មេរៀនទី១១
តើច្បាប់របស់ព្រះជួយយើងយ៉ាងដូចម្ដេច?
១. ហេតុអ្វីយើងត្រូវការការណែនាំ?
តើច្បាប់ក្នុងគម្ពីរអាចជួយយើងឲ្យចេះប្រុងប្រយ័ត្នជាងមុនយ៉ាងដូចម្ដេច?—ទំនុកតម្កើង ៣៦:៩
ព្រះដែលជាអ្នកបង្កើត លោកមានប្រាជ្ញាច្រើនជាងយើង។ ក្នុងនាមជាបិតាដែលប្រកបដោយសេចក្ដីស្រឡាញ់ លោកយកចិត្តទុកដាក់ចំពោះយើង។ បន្ថែមទៅទៀត លោកចង់ឲ្យយើងពឹងផ្អែកលើលោក។ (យេរេមា ១០:២៣) ដូចកូនតូចម្នាក់ដែលត្រូវការការណែនាំពីឪពុកម្ដាយ នោះយើងទាំងអស់គ្នាក៏ត្រូវការការណែនាំពីព្រះដែរ។ (អេសាយ ៤៨:១៧, ១៨) ច្បាប់ដែលមានក្នុងគម្ពីរផ្ដល់ការណែនាំដល់យើងដែលជាអំណោយមួយពីព្រះ។—សូមអាន ធីម៉ូថេទី២ ៣:១៦
ច្បាប់របស់ព្រះយេហូវ៉ាបង្រៀនយើងឲ្យមានរបៀបរស់នៅដ៏ល្អបំផុតនៅសព្វថ្ងៃនេះ ហើយក៏បង្ហាញយើងនូវរបៀបដែលយើងអាចទទួលរង្វាន់ជាជីវិតដែលគ្មានទីបញ្ចប់នាអនាគតដែរ។ ដោយសារព្រះបានបង្កើតយើង ដូច្នេះជាការត្រឹមត្រូវដែលយើងបង្ហាញចិត្តដឹងគុណចំពោះការណែនាំដែលលោកបានផ្ដល់ឲ្យយើង។—សូមអាន ទំនុកតម្កើង ១៩:៧, ១១; ការបើកបង្ហាញ ៤:១១
២. តើបណ្ដាំរបស់ព្រះណែនាំយើងយ៉ាងដូចម្ដេច?
សេចក្ដីពិតដែលជាមូលដ្ឋានក្នុងគម្ពីរបង្ហាញយើងនូវអ្វីដែលព្រះចង់ឲ្យយើងប្រព្រឹត្តក្នុងស្ថានភាពជាច្រើន។ ចំពោះច្បាប់ផ្សេងទៀត យើងអាចប្រើក្នុងកាលៈទេសៈយ៉ាងជាក់លាក់ណាមួយ។ (ចោទិយកថា ២២:៨) យើងត្រូវប្រើសមត្ថភាពរិះគិតដើម្បីយល់នូវរបៀបដែលសេចក្ដីពិតក្នុងគម្ពីរប្រាប់យើងអំពីអ្វីដែលយើងគួរធ្វើ។ (សុភាសិត ២:១០-១២) ជាឧទាហរណ៍ គម្ពីរបង្រៀនថា ជីវិតជាអំណោយមួយដែលមកពីព្រះ។ សេចក្ដីពិតនេះអាចណែនាំយើងបាន ទោះជានៅកន្លែងធ្វើការ នៅផ្ទះ និងនៅពេលធ្វើដំណើរក្ដី។ បើយើងចងចាំអំពីសេចក្ដីពិតនេះ នោះជួយយើងឲ្យចេះប្រុងប្រយ័ត្នច្រើនជាងមុន។—សូមអាន សកម្មភាព ១៧:២៨
៣. តើបញ្ញត្ដិពីរយ៉ាងអ្វីដែលសំខាន់បំផុត?
លោកយេស៊ូបានឲ្យបញ្ញត្ដិពីរយ៉ាងដែលសំខាន់ជាងគេ។ បញ្ញត្ដិទី១ បង្ហាញអំពីគោលបំណងក្នុងជីវិតរបស់មនុស្សជាតិ ពោលគឺដើម្បីឲ្យពួកគេស្គាល់ព្រះ ស្រឡាញ់លោក និងបម្រើលោកដោយស្មោះត្រង់។ ដូច្នេះ មុននឹងយើងធ្វើការសម្រេចចិត្តផ្សេងៗ យើងគួរពិចារណាអំពីបញ្ញត្ដិនេះជាមុនសិន។ (សុភាសិត ៣:៦) អស់អ្នកដែលរស់នៅស្របតាមបញ្ញត្ដិនេះ ពួកគេនឹងមានចំណងមិត្តភាពជាមួយព្រះ មានសុភមង្គលពិត និងមានជីវិតដែលគ្មានទីបញ្ចប់។—សូមអាន ម៉ាថាយ ២២:៣៦-៣៨
បញ្ញត្ដិទី២ អាចជួយយើងឲ្យមានសន្ដិភាពជាមួយនឹងអ្នកឯទៀត។ (កូរិនថូសទី១ ១៣:៤-៧) ការធ្វើតាមបញ្ញត្ដិទី២នេះ ក៏រួមបញ្ចូលការយកតម្រាប់តាមព្រះស្តីអំពីរបៀបដែលលោកប្រព្រឹត្តចំពោះមនុស្សដែរ។—សូមអាន ម៉ាថាយ ៧:១២; ២២:៣៩, ៤០
៤. តើច្បាប់របស់ព្រះជួយយើងយ៉ាងដូចម្ដេច?
ច្បាប់របស់ព្រះបង្រៀនក្រុមគ្រួសារអំពីរបៀបដែលពួកគេអាចមានសាមគ្គីភាពដែលប្រកបដោយសេចក្ដីស្រឡាញ់។ (កូឡុស ៣:១២-១៤) បណ្ដាំរបស់ព្រះក៏ការពារក្រុមគ្រួសារនីមួយៗដែរ ដោយបង្រៀនយើងអំពីសេចក្ដីពិតជាមូលដ្ឋានមួយទៀត គឺចំណងអាពាហ៍ពិពាហ៍គួរនៅស្ថិតស្ថេរជារៀងរហូត។—សូមអាន លោកុប្បត្តិ ២:២៤
បើយើងធ្វើតាមច្បាប់ក្នុងគម្ពីរ នោះអាចជួយយើងឲ្យមានសេចក្ដីសុខសាន្តក្នុងចិត្ត និងជួយបំពេញសេចក្ដីត្រូវការចាំបាច់ក្នុងជីវភាពរស់នៅរបស់យើង។ ជាឧទាហរណ៍ និយោជកច្រើនតែចង់បានបុគ្គលិកដែលទៀងត្រង់និងឧស្សាហ៍ធ្វើការ ដែលរស់នៅស្របតាមច្បាប់ក្នុងគម្ពីរ។ (សុភាសិត ១០:៤, ២៦; ហេប្រឺ ១៣:១៨) បណ្ដាំរបស់ព្រះក៏បង្រៀនយើងឲ្យចេះស្កប់ចិត្តនឹងអ្វីដែលយើងត្រូវការជាចាំបាច់ ហើយចាត់ទុកចំណងមិត្តភាពជាមួយព្រះជាអ្វីដែលសំខាន់ជាងវត្ថុទ្រព្យ។—សូមអាន ម៉ាថាយ ៦:២៤, ២៥, ៣៣; ធីម៉ូថេទី១ ៦:៨-១០
ការធ្វើតាមច្បាប់ក្នុងគម្ពីរអាចការពារសុខភាពរបស់យើង។ (សុភាសិត ១៤:៣០; ២២:២៤, ២៥) ជាឧទាហរណ៍ ការធ្វើតាមច្បាប់របស់ព្រះស្តីអំពីការប្រមឹកស្រា នោះការពារយើងពីជំងឺដែលបណ្ដាលឲ្យស្លាប់ និងពីគ្រោះថ្នាក់ផ្សេងៗ។ (សុភាសិត ២៣:២០) ព្រះយេហូវ៉ាអនុញ្ញាតឲ្យយើងពិសាគ្រឿងស្រវឹងបាន ប៉ុន្តែកុំឲ្យហួសប្រមាណ។ (ទំនុកតម្កើង ១០៤:១៥; កូរិនថូសទី១ ៦:១០) ច្បាប់របស់ព្រះមិនគ្រាន់តែជួយយើងក្នុងការប្រព្រឹត្តប៉ុណ្ណោះទេ តែក៏ជួយការពារចិត្តគំនិតរបស់យើងផងដែរ។ (ទំនុកតម្កើង ១១៩:៩៧-១០០) ប៉ុន្តែ គ្រិស្តសាសនិកពិតមិនគោរពច្បាប់ព្រះដើម្បីតែប្រយោជន៍ខ្លួនប៉ុណ្ណោះទេ តែពួកគេធ្វើដូច្នេះដើម្បីលើកតម្កើងព្រះយេហូវ៉ាវិញ។—សូមអាន ម៉ាថាយ ៥:១៤-១៦