ចំណុចហាត់រៀនទី៨
ឧទាហរណ៍ដែលបង្រៀនចំណុចសំខាន់
ម៉ាថាយ ១៣:៣៤, ៣៥
សេចក្ដីសង្ខេប: បង្កើនគុណភាពនៃការបង្រៀនរបស់អ្នកដោយប្រើឧទាហរណ៍ស្រួលយល់ដែលទាក់ទាញចិត្តអ្នកស្ដាប់ និងបង្រៀនចំណុចសំខាន់ៗ។
របៀបអនុវត្ត:
ជ្រើសរើសឧទាហរណ៍ស្រួលយល់។ ដូចលោកយេស៊ូដែរ សូមប្រើអ្វីៗដែលសាមញ្ញដើម្បីពន្យល់អ្វីដែលស្មុគស្មាញ និងប្រើអ្វីដែលស្រួលយល់ដើម្បីពន្យល់អ្វីដែលពិបាកយល់។ កុំបន្ថែមព័ត៌មានមិនសំខាន់ដែលធ្វើឲ្យឧទាហរណ៍ស្មុគស្មាញ។ អ្នកត្រូវប្រាកដថាព័ត៌មានក្នុងឧទាហរណ៍ ពិតជាទាក់ទងនឹងចំណុចដែលអ្នកកំពុងបង្រៀន។ បើមិនដូច្នេះទេ អ្នកស្ដាប់ប្រហែលយល់ច្រឡំពីព្រោះព័ត៌មានខ្លះមិនទាក់ទងនឹងចំណុចសំខាន់ឬមិនច្បាស់លាស់។
គិតអំពីអ្វីដែលនឹងនាំឲ្យអ្នកស្ដាប់ទទួលប្រយោជន៍។ ជ្រើសរើសឧទាហរណ៍ដែលរួមបញ្ចូលសកម្មភាពនិងចំណាប់អារម្មណ៍របស់អ្នកស្ដាប់។ សូមប្រយ័ត្នកុំប្រើឧទាហរណ៍ដែលធ្វើឲ្យអ្នកស្ដាប់អៀនខ្មាសឬទើសចិត្ត។
បង្រៀនចំណុចសំខាន់។ សូមលើកឧទាហរណ៍ដែលពន្យល់តែចំណុចសំខាន់ៗ ជាជាងចំណុចបន្ទាប់បន្សំ។ សូមប្រាកដថាអ្នកស្ដាប់នឹងមិនគ្រាន់តែចាំឧទាហរណ៍ប៉ុណ្ណោះ តែក៏នឹងចាំចំណុចសំខាន់នៃឧទាហរណ៍នោះដែរ។