សំបុត្រពីគណៈអភិបាល
ជូនចំពោះអ្នកផ្សព្វផ្សាយដំណឹងល្អជាទីស្រឡាញ់:
យើងមានសាមគ្គីភាពក្នុងការគោរពប្រណិប័តន៍ព្រះយេហូវ៉ាដែលជាព្រះពិតតែមួយ។ នេះពិតជាឯកសិទ្ធិដ៏អស្ចារ្យមែន! យើងជា«អ្នករួមការងារ»ជាមួយនឹងព្រះ ហើយបានទទួលកិច្ចការដ៏ពិសិដ្ឋដែលអាចសង្គ្រោះជីវិតមនុស្ស ពោលគឺកិច្ចការផ្សព្វផ្សាយនិងបង្រៀនអ្នកឯទៀតអំពីដំណឹងល្អនៃរាជាណាចក្រព្រះដែលបានត្រូវស្ថាបនាឡើង។ (១កូ. ៣:៩; ម៉ាថ. ២៨:១៩, ២០) ដើម្បីសម្រេចកិច្ចការនេះទូទាំងពិភពលោកដោយមានសេចក្ដីសុខសាន្តនិងមានសាមគ្គីភាព យើងត្រូវតែមានការរៀបចំយ៉ាងល្អ។—១កូ. ១៤:៤០
សៀវភៅនេះនឹងជួយអ្នកយល់អំពីដំណើរការនៃក្រុមជំនុំគ្រិស្តសាសនិកនៅសព្វថ្ងៃនេះ ក៏នឹងពន្យល់អំពីឯកសិទ្ធិនិងភារកិច្ចដែលអ្នកមានក្នុងនាមជាសាក្សីព្រះយេហូវ៉ាដែរ។ បើអ្នកឲ្យតម្លៃចំពោះឯកសិទ្ធិហើយបំពេញភារកិច្ចរបស់អ្នក នោះ‹ជំនឿរបស់អ្នកនឹងត្រូវពង្រឹង›ឡើង។—សកម្ម. ១៦:៤, ៥; កាឡ. ៦:៥
ម្ល៉ោះហើយ យើងសូមលើកទឹកចិត្តអ្នកឲ្យសិក្សាសៀវភៅនេះយ៉ាងយកចិត្តទុកដាក់។ សូមគិតអំពីរបៀបដែលអ្នកអាចអនុវត្តព័ត៌មានពីសៀវភៅនេះក្នុងជីវិតរបស់អ្នក។ ជាឧទាហរណ៍ បើថ្មីៗនេះអ្នកបានក្លាយទៅជាអ្នកផ្សព្វផ្សាយដែលមិនទាន់ទទួលការជ្រមុជទឹក តើអ្នកត្រូវធ្វើអ្វីទៀតដើម្បីទទួលការជ្រមុជទឹកជាសាក្សីព្រះយេហូវ៉ា? ចុះបើអ្នកបានទទួលការជ្រមុជទឹករួចហើយ តើអ្នកអាចធ្វើអ្វីដើម្បីរីកចម្រើនក្នុងការគោរពប្រណិប័តន៍ព្រះ ហើយបង្កើនកិច្ចបម្រើជូនព្រះយេហូវ៉ា? (១ធី. ៤:១៥) តើអ្នកអាចជួយធ្វើឲ្យមានសន្តិភាពក្នុងក្រុមជំនុំយ៉ាងដូចម្ដេច? (២កូ. ១៣:១១) សូមស្វែងរកចម្លើយចំពោះសំណួរទាំងនោះក្នុងសៀវភៅនេះ។
បើអ្នកជាបងប្រុសដែលបានទទួលការជ្រមុជទឹក តើអ្នកអាចធ្វើអ្វីដើម្បីមានគុណសម្បត្តិគ្រប់គ្រាន់បម្រើជាជំនួយការខាងកិច្ចបម្រើ ហើយក្រោយមកបម្រើជាអ្នកចាស់ទុំ? មនុស្សថ្មីរាប់ពាន់នាក់កំពុងចូលអង្គការរបស់ព្រះ ដូច្នេះយើងត្រូវការជាបន្ទាន់នូវបងប្អូនប្រុសដែលមានគុណសម្បត្តិគ្រប់គ្រាន់ដើម្បីនាំមុខក្នុងក្រុមជំនុំ។ សៀវភៅនេះនឹងជួយអ្នកដឹងអំពីអ្វីដែលអ្នកត្រូវធ្វើ ដើម្បី«ព្យាយាមឲ្យបានមុខងារ»ដូចនេះក្នុងកិច្ចបម្រើព្រះ។—១ធី. ៣:១
យើងអធិដ្ឋានយ៉ាងស្មោះ សូមឲ្យសៀវភៅនេះជួយអ្នកយល់អំពីភារកិច្ចរបស់អ្នកក្នុងរបៀបរៀបចំរបស់ព្រះយេហូវ៉ា និងឲ្យតម្លៃលើភារកិច្ចនោះ។ យើងស្រឡាញ់បងប្អូនទាំងអស់គ្នាខ្លាំងណាស់។ យើងបន្តអធិដ្ឋានសូមឲ្យបងប្អូនស្ថិតនៅក្នុងចំណោមមនុស្សដែលមានអំណរជានិច្ចក្នុងការគោរពប្រណិប័តន៍បិតារបស់យើងនៅស្ថានសួគ៌ ពោលគឺព្រះយេហូវ៉ា។—ទំនុក. ៣៧:១០, ១១; អេ. ៦៥:២១-២៥
ពីបងប្អូនរបស់អ្នក
Governing Body of Jehovah’s Witnesses
(គណៈអភិបាលនៃសាក្សីព្រះយេហូវ៉ា)