ការបំភ្លឺភ្នែកនឹងដំណឹងល្អ
សុភាសិតសាសន៍ដាណឺម៉ាក៌មួយចែងថា៖ «ផ្ទៃមេឃមិនមែនមានពណ៌ខៀវតិច ដោយព្រោះតែមនុស្សខ្វាក់មើលមិនឃើញនោះទេ»។ ប៉ុន្តែនៅក្នុងជីវភាពប្រចាំថ្ងៃដ៏រវល់របស់យើង តើយើងមើលឃើញផ្ទៃមេឃពណ៌ខៀវទេ បើនិយាយជាប្រៀបធៀបនោះ? តើយើងប្រមើលឃើញអនាគតដោយមានការទុកចិត្តបានទេ? តើយើងពិតជាជឿនឹងដំណឹងល្អដែលមានក្នុងព្រះគម្ពីរ ជាបន្ទូលរបស់ព្រះទេ?
នៅក្នុងអត្ថបទពីមុន យើងបានពិចារណាមើលទិដ្ឋភាពផ្សេងៗនៃភាពខ្វាក់ភ្នែក។ ឥឡូវនេះ សូមឲ្យយើងពិចារណាមើលចក្ខុវិស័យមួយប្រភេទទៀត ដែលសំខាន់ជាងនោះទៅទៀត។ ដ្បិតនេះជាប់ទាក់ទងនឹងសុភមង្គលដ៏យូរអង្វែងរបស់យើង ព្រមទាំងអនាគតសំរាប់ពួកអ្នកស្ងួនភ្ងារបស់យើងដែរ។
ដោយគ្មានការសង្ស័យឡើយ យើងកំពុងតែជួបប្រទះនឹង«គ្រាលំបាកណាស់»។ (ធីម៉ូថេទី២ ៣:១) តើមានលទ្ធផលអ្វីកើតឡើង ពេលដែលមនុស្សខំពុះពាររកស៊ីចិញ្ចឹមជីវិត អត់ទ្រាំនឹងផលវិបាកខាងសុខភាព និងបញ្ហាគ្រួសារ ហើយខំអត់ធ្មត់នឹងអយុត្ដិធម៌ក្នុងសង្គមនិងការខ្វះសេចក្ដីស្រឡាញ់នោះ? គួរឲ្យសោកស្ដាយដែរ ការទុកចិត្តរបស់មនុស្សជាច្រើនទៅលើមនុស្សគ្នាឯង សាសនា និងរដ្ឋាភិបាល ត្រូវបានបន្ថយបន្ដិចម្ដងៗ។ ដោយដឹងថាគ្មានផ្លូវដោះស្រាយនោះ ពួកគេបែរទៅជាសន្និដ្ឋានថា បញ្ហារបស់គេនឹងគ្មានអ្នកណាអាចដោះស្រាយតាមវិធីធម្មតាបានឡើយ។ នៅក្នុងសារពត៌មានសាសន៍ប្រេហ្ស៊ីល ឈ្មោះហ្សឺណែល ដា ថាឌឺ លោកហ្សាកុប ផិនយ៉ារូ ហ្គោលប៊ើក សង្កេតឃើញថា៖ «នៅក្នុងវត្តមាននៃហេតុការណ៍ពិតដ៏សាហាវ មនុស្សមានអារម្មណ៍មួម៉ៅ ដោយសារតែកំហុសដែលពួកគេមិនបានពិចារណាឲ្យបានដិតដល់ ហើយពួកគេពឹងពាក់ទៅលើសាសនាអាថ៌កំបាំងដែលធ្វើឲ្យរសាយចិត្ត»។ ប៉ុន្តែ សូម្បីតែមានបញ្ហាអ្វីក៏ដោយ យើងចង់ប្រើសុភនិច្ឆ័យរបស់យើងដែរ មែនទេ?
ឧបមាថា អ្នកត្រូវការផ្ទះមួយសំរាប់គ្រួសាររបស់អ្នក ហើយចំពោះលុយ នោះមិនជាបញ្ហាទេ។ អ្នកប្រហែលជារកមើលជុំវិញ ហើយចូលទៅមើលផ្ទះផ្សេងៗនៅក្នុងសង្កាត់នានា។ ទោះបីជាអ្នកលក់អសង្ហាររិមភណ្ឌខំតម្រូវចិត្តអ្នកក្ដី អ្នកនៅតែមិនទាន់រកឃើញផ្ទះដែលអ្នកចង់បាននោះនៅឡើយ។ ដោយព្រោះតែរឿងនេះទាក់ទងដល់សុខុមាលភាពនិងការសប្បាយរីករាយនៃគ្រួសាររបស់អ្នក អ្នកមិនលះបង់ពីការខំប្រឹងនោះទេ មែនទេ? ឥឡូវនេះ សូមគិតមើលនូវការសប្បាយរីករាយ ពេលដែលអ្នកនៅទីបំផុត បានរកឃើញផ្ទះដែលអ្នកចង់បានយ៉ាងខ្លាំងនោះ។
ដូចជាអ្នកនឹងចំណាយពេលដើម្បីស្វែងរកផ្ទះថ្មីមួយ ហេតុអ្វីក៏អ្នកមិនចំណាយពេលពិនិត្យមើលព្រះគម្ពីរ ដើម្បី ស្វែងរកនូវចម្លើយចំពោះបញ្ហារបស់អ្នកដែរទៅ? ដូចជាយើងត្រូវតែវែកញែកការណ៍ពិតទាំងឡាយ ពេលដែលយើងធ្វើការសម្រេចចិត្តអំពីផ្ទះនោះ យើងក៏ត្រូវតែវែកញែកឲ្យសមត្រឹមត្រូវនូវអ្វីៗដែលយើងបានអានក្នុងព្រះបន្ទូលរបស់ព្រះដែរ។ ហើយអ្វីដែលរឹតតែមានប្រយោជន៍ជាងការស្វែងរកផ្ទះនោះទៅទៀត គឺការយល់ឃើញនិងការទទួលយកសេចក្ដីពិតអំពីព្រះយេហូវ៉ានិងព្រះយេស៊ូវគ្រីស្ទ។ ព្រះយេស៊ូវបានមានបន្ទូលថា៖ «នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ នឹងព្រះយេស៊ូវគ្រីស្ទដែលទ្រង់បានចាត់ឲ្យមកផង»។—យ៉ូហាន ១៧:៣
ប៉ុន្តែ បើសារព្រះគម្ពីរមានតម្លៃដល់ម្ល៉េះ ហេតុអ្វីក៏មនុស្សជាច្រើននៅតែខ្វាក់នឹងសារដំណឹងល្អនេះដូច្នេះ? មូលហេតុមួយ ដែលនឹងអាចធ្វើឲ្យមនុស្សជាច្រើនភ្ញាក់ផ្អើលនោះ គឺថា«លោកីយទាំងមូលដេកនៅក្នុងឱវាទនៃមេកំណាច»។ (យ៉ូហានទី១ ៥:១៩) ជាលទ្ធផល អារក្សសាតាំង«បានបង្អាប់ដល់គំនិតពួកគេដែលមិនជឿ ក្រែងរស្មីពន្លឺនៃដំណឹងល្អ ដែលសំដែងពីសិរីល្អនៃព្រះគ្រីស្ទដ៏ជារូបអង្គព្រះ បានភ្លឺមកដល់គេ»។ (កូរិនថូសទី២ ៤:៤) ថ្វីបើយើងមើលឃើញដោយភ្នែករបស់យើង គឺជាខួរក្បាលទេដែលបកស្រាយពន្លឺដែលចូលតាមភ្នែកនោះ។ ម្ល៉ោះហើយបានជាភាពខ្វាក់ក៏ត្រូវគេពន្យល់ថា«មិនអាច ឬមិនសុខចិត្តវែកញែក ឬវិនិច្ឆ័យ»។ ការនេះធ្វើឲ្យយើងនឹកឃើញអំពីវោហារប្រជាប្រិយមួយថា៖ «គ្មានមនុស្សណាខ្វាក់ដូចមនុស្សដែលមិនចង់ឃើញនោះទេ»។
មនុស្សខ្វាក់មិនអាចមើលឃើញអ្វីនៅពីមុខគាត់ទេ ដូច្នេះគ្រោះថ្នាក់អាចកើតដល់គាត់បាន។ ភាពខ្វាក់ភ្នែករបស់មនុស្សជាច្រើន ឥឡូវមិនអាចប្រែត្រឡប់ដូចដើមវិញបានទេ ក៏ប៉ុន្តែគ្មានអ្នកណាម្នាក់ត្រូវបង្ខំឲ្យនៅតែខ្វាក់ខាងវិញ្ញាណឡើយ។
ការមានជ័យជំនះលើភាពខ្វាក់ខាងវិញ្ញាណ
ដូចជាស្ថានភាពខ្វះខាតខាងអនាម័យអាចធ្វើឲ្យចក្ខុវិស័យទៅជាទន់ខ្សោយ បរិយាការដែលថោកទាបក៏អាចបណ្ដាលឲ្យមានភាពខ្វាក់ខាងសីលធម៌ដែរ។ ម្យ៉ាងវិញទៀត ព្រះយេស៊ូវគ្រីស្ទបានព្រមានអំពីលទ្ធិនិងប្រពៃណីទាំងឡាយដែលមនុស្សបានបង្កើតមក។ មេដឹកនាំសាសនានៅជំនាន់នោះបានធ្វើឲ្យ ហ្វូងចៀមរបស់គេវង្វេង ដូច្នេះហើយបានជាទ្រង់មានបន្ទូលប្រាប់ជាប្រាកដថា៖ «គេជាមនុស្សខ្វាក់ដែលនាំមនុស្សខ្វាក់ បើមនុស្សខ្វាក់នាំមនុស្សខ្វាក់ដូច្នេះ នោះទាំង២នាក់នឹងធ្លាក់ទៅក្នុងរណ្ដៅហើយ»។—ម៉ាថាយ ១៥:១៤
ជាជាងបណ្ដោយឲ្យមេដឹកនាំដែលខ្វាក់ខាងវិញ្ញាណនិងខាងសីលធម៌បំភាន់នោះ អស់ពួកអ្នកដែលបានបំភ្លឺភ្នែកគេនឹងដំណឹងល្អនៃព្រះរាជាណាចក្ររបស់ព្រះ មានចិត្តសប្បាយរីករាយណាស់! ព្រះយេស៊ូវបានប្រកាសថា៖ «ខ្ញុំបានមកក្នុងលោកីយនេះ ដើម្បីនឹងជំនុំជំរះ ឲ្យពួកអ្នកដែលមើលមិនឃើញបានភ្លឺឡើង»។ (យ៉ូហាន ៩:៣៩) ដូច្នេះ តើមនុស្សដែលខ្វាក់ខាងវិញ្ញាណអាចទៅជាមើលឃើញវិញ បានយ៉ាងដូចម្ដេច? បើអញ្ចឹង សូមឲ្យយើងបន្តការពិនិត្យពិច័យភាពខ្វាក់ភ្នែកសាឡើងវិញ។
ឥឡូវនេះ សំវិធានវត្ថុផ្សេងៗអាចមានដល់ពួកអ្នកដែលខូចចក្ខុវិស័យហើយ។ ពីមុន សំវិធានវត្ថុនេះមិនដែលមានសោះ។ កាលពីដើម គ្មានការប្ដេជ្ញាខំប្រឹងប្រែងជួយដល់មនុស្សខ្វាក់ទេ ទាល់តែលោកវ៉ាឡង់ថង់ អោយ៉េបានស្ថាបនាសាលាពិសេសមួយសំរាប់មនុស្សខ្វាក់នៅក្នុងឆ្នាំ១៧៨៤។ ក្រោយមក លោកលូវី ប្រែលបានបង្កើតប្រព័ន្ធមួយដែលប្រើឈ្មោះរបស់គាត់ ដើម្បីជួយមនុស្សខូចចក្ខុវិស័យឲ្យអាចអានបាន។
ចុះចំពោះមនុស្សខ្វាក់ខាងវិញ្ញាណនោះយ៉ាងណាដែរ? ក្នុងឆ្នាំថ្មីៗនេះ មានការខំប្រឹងប្រែងយ៉ាងខ្លាំងក្នុងការប្រកាសដំណឹងល្អ សូម្បីតែនៅកន្លែងដាច់ស្រយាលបំផុតនៅលើផែនដី ក៏មានការប្រកាសដំណឹងល្អដែរ។ (ម៉ាថាយ ២៤:១៤) ស្មរបន្ទាល់ព្រះយេហូវ៉ាមានចិត្តរីករាយនឹងនាំយកសេចក្ដីសង្ឃឹមទៅពួកមនុស្សខ្វាក់ខាងវិញ្ញាណ និងមនុស្សខ្វាក់ភ្នែកមែនទែនផង។
ស្ត្រីជាតិប្រេហ្ស៊ីលម្នាក់បានសរសេរថា៖ «ទោះបីជាខ្ញុំមានវិកលភាពក្ដី ខ្ញុំចង់និយាយថា ខ្ញុំអាចមើលឃើញ—ខាងវិញ្ញាណ។ ព្រះទ្រង់ក៏អស្ចារ្យម្ល៉េះហ្ន៎! យើងខ្ញុំសប្បាយចិត្តណាស់ ដោយដឹងថាព្រះយេហូវ៉ានឹង‹លាព្រះហស្ត ក៏បំពេញចិត្តប្រាថ្នានៃជីវិតទាំងឡាយ›»។ (ទំនុកដំកើង ១៤៥:១៦) ហើយហ្សូហ្សេ ជាបុរសខ្វាក់ម្នាក់ នឹកចាំថា៖ «ជីវិតរបស់ខ្ញុំអាចបែងចែកទៅជាពីរចំណែក គឺចំណែកពីមុននិងក្រោយពីស្មរបន្ទាល់។ . . . ដោយសារតែពួកស្មរបន្ទាល់នេះហើយ បានជាខ្ញុំចាប់ផ្ដើមយល់ឃើញយ៉ាងភ្លឺច្បាស់លាស់អំពីពិភពលោកនេះ។ ខ្ញុំពេញចិត្តនឹងទំនាក់ទំនងយ៉ាងសុខដុមជាមួយអ្នកឯទៀតក្នុងក្រុមជំនុំ»។ ពោរពេញទៅដោយសេចក្ដីរីករាយដូចនេះដែរ ព្រះគម្ពីរបានធានាអះអាងនឹងយើងថា បន្ដិចទៀតនឹងគ្មានអ្នកណានៅលើផែនដីនឹងត្រូវខ្វាក់—ភ្នែកមែនទែន ឬខាងវិញ្ញាណឡើយ។ តើការនោះនឹងកើតឡើងបានយ៉ាងដូចម្ដេច? ចំពោះសេចក្ដីសន្យាដែលថា«ព្រះយេហូវ៉ាទ្រង់នឹងបំភ្លឺភ្នែករបស់មនុស្សខ្វាក់»តើនឹងកើតឡើងពាសពេញផែនដីតាមរបៀបណា?—ទំនុកដំកើង ១៤៦:៨
ឱសថអចិន្ត្រៃយ៍តែមួយ—ព្រះរាជាណាចក្ររបស់ព្រះ
ទោះបីជាការជំនាញខាងវិជ្ជាពេទ្យបានរីកចំរើនឡើងក៏ដោយ ក៏នៅតែមានជំងឺជាច្រើនបន្តធ្វើឲ្យមានភាពខ្វាក់ ការឈឺចាប់ និងសេចក្ដីស្លាប់។ បើអញ្ចឹង តើអ្វីដែលត្រូវការជាចាំបាច់ក្នុងការកំចាត់ឧនាហារូបត្ថម្ភ ស្ថានភាពខ្វះខាតអនាម័យ និងការកើតទុក្ខដែលធ្វើឲ្យខូចដល់ចក្ខុវិស័យនិងអំណរអរនៃជីវិតនោះ? ការប្រោសមនុស្សខ្វាក់ឲ្យជា ដែលព្រះយេស៊ូវនិងអ្នកឯទៀតបានធ្វើឡើង គ្រាន់តែជាគំរូដ៏តូចមួយសំរាប់អនាគត។ សេចក្ដីបង្រៀននិងកិច្ចការប្រោសឲ្យជារបស់ទ្រង់ ជាប្រផ្នូលនឹងប្រសិទ្ធិពរជាច្រើនដែលនឹងត្រូវប្រទានមកផែនដីនេះ នៅក្រោមរាជរដ្ឋាភិបាលរបស់ព្រះ។
ការប្រោសឲ្យជានៅពាសពេញពិភពលោកនឹងជិតមកដល់ហើយ។a សាវកយ៉ូហានបានពន្យល់យ៉ាងប្រសើរអំពីកម្មវិធីប្រោសឲ្យជារបស់ព្រះ ថា៖ «ទេវតាក៏បង្ហាញ ឲ្យខ្ញុំឃើញទន្លេទឹកជីវិត ថ្លាដូចជាកែវចរណៃ ដែលហូរចេញពីបល្ល័ង្កនៃព្រះ នឹងកូនចៀម ឯនៅកណ្ដាលផ្លូវទីក្រុងនោះ ហើយនៅមាត់ទន្លេទាំងសងខាង នោះមានដើមជីវិត ដែលបង្កើតផ្លែ១២ដង គឺ១ខែម្ដងៗ ហើយស្លឹកឈើនោះ ក៏សំរាប់នឹងមើលអស់ទាំងសាសន៍ឲ្យជា»។—វិវរណៈ ២២:១, ២
ឃ្លាដែលថា «ទឹកជីវិត» និង «ដើមជីវិត» បញ្ជាក់ឲ្យឃើញថា ក្រោយពីរបបដ៏អាក្រក់ជួជាតិនៃសម័យនេះបានវិនាសទៅ នោះសំវិធានវត្ថុនៃការប្រោសឲ្យជារបស់ព្រះរាជាណាចក្រនៃព្រះនឹងធ្វើឲ្យមនុស្សជាតិទទួលភាពល្អឥតខ្ចោះបានបន្ដិចម្ដងៗ។ តាមការពិត ផលប្រយោជន៍នៃយញ្ញបូជារបស់ព្រះយេស៊ូវ (រាប់បញ្ចូលទាំងការអត់ឱនទោសទាំងអស់) ព្រមទាំងចំណេះវិជ្ជាអំពីព្រះយេស៊ូវគ្រីស្ទ និងព្រះវរបិតារបស់ទ្រង់ នឹងនាំឲ្យមានសុខភាពដ៏ល្អឥតខ្ចោះនិងជីវិតអស់កល្បជានិច្ចផង។—យ៉ូហាន ៣:១៦
សុភមង្គលក្នុងពិភពលោកថ្មី
បើអញ្ចឹង សូមនឹកគិតអំពីផែនដីដែលគ្មានឧក្រិដ្ឋកម្ម ភាពកខ្វក់ ឬភាពក្រីក្រ។ សូមនឹកគិតទៀតអំពីគ្រួសាររបស់អ្នករស់នៅក្នុងទីមនោរម្យដែលបានស្អាងឡើងវិញ ដែលពោរពេញទៅដោយសេចក្ដីសុខសាន្តនោះ។ (អេសាយ ៣២:១៧, ១៨) តើនឹងសប្បាយរីករាយយ៉ាងណាទៅហ្ន៎ ដោយអាចមើលឃើញពណ៌គ្រប់បែបយ៉ាង តាមសតិនិងប្រសាទដ៏ល្អគ្រប់សព្វរបស់យើង!
លោកហ្វេបបឺ ប៊ីរិន មានប្រសាសន៍ថា៖ «ស្ថានភាពធម្មជាតិសំរាប់មនុស្សលោក នោះគឺឲ្យរស់នៅក្នុងបរិយាការដែលប្រែប្រួលជានិច្ច—នៃពន្លឺ ពណ៌ និងសណ្ឋានផ្សេងៗ។ គឺមិនដែលមានបរិយាការដដែលនៅក្នុងធម្មជាតិទេ។ ពណ៌ជាធម្មជាតិមួយដែលធ្វើឲ្យចិត្តសប្បាយរីករាយក្នុងពិភពលោកនេះ។ នៅក្នុងធម្មជាតិ មិនមែនមានតែពីរបីពណ៌នោះទេ ហើយជីវិតដ៏សប្បាយរីករាយភាគច្រើនគឺទាក់ទាញនឹងពណ៌នោះឯង»។
ដូច្នេះអំណោយទាននៃចក្ខុវិស័យនោះ គឺមានតម្លៃណាស់! តើនឹងទៅជាការដ៏រីករាយយ៉ាងណាទៅហ្ន៎ នៅពេលភ្នែកមនុស្សដែលពីដើម—ខ្វាក់មែនទែន ឬខ្វាក់ខាងវិញ្ញាណក្ដី—នឹងមើលឃើញវិញនោះ!
មែនហើយ នៅក្នុងទីមនោរម្យដែលបានស្អាងឡើងវិញនៅខាងមុខនេះ ភាពខ្វាក់និងទុព្វលភាពឯទៀត នឹងលែងធ្វើឲ្យមានអពមង្គលទៀតហើយ! គ្មានអ្នកណានឹងត្រូវនាំឲ្យវង្វេងទៀតទេ។ ដោយព្រោះតែសេចក្ដីស្រឡាញ់ដ៏ស្មោះនឹងមានជាទូទៅ មនុស្សទាំងអស់នឹងត្រូវបានបំភ្លឺឡើងខាងវិញ្ញាណ។ សេចក្ដីល្អទាំងនេះនិងសេចក្ដីជាច្រើនទៀតនឹងកើតមានឡើងនៅក្នុងអនាគតខាងមុខនេះ តែឥឡូវនេះជាពេលវេលាដែលយើងត្រូវតែធ្វើយ៉ាងណាឲ្យព្រះយេហូវ៉ាទ្រង់សព្វព្រះហឫទ័យនឹងយើង ដ្បិតទ្រង់នឹងសម្រេចសេចក្ដីសន្យារបស់ទ្រង់ថា៖ «[នៅ]គ្រានោះ ភ្នែករបស់មនុស្សខ្វាក់នឹងបានភ្លឺឡើង»!—អេសាយ ៣៥:៥
[កំណត់សម្គាល់]
a សូមពិនិត្យមើលទីសំអាងដែលបានសម្ដែងមកនៅក្នុងសៀវភៅអ្នកអាចរស់នៅជានិរន្តរ៍ក្នុងសួនមនោរម្យនៅលើផែនដី ជំពូក ១៨ ដែលបានបោះពុម្ពដោយសមាគមប៉មយាមខាងព្រះគម្ពីរនិងខិតប័ណ្ណនៃរដ្ឋញូវយ៉ក ជាសាជីវកម្ម។
[រូបភាពនៅទំព័រ៧]
នៅគ្រានោះ ភ្នែករបស់មនុស្សខ្វាក់នឹងបានភ្លឺឡើង!