ជំពូកទី១២
តើអ្នកអាចក្លាយទៅជាមិត្តសម្លាញ់របស់ព្រះយ៉ាងដូចម្ដេច?
១, ២. តើអ្នកណាខ្លះជាមិត្តសម្លាញ់របស់ព្រះយេហូវ៉ា?
តើអ្នកចង់រាប់អានមនុស្សបែបណាធ្វើជាមិត្តភក្ដិ? អ្នកចង់រាប់អានមនុស្សដែលអ្នកចូលចិត្ត។ គាត់ជាមនុស្សដែលអាចចុះសម្រុងនឹងអ្នកបាន ហើយគាត់មានចិត្តសប្បុរស និងមានគុណសម្បត្ដិផ្សេងទៀតដែលអ្នកពេញចិត្ត។
២ ព្រះយេហូវ៉ាជ្រើសរើសមនុស្សខ្លះឲ្យធ្វើជាមិត្តសម្លាញ់របស់លោក។ ជាឧទាហរណ៍ អាប្រាហាំជាសម្លាញ់ម្នាក់របស់ព្រះយេហូវ៉ា។ (អេសាយ ៤១:៨; យ៉ាកុប ២:២៣) ព្រះយេហូវ៉ាក៏ចូលចិត្តដាវីឌដែរ។ លោកមានប្រសាសន៍ថាដាវីឌ«ជាអ្នកត្រូវនឹងចិត្តរបស់ខ្ញុំ»។ (សកម្មភាព ១៣:២២) ម្យ៉ាងទៀត គម្ពីរប្រាប់ថាអ្នកប្រកាសទំនាយឈ្មោះដានីយ៉ែលជា«មនុស្សសំណប់»របស់ព្រះយេហូវ៉ា។—ដានីយ៉ែល ៩:២៣
៣. ហេតុអ្វីព្រះយេហូវ៉ាបានចាត់ទុកអាប្រាហាំ ដាវីឌ និងដានីយ៉ែលជាសម្លាញ់របស់លោក?
៣ ហេតុអ្វីព្រះយេហូវ៉ាបានចាត់ទុកអាប្រាហាំ ដាវីឌ និងដានីយ៉ែលជាសម្លាញ់របស់លោក? លោកមានប្រសាសន៍ទៅអាប្រាហាំថា៖ ‹អ្នកបានស្ដាប់តាមពាក្យខ្ញុំ›។ (លោកុប្បត្តិ ២២:១៨) ព្រះយេហូវ៉ាធ្វើជាមិត្តសម្លាញ់នឹងអ្នកដែលស្ដាប់បង្គាប់លោកដោយចិត្តរាបទាប។ សូម្បីតែប្រជាជាតិមួយក៏អាចក្លាយទៅជាសម្លាញ់របស់លោកបានដែរ។ ជាឧទាហរណ៍ ព្រះយេហូវ៉ាបានប្រាប់ប្រជាជាតិអ៊ីស្រាអែលថា៖ «ចូរស្ដាប់តាមពាក្យអញ នោះអញនឹងធ្វើជាព្រះដល់ឯងរាល់គ្នា ហើយឯងរាល់គ្នានឹងបានជារាស្ត្ររបស់អញ»។ (យេរេមា ៧:២៣) ដូច្នេះ បើអ្នកពិតជាចង់ធ្វើជាមិត្តសម្លាញ់របស់ព្រះយេហូវ៉ាមែន អ្នកក៏ត្រូវស្ដាប់បង្គាប់លោកដែរ។
ព្រះយេហូវ៉ាការពារមិត្តសម្លាញ់របស់លោក
៤, ៥. តើព្រះយេហូវ៉ាការពារមិត្តសម្លាញ់របស់លោកយ៉ាងដូចម្ដេច?
៤ គម្ពីរចែងថាព្រះយេហូវ៉ាស្វែងរកឱកាសដើម្បី«សំដែងព្រះចេស្ដា ជួយដល់អស់អ្នកណាដែលមានចិត្តស្មោះត្រង់ចំពោះទ្រង់»។ (របាក្សត្រទី២ ១៦:៩) នៅទំនុកតម្កើង ៣២:៨ ព្រះយេហូវ៉ាសន្យាចំពោះមិត្តសម្លាញ់របស់លោកថា៖ «អញនឹងបង្ហាត់បង្រៀនឲ្យឯងស្គាល់ផ្លូវដែលឯងត្រូវដើរ អញនឹងទូន្មានឯង ដោយភ្នែកអញមើលឯងជាប់»។
៥ មានសត្រូវដ៏ខ្លាំងក្លាមួយរូបដែលចង់រារាំងយើងមិនឲ្យធ្វើជាសម្លាញ់របស់ព្រះ។ ក៏ប៉ុន្តែ ព្រះយេហូវ៉ាចង់ការពារយើង។ (សូមអាន ទំនុកតម្កើង ៥៥:២២) ក្នុងនាមជាមិត្តរបស់ព្រះយេហូវ៉ា យើងបម្រើលោកដោយអស់ពីចិត្ត។ យើងស្មោះត្រង់ចំពោះលោក ទោះបីជាស្ថិតនៅក្រោមស្ថានភាពដ៏ពិបាកក្ដី។ យើងមានទំនុកចិត្តដូចអ្នកតែងទំនុកតម្កើងដែលសរសេរអំពីព្រះយេហូវ៉ាថា៖ «ដោយព្រោះទ្រង់គង់នៅខាងស្ដាំទូលបង្គំ បានជាទូលបង្គំមិនត្រូវរង្គើឡើយ»។ (ទំនុកតម្កើង ១៦:៨; ៦៣:៨) ដូច្នេះ តើតាមរបៀបណាសាថានព្យាយាមរារាំងយើងមិនឲ្យធ្វើជាមិត្តសម្លាញ់របស់ព្រះ?
ការចោទប្រកាន់របស់សាថាន
៦. តើសាថានចោទប្រកាន់មនុស្សជាតិយ៉ាងដូចម្ដេច?
៦ នៅជំពូកទី១១ យើងបានរៀនថាសាថានបានចោទប្រកាន់ព្រះយេហូវ៉ាថាលោកជាអ្នកកុហក និងគ្មានយុត្ដិធម៌ ដោយសារវាគិតថាលោកមិនអនុញ្ញាតឲ្យអាដាមនិងអេវ៉ាសម្រេចចិត្តដោយខ្លួនឯងអំពីអ្វីដែលខុសនិងអ្វីដែលត្រូវ។ មិនត្រឹមតែប៉ុណ្ណោះ ក្នុងគម្ពីរនៅសៀវភៅយ៉ូបប្រាប់ថាសាថានក៏បានចោទប្រកាន់មនុស្សដែលចង់ធ្វើជាសម្លាញ់របស់ព្រះដែរ។ សាថានចោទថាមនុស្សបម្រើព្រះដោយសារតែពួកគេទទួលប្រយោជន៍ពីលោក មិនមែនដោយសារស្រឡាញ់លោកទេ។ សាថានថែមទាំងអះអាងថាវាអាចនាំអ្នកណាក៏បានឲ្យប្រឆាំងព្រះ។ សូមឲ្យយើងពិចារណាអំពីអ្វីដែលយើងអាចរៀនពីគំរូរបស់យ៉ូប និងរបៀបដែលព្រះយេហូវ៉ាបានការពារគាត់។
៧, ៨. (ក) ហេតុអ្វីយ៉ូបខុសពីមនុស្សឯទៀតនៅផែនដី? (ខ) តើសាថាននិយាយយ៉ាងណាអំពីយ៉ូប?
៧ តើយ៉ូបជាអ្នកណា? គាត់ជាមនុស្សល្អដែលរស់នៅប្រមាណ៣.៦០០ឆ្នាំមុន។ ព្រះយេហូវ៉ាមានប្រសាសន៍ថានៅគ្រានោះគ្មានមនុស្សណាដូចយ៉ូបទេនៅផែនដី។ យ៉ូបគោរពព្រះយ៉ាងជ្រាលជ្រៅ ហើយគាត់ស្អប់អំពើអាក្រក់។ (យ៉ូប ១:៨) យ៉ូបជាមិត្តសម្លាញ់ពិតរបស់ព្រះយេហូវ៉ា។
៨ សាថានអះអាងថាយ៉ូបបម្រើព្រះយេហូវ៉ាដើម្បីតែប្រយោជន៍ខ្លួនប៉ុណ្ណោះ។ វានិយាយទៅព្រះថា៖ «តើទ្រង់មិនបានធ្វើរបងព័ទ្ធជុំវិញ ព្រមទាំងគ្រួ នឹងរបស់ដែលគាត់មានទាំងប៉ុន្មានផងទេឬអី ទ្រង់បានប្រទានពរ ដល់ការដែលដៃគាត់ធ្វើ ទ្រព្យសម្បត្ដិគាត់ក៏បានចំរើនឡើងនៅលើផែនដី ដូច្នេះ ចូរទ្រង់គ្រាន់តែលូកព្រះហស្ត ទៅពាល់របស់ផងគាត់ទាំងប៉ុន្មានចុះ នោះគាត់នឹងប្រមាថដល់ទ្រង់ នៅចំពោះព្រះភក្ដ្រ»។—យ៉ូប ១:១០, ១១
៩. តើព្រះយេហូវ៉ាអនុញ្ញាតឲ្យសាថានធ្វើអ្វីចំពោះយ៉ូប?
៩ សាថានចោទថាយ៉ូបបម្រើព្រះយេហូវ៉ាដោយសារព្រះឲ្យពរគាត់។ សាថានក៏អះអាងដែរថាវាអាចធ្វើឲ្យយ៉ូបឈប់បម្រើព្រះយេហូវ៉ាបាន។ ព្រះមិនយល់ស្របនឹងការអះអាងរបស់សាថានទេ ប៉ុន្តែលោកបានអនុញ្ញាតឲ្យវាល្បងលយ៉ូប ដើម្បីឲ្យដឹងថា តើយ៉ូបជាសម្លាញ់របស់ព្រះដោយសារគាត់ស្រឡាញ់លោកមែនឬក៏មិនមែន?
សាថានវាយប្រហារយ៉ូប
១០. តើសាថានបានវាយប្រហារយ៉ូបយ៉ាងដូចម្ដេច ហើយតើយ៉ូបមានប្រតិកម្មយ៉ាងណា?
១០ ដំបូង សាថានបានលួច ឬក៏បានសម្លាប់ចោលសត្វទាំងអស់ដែលជារបស់យ៉ូប។ បន្ទាប់មក សាថានបានសម្លាប់អ្នកបម្រើយ៉ូបស្ទើរតែគ្មានសល់។ ចុងក្រោយ សាថានបានធ្វើឲ្យមានខ្យល់ព្យុះដើម្បីសម្លាប់កូនទាំង១០នាក់របស់យ៉ូបទៀត។ យ៉ូបបាត់បង់អ្វីៗទាំងអស់។ យ៉ាងណាក៏ដោយ យ៉ូបនៅតែរក្សាចិត្តស្មោះត្រង់ចំពោះព្រះយេហូវ៉ា។ គម្ពីរចែងថា៖ «ក្នុងគ្រប់សេចក្ដីទាំងនេះយ៉ូបមិនបានធ្វើបាបឡើយ ក៏មិនបានប្រកាន់ទោសដល់ព្រះដែរ»។—យ៉ូប ១:១២-១៩, ២២
ព្រះយេហូវ៉ាផ្ដល់រង្វាន់ដល់យ៉ូបដោយសារគាត់ជាមិត្តដ៏ស្មោះត្រង់
១១. (ក) តើសាថានបានធ្វើអ្វីទៀតចំពោះយ៉ូប? (ខ) តើយ៉ូបបានធ្វើអ្វី?
១១ ក៏ប៉ុន្តែ សាថានមិនព្រមឈប់ទេ។ វានិយាយទៅព្រះថា៖ «ចូរទ្រង់គ្រាន់តែលូកព្រះហស្តទៅពាល់ដល់ឆ្អឹង នឹងសាច់គាត់ចុះ នោះគាត់នឹងប្រមាថដល់ទ្រង់ នៅចំពោះព្រះភក្ដ្រ»។ ដូច្នេះ ព្រះអនុញ្ញាតឲ្យសាថានធ្វើឲ្យយ៉ូបកើតជំងឺមួយដែលនាំឲ្យឈឺចាប់យ៉ាងខ្លាំង។ (យ៉ូប ២:៥, ៧) ទោះជាយ៉ាងនោះក្ដី យ៉ូបនៅតែស្មោះភក្ដីចំពោះព្រះយេហូវ៉ា។ គម្ពីរចែងថា៖ «ក្នុងគ្រប់ទាំងសេចក្ដីទាំងនោះ យ៉ូបមិនបានធ្វើឲ្យខ្លួនសៅហ្មង ដោយបបូរមាត់»ឬដោយនិយាយប្រឆាំងនឹងព្រះទេ។—យ៉ូប ២:១០
១២. តើយ៉ូបបានបង្ហាញយ៉ាងណាថាសាថានជាអ្នកកុហក?
១២ យ៉ូបមិនបានដឹងសោះអំពីការចោទប្រកាន់របស់សាថាន ឬមូលហេតុដែលគាត់រងទុក្ខវេទនាដូច្នេះ។ គាត់គិតថាព្រះយេហូវ៉ាជាអ្នកបណ្ដាលឲ្យគាត់មានទុក្ខវេទនាទាំងនេះ។ (យ៉ូប ៦:៤; ១៦:១១-១៤) យ៉ាងណាក៏ដោយ យ៉ូបនៅតែស្មោះត្រង់ចំពោះព្រះយេហូវ៉ា។ នេះបង្ហាញយ៉ាងច្បាស់ថាយ៉ូបមិនមែនបម្រើព្រះដើម្បីតែប្រយោជន៍ខ្លួនទេ។ យ៉ូបជាមិត្តសម្លាញ់ពិតរបស់ព្រះ ដោយសារគាត់ស្រឡាញ់លោក។ ដូច្នេះ ការចោទប្រកាន់របស់សាថានគឺមិនពិតទាល់តែសោះ!
១៣. តើយ៉ូបបានទទួលអ្វីដោយសារគាត់ស្មោះត្រង់នឹងព្រះ?
១៣ ទោះជាយ៉ូបមិនដឹងថាមានអ្វីកើតឡើងនៅស្ថានសួគ៌ក៏ដោយ តែគាត់ស្មោះត្រង់នឹងព្រះ ព្រមទាំងបង្ហាញថាសាថានជាបុគ្គលអាក្រក់។ ព្រះយេហូវ៉ាផ្ដល់រង្វាន់ឲ្យយ៉ូបដោយសារគាត់ជាមិត្តភក្ដិដ៏ស្មោះត្រង់។—យ៉ូប ៤២:១២-១៧
សាថានក៏ចោទប្រកាន់អ្នកដែរ
១៤, ១៥. តើសាថានចោទប្រកាន់មនុស្សទាំងអស់យ៉ាងដូចម្ដេច?
១៤ អ្នកអាចរៀនមេរៀនដ៏សំខាន់ពីអ្វីដែលបានកើតឡើងចំពោះយ៉ូប។ នៅសព្វថ្ងៃនេះ សាថានចោទប្រកាន់ថាយើងបម្រើព្រះយេហូវ៉ាដោយសារតែយើងអាចទទួលប្រយោជន៍ពីលោក។ នៅយ៉ូប ២:៤ សាថានអះអាងថា៖ «មនុស្សនឹងសុខចិត្តលះបង់ទាំងអស់ចោល ដើម្បីឲ្យបានជីវិតគង់នៅ»។ យ៉ាងនេះ សាថានកំពុងចោទប្រកាន់មនុស្សទាំងអស់ថាពួកគេគិតតែពីប្រយោជន៍ផ្ទាល់ខ្លួន មិនគ្រាន់តែយ៉ូបប៉ុណ្ណោះទេ។ រាប់រយឆ្នាំក្រោយពីយ៉ូបស្លាប់ សាថាននៅតែបន្តមើលងាយព្រះយេហូវ៉ា និងចោទប្រកាន់អ្នកបម្រើរបស់លោក។ ជាឧទាហរណ៍ នៅសុភាសិត ២៧:១១ ចែងថា៖ «កូនអើយ ចូរឲ្យឯងមានប្រាជ្ញាឡើង ហើយឲ្យចិត្តអញបានរីករាយចុះ ដើម្បីឲ្យអញអាចតបឆ្លើយចំពោះមនុស្សដែលដៀលតិះ[ឬមើលងាយ]ដល់អញ»។
១៥ អ្នកអាចជ្រើសរើសស្ដាប់បង្គាប់ព្រះយេហូវ៉ា ហើយធ្វើជាសម្លាញ់ដ៏ស្មោះត្រង់របស់លោក ព្រមទាំងបង្ហាញថាសាថានជាអ្នកកុហក។ ទោះជាអ្នកត្រូវធ្វើការកែប្រែយ៉ាងខ្លាំងក្នុងជីវិតដើម្បីក្លាយទៅជាមិត្តសម្លាញ់របស់ព្រះយេហូវ៉ាក្ដី តែនេះជាការសម្រេចចិត្តដ៏ល្អបំផុត! ការសម្រេចចិត្តរបស់អ្នកគឺជារឿងសំខាន់ណាស់។ ហេតុអ្វី? ពីព្រោះសាថានអះអាងថាអ្នកនឹងមិនអាចស្មោះត្រង់ចំពោះព្រះបានទេ ពេលដែលអ្នកមានបញ្ហា។ វាព្យាយាមបោកបញ្ឆោតយើងឲ្យលែងស្មោះត្រង់នឹងព្រះទៀត។ តើតាមរបៀបណា?
១៦. (ក) តើសាថានខំនាំមនុស្សឲ្យឈប់បម្រើព្រះយេហូវ៉ាដោយប្រើវិធីណាខ្លះ? (ខ) តើតាមរបៀបណាមេកំណាចខំរារាំងអ្នកផ្ទាល់មិនឲ្យបម្រើព្រះយេហូវ៉ា?
១៦ សាថានប្រើវិធីផ្សេងៗដើម្បីព្យាយាមធ្វើឲ្យយើងលែងជាសម្លាញ់របស់ព្រះ។ វាពាធាយើង«ដូចតោដែលកំពុងគ្រហឹមរកលេបត្របាក់អ្នកណាម្នាក់»។ (ពេត្រុសទី១ ៥:៨) សូមកុំភ្ញាក់ផ្អើលឡើយ ពេលដែលមិត្តភក្ដិ ក្រុមគ្រួសារ ឬអ្នកឯទៀតព្យាយាមបញ្ឈប់អ្នកមិនឲ្យសិក្សាគម្ពីរ និងមិនឲ្យធ្វើអ្វីដែលព្រះពេញចិត្ត។ នៅពេលនោះអ្នកប្រហែលជានឹងមានអារម្មណ៍ថាខ្លួនកំពុងទទួលរងការវាយប្រហារពីគ្រប់ទិសទី។a (យ៉ូហាន ១៥:១៩, ២០) ម្យ៉ាងទៀត សាថានបានក្លែងខ្លួន«ជាទេវតានៃពន្លឺ»។ ដូច្នេះតាមរបៀបនេះ វាប្រហែលជាព្យាយាមបោកបញ្ឆោតយើងឲ្យឈប់ស្ដាប់បង្គាប់ព្រះយេហូវ៉ា។ (កូរិនថូសទី២ ១១:១៤) វិធីមួយទៀតដែលសាថានប្រើដើម្បីខំរារាំងយើងមិនឲ្យបម្រើព្រះយេហូវ៉ា គឺវាធ្វើឲ្យយើងគិតថាយើងមិនល្អគ្រប់គ្រាន់ដើម្បីបម្រើលោកទេ។—សុភាសិត ២៤:១០
ចូរធ្វើតាមបញ្ញត្ដិរបស់ព្រះយេហូវ៉ា
១៧. ហេតុអ្វីយើងស្ដាប់បង្គាប់ព្រះយេហូវ៉ា?
១៧ ពេលយើងស្ដាប់បង្គាប់ព្រះយេហូវ៉ា យើងបង្ហាញថាសាថានជាអ្នកកុហក។ តើអ្វីនឹងជួយយើងឲ្យស្ដាប់បង្គាប់លោក? គម្ពីរប្រាប់ថា៖ «ត្រូវឲ្យឯងស្រឡាញ់ព្រះយេហូវ៉ា ជាព្រះនៃឯងឲ្យអស់ពីចិត្ត អស់ពីព្រលឹង ហើយអស់ពីកំឡាំងឯង»។ (ចោទិយកថា ៦:៥) យើងធ្វើតាមបញ្ញត្ដិរបស់ព្រះដោយសារយើងស្រឡាញ់លោក។ កាលដែលយើងស្រឡាញ់ព្រះយេហូវ៉ាកាន់តែខ្លាំង នោះយើងនឹងខំអស់ពីសមត្ថភាពដើម្បីធ្វើតាមបង្គាប់លោក។ សាវ័កយ៉ូហានបានសរសេរថា៖ «ការស្រឡាញ់ព្រះ មានន័យថា យើងកាន់តាមបញ្ញត្ដិរបស់លោក ហើយបញ្ញត្ដិរបស់លោកមិនមែនជាបន្ទុកធ្ងន់ទេ»។—យ៉ូហានទី១ ៥:៣
១៨, ១៩. (ក) តើបញ្ញត្ដិរបស់ព្រះយេហូវ៉ាប្រាប់អំពីការប្រព្រឹត្តអ្វីខ្លះដែលយើងត្រូវជៀសវាង? (ខ) តើយើងដឹងយ៉ាងដូចម្ដេចថាព្រះយេហូវ៉ាមិនដែលតម្រូវឲ្យយើងធ្វើអ្វីដែលហួសពីសមត្ថភាពរបស់យើង?
១៨ តើបញ្ញត្ដិរបស់ព្រះយេហូវ៉ាប្រាប់អំពីការប្រព្រឹត្តអ្វីខ្លះដែលយើងត្រូវជៀសវាង? មានបញ្ញត្ដិខ្លះក្នុងប្រអប់ដែលមានចំណងជើងថា «ចូរស្អប់អ្វីដែលព្រះយេហូវ៉ាស្អប់»។ មុនដំបូង អ្នកប្រហែលជាគិតថាការប្រព្រឹត្តខ្លះមើលទៅមិនសូវជាអាក្រក់ប៉ុន្មានទេ។ ក៏ប៉ុន្តែ ពេលអ្នកអានខគម្ពីរដែលមានក្នុងប្រអប់នោះ ហើយរំពឹងគិតយ៉ាងជ្រាលជ្រៅ នោះអ្នកនឹងឃើញថាការធ្វើតាមបញ្ញត្ដិរបស់ព្រះយេហូវ៉ានាំឲ្យអ្នកទទួលប្រយោជន៍។ ម្យ៉ាងទៀត អ្នកទំនងជាមានអារម្មណ៍ថាអ្នកត្រូវកែប្រែការប្រព្រឹត្តខ្លះរបស់ខ្លួន។ ជួនកាល ទោះជានេះប្រហែលជាពិបាកក៏ពិតមែន តែបើអ្នកសុខចិត្តកែប្រែ នោះអ្នកនឹងមានសេចក្ដីសុខសាន្ត និងសុភមង្គលដែលមកពីការធ្វើជាសម្លាញ់របស់ព្រះ។ (អេសាយ ៤៨:១៧, ១៨) តើយើងដឹងយ៉ាងដូចម្ដេចថាយើងពិតជាអាចកែប្រែការប្រព្រឹត្តរបស់យើងបាន?
១៩ ព្រះយេហូវ៉ាមិនដែលតម្រូវឲ្យយើងធ្វើអ្វីដែលហួសពីសមត្ថភាពរបស់យើងទេ។ (ចោទិយកថា ៣០:១១-១៤) ដោយសារលោកជាមិត្តសម្លាញ់ពិតរបស់យើង នោះលោកជ្រាបអំពីកម្រិតសមត្ថភាពរបស់យើងច្បាស់ជាងយើងទៅទៀត។ លោកជ្រាបអំពីចំណុចខ្លាំងនិងចំណុចខ្សោយរបស់យើង។ (ទំនុកតម្កើង ១០៣:១៤) សាវ័កប៉ូលលើកទឹកចិត្តយើងថា៖ «ព្រះគឺស្មោះត្រង់ ហើយលោកនឹងមិនឲ្យអ្នករាល់គ្នារងការល្បួងហួសពីសមត្ថភាពស៊ូទ្រាំរបស់អ្នករាល់គ្នាឡើយ តែលោកក៏នឹងរៀបចំផ្លូវចេញ ដើម្បីឲ្យអ្នករាល់គ្នាអាចស៊ូទ្រាំនៅពេលជួបប្រទះសេចក្ដីល្បួងនោះ»។ (កូរិនថូសទី១ ១០:១៣) យើងអាចមានទំនុកចិត្តថាព្រះយេហូវ៉ាតែងតែផ្ដល់កម្លាំងឲ្យយើងធ្វើតាមបញ្ញត្ដិរបស់លោក។ លោកនឹងផ្ដល់ឲ្យអ្នកនូវ«ឫទ្ធានុភាពដែលលើសពីធម្មតា»ដើម្បីជួយអ្នកឲ្យស៊ូទ្រាំនឹងស្ថានភាពពិបាក។ (កូរិនថូសទី២ ៤:៧) ក្នុងគ្រាលំបាក ប៉ូលបានទទួលជំនួយពីព្រះយេហូវ៉ា នោះគាត់អាចនិយាយថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។—ភីលីព ៤:១៣
ចូររៀនស្រឡាញ់អ្វីដែលព្រះស្រឡាញ់
២០. តើអ្នកគួរយកតម្រាប់ព្រះក្នុងការបង្ហាញគុណសម្បត្ដិណាខ្លះ ហើយហេតុអ្វី?
២០ បើយើងចង់ធ្វើជាមិត្តសម្លាញ់ព្រះយេហូវ៉ា យើងមិនគ្រាន់តែជៀសវាងពីអ្វីដែលលោកស្អប់ប៉ុណ្ណោះទេ តែយើងក៏ត្រូវធ្វើលើសពីនោះទៅទៀត។ (រ៉ូម ១២:៩) មិត្តរបស់ព្រះស្រឡាញ់អ្វីដែលលោកស្រឡាញ់។ លក្ខណៈខ្លះៗដែលលោកស្រឡាញ់បានត្រូវរៀបរាប់នៅទំនុកតម្កើង ១៥:១-៥។ (សូមអាន) មិត្តរបស់ព្រះយេហូវ៉ាត្រូវបណ្ដុះឲ្យមានគុណសម្បត្ដិដូចលោក ហើយបង្ហាញ«សេចក្ដីស្រឡាញ់ អំណរ សេចក្ដីសុខសាន្ត ចិត្តធ្ងន់ សេចក្ដីសប្បុរស គុណធម៌ ជំនឿ ចិត្តស្លូតបូត ការចេះទប់ចិត្ត»។—កាឡាទី ៥:២២, ២៣
២១. តើតាមរបៀបណាអ្នកអាចរៀនបង្ហាញគុណសម្បត្ដិដែលព្រះស្រឡាញ់?
២១ តើតាមរបៀបណាអ្នកអាចរៀនបង្ហាញគុណសម្បត្ដិទាំងនោះ? អ្នកត្រូវរៀនអ្វីដែលព្រះយេហូវ៉ាស្រឡាញ់ ដោយអាននិងសិក្សាគម្ពីរជាទៀងទាត់។ (អេសាយ ៣០:២០, ២១) កាលដែលអ្នកធ្វើដូច្នេះ អ្នកនឹងស្រឡាញ់ព្រះយេហូវ៉ាកាន់តែខ្លាំង ហើយនោះនឹងជំរុញចិត្តអ្នកឲ្យចង់ស្ដាប់បង្គាប់លោក។
២២. តើអ្នកនឹងទទួលប្រយោជន៍អ្វីខ្លះបើអ្នកស្ដាប់បង្គាប់ព្រះយេហូវ៉ា?
២២ ការកែប្រែដែលអ្នកត្រូវធ្វើជាចាំបាច់អាចប្រៀបដូចជាការដោះសម្លៀកបំពាក់ចាស់ចេញ ហើយពាក់សម្លៀកបំពាក់ថ្មីវិញ។ គម្ពីរប្រាប់ថាអ្នកត្រូវ«ដោះចេញនូវបុគ្គលិកលក្ខណៈចាស់» រួចអ្នកត្រូវ«បំពាក់ខ្លួនដោយបុគ្គលិកលក្ខណៈថ្មី»។ (កូឡុស ៣:៩, ១០) ទោះជាការធ្វើដូចនោះគឺមិនងាយស្រួលក៏ដោយ តែពេលដែលយើងកែប្រែលក្ខណៈមិនល្អរបស់យើង ហើយធ្វើតាមបញ្ញត្ដិរបស់ព្រះយេហូវ៉ា លោកសន្យាថានឹងផ្ដល់«រង្វាន់យ៉ាងធំ»ដល់យើង។ (ទំនុកតម្កើង ១៩:១១) សូមសម្រេចចិត្តស្ដាប់បង្គាប់ព្រះយេហូវ៉ា ហើយបង្ហាញថាសាថានជាអ្នកកុហក។ សូមបម្រើព្រះយេហូវ៉ា មិនមែនដោយសាររង្វាន់ណាមួយនៅអនាគតនោះទេ តែដោយសារអ្នកស្រឡាញ់លោកដោយស្មោះ។ ដោយធ្វើដូច្នេះ អ្នកនឹងក្លាយទៅជាមិត្តសម្លាញ់ពិតរបស់ព្រះ!
a នេះមិនមានន័យថាសាថានកំពុងតែកាន់កាប់គំនិតរបស់មនុស្សដែលប្រឆាំងអ្នកមិនឲ្យសិក្សាគម្ពីរនោះទេ។ ក៏ប៉ុន្តែ សាថានគឺជា«ព្រះនៃរបៀបរបបពិភពលោកនេះ» ហើយ«ពិភពលោកទាំងមូលនៅក្រោមអំណាចរបស់មេកំណាច»។ ដូច្នេះ យើងមិនភ្ញាក់ផ្អើលឡើយពេលមនុស្សខ្លះព្យាយាមមិនឲ្យយើងបម្រើព្រះយេហូវ៉ា។—កូរិនថូសទី២ ៤:៤; យ៉ូហានទី១ ៥:១៩