ជំពូកទី១០
លោកយេស៊ូនិងក្រុមគ្រួសារធ្វើដំណើរទៅក្រុងយេរូសាឡិម
លោកយេស៊ូដែលមានអាយុ១២ឆ្នាំសួរសំណួរពួកគ្រូ
លោកយេស៊ូហៅព្រះយេហូវ៉ាថា«បិតា»
ឥឡូវជារដូវស្លឹកឈើលាស់។ ជារៀងរាល់ឆ្នាំនារដូវនោះក្រុមគ្រួសារនិងញាតិមិត្តរបស់យ៉ូសែបតែងតែធ្វើដំណើរទៅក្រុងយេរូសាឡិម ដើម្បីធ្វើបុណ្យរំលងតាមច្បាប់របស់ម៉ូសេ។ (ចោទិយកថា ១៦:១៦) ពីក្រុងណាសារ៉ែតទៅក្រុងយេរូសាឡិមមានចម្ងាយប្រហែលជា១២០គីឡូម៉ែត្រ។ នេះជាពេលមមាញឹកនិងគួរឲ្យរំភើបចិត្តសម្រាប់អស់អ្នកដែលចូលរួម។ ឥឡូវ លោកយេស៊ូមានអាយុ១២ឆ្នាំហើយ។ លោកកំពុងទន្ទឹងចាំដោយចិត្តរំភើបដើម្បីចូលរួមបុណ្យនោះ និងដើម្បីទៅវិហារនៅក្រុងយេរូសាឡិមម្ដងទៀត។
ចំពោះលោកយេស៊ូនិងក្រុមគ្រួសាររបស់លោក បុណ្យរំលងមិនមែនជាពិធីដែលមានរយៈពេលតែមួយថ្ងៃនោះទេ ពីព្រោះក្រោយបុណ្យរំលងគឺជាថ្ងៃចាប់ផ្ដើមនៃបុណ្យនំឥតដំបែ ដែលមានរយៈពេល៧ថ្ងៃ។ (ម៉ាកុស ១៤:១) បុណ្យនេះបានត្រូវគេចាត់ទុកជាផ្នែកនៃរដូវបុណ្យរំលង។ ពួកគាត់ចំណាយពេលប្រហែលជាពីរសប្ដាហ៍ក្នុងការធ្វើដំណើរពីក្រុងណាសារ៉ែត រួមទាំងការស្នាក់នៅក្រុងយេរូសាឡិម និងការត្រឡប់មកផ្ទះវិញ។ ប៉ុន្តែឆ្នាំនេះ ពួកគាត់ត្រូវចំណាយពេលយូរជាង ពីព្រោះមានហេតុការណ៍មួយបានកើតឡើងដែលទាក់ទងនឹងលោកយេស៊ូ។ ពួកគាត់បានដឹងអំពីហេតុការណ៍នោះ នៅពេលពួកគាត់ធ្វើដំណើរពីក្រុងយេរូសាឡិមត្រឡប់ទៅផ្ទះវិញ។
ពេលពួកគាត់កំពុងធ្វើដំណើរ យ៉ូសែបនិងម៉ារៀស្មានថាកុមារយេស៊ូនៅជាមួយនឹងញាតិមិត្តដែលកំពុងធ្វើដំណើរជាមួយគ្នា។ ប៉ុន្តែ ពេលដែលពួកគាត់ឈប់សម្រាកនៅពេលយប់ ពួកគាត់មិនឃើញកុមារយេស៊ូឡើយ។ ដូច្នេះ ពួកគាត់ព្យាយាមរកកុមារយេស៊ូក្នុងចំណោមញាតិមិត្ត តែរកលោកមិនឃើញសោះ។ ពួកគាត់មិនដឹងថាកូនប្រុសរបស់ពួកគាត់បានទៅណាទេ! ក្រោយមកយ៉ូសែបនិងម៉ារៀក៏ធ្វើដំណើរត្រឡប់ទៅក្រុងយេរូសាឡិមវិញ ដើម្បីរកកុមារយេស៊ូ។
ពួកគាត់ស្វែងរកកូនអស់មួយថ្ងៃ តែរកមិនឃើញសោះ។ នៅថ្ងៃទី២ ក៏ពួកគាត់នៅតែរកកូនមិនឃើញដែរ។ ទីបំផុតនៅថ្ងៃទី៣ ពួកគាត់រកឃើញកូនប្រុសរបស់ខ្លួននៅសាលមួយក្នុងវិហារ។ ពួកគាត់ឃើញកុមារយេស៊ូកំពុងអង្គុយស្ដាប់និងសួរសំណួរពួកគ្រូសាសនាយូដា ហើយពួកគ្រូទាំងនោះកំពុងកោតស្ងើចដោយសារការយល់ដឹងរបស់លោក។
ឃើញដូច្នេះ ម៉ារៀសួរកុមារយេស៊ូថា៖ «ហេតុអ្វីបានជាកូនប្រព្រឹត្តនឹងយើងដូច្នេះ? ឪពុកម្ដាយខំរកកូនទាំងពិបាកចិត្ត»។—លូកា ២:៤៨
កុមារយេស៊ូភ្ញាក់ផ្អើល ពេលឪពុកម្ដាយមិនដឹងថាលោកនៅទីណា។ ដូច្នេះ កុមារសួរថា៖ «ហេតុអ្វីបានជាត្រូវដើររកកូន? តើមិនបាននឹកឃើញថាកូននៅកន្លែងគោរពបូជារបស់បិតាកូនទេឬ?»។—លូកា ២:៤៩
ឥឡូវពួកគាត់បានជួបជុំគ្នា ហើយកុមារយេស៊ូត្រឡប់ទៅផ្ទះនៅក្រុងណាសារ៉ែតជាមួយនឹងយ៉ូសែបនិងម៉ារៀវិញ ថែមទាំងបន្តចុះចូលក្នុងឱវាទរបស់ពួកគាត់។ កុមារយេស៊ូក៏កាន់តែធំ ហើយប្រកបដោយប្រាជ្ញាកាន់តែច្រើនឡើងៗ។ ទោះបីជាលោកនៅក្មេងក៏ដោយ លោកទទួលការពេញចិត្តពីព្រះនិងពីមនុស្ស។ លោកយេស៊ូពិតជាទុកគំរូល្អតាំងពីក្មេងមក ពីព្រោះលោកមិនគ្រាន់តែស្វែងរកចំណេះអំពីព្រះប៉ុណ្ណោះទេ តែលោកក៏បង្ហាញការគោរពចំពោះឪពុកម្ដាយដែរ។