មេរៀនទី១
តើមានដំណឹងល្អអ្វី?
១. តើព្រះមានដំណឹងអ្វី?
ព្រះចង់ឲ្យមនុស្សមានជីវិតរីករាយនៅផែនដី។ ដោយសារលោកស្រឡាញ់មនុស្សជាតិ លោកបានបង្កើតផែនដី និងរបស់ទាំងអស់ដែលមាននៅផែនដី។ បន្ដិចទៀត លោកនឹងធ្វើឲ្យមនុស្សទូទាំងផែនដីមានអនាគតដ៏ល្អប្រសើរ។ លោកនឹងបំបាត់ចោលនូវដើមហេតុដែលបណ្ដាលឲ្យមនុស្សរងទុក្ខវេទនា។—សូមអាន យេរេមា ២៩:១១
យើងដឹងថា មិនធ្លាប់មានរដ្ឋាភិបាលណាមួយដែលអាចបំបាត់ចោលទាំងស្រុងនូវអំពើហិង្សា ជំងឺ ឬសេចក្ដីស្លាប់ឡើយ។ ប៉ុន្តែ មានដំណឹងល្អសម្រាប់យើង គឺបន្ដិចទៀត ព្រះនឹងបំបាត់ចោលរដ្ឋាភិបាលទាំងអស់របស់មនុស្ស ហើយជំនួសវិញដោយរដ្ឋាភិបាលរបស់លោក។ ពេលនោះរាស្ត្ររបស់លោកនឹងមានសេចក្ដីសុខសាន្ត ហើយមានសុខភាពល្អ។—សូមអាន អេសាយ ២៥:៨; ៣៣:២៤; ដានីយ៉ែល ២:៤៤
២. ហេតុអ្វីដំណឹងល្អនោះសំខាន់ម្ល៉េះនៅសព្វថ្ងៃនេះ?
ព្រះនឹងបំផ្លាញចោលមនុស្សអាក្រក់ពីផែនដី។ នេះជាវិធីតែមួយគត់ដែលអាចបំបាត់ចោលនូវទុក្ខវេទនាទាំងអស់។ (សេផានា ២:៣) តើពេលណាដែលលោកនឹងធ្វើដូច្នេះ? បណ្ដាំរបស់ព្រះបានទាយអំពីស្ថានភាពផ្សេងៗដែលកំពុងយាយីមនុស្សជាតិនៅសព្វថ្ងៃនេះ។ អំពើអាក្រក់ជាច្រើនដែលកំពុងកើតឡើងនៅផែនដីបញ្ជាក់ឲ្យឃើញថា ពេលដែលព្រះនឹងបំផ្លាញមនុស្សអាក្រក់គឺជិតមកដល់ហើយ។—សូមអាន ធីម៉ូថេទី២ ៣:១-៥
៣. តើយើងគួរធ្វើអ្វី?
យើងគួររៀនអំពីព្រះតាមរយៈគម្ពីរដែលជាបណ្ដាំរបស់លោក។ គម្ពីរប្រៀបដូចជាសំបុត្រមួយដែលយើងបានទទួលពីបិតាដែលស្រឡាញ់យើង។ គម្ពីរប្រាប់យើងអំពីរបៀបដែលយើងអាចមានជីវិតដ៏ប្រសើរជាងនៅឥឡូវនេះ និងរបៀបដែលយើងអាចទទួលជីវិតដែលគ្មានទីបញ្ចប់នៅផែនដីនាអនាគត។ មនុស្សខ្លះប្រាកដជាមិនចូលចិត្តទេ កាលដែលឃើញលោកអ្នកកំពុងទទួលជំនួយដើម្បីយល់អំពីគម្ពីរនោះ។ ក៏ប៉ុន្តែ លោកអ្នកមិនគួរឲ្យអ្នកឯទៀតធ្វើឲ្យលោកអ្នកធ្លាក់ទឹកចិត្ត ហើយបាត់បង់ឱកាសដ៏ល្អអស្ចារ្យនេះឡើយ។—សូមអាន សុភាសិត ២៩:២៥; ការបើកបង្ហាញ ១៤:៦, ៧