ចាប់ផ្ដើមការសន្ទនា
មេរៀនទី ៥
មិនធ្វើឲ្យទើសចិត្ត
គោលការណ៍៖ «ចូរឲ្យសម្ដីរបស់អ្នករាល់គ្នាប្រកបដោយភាពសប្បុរសជានិច្ច»។—កូឡ. ៤:៦
អ្វីដែលប៉ូលធ្វើ
១. សូមមើល វីដេអូ ឬអានសកម្មភាព ១៧:២២, ២៣។ បន្ទាប់មក សូមពិចារណាសំណួរដូចតទៅ៖
ក. ពេលប៉ូលឃើញក្នុងក្រុងអាថែនមានពេញទៅដោយការគោរពបូជាដល់ព្រះមិនពិត តើគាត់មានអារម្មណ៍យ៉ាងណា? (សូមមើលសកម្មភាព ១៧:១៦)
ខ. ជាជាងស្ដីបន្ទោសអ្នកក្រុងអាថែន ប៉ូលបានយកជំនឿរបស់ពួកគេមកធ្វើជាចំណុចដើម្បីប្រាប់អំពីដំណឹងល្អតាមរបៀបដែលមិនធ្វើឲ្យពួកគេទើសចិត្ត។ តើគាត់ធ្វើដូច្នេះតាមរបៀបណា?
តើគំរូប៉ូលបង្រៀនយើងយ៉ាងណា?
២. បើយើងចេះជ្រើសរើសសាច់រឿង ស្គាល់វិធីសាស្ត្រក្នុងការសន្ទនា ហើយដឹងថាពេលណាដែលគួរនិយាយ នោះមនុស្សទំនងជាព្រមស្ដាប់យើងច្រើនជាង។
ធ្វើតាមប៉ូល
៣. ជ្រើសរើសប្រធានបទដែលទាក់ទាញចិត្ត។ ជាឧទាហរណ៍ ពេលសន្ទនាជាមួយអ្នកដែលមិនកាន់គ្រិស្តសាសនា អ្នកប្រហែលជាត្រូវកែសម្រួលរបៀបនិយាយអំពីគម្ពីរឬអំពីលោកយេស៊ូ។
៤. កុំប្រញាប់កែទស្សនៈរបស់អ្នកស្ដាប់។ ចូរទុកឲ្យគាត់បញ្ចេញមតិផ្ទាល់ខ្លួន។ បើគាត់និយាយអ្វីមួយដែលផ្ទុយពីសេចក្ដីបង្រៀនក្នុងគម្ពីរ មិនត្រូវប្រញាប់កែសម្ដីរបស់គាត់ឡើយ។ (យ៉ា. ១:១៩) ការស្ដាប់គាត់និយាយ នោះជួយអ្នកឲ្យដឹងអំពីជំនឿរបស់គាត់ និងមូលហេតុដែលគាត់ជឿដូច្នេះ។—សុភ. ២០:៥
៥. យល់ស្រប ហើយសរសើរគាត់បើអាចធ្វើបាន។ គាត់ប្រហែលជាជឿយ៉ាងស្មោះថា ជំនឿសាសនារបស់គាត់គឺត្រឹមត្រូវ។ សូមព្យាយាមនិយាយអំពីអ្វីដែលស្របនឹងគំនិតរបស់គាត់។ បន្ទាប់មក បន្តិចម្ដងៗសូមជួយគាត់ឲ្យយល់ពីអ្វីដែលគម្ពីរបង្រៀន។