មេរៀនទី៥
តើអ្វីជាគោលបំណងនៃព្រះសំរាប់ផែនដី?
ហេតុអ្វីក៏ព្រះយេហូវ៉ាបានបង្កើតផែនដី? (១, ២)
ហេតុអ្វីក៏ផែនដីឥឡូវនេះមិនមែនជាសួនមនោរម្យ? (៣)
តើអ្វីនឹងកើតឡើងដល់មនុស្សអាក្រក់? (៤)
នៅអនាគត តើព្រះយេស៊ូនឹងធ្វើអ្វីសំរាប់មនុស្សឈឺ? មនុស្សចាស់ជរា? មនុស្សស្លាប់? (៥, ៦)
ដើម្បីឲ្យបានចំណែកនៃពរអនាគតនេះ តើអ្នកត្រូវតែធ្វើយ៉ាងណា? (៧)
១. ព្រះយេហូវ៉ាបានបង្កើតផែនដីនេះមក ដើម្បីឲ្យមនុស្សរស់នៅដោយសប្បាយជារៀងរហូត។ ទ្រង់ចង់ឲ្យផែនដីរមែងពោរពេញទៅដោយមនុស្សសុចរិតដ៏សប្បាយចិត្តរស់នៅជានិច្ច។ (ទំនុកដំកើង ១១៥:១៦; អេសាយ ៤៥:១៨) ផែនដីគឺមិនត្រូវនឹងបំផ្លាញចោលទៅឡើយ គឺនឹងនៅគង់វង់ជាប់ជារៀងរហូត។—ទំនុកដំកើង ១០៤:៥; សាស្ដា ១:៤
២. មុនពេលព្រះបានបង្កើតមនុស្ស ទ្រង់បានជ្រើសរើសយកមួយចំណែកតូចនៃផែនដី ហើយបានធ្វើជាសួនមនោរម្យមួយដ៏ស្រល់ស្អាត។ ទ្រង់ហៅវាថាសួនច្បារអេដែន។ គឺនៅទីនេះហើយដែលទ្រង់បានដាក់បុរសនិងស្ត្រីដំបូង គឺអ័ដាមនិងអេវ៉ាឲ្យរស់នៅ។ ព្រះមានបន្ទូលឲ្យពួកគេបង្កើតកូនបំពេញផែនដីទាំងមូល។ បន្ដិចម្ដងៗ ពួកគេនឹងធ្វើផែនដីទាំងមូលឲ្យទៅជាសួនមនោរម្យ។—លោកុប្បត្តិ ១:២៨; ២:៨, ១៥
៣. អ័ដាមនិងអេវ៉ាបានប្រព្រឹត្តអំពើបាបដោយល្មើសច្បាប់នៃព្រះដោយចេតនា។ ដូច្នេះព្រះយេហូវ៉ាបណ្ដេញពួកគេចេញពីសួនច្បារអេដែន។ សួនមនោរម្យក៏ត្រូវបាត់បង់ទៅ។ (លោកុប្បត្តិ ៣:១-៦, ២៣) ប៉ុន្តែ ព្រះយេហូវ៉ាមិនបានភ្លេចឡើយនូវគោលបំណងនៃទ្រង់សំរាប់ផែនដីនេះ។ ព្រះអង្គសន្យាថា នឹងធ្វើផែនដីឲ្យក្លាយទៅជាសួនមនោរម្យជាមិនខាន ដែលមនុស្សនឹងរស់នៅជារៀងរហូត។ តើព្រះអង្គនឹងធ្វើការនេះដូចម្ដេច?—ទំនុកដំកើង ៣៧:២៩
៤. មុននឹងផែនដីនេះអាចក្លាយជាសួនមនោរម្យបាន មនុស្សអាក្រក់ត្រូវតែដកចេញសិន។ (ទំនុកដំកើង ៣៧:៣៨) ការនេះនឹងកើតឡើងនៅអើម៉ាគេដូន ដែលជាសង្គ្រាមរបស់ព្រះដើម្បីបញ្ចប់អំពើអាក្រក់ជួជាតិ។ បន្ទាប់មក សាតាំងនឹងត្រូវឃុំទុកចោលអស់រយៈ១.០០០ឆ្នាំ។ នេះបានសេចក្ដីថាឥតមានសល់មនុស្សអាក្រក់មកបំផ្លិចបំផ្លាញផែនដីទៀតឡើយ។ គឺមានតែរាស្ត្រនៃព្រះប៉ុណ្ណោះទេដែលរស់រានមានជីវិត។—វិវរណៈ ១៦:១៤, ១៦; ២០:១-៣
៥. រួចមកព្រះយេស៊ូគ្រីស្ទនឹងគ្រប់គ្រងជាព្រះមហាក្សត្រទៅលើផែនដីនេះក្នុងរយៈ១.០០០ឆ្នាំ។ (វិវរណៈ ២០:៦) ទ្រង់នឹងដកយកបាបបន្ដិចម្ដងៗចោលចេញពីចិត្តគំនិតនិងរូបកាយយើង។ យើងនឹងក្លាយទៅជាមនុស្សគ្រប់ល័ក្ខណ៍ដូចអ័ដាមនិងអេវ៉ាអញ្ចឹង មុនពេលដែលពួកគេបានប្រព្រឹត្តអំពើបាប។ រួចមកនឹងលែងមានជម្ងឺឈឺថ្កាត់ ជរាភាព និងសេចក្ដីស្លាប់ទៀតហើយ។ មនុស្សឈឺនឹងបានជាសះស្បើយ ហើយមនុស្សចាស់ជរានឹងក្លាយទៅជាក្មេងវិញ។—យ៉ូប ៣៣:២៥; អេសាយ ៣៣:២៤; វិវរណៈ ២១:៣, ៤
៦. ក្នុងគ្រាសោយរាជ្យរយៈមួយពាន់ឆ្នាំរបស់ព្រះយេស៊ូ ពួកមនុស្សស្មោះត្រង់នឹងរៀបចំកែប្រែផែនដីទាំងមូលឲ្យទៅជាសួនមនោរម្យ។ (លូកា ២៣:៤៣) ហើយឯពួកអ្នកស្លាប់រាប់លាននាក់នឹងត្រូវប្រោសឲ្យមានជីវិតរស់ឡើងជាមនុស្សវិញនៅលើផែនដី។ (កិច្ចការ ២៤:១៥) បើពួកគេប្រព្រឹត្តអ្វីដែលព្រះទ្រង់តម្រូវពីពួកគេ នោះពួកគេនឹងមានជីវិតរស់នៅតទៅជារៀងរហូតនៅលើផែនដី។ បើមិនដូច្នេះទេ ពួកគេនឹងត្រូវវិនាសសាបសូន្យអស់កល្បជានិច្ច។—យ៉ូហាន ៥:២៨, ២៩; វិវរណៈ ២០:១១-១៥
៧. ដូច្នេះ គោលបំណងដើមរបស់ព្រះសំរាប់ផែនដីនឹងបានសម្រេច។ តើអ្នកចង់ទទួលចំណែកនៃពរអនាគតទាំងនេះឬទេ? បើចង់បាន អ្នកត្រូវតែបន្តរៀនសូត្រអំពីព្រះយេហូវ៉ា ហើយនិងប្រព្រឹត្តតាមសេចក្ដីតម្រូវនៃព្រះអង្គជានិច្ចតទៅ។ ការចូលរួមក្នុងកិច្ចប្រជុំនៅសាលព្រះរាជាណាចក្រនៃស្មរបន្ទាល់ព្រះយេហូវ៉ានាតំបន់អ្នក នោះនឹងជួយអ្នកឲ្យធ្វើយ៉ាងនេះបាន។—អេសាយ ១១:៩; ហេព្រើរ ១០:២៤, ២៥
[រូបភាពនៅទំព័រ១០]
សួនមនោរម្យដែលបានបាត់បង់ទៅ
[រូបភាពនៅទំព័រ១១]
ក្រោយពេលសង្គ្រាមអើម៉ាគេដូន ផែនដីនឹងត្រូវរៀបចំធ្វើឲ្យទៅជាសួនមនោរម្យ