មេរៀនទី៥៦
យ៉ូសៀសស្រឡាញ់ច្បាប់របស់ព្រះ
ពេលយ៉ូសៀសអាយុ៨ឆ្នាំ គាត់បានទៅជាស្ដេចស្រុកយូដា។ នៅពេលនោះ បណ្ដាជននាំគ្នាធ្វើអំពើមន្តអាគម និងគោរពបូជារូបព្រះផ្សេងៗ។ ពេលអាយុ១៦ឆ្នាំ យ៉ូសៀសព្យាយាមរៀនអំពីការគោរពប្រណិប័តន៍ព្រះយេហូវ៉ាតាមរបៀបត្រឹមត្រូវ។ ពេលអាយុ២០ឆ្នាំ គាត់ចាប់ផ្ដើមបំផ្លាញរូបព្រះនិងទីបូជាទាំងអស់នៅក្នុងស្រុក។ ពេលអាយុ២៦ឆ្នាំ គាត់រៀបចំឲ្យមានការជួសជុលវិហាររបស់ព្រះយេហូវ៉ា។
នៅថ្ងៃមួយក្នុងវិហារ សម្ដេចសង្ឃហ៊ីលគីយ៉ាបានរកឃើញរមូរច្បាប់របស់ព្រះយេហូវ៉ា។ នោះប្រហែលជារមូរដែលសរសេរដោយម៉ូសេ។ សាផានដែលជាស្មៀនបានយករមូរនោះទៅឲ្យយ៉ូសៀស ហើយចាប់ផ្ដើមអានឲ្យយ៉ូសៀសស្ដាប់។ ពេលនោះទើបយ៉ូសៀសដឹងថា បណ្ដាជនមិនបានស្ដាប់បង្គាប់ព្រះយេហូវ៉ាអស់ជាយូរឆ្នាំហើយ។ ស្ដេចបាននិយាយទៅហ៊ីលគីយ៉ាថា៖ ‹ព្រះយេហូវ៉ាខឹងនឹងយើងរាល់គ្នាខ្លាំងណាស់។ សូមអ្នកទៅនិយាយជាមួយនឹងលោក ដើម្បីដឹងថាយើងត្រូវធ្វើអ្វី›។ ព្រះយេហូវ៉ាឆ្លើយតបតាមរយៈស្ត្រីម្នាក់ឈ្មោះហ៊ូលដា ជាអ្នកប្រកាសទំនាយ ដោយប្រាប់ថា៖ ‹បណ្ដាជនយូដាបានចាកចេញពីខ្ញុំ។ ដូច្នេះ ខ្ញុំនឹងដាក់ទោសពួកគេ។ ប៉ុន្តែ មិនមែនក្នុងពេលដែលយ៉ូសៀសធ្វើជាស្ដេចទេ ពីព្រោះគាត់បានបង្ហាញចិត្តរាបទាប›។
ពេលយ៉ូសៀសឮដូច្នេះ គាត់បានកោះហៅបណ្ដាជនយូដាទាំងអស់ឲ្យមកជួបជុំគ្នានៅឯវិហារ។ បន្ទាប់មក ស្ដេចបានអានច្បាប់របស់ព្រះយេហូវ៉ាឲ្យពួកគេស្ដាប់។ រួចមក យ៉ូសៀសនិងបណ្ដាជនបានសន្យាថា ពួកគេនឹងស្ដាប់បង្គាប់ព្រះយេហូវ៉ាអស់ពីដួងចិត្ត។
អស់ជាច្រើនឆ្នាំ បណ្ដាជនយូដាមិនបានធ្វើបុណ្យរំលងទេ។ ប៉ុន្តែ ពេលយ៉ូសៀសអានរមូរច្បាប់ថា ត្រូវធ្វើបុណ្យរំលងជារៀងរាល់ឆ្នាំ នោះគាត់ប្រាប់បណ្ដាជនថា៖ ‹យើងនឹងធ្វើបុណ្យរំលងជូនព្រះយេហូវ៉ា›។ រួចមក យ៉ូសៀសបានរៀបចំគ្រឿងបូជាជាច្រើន ហើយចាត់ចែងក្រុមមួយឲ្យច្រៀងនៅវិហារ។ ឥឡូវ បណ្ដាជនបានធ្វើបុណ្យរំលង។ បន្ទាប់មកទៀត ពួកគេបានធ្វើបុណ្យនំប៉័ងឥតដំបែអស់រយៈពេល៧ថ្ងៃ។ តាំងពីសម័យសាំយូអែលមក មិនដែលមានបុណ្យរំលងណាដូចបុណ្យរំលងនេះទេ។ យ៉ូសៀសពិតជាស្រឡាញ់ច្បាប់របស់ព្រះខ្លាំងណាស់! តើអ្នកចូលចិត្តរៀនអំពីព្រះយេហូវ៉ាទេ?
«ប្រសាសន៍របស់លោកជាចង្កៀងបំភ្លឺជើងខ្ញុំនិងជាពន្លឺបំភ្លឺផ្លូវខ្ញុំ»។—ចម្រៀងសរសើរព្រះ ១១៩:១០៥