ផ្នែកទី៨
រស់នៅជានិរន្តរ៍លើផែនដីមនោរម្យ
១, ២. តើជីវិតរស់នៅគឺជាយ៉ាងណា នៅក្រោមការគ្រប់គ្រងនៃព្រះរាជាណាចក្ររបស់ព្រះ?
១ តើជីវិតរស់នៅនឹងទៅជាយ៉ាងណា នៅពេលដែលព្រះកំចាត់អំពើអាក្រក់ជួជាតិនិងការឈឺចាប់ចេញពីផែនដី ហើយនាំមកនូវពិភពលោកថ្មីនៃទ្រង់ក្រោមការគ្រប់គ្រងនៃព្រះរាជាណាចក្រស្ថានសួគ៌របស់ទ្រង់ ដែលប្រកបទៅដោយសេចក្ដីស្រឡាញ់នោះ? ព្រះមានបន្ទូលសន្យាថាទ្រង់នឹង ‹លាព្រះហស្តបំពេញចិត្តប្រាថ្នានៃជីវិតទាំងឡាយ›។—ទំនុកដំកើង ១៤៥:១៦
២ តើអ្វីជាចិត្តប្រាថ្នាដ៏ត្រឹមត្រូវរបស់អ្នក? តើចិត្តអ្នកមិនចង់បានទេឬនូវជីវិតដ៏សប្បាយរីករាយ កិច្ចការដ៏មានប្រយោជន៍ របស់របរដ៏សម្បូរហូរហៀរ ទីនៅជុំវិញដ៏ល្អស្អាត សន្ដិភាពក្នុងចំណោមមនុស្សទាំងអស់ និងសេចក្ដីរួចផុតពីអយុត្ដិធម៌ ជម្ងឺឈឺថ្កាត់ ការឈឺចាប់ និងសេចក្ដីស្លាប់? ចុះចំពោះទស្សនវិស័យខាងវិញ្ញាណដ៏អរសប្បាយ តើចិត្តអ្នកប្រាថ្នាចង់បានទេ? របស់ទាំងអស់នេះនឹងមានមកក្នុងពេលឆាប់ៗខាងមុខនេះ ក្រោមការគ្រប់គ្រងនៃព្រះរាជាណាចក្ររបស់ព្រះ។ សូមកត់សម្គាល់នូវប្រសិទ្ធិពរដ៏ល្អ ដែលព្រះគម្ពីរបានចែងប្រាប់ថានឹងកើតឡើងក្នុងពិភពលោកថ្មីនោះ។
មនុស្សលោកបានសន្ដិភាពសុក្រឹតពេញទី
៣-៦. តើអ្វីជួយឲ្យយើងបានប្រាកដក្នុងចិត្តថា មនុស្សនឹងមានសន្ដិភាពនៅក្នុងពិភពលោកថ្មី?
៣ «[ព្រះ] ទ្រង់បណ្ដាលឲ្យការសង្គ្រាមស្ងប់រំងាប់រហូតដល់ចុងផែនដី ទ្រង់បំបាក់ធ្នូ ហើយកាច់លំពែង ក៏ដុតអស់ទាំងរទេះចំបាំងនៅក្នុងភ្លើង»។—ទំនុកដំកើង ៤៦:៩
៤ «គេនឹងយកដាវរបស់ខ្លួនដំធ្វើជាផាលនង្គ័ល ហើយលំពែងគេធ្វើជាដង្កាវវិញ។ នគរ១នឹងមិនលើកដាវទាស់នឹងនគរ១ទៀតឡើយ ក៏មិនហាត់រៀនធ្វើសឹកសង្គ្រាមទៀតដែរ»។—អេសាយ ២:៤
៥ «ឯមនុស្សរាបសា គេនឹងបានផែនដីជាមរដក ហើយនឹងបានចិត្តរីករាយដោយសេចក្ដីក្សេមក្សាន្តដ៏បរិបូរ»។—ទំនុកដំកើង ៣៧:១១
៦ «ផែនដីទាំងមូលបានស្រាកស្រាន្តអស់ហើយ ក៏ស្ងៀមស្ងប់ដែរ។ គេទំលាយសំឡេងច្រៀងចេញមក»។—អេសាយ ១៤:៧
មនុស្សនិងសត្វរួមរស់សុខសាន្តជាមួយគ្នា
៧, ៨. តើមនុស្សនិងសត្វនឹងបានសុខសាន្តជាមួយគ្នាយ៉ាងដូចម្ដេច?
៧ «នៅគ្រានោះ ឆ្កែព្រៃនឹងនៅជាមួយនឹងកូនចៀម។ ឯខ្លារខិន នឹងដេកនៅជាមួយនឹងកូនពពែ។ ឯកូនគោនឹងសិង្ហស្ទាវ ព្រមទាំងសត្វបំប៉នយ៉ាងធាត់នឹងនៅជាមួយគ្នា ហើយក្មេងតូចៗជាអ្នកគង្វាលវា។ គោញីនឹងខ្លាឃ្មុំនឹងរកស៊ីជាមួយគ្នា ហើយកូនវានឹងដេកនៅជាមួយដែរ។ ឯសិង្ហនឹងស៊ីចំបើងដូចជាគោវិញ។ កូនមនុស្សដែលនៅបៅដោះនឹងលេងនៅត្រង់មាត់រន្ធពស់ហនុមាន ហើយក្មេងលែងដោះនឹងលូកដៃចូលទៅក្នុងរូងពស់វែកបាន។ វារាល់គ្នានឹងមិនធ្វើទុក្ខ ឬបំផ្លាញគ្នា»។—អេសាយ ១១:៦-៩
៨ «នៅថ្ងៃនោះ អញក៏នឹងតាំងសញ្ញាឲ្យគេ ជាមួយនឹងសត្វនៅផែនដី នឹងសត្វហើរលើអាកាស ហើយសត្វលូនវារនៅដីផង . . . ឲ្យគេបានដេកទៅដោយសុខសាន្ត»។—ហូសេ ២:១៨
សុខភាពល្អឥតខ្ចោះ ជីវិតអស់កល្បជានិច្ច
៩-១៤. សូមរៀបរាប់អំពីលក្ខណៈនៃសុខភាពក្នុងពិភពលោកថ្មី?
៩ «គ្រានោះ ភ្នែករបស់មនុស្សខ្វាក់ នឹងបានភ្លឺឡើង ហើយត្រចៀករបស់មនុស្សថ្លង់នឹងឮបាន។ គ្រានោះ ពួកមនុស្សខ្វិននឹងលោតដូចជាប្រើស ហើយអណ្ដាតរបស់មនុស្សគក៏នឹងច្រៀងឡើង។ ដ្បិតនៅទីរហោស្ថាននឹងមានក្បាលទឹកផុសចេញ ហើយនឹងមានផ្លូវទឹកហូរនៅសមុទ្រខ្សាច់ដែរ»។—អេសាយ ៣៥:៥, ៦
១០ «ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ។ ដ្បិតសេចក្ដីមុនទាំងប៉ុន្មាន បានកន្លងបាត់ទៅហើយ»។—វិវរណៈ ២១:៤
១១ «ឯពួកអ្នកដែលនៅក្នុងក្រុងគេនឹងមិនថា៖ ‹ខ្ញុំឈឺទៀតឡើយ› »។—អេសាយ ៣៣:២៤
១២ «យ៉ាងនោះសាច់គេនឹងបានស្រស់ជាងសាច់របស់កូនក្មេង ក៏នឹងប្រែទៅដូចកាលនៅក្មេងវិញ»។—យ៉ូប ៣៣:២៥
១៣ «អំណោយទាននៃព្រះវិញ គឺជាជីវិតដ៏នៅអស់កល្បជានិច្ច ដោយព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា»។—រ៉ូម ៦:២៣
១៤ «អ្នកណាដែលជឿដល់ព្រះរាជបុត្រានោះ[នឹង] . . . មានជីវិតអស់កល្បជានិច្ចវិញ»។—យ៉ូហាន ៣:១៦
ពួកមនុស្សស្លាប់មានជីវិតរស់ឡើងវិញ
១៥-១៧. តើមានសេចក្ដីសង្ឃឹមអ្វីសំរាប់ពួកអ្នកដែលស្លាប់ទៅហើយ?
១៥ «ទាំងមនុស្សសុចរិត នឹងមនុស្សទុច្ចរិត នឹងបានរស់ឡើងវិញទាំងអស់គ្នា»។—កិច្ចការ ២៤:១៥
១៦ «មានពេលវេលាមក ដែលអស់ទាំងខ្មោចនៅក្នុងផ្នូរ [សេចក្ដីចងចាំរបស់ព្រះ] នឹងឮសំឡេងទ្រង់ ហើយនឹងចេញមក»។—យ៉ូហាន ៥:២៨, ២៩
១៧ «ឯសមុទ្រ នោះបានប្រគល់ពួកមនុស្សស្លាប់ ដែលនៅក្នុងទឹកមកវិញ ហើយសេចក្ដីស្លាប់ នឹងស្ថានឃុំព្រលឹងមនុស្សស្លាប់ [ផ្នូរ] ក៏ប្រគល់ពួកមនុស្សស្លាប់ ដែលនៅឯណោះមកវិញដែរ»។—វិវរណៈ ២០:១៣
ផែនដី ជាសួនមនោរម្យដ៏មានផលសម្បូរហូរហៀរ
១៨-២២. តើផែនដីទាំងមូលនឹងត្រូវរៀបចំប្រែប្រួលទៅជាយ៉ាងណា?
១៨ «នឹងមានព្រះពរធ្លាក់មកមួយមេៗ ដើមឈើនៅផែនដីនឹងបង្កើតផ្លែ ហើយដីនឹងបានផលចំរើន វារាល់គ្នានឹងនៅក្នុងស្រុកខ្លួនដោយសុខសាន្ត»។—អេសេគាល ៣៤:២៦, ២៧
១៩ «នោះដីនឹងបង្កើតផលឡើង ហើយព្រះដ៏ជាព្រះនៃយើងខ្ញុំ ទ្រង់នឹងប្រទានពរមកយើងខ្ញុំ»។—ទំនុកដំកើង ៦៧:៦
២០ «ទីរហោស្ថាន ហើយទីហួតហែង នឹងមានសេចក្ដីអំណរ ឯសមុទ្រខ្សាច់នឹងរីករាយ ហើយផ្កាឡើងដូចជាកុឡាប»។—អេសាយ ៣៥:១
២១ «ឯអស់ទាំងភ្នំធំនឹងភ្នំតូចទាំងប៉ុន្មាននឹងធ្លាយចេញជាចំរៀងនៅមុខឯង ហើយគ្រប់ទាំងដើមឈើនៅព្រៃនឹងទះដៃផង នោះនឹងមានដើមកកោះដុះឡើង ជំនួសគុម្ពបន្លា ហើយដើមយីថោនឹងដុះឡើង ជំនួសអញ្ចាញ»។—អេសាយ ៥៥:១២, ១៣
២២ «អ្នកនឹងនៅក្នុងស្ថានបរមសុខ[សួនមនោរម្យ] ជាមួយនឹងខ្ញុំដែរ»។—លូកា ២៣:៤៣
ផ្ទះសម្បែងដ៏ល្អសំរាប់មនុស្សគ្រប់គ្នា
២៣, ២៤. តើអ្វីជួយឲ្យយើងបានប្រាកដក្នុងចិត្តថា នឹងមានផ្ទះសម្បែងល្អបរិបូរសំរាប់មនុស្សគ្រប់គ្នា?
២៣ «មនុស្សនឹងសង់ផ្ទះ ហើយនឹងអាស្រ័យនៅផង . . . គេនឹងមិនសង់ រួចមានម្នាក់ទៀតអាស្រ័យនៅ ឬដាំ រួចមានម្នាក់ទៀតបរិភោគផលនោះឡើយ . . . ពួករើសតាំងរបស់អញនឹងប្រើប្រាស់ការដែលដៃគេធ្វើជាយឺនយូរទៅ គេនឹងមិនខំធ្វើជាឥតប្រយោជន៍ ឬបង្កើតមកឲ្យតែបានត្រូវវិនាសទៅនោះឡើយ»។—អេសាយ ៦៥:២១-២៣
២៤ «គ្រប់គ្នានឹងអង្គុយក្រោមដើមទំពាំងបាយជូរ ហើយក្រោមដើមល្វារបស់ខ្លួន ឥតមានអ្នកណាបំភ័យគេឡើយ»។—មីកា ៤:៤
អ្នកអាចរស់នៅជានិរន្តរ៍ក្នុងសួនមនោរម្យ
២៥. តើយើងមានទស្សនៈវិស័យដ៏ល្អយ៉ាងណាសំរាប់អនាគត?
២៥ នេះជាទស្សនៈវិស័យដ៏ល្អម្ល៉េះសំរាប់អនាគត! ជីវិតក្នុងពេលឥឡូវនេះអាចមានន័យល្អប្រសើរណាស់ណាទៅហ្ន៎ បើយើងកាន់ជាប់នឹងសេចក្ដីសង្ឃឹមដ៏រឹងមាំ ថាក្នុងពិភពលោកថ្មីនៃព្រះ បញ្ហាសព្វថ្ងៃទាំងប៉ុន្មាននឹងកន្លងផុតទៅនោះ! «របស់ពីមុនៗ នោះនឹងគ្មានអ្នកណានឹកចាំទៀត ក៏មិនដែលចូលក្នុងគំនិតឡើយ»។ (អេសាយ ៦៥:១៧) ហើយនេះជាការគួរឲ្យស្រាកស្រួលចិត្តមែន ដោយដឹងថា ជីវិតរស់នៅក្នុងពេលនោះ នឹងស្ថិតស្ថេរនៅអស់កល្បជានិច្ច៖ «[ព្រះ] ទ្រង់នឹងបំផ្លាញសេចក្ដីស្លាប់ឲ្យសូន្យបាត់ទៅជាដរាប»។—អេសាយ ២៥:៨
២៦. តើតាមរយៈអ្វីដែលយើងអាចបានជីវិតអស់កល្បក្នុងពិភពលោកថ្មីនៃព្រះ?
២៦ តើអ្នកចង់រស់នៅជានិរន្តរ៍ ក្នុងសួនមនោរម្យក្នុងពិភពលោកថ្មីដែលជិតមកដល់ហើយនោះទេ? អ្នកប្រហែលជាសួរថា៖ ‹តើខ្ញុំត្រូវធ្វើដូចម្ដេចឲ្យព្រះសង្គ្រោះខ្ញុំនៅពេលចុងបញ្ចប់នៃលោកីយ៍នេះ ហើយឲ្យរស់ផុតតទៅទៀត ក្នុងពិភពលោកថ្មីនៃទ្រង់នោះ›? អ្នកត្រូវតែធ្វើតាមបន្ទូលនៃព្រះយេស៊ូ ដូចពេលដែលទ្រង់អធិស្ឋានដល់ព្រះថា៖ «នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ នឹងព្រះយេស៊ូវគ្រីស្ទដែលទ្រង់បានចាត់ឲ្យមកផង»។—យ៉ូហាន ១៧:៣
២៧. តើអ្នកត្រូវតែធ្វើអ្វីដើម្បីឲ្យមានចំណែកក្នុងគោលបំណងរបស់ព្រះដែរ?
២៧ ដូច្នេះ សូមយកព្រះគម្ពីរមួយក្បាល ហើយបញ្ជាក់មើលអ្វីៗដែលអ្នកបានអានក្នុងសៀវភៅស្តើងនេះ។ សូមសួររកពួកអ្នកឯទៀត ដែលរៀននិងបង្រៀនសេចក្ដីពិតទាំងនេះពីព្រះគម្ពីរ។ សូមដកខ្លួនចេញពីសាសនាដែលមានពុត ដែលបង្រៀននិងប្រព្រឹត្តការដែលខុសផ្ទុយពីព្រះគម្ពីរ។ សូមរៀនអំពីរបៀប ដែលអ្នក ព្រមទាំងពួករាប់លាននាក់ឯទៀត ដែលកំពុងតែធ្វើតាមព្រះហឫទ័យនៃព្រះហើយនោះ អាចរស់នៅជានិរន្តរ៍បានក្នុងសួនមនោរម្យលើផែនដី ដូចព្រះមានបំណងសំរាប់មនុស្ស។ ហើយសូមឲ្យចាំក្នុងចិត្តនូវបន្ទូលដែលបណ្ដាលមកពីព្រះ ដែលថ្លែងប្រាប់អំពីអនាគតឆាប់ៗខាងមុខថា៖ «ឯលោកីយនេះ នឹងសេចក្ដីប៉ងប្រាថ្នារបស់វា នោះកំពុងកន្លងទៅ តែអ្នកណាដែលធ្វើតាមព្រះហឫទ័យព្រះ នោះនឹងនៅជាប់អស់កល្បជានិច្ចវិញ»។—យ៉ូហានទី១ ២:១៧
[រូបភាពនៅទំព័រ៣១]
គោលបំណងនៃព្រះ ដើម្បីតាំងសួនមនោរម្យលើផែនដីវិញ នឹងបានសម្រេចក្នុងពេលឆាប់ៗនេះ