មេរៀនទី១
របៀបដែលអ្នកអាចរកឃើញនូវអ្វីដែលព្រះទ្រង់តម្រូវ
តើអ្វីជាពត៌មានដ៏សំខាន់ដែលមាននៅក្នុងព្រះគម្ពីរ? (១)
តើអ្នកណាជាអ្នកនិពន្ធព្រះគម្ពីរ? (២)
ហេតុអ្វីអ្នកគួររៀនសូត្រព្រះគម្ពីរ? (៣)
១. ព្រះគម្ពីរជាអំណោយមួយដ៏មានតម្លៃពីព្រះ គឺប្រៀបដូចនឹងសំបុត្រពីបិតាមួយរូបដ៏ប្រកបដោយសេចក្ដីស្រឡាញ់ សរសេរទៅឲ្យបុត្រាបុត្រីរបស់លោក។ ព្រះគម្ពីរប្រាប់យើងនូវសេចក្ដីពិតអំពីព្រះ—ថាទ្រង់ជាអ្នកណា ហើយខ្នាតតម្រារបស់ទ្រង់ជាអ្វី។ ព្រះគម្ពីរពន្យល់នូវរបៀបលៃលកដោះស្រាយបញ្ហានិងរបៀបរកសុភមង្គលពិតឃើញ។ មានតែព្រះគម្ពីរទេដែលប្រាប់យើងនូវអ្វីៗដែលយើងត្រូវធ្វើដើម្បីផ្គាប់ព្រះហឫទ័យព្រះ។—ទំនុកដំកើង ១:១-៣; អេសាយ ៤៨:១៧, ១៨
២. ព្រះគម្ពីរបានត្រូវសរសេរដោយបុរសប្រហែលជា៤០នាក់ ក្នុងរយៈពេល១.៦០០ឆ្នាំ ចាប់ផ្ដើមក្នុងឆ្នាំ១៥១៣មុនគ.ស.។ ព្រះគម្ពីរគឺមានសៀវភៅតូចៗ៦៦ក្បាលបូកបញ្ចូលគ្នា។ ឯពួកអ្នកសរសេរព្រះគម្ពីរ ត្រូវបានព្រះបណ្ដាលឲ្យគេតែងពាក្យចេញមក។ ពួកគេសរសេរគំនិតរបស់ទ្រង់ មិនមែនរបស់ខ្លួនគេទេ។ ដូច្នេះ ព្រះដែលគង់នៅក្នុងស្ថានសួគ៌ ជាអ្នកនិពន្ធព្រះគម្ពីរ មិនមែនមនុស្សមួយរូបណាលើផែនដីឡើយ។—ធីម៉ូថេទី២ ៣:១៦, ១៧; ពេត្រុសទី២ ១:២០, ២១
៣. ព្រះទ្រង់បានយកព្រះទ័យទុកដាក់ចំពោះព្រះគម្ពីរ ដើម្បីឲ្យព្រះគម្ពីរបានត្រូវចម្លងដោយត្រឹមត្រូវនិងរក្សាការពារទុកផង។ ព្រះគម្ពីរបានត្រូវបោះពុម្ពច្រើនជាងសៀវភៅឯណាទាំងអស់។ មិនមែនមនុស្សគ្រប់ៗរូបនឹងសប្បាយចិត្តនោះទេ ដោយឃើញអ្នករៀនសូត្រព្រះគម្ពីរ ប៉ុន្តែសូមកុំឲ្យការនេះឃាត់ឃាំងអ្នកឡើយ។ អនាគតដ៏អស់កល្បរបស់អ្នកគឺស្រេចតែនឹងអ្នកទទួលស្គាល់ព្រះ ហើយធ្វើតាមព្រះហឫទ័យនៃទ្រង់ ទោះបីមានការប្រឆាំងយ៉ាងណាក៏ដោយ។—ម៉ាថាយ ៥:១០-១២; យ៉ូហាន ១៧:៣