ផ្នែកទី៥
ជីវិតមានគោលបំណងដ៏រុងរឿង
១, ២. តើតាមរបៀបណាដែលយើងអាចដឹងថាព្រះមានព្រះទ័យខ្វល់ខ្វាយចំពោះយើង ហើយតើយើងអាចរកចម្លើយពីណាសំរាប់សំនួរអំពីជីវិត?
១ របៀបដែលផែនដីនិងជីវិតទាំងឡាយបានបង្កើតមក បង្ហាញឲ្យឃើញថា ព្រះដែលជាអ្នកបង្កើតគឺជាព្រះមួយអង្គដ៏ប្រកបទៅដោយសេចក្ដីស្រឡាញ់ ទាំងមានព្រះទ័យខ្វល់ខ្វាយណាស់។ ហើយបន្ទូលរបស់ទ្រង់ គឺព្រះគម្ពីរ បង្ហាញថាទ្រង់មានព្រះទ័យខ្វល់ខ្វាយ ហើយប្រាប់យើងនូវចម្លើយដ៏ល្អបំផុតចំពោះសំនួរដែលថា៖ ហេតុអ្វីក៏មនុស្សយើងនៅលើផែនដីនេះ? ហើយទីណាជាគោលដៅរបស់យើង?
២ យើងត្រូវតែពិនិត្យព្រះគម្ពីរដើម្បីរកចម្លើយទាំងនោះ។ បន្ទូលរបស់ព្រះប្រាប់ថា៖ «បើអ្នករាល់គ្នាស្វែងរកទ្រង់ នោះនឹងរកឃើញពិត តែបើអ្នករាល់គ្នាបោះបង់ចោលទ្រង់វិញ ទ្រង់ក៏នឹងបោះបង់ចោលអ្នករាល់គ្នាដែរ»។ (របាក្សត្រទី២ ១៥:២) ដូច្នេះ តើការពិនិត្យស្រាវជ្រាវព្រះគម្ពីរនឹងបង្ហាញឲ្យឃើញអ្វីអំពីគោលបំណងរបស់ព្រះសំរាប់យើងនោះ?
មូលហេតុដែលព្រះបានបង្កើតមនុស្សមក
៣. ហេតុអ្វីបានជាព្រះបង្កើតផែនដី?
៣ ព្រះគម្ពីរបង្ហាញថា តាមព្រះហឫទ័យទ្រង់ ព្រះបានបង្កើតផែនដីសំរាប់មនុស្ស។ អេសាយ ៤៥:១៨ ប្រាប់អំពីផែនដី ថាព្រះ «មិនមែនបង្កើតមកឲ្យនៅទទេទេ [តែ]បានជបសូនបង្កើតឲ្យជាទីអាស្រ័យនៅ»។ ហើយទ្រង់បានប្រទានឲ្យផែនដីមានអ្វីៗទាំងអស់ដែលមនុស្សត្រូវការ មិនមែនគ្រាន់តែឲ្យមានជីវិតរស់នៅប៉ុណ្ណោះទេ គឺដើម្បីឲ្យបានសប្បាយនឹងជីវិតដល់ពេញកំរិតផង។—លោកុប្បត្តិ ជំពូក ១ និង ២
៤. ហេតុអ្វីបានជាព្រះបង្កើតមនុស្សដំបូង?
៤ ក្នុងបន្ទូលរបស់ទ្រង់ ព្រះសម្ដែងប្រាប់អំពីការបង្កើតមនុស្សដំបូង គឺអ័ដាមនិងនាងអេវ៉ា ហើយបង្ហាញថាទ្រង់មានព្រះហឫទ័យយ៉ាងណាសំរាប់គ្រួសារមនុស្ស។ ទ្រង់មានបន្ទូលថា៖ «ចូរយើងធ្វើមនុស្សឲ្យដូចជារូបយើងឲ្យមានភាពដូចយើង ហើយឲ្យមានអំណាចលើត្រីសមុទ្រ សត្វហើរលើអាកាស នឹងសត្វជើង៤ដែលនៅលើផែនដីទាំងមូល ព្រមទាំងសត្វលូនវារដែលវារនៅផែនដីផង»។ (លោកុប្បត្តិ ១:២៦) មនុស្សគឺនឹងមានអំណាចត្រួតត្រាលើ «ផែនដីទាំងមូល» និងពពួកសត្វទាំងឡាយដែលបានបង្កើតមក។
៥. តើមនុស្សដំបូងបានត្រូវដាក់ឲ្យនៅកន្លែងណា?
៥ ព្រះបានធ្វើសួនច្បារមួយល្អស្អាតនៅកន្លែងមួយហៅថា អេដែន ស្ថិតនៅក្នុងមជ្ឈិមបូព៌ា។ រួចមកទ្រង់ក៏ «យកអ័ដាមទៅដាក់នៅក្នុងសួនច្បារអេដែន ឲ្យគាត់ធ្វើការហើយថែរក្សា»។ នេះគឺជាសួនមនោរម្យដែលមានអ្វីៗទាំងអស់សំរាប់ឲ្យមនុស្សដំបូងបរិភោគ។ ហើយក៏មាន «អស់ទាំងដើមឈើដែលគួរពិចពិលរមឹលមើល ហើយសំរាប់ជាអាហារ» ព្រមទាំងរុក្ខជាតិឯទៀតនិងសត្វជាច្រើនយ៉ាងដ៏គួរឲ្យចាប់អារម្មណ៍ផងដែរ។—លោកុប្បត្តិ ២:៧-៩, ១៥
៦. តើមនុស្សបានត្រូវបង្កើតមកទាំងមានគុណសម្បត្ដិអ្វីខាងចិត្តនិងខាងរូបរាង?
៦ រូបកាយនៃមនុស្សដំបូងបានត្រូវបង្កើតមកយ៉ាងគ្រប់ល័ក្ខណ៍ ដូច្នេះពួកគេមិនត្រូវឈឺចាស់ជរាឬស្លាប់ទេ។ ពួកគេបានទទួលគុណសម្បត្ដិផ្សេងៗ ដូចជាគុណសម្បត្ដិនៃការជ្រើសរើសតាមចិត្ត។ របៀបដែលពួកគេបានត្រូវបង្កើតមកគឺពន្យល់ក្នុងលោកុប្បត្តិ ១:២៧ ថា៖ «ទ្រង់ក៏បង្កើតមនុស្សឲ្យដូចរូបអង្គទ្រង់ គឺបានបង្កើតគេឲ្យចំនឹងរូបអង្គទ្រង់នោះឯង ក៏បង្កើតគេឡើងជាប្រុសជាស្រី»។ ពីព្រោះយើងបានត្រូវបង្កើតមកដូចរូបអង្គព្រះ នោះយើងមិនគ្រាន់តែបានទទួលលក្ខណៈពិសេសខាងរូបរាងនិងខាងចិត្តប៉ុណ្ណោះទេ គឺខាងសីលធម៌និងខាងវិញ្ញាណផងដែរ ហើយទាំងអស់នេះត្រូវតែបំពេញឲ្យបានបរិបូណ៌ ទើបយើងបានសប្បាយចិត្តពិតមែន។ ព្រះប្រទានរបស់សំរាប់បំពេញការត្រូវការទាំងនោះ ព្រមទាំងការត្រូវការចំណីអាហារ ទឹក និងខ្យល់ផង។ ដូចព្រះយេស៊ូមានបន្ទូលប្រាប់ថា «មនុស្សមិនមែនរស់ ដោយសារតែនំប៉័ងប៉ុណ្ណោះទេ គឺរស់ដោយសារគ្រប់ទាំងព្រះបន្ទូល ដែលចេញពីព្រះឱស្ឋព្រះ [យេហូវ៉ា] មកដែរ»។—ម៉ាថាយ ៤:៤
៧. អ្វីជាសេចក្ដីបង្គាប់ដែលមនុស្សមួយគូដំបូងបានទទួល?
៧ ម្យ៉ាងទៀត ព្រះបានប្រទានសេចក្ដីបង្គាប់ដ៏ល្អមួយដល់មនុស្សមួយគូដំបូងនៅសួនអេដែនថា៖ «ចូរបង្កើតកូនឲ្យចំរើនជាច្រើនឡើង ឲ្យមានពេញពាសលើផែនដីចុះ»។ (លោកុប្បត្តិ ១:២៨) ដូច្នេះ ពួកគេអាចបន្តពូជបង្កើតកូនដ៏គ្រប់ល័ក្ខណ៍។ ហើយពេលដែលមនុស្សកើនចំនួនច្រើនឡើង នោះពួកគេនឹងមានការងារដែលគេចូលចិត្តធ្វើ គឺការពង្រីកព្រំដែននៃសួនអេដែន ដែលជាទីមនោរម្យដ៏ល្អស្អាតពីដំបូង។ ដល់ទីបំផុត ផែនដីទាំងមូលនឹងកើតឡើងជាសួនមនោរម្យមួយ ដែលមានមនុស្សគ្រប់ល័ក្ខណ៍សប្បាយចិត្តរស់នៅជានិរន្តរ៍។ ព្រះគម្ពីរប្រាប់យើងថា ក្រោយពីបានបង្កើតការទាំងនេះរួចហើយ «ព្រះទ្រង់ទតគ្រប់ទាំងរបស់ដែលទ្រង់បានធ្វើនោះ ក៏ឃើញថា ទាំងអស់ជាការល្អប្រពៃ»។—លោកុប្បត្តិ ១:៣១; សូមមើល ទំនុកដំកើង ១១៨:១៧ ផង
៨. តើមនុស្សនឹងត្រូវថែរក្សាផែនដីយ៉ាងដូចម្ដេច?
៨ នេះគឺឃើញច្បាស់ថា មនុស្សនឹងត្រូវប្រើផែនដីដែលគេបង្ក្រាប ដើម្បីផ្ដល់ផលប្រយោជន៍ដល់ខ្លួនគេ។ ប៉ុន្តែនេះត្រូវតែប្រព្រឹត្តឡើងក្នុងរបៀបដែលចេះដឹងខុសត្រូវ។ មនុស្សគឺជាអ្នកកាន់កាប់ថែរក្សាផែនដី មិនមែនជាអ្នកបំផ្លិចបំផ្លាញផែនដីនោះទេ។ ការបំផ្លាញផែនដីដែលយើងឃើញសព្វថ្ងៃនេះ គឺខុសស្រឡះពីព្រះហឫទ័យនៃព្រះ ហើយពួកអ្នកចូលរួមបំផ្លាញផែនដី គឺប្រព្រឹត្តផ្ទុយស្រឡះពីគោលបំណងនៃជីវិតលើផែនដីដែរ។ ពួកគេនឹងទទួលទណ្ឌកម្ម ដ្បិតព្រះគម្ពីរប្រាប់ថា ព្រះនឹង «បំផ្លាញពួកអ្នកដែលបង្ខូចផែនដី»។—វិវរណៈ ១១:១៨
នៅតែជាគោលបំណងរបស់ព្រះ
៩. ហេតុអ្វីក៏យើងអាចទុកចិត្តថា គោលបំណងនៃព្រះនឹងត្រូវសម្រេច?
៩ ដូច្នេះ តាំងពីដើមរៀងមក គោលបំណងនៃព្រះគឺឲ្យគ្រួសារមនុស្សគ្រប់ល័ក្ខណ៍រស់នៅជានិរន្តរ៍លើផែនដីក្នុងសួនមនោរម្យ។ នេះគឺនៅតែជាគោលបំណងរបស់ទ្រង់ដដែល! គោលបំណងនោះនឹងត្រូវសម្រេចជាមិនខាន។ ព្រះគម្ពីរថ្លែងថា៖ «ព្រះយេហូវ៉ានៃពួកពលបរិវារ ទ្រង់បានស្បថថា៖ ពិតប្រាកដជានឹងកើតមានដូចជាអញបានគិតហើយ ក៏នឹងសំរេចដូចជាអញបានកំណត់ទុកផង»។ «អើ អញបានចេញវាចាហើយ អញនឹងធ្វើឲ្យការនោះកើតឡើងផង អញបានគិតសម្រេចស្រេចហើយ អញនឹងធ្វើការនោះឯង»។—អេសាយ ១៤:២៤; ៤៦:១១
១០, ១១. តើព្រះយេស៊ូ ពេត្រុស និងស្តេចដាវីឌអ្នកតែងទំនុកដំកើងប្រាប់យ៉ាងដូចម្ដេចអំពីសួនមនោរម្យ?
១០ ព្រះយេស៊ូគ្រីស្ទមានបន្ទូលអំពីគោលបំណងព្រះ ដែលចង់ស្ថាបនាសួនមនោរម្យឡើងវិញនៅលើផែនដី ពេលទ្រង់មានបន្ទូលប្រាប់បុរសម្នាក់ដែលចង់បានសេចក្ដីសង្ឃឹមក្នុងអនាគតថា៖ «អ្នកនឹងនៅក្នុងស្ថានបរមសុខ [សួនមនោរម្យ] ជាមួយខ្ញុំដែរ»។ (លូកា ២៣:៤៣) សាវ័កពេត្រុសក៏បាននិយាយអំពីពិភពលោកថ្មីដែលនឹងត្រូវមកដល់ ដោយទាយប្រាប់ថា៖ «តាមសេចក្ដីសន្យារបស់[ព្រះ] នោះយើងរាល់គ្នាទន្ទឹងចាំផ្ទៃមេឃថ្មី [ការរៀបចំរដ្ឋាភិបាលថ្មីគ្រប់គ្រងពីស្ថានសួគ៌] នឹងផែនដីថ្មី [សង្គមថ្មីលើផែនដី] ដែលមានសុទ្ធតែសេចក្ដីសុចរិតវិញ»។—ពេត្រុសទី២ ៣:១៣
១១ ស្តេចដាវីឌដែលជាអ្នកតែងទំនុកដំកើងក៏បានសរសេរប្រាប់ដែរ អំពីពិភពលោកថ្មីដែលនឹងត្រូវមកដល់ ហើយត្រូវនៅជាប់យូរប៉ុន្មាន។ ទ្រង់បានទាយប្រាប់ថា៖ «ពួកអ្នកសុចរិតនឹងបាន [ផែនដី] ទុកជាមរដក ហើយនឹងនៅ [លើផែនដី] នោះជានិច្ច»។ (ទំនុកដំកើង ៣៧:២៩) ហេតុនេះហើយបានជាព្រះយេស៊ូបានសន្យាថា៖ «មានពរហើយ អស់អ្នកដែលស្លូតត្រង់ ដ្បិតអ្នកទាំងនោះនឹងគ្រងផែនដីជាមរដក»។—ម៉ាថាយ ៥:៥
១២, ១៣. សូមសង្ខេបប្រាប់អំពីគោលបំណងដ៏ល្អរុងរឿងរបស់ព្រះសំរាប់មនុស្សលោក។
១២ ការរស់នៅជានិរន្តរ៍ក្នុងសួនមនោរម្យលើផែនដីដ៏គ្មានអំពើអាក្រក់ បទឧក្រិដ្ឋ រោគជម្ងឺ ទុក្ខព្រួយ និងការឈឺចាប់អ្វីទាំងអស់ នេះជាសេចក្ដីសង្ឃឹមដ៏ល្អរុងរឿងណាស់ហ្ន៎! ក្នុងសៀវភៅចុងក្រោយនៃព្រះគម្ពីរ ទំនាយរបស់ព្រះសង្ខេបប្រាប់គោលបំណងដ៏ល្អរុងរឿងនេះថា៖ «ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ ដ្បិតសេចក្ដីមុនទាំងប៉ុន្មាន បានកន្លងបាត់ទៅហើយ»។ ទំនាយក៏ប្រាប់ទៀតថា៖ «ឯព្រះអង្គ ដែលគង់លើបល្ល័ង្ក ទ្រង់មានបន្ទូលថា៖ ‹មើល អញធ្វើទាំងអស់ឡើងជាថ្មី› រួចទ្រង់មានបន្ទូលមកខ្ញុំថា៖ ‹ចូរសរសេរទុកចុះ ដ្បិតពាក្យទាំងនេះពិតប្រាកដ ហើយគួរជឿ› »។—វិវរណៈ ២១:៤, ៥
១៣ ពិតហើយ ព្រះមានគោលបំណងមួយដ៏រុងរឿងក្នុងព្រះហឫទ័យទ្រង់ គឺពិភពលោកថ្មីនៃសេចក្ដីសុចរិត ជាសួនមនោរម្យដ៏នៅអស់កល្បជានិច្ច ដែលបានទាយប្រាប់ដោយព្រះមួយអង្គ ដែលនឹងអាចសម្រេចតាមសេចក្ដីសន្យារបស់ទ្រង់បាន ដ្បិតបន្ទូលរបស់ទ្រង់គឺ «ពិតប្រាកដ ហើយគួរជឿ»។
[រូបភាពនៅទំព័រ២០, ២១]
ព្រះមានគោលបំណងឲ្យមនុស្សរស់នៅជានិរន្តរ៍ក្នុងសួនមនោរម្យលើផែនដី។ នេះនៅតែជាគោលបំណងរបស់ទ្រង់ដដែល
[រូបភាពនៅទំព័រ២២]
ម្ចាស់ផ្ទះអាចចាប់ពួកអ្នកជួលដែលបំផ្លាញផ្ទះរបស់លោកឲ្យទទួលខុសត្រូវ