មេរៀនទី៣២
អ្នកដឹកនាំថ្មីនិងស្ត្រីក្លាហានពីរនាក់
ក្រោយពីយ៉ូស្វេដឹកនាំរាស្ត្ររបស់ព្រះយេហូវ៉ាអស់ជាច្រើនឆ្នាំមក គាត់បានស្លាប់នៅអាយុ១១០ឆ្នាំ។ អំឡុងពេលដែលយ៉ូស្វេនៅរស់ ជនជាតិអ៊ីស្រាអែលគោរពប្រណិប័តន៍ព្រះយេហូវ៉ា។ ប៉ុន្តែ បន្ទាប់ពីយ៉ូស្វេស្លាប់ ពួកគេបែរទៅគោរពបូជារូបព្រះផ្សេងៗដូចជនជាតិកាណាន។ ហេតុនេះ ព្រះយេហូវ៉ាបានបណ្ដោយឲ្យយ៉ាប៊ីនជាស្ដេចស្រុកកាណាន សង្កត់សង្កិនធ្វើបាបពួកគេ។ បណ្ដាជនអ៊ីស្រាអែលបានអង្វរសុំព្រះយេហូវ៉ាឲ្យជួយពួកគេ។ ដូច្នេះ លោកបានតែងតាំងបារ៉ាក់ឲ្យធ្វើជាអ្នកដឹកនាំថ្មី ដើម្បីជួយបណ្ដាជនឲ្យត្រឡប់មកឯព្រះយេហូវ៉ាវិញ។
អ្នកប្រកាសទំនាយស្រីម្នាក់ឈ្មោះដេបូរ៉ា បានចាត់គេឲ្យទៅហៅបារ៉ាក់មកជួបនាង។ នាងបានប្រាប់បារ៉ាក់នូវប្រសាសន៍របស់ព្រះយេហូវ៉ាថា៖ ‹ចូរនាំមនុស្ស១០.០០០នាក់ ទៅច្បាំងនឹងកងទ័ពរបស់យ៉ាប៊ីននៅឯស្ទឹងគីសុន។ នៅទីនោះ អ្នកនឹងវាយឈ្នះស៊ីសេរ៉ាដែលជាមេទ័ពរបស់យ៉ាប៊ីន›។ បារ៉ាក់ប្រាប់ដេបូរ៉ាថា៖ «ខ្ញុំនឹងទៅ បើនាងទៅជាមួយនឹងខ្ញុំ»។ នាងនិយាយថា៖ ‹ខ្ញុំនឹងទៅជាមួយអ្នក តែមិនមែនអ្នកដែលនឹងសម្លាប់ស៊ីសេរ៉ាទេ។ ព្រះយេហូវ៉ាបានមានប្រសាសន៍ថា គឺស្ត្រីម្នាក់នឹងសម្លាប់គាត់វិញ›។
ដេបូរ៉ាបានចេញទៅជាមួយបារ៉ាក់និងទាហានរបស់គាត់ឡើងភ្នំថេបោ ដើម្បីត្រៀមប្រយុទ្ធ។ កាលស៊ីសេរ៉ាឮដំណឹងនេះ គាត់ប្រញាប់ប្រមូលរទេះចម្បាំងនិងកងទ័ពទៅជ្រលងភ្នំខាងក្រោម។ ដេបូរ៉ាប្រាប់បារ៉ាក់ថា៖ ‹ថ្ងៃនេះ ព្រះយេហូវ៉ានឹងឲ្យអ្នកទទួលជ័យជម្នះ›។ បារ៉ាក់និងទាហាន១០.០០០នាក់សម្រុកចុះពីភ្នំ ទៅច្បាំងនឹងកងទ័ពដ៏ខ្លាំងក្លារបស់ស៊ីសេរ៉ា។
បន្ទាប់មក ព្រះយេហូវ៉ាបានធ្វើឲ្យទឹកស្ទឹងគីសុនជន់ឡើង។ រទេះចម្បាំងរបស់ស៊ីសេរ៉ាជាប់គាំងក្នុងភក់ ដូច្នេះគាត់ទុករទេះចោល ហើយរត់ចេញទៅ។ បារ៉ាក់និងទាហានរបស់គាត់បានវាយឈ្នះកងទ័ពរបស់ស៊ីសេរ៉ា ប៉ុន្តែស៊ីសេរ៉ាបានរត់គេចខ្លួន! គាត់រត់ទៅលាក់ខ្លួនក្នុងត្រសាលរបស់ស្ត្រីម្នាក់ឈ្មោះយ៉ាអែល។ នាងបានឲ្យគាត់ផឹកទឹកដោះគោ រួចយកភួយដណ្ដប់ឲ្យគាត់។ មេទ័ពនេះអស់កម្លាំងជាខ្លាំង រហូតដល់ដេកលក់។ ពេលនោះយ៉ាអែលបានដើរលបៗទៅជិតគាត់ រួចយកស្នឹងដំក្បាលស៊ីសេរ៉ាធ្លុះដល់ដី ហើយគាត់ក៏ស្លាប់ទៅ។
បារ៉ាក់បានដេញតាមស៊ីសេរ៉ា រហូតដល់ត្រសាលរបស់យ៉ាអែល។ យ៉ាអែលចេញមកជួបគាត់ ហើយនិយាយថា៖ «សូមចូលក្នុង ខ្ញុំនឹងបង្ហាញបុរសដែលអ្នកកំពុងរក»។ បារ៉ាក់ក៏ចូលទៅក្នុង ហើយឃើញស៊ីសេរ៉ាដេកស្លាប់។ រួចមក បារ៉ាក់និងដេបូរ៉ាបានច្រៀងសរសើរព្រះយេហូវ៉ា ដែលបានជួយជនជាតិអ៊ីស្រាអែលឲ្យវាយឈ្នះពួកសត្រូវ។ ចាប់ពីពេលនោះមក ជនជាតិអ៊ីស្រាអែលមានសន្តិភាពអស់៤០ឆ្នាំ។
«ពួកស្ត្រីដែលកំពុងប្រកាសដំណឹងល្អ ពួកនាងប្រៀបដូចជាកងទ័ពដ៏ធំមួយ»។—ចម្រៀងសរសើរព្រះ ៦៨:១១