ភាគ១៩
លោកយេស៊ូទាយអំពីព្រឹត្ដិការណ៍ដែលនឹងកើតឡើងពេញពិភពលោក
លោកយេស៊ូទាយអំពីវត្តមានរបស់លោក ជាស្តេច និងអំពីគ្រាចុងបញ្ចប់នៃរបៀបរបបពិភពលោកនេះ
នៅលើភ្នំដើមអូលីវ ជាកន្លែងដែលគេអាចមើលឃើញទេសភាពដ៏ត្រចះត្រចង់នៃក្រុងយេរូសាឡិមនិងវិហារដែលនៅខាងក្រោម នោះពួកសាវ័កបួននាក់របស់លោកយេស៊ូបានសួរលោកដោយឡែកពីគេអំពីអ្វីដែលលោកបានមានប្រសាសន៍ពីមុន។ លោកយេស៊ូទើបតែបានមានប្រសាសន៍ថា វិហារនៅក្រុងយេរូសាឡិមនឹងត្រូវបំផ្លាញចោល។ ហើយនៅពេលមួយមុននេះ លោកបានប្រាប់ពួកអ្នកកាន់តាមអំពី«ទីបញ្ចប់របៀបរបបពិភពលោកនេះ»។ (ម៉ាថាយ ១៣:៤០, ៤៩) ឥឡូវ ពួកសាវ័កសួរថា៖ «តើអ្វីជាសញ្ញាសម្គាល់ដែលបញ្ជាក់វត្តមានរបស់លោក និងគ្រាចុងបញ្ចប់នៃរបៀបរបបពិភពលោក?»។—ម៉ាថាយ ២៤:៣
លោកយេស៊ូបានប្រាប់អំពីអ្វីដែលនឹងកើតឡើងមុនការបំផ្លាញចោលក្រុងយេរូសាឡិម។ ប៉ុន្តែ ប្រសាសន៍របស់លោករួមបញ្ចូលអ្វីច្រើនទៀត។ ទំនាយរបស់លោកនឹងបានសម្រេចក្នុងកម្រិតធំជាងនៅពិភពលោកទាំងមូល។ លោកយេស៊ូបានទាយអំពីព្រឹត្ដិការណ៍ផ្សេងៗនិងស្ថានភាពក្នុងពិភពលោកដែលរួមគ្នាជាសញ្ញាសម្គាល់មួយ។ សញ្ញាសម្គាល់នោះនឹងបង្ហាញដល់អស់អ្នកដែលនៅផែនដីថា វត្តមានរបស់លោកយេស៊ូពេលគ្រប់គ្រងជាស្តេចបានចាប់ផ្ដើមហើយ។ និយាយឲ្យចំទៅ សញ្ញាសម្គាល់នឹងបង្ហាញថា ព្រះយេហូវ៉ាបានតែងតាំងលោកយេស៊ូជាស្តេចក្នុងរាជាណាចក្រនៃមេស្ស៊ី ដែលបានត្រូវសន្យាជាយូរមកហើយ។ សញ្ញាសម្គាល់នោះបង្ហាញថា រាជាណាចក្ររបស់ព្រះហៀបនឹងដកចេញនូវអំពើអាក្រក់ជួជាតិ និងនាំមកនូវសន្ដិភាពពិតដល់មនុស្សជាតិ។ ដូច្នេះព្រឹត្ដិការណ៍ផ្សេងៗដែលលោកយេស៊ូបានទាយ សម្គាល់គ្រាចុងក្រោយបង្អស់នៃរបៀបរបបចាស់នៃពិភពលោកនេះ ពោលគឺរបៀបរបបសាសនា នយោបាយ និងសង្គមដែលមាននៅសម័យនេះ ហើយសម្គាល់ការចាប់ផ្ដើមរបៀបរបបថ្មីមួយទៀត។
ពេលលោកយេស៊ូពន្យល់អំពីអ្វីដែលត្រូវកើតឡើងនៅផែនដីក្នុងអំឡុងវត្តមានរបស់លោកពេលគ្រប់គ្រងជាស្តេចនៅស្ថានសួគ៌ លោកបានមានប្រសាសន៍ថានឹងមានសង្គ្រាមរវាងប្រជាជាតិនានា ការអត់ឃ្លាន ការរញ្ជួយដីយ៉ាងខ្លាំង និងរោគរាតត្បាត។ ការប្រឆាំងច្បាប់នឹងមានកាន់តែច្រើនឡើង។ អ្នកកាន់តាមពិតរបស់លោកយេស៊ូនឹងផ្សព្វផ្សាយដំណឹងល្អអំពីរាជាណាចក្ររបស់ព្រះនៅពាសពេញផែនដី។ នៅទីបញ្ចប់នៃព្រឹត្ដិការណ៍ទាំងនោះ នឹងមាន«ទុក្ខវេទនាជាខ្លាំង»ដែលមិនធ្លាប់មានពីមុនទេ។—ម៉ាថាយ ២៤:២១
តើពួកអ្នកកាន់តាមលោកយេស៊ូអាចដឹងដោយដូចម្ដេចថា សេចក្ដីវេទនានោះគឺជិតកើតឡើងហើយ? លោកយេស៊ូបានមានប្រសាសន៍ថា៖ «ចូរទាញយកមេរៀនពីឧទាហរណ៍អំពីដើមល្វាតូច»។ (ម៉ាថាយ ២៤:៣២) កាលដែលឃើញមែកល្វាដុះស្លឹក នោះជាសញ្ញាសម្គាល់យ៉ាងច្បាស់ថា រដូវក្ដៅជិតដល់ហើយ។ ដូចគ្នាដែរ កាលដែលឃើញអ្វីៗដែលលោកយេស៊ូបានទាយកើតឡើងនៅគ្រាតែមួយ នោះជាសញ្ញាសម្គាល់យ៉ាងច្បាស់ថាទីបញ្ចប់ជិតដល់ហើយ។ ក្រៅពីបិតានៅស្ថានសួគ៌ នោះគ្មានអ្នកណាដឹងអំពីថ្ងៃនិងម៉ោងពិតប្រាកដ ដែលសេចក្ដីវេទនាជាខ្លាំងនឹងចាប់ផ្ដើមទេ។ ដូច្នេះ លោកយេស៊ូបានដាស់តឿនពួកអ្នកកាន់តាមលោកថា៖ «ចូរប្រុងប្រយ័ត្ន ព្រោះអ្នករាល់គ្នាមិនដឹងថាពេលណាជាពេលកំណត់ឡើយ»។—ម៉ាកុស ១៣:៣៣
—មានមូលដ្ឋានលើសៀវភៅម៉ាថាយ ជំពូកទី២៤និង២៥ ម៉ាកុស ជំពូកទី១៣ លូកា ជំពូកទី២១។
a ដើម្បីដឹងថែមទៀតអំពីទំនាយរបស់លោកយេស៊ូ សូមមើលសៀវភៅតើគម្ពីរអាចបង្រៀនយើងអំពីអ្វី? ជំពូកទី៩ បោះពុម្ពដោយសាក្សីព្រះយេហូវ៉ា។