មេរៀនទី១៣
តើនឹងមានអ្វីកើតឡើងចំពោះសាសនា?
១. តើសាសនាទាំងអស់សុទ្ធតែល្អឬ?
ក្នុងសាសនានីមួយៗមានមនុស្សដែលមានចិត្តស្មោះដែលចង់ធ្វើឲ្យព្រះពេញចិត្ត។ នេះពិតជាដំណឹងល្អមែន ដោយសារព្រះសម្គាល់ពួកអ្នកដែលមានចិត្តគំនិតបែបនោះ ហើយលោកឲ្យតម្លៃចំពោះពួកគេ។ ប៉ុន្តែគួរឲ្យសោកស្ដាយណាស់ ដោយសារមនុស្សបានយកសាសនាធ្វើជាលេសដើម្បីបិទបាំងការប្រព្រឹត្តអាក្រក់របស់ខ្លួន។ (កូរិនថូសទី២ ៤:៣, ៤; ១១:១៣-១៥) យោងតាមបណ្ដាញផ្សាយព័ត៌មានបានរាយការណ៍ថា សាសនាខ្លះបានចូលរួមក្នុងសង្គ្រាម ភេវរកម្ម ការប្រល័យពូជសាសន៍ ព្រមទាំងធ្វើបាបនិងរំលោភកូនក្មេង។ ដំណឹងនេះពិតជាធ្វើឲ្យអ្នកដែលមានជំនឿទៅលើព្រះកើតទុក្ខមែន!—សូមអាន ម៉ាថាយ ២៤:៣-៥, ១១, ១២
សាសនាពិតលើកតម្កើងព្រះ រីឯសាសនាមិនពិតធ្វើឲ្យព្រះមិនពេញចិត្តវិញ។ សាសនាមិនពិតបង្រៀនទ្រឹស្តីដែលគ្មានមូលដ្ឋានក្នុងគម្ពីរទេ នេះរួមបញ្ចូលសេចក្ដីបង្រៀនមិនពិតស្តីអំពីព្រះនិងអំពីមនុស្សស្លាប់។ ប៉ុន្តែ ព្រះយេហូវ៉ាចង់ឲ្យមនុស្សស្គាល់សេចក្ដីពិតអំពីលោក។—សូមអាន អេសេគាល ១៨:៤; ធីម៉ូថេទី១ ២:៣-៥
២. តើនឹងមានអ្វីកើតឡើងចំពោះសាសនា?
យើងមានចិត្តរីករាយណាស់ ដោយសារព្រះស្គាល់ពុតត្បុតរបស់សាសនាដែលអះអាងថាស្រឡាញ់លោក តែពួកគេបែរជាស្រឡាញ់ពិភពលោករបស់សាថានវិញ។ (យ៉ាកុប ៤:៤) បណ្ដាំរបស់ព្រះបានហៅសាសនាមិនពិតទាំងនោះថា«បាប៊ីឡូនដ៏ខ្លាំងក្លា»។ បាប៊ីឡូនគឺជាទីក្រុងពីបុរាណមួយ ហើយសាសនាមិនពិតចាប់ផ្ដើមមាននៅទីក្រុងនោះ បន្ទាប់ពីទឹកជន់លិចនៅសម័យណូអេ។ បន្ដិចទៀត ព្រះនឹងបំផ្លាញចោលមួយរំពេចនូវសាសនាមិនពិតដែលបោកបញ្ឆោតនិងគាបសង្កត់មនុស្សជាតិ។—សូមអាន ការបើកបង្ហាញ ១៧:១, ២, ៥, ១៦, ១៧; ១៨:៨
ក៏ប៉ុន្តែ ក្នុងសាសនាមិនពិតនានាមានមនុស្សដែលពិតជាចង់ធ្វើឲ្យព្រះយេហូវ៉ាពេញចិត្ត។ លោកមិនបានភ្លេចពួកគេទេ។ លោកកំពុងប្រមូលមនុស្សបែបនោះ ដោយបង្រៀនពួកគេអំពីសេចក្ដីពិត។—សូមអាន មីកា ៤:២, ៥
៣. តើមនុស្សដែលពិតជាចង់ធ្វើឲ្យព្រះពេញចិត្តគួរធ្វើអ្វីខ្លះ?
សាសនាពិតកំពុងធ្វើឲ្យមនុស្សមានសាមគ្គីភាព
ព្រះយេហូវ៉ាស្រឡាញ់មនុស្សដែលចង់ស្គាល់សេចក្ដីពិតនិងចង់ធ្វើអំពើល្អ។ លោកសុំពួកគេឲ្យចេញពីសាសនាមិនពិត។ មនុស្សដែលស្រឡាញ់ព្រះសុខចិត្តកែប្រែជីវិតដើម្បីធ្វើឲ្យលោកពេញចិត្ត។—សូមអាន ការបើកបង្ហាញ ១៨:៤
នៅសតវត្សរ៍ទី១ ពេលមនុស្សចង់ស្គាល់សេចក្ដីពិតបានឮសេចក្ដីបង្រៀនក្នុងគម្ពីរពីពួកសាវ័ក នោះពួកគេបានធ្វើតាមដោយចិត្តរីករាយ។ ពួកគេបានរៀនអំពីរបៀបរស់នៅថ្មីពីព្រះយេហូវ៉ា ពោលគឺរបៀបរស់នៅដែលមានសុភមង្គលច្រើនជាង មានគោលបំណង និងមានសេចក្ដីសង្ឃឹម។ ពួកគេជាគំរូល្អសម្រាប់យើងនៅសព្វថ្ងៃនេះ ពីព្រោះពួកគេធ្វើតាមដំណឹងល្អ ដោយចាត់ទុកការធ្វើតាមបំណងប្រាថ្នារបស់ព្រះយេហូវ៉ាជាអ្វីដែលសំខាន់បំផុតក្នុងជីវិតរបស់ពួកគេ។—សូមអាន ថែស្សាឡូនិចទី១ ១:៨, ៩; ២:១៣
ព្រះយេហូវ៉ាអញ្ជើញអស់អ្នកដែលបានចេញពីសាសនាមិនពិតឲ្យរួបរួមជាមួយអ្នកដែលគោរពប្រណិប័តន៍លោក។ ពួកគេប្រៀបដូចជាក្រុមគ្រួសារមួយ។ បើលោកអ្នកធ្វើតាមការអញ្ជើញដ៏កក់ក្ដៅរបស់ព្រះយេហូវ៉ា នោះលោកអ្នកនឹងក្លាយទៅជាមិត្តសម្លាញ់របស់លោក ហើយនឹងទៅជាសមាជិកនៃក្រុមគ្រួសារថ្មីមួយដែលពោរពេញទៅដោយសេចក្ដីស្រឡាញ់។ តើក្រុមគ្រួសារថ្មីនោះជាអ្នកណា? គឺជាបងប្អូនរួមជំនឿដែលគោរពប្រណិប័តន៍ព្រះយេហូវ៉ា។ ម្យ៉ាងទៀត លោកអ្នកនឹងទទួលជីវិតដែលគ្មានទីបញ្ចប់។—សូមអាន ម៉ាកុស ១០:២៩, ៣០; កូរិនថូសទី២ ៦:១៧, ១៨
៤. តើព្រះនឹងធ្វើឲ្យមនុស្សទូទាំងផែនដីមានចិត្តសប្បាយរីករាយយ៉ាងដូចម្ដេច?
មិនយូរទៀតសាសនាមិនពិតនឹងត្រូវបំផ្លាញ។ នេះគឺជាដំណឹងល្អ។ ពេលនោះពិភពលោកទាំងមូលនឹងលែងមានការគាបសង្កត់ទៀត។ សាសនាមិនពិតនឹងមិនបំភាន់មនុស្សជាតិ ហើយនឹងមិនធ្វើឲ្យពួកគេបែកបាក់គ្នាទៀតឡើយ។ មនុស្សគ្រប់រូបនឹងមានសាមគ្គីភាពក្នុងការគោរពប្រណិប័តន៍ព្រះពិតតែមួយ។—សូមអាន ការបើកបង្ហាញ ១៨:២០, ២១; ២១:៣, ៤