ប្រអប់ការពន្យល់បន្ថែម ២០ក
ការបែងចែកដីធ្លី
ការពណ៌នាអំពីព្រំប្រទល់ដែលបានត្រូវវាស់វែងយ៉ាងត្រឹមត្រូវបានពង្រឹងទំនុកចិត្តជននិរទេសថា ស្រុកជាទីស្រឡាញ់របស់ពួកគេនឹងត្រូវរៀបចំឡើងវិញជាមិនខាន។ នៅសព្វថ្ងៃ តើយើងអាចទាញមេរៀនអ្វីខ្លះពីការបើកបង្ហាញនេះ? សូមពិចារណាចំណុចពីរដូចតទៅ៖
តួនាទីដ៏សំខាន់និងភារកិច្ចដ៏មានតម្លៃ
ជននិរទេសម្នាក់ៗដែលត្រឡប់មកវិញនឹងទទួលដីធ្លីជាមត៌កក្នុងស្រុកសន្យាដែលបានត្រូវរៀបចំសាជាថ្មី។ ស្រដៀងគ្នាដែរ សព្វថ្ងៃនេះអ្នកបម្រើទាំងអស់របស់ព្រះយេហូវ៉ាមានតួនាទីសំខាន់ក្នុងសួនឧទ្យានក្នុងន័យធៀប។ ទោះជាយើងមានកិច្ចការតូចតាចក្នុងអង្គការរបស់ព្រះក្ដី យើងទាំងអស់គ្នាមានតួនាទីសំខាន់និងភារកិច្ចដ៏មានតម្លៃ។ ចំពោះព្រះយេហូវ៉ា អ្នកបម្រើរបស់លោកមានតម្លៃស្មើគ្នា។
ការបែងចែកដីធ្លីស្មើគ្នា
ក្នុងការបើកបង្ហាញដែលអេសេគាលបានឃើញក្នុងគំនិត អស់អ្នកដែលរស់នៅលើដីធ្លីនីមួយៗក្នុងស្រុកសន្យាដែលបានត្រូវរៀបចំឡើងវិញ ពួកគេទទួលប្រយោជន៍ពីធនធានធម្មជាតិដូចគ្នា។ ស្រដៀងគ្នាដែរ នៅសព្វថ្ងៃនេះព្រះយេហូវ៉ាផ្ដល់ពរស្មើគ្នាដល់អ្នកបម្រើទាំងអស់របស់លោកដែលស្ថិតនៅក្នុងបរិយាកាសប្រៀបដូចជាសួនឧទ្យាន។