ព្រះយេហូវ៉ា—ព្រះដែលបង្រៀន
«ព្រះទ្រង់[ព្រះយេហូវ៉ា]បង្រៀនគេទាំងអស់គ្នា»។—យ៉ូហាន ៦:៤៥
១. តើព្រះយេស៊ូកំពុងតែធ្វើអ្វីនៅភូមិកាពើណិមឥឡូវនេះ?
ព្រះយេស៊ូគ្រីស្ទទើបតែបានសម្ដែងអព្ភូតហេតុ ហើយឥឡូវនេះគេឃើញទ្រង់កំពុងតែបង្រៀននៅក្នុងសាលាប្រជុំនៅឯភូមិកាពើណិម នៅជិតសមុទ្រកាលីឡេ។ (យ៉ូហាន ៦:១-២១, ៥៩) មនុស្សជាច្រើនមិនជឿទ្រង់ទេ កាលដែលទ្រង់បានមានបន្ទូលថា៖ «ខ្ញុំបានចុះពីស្ថានសួគ៌មក»។ ពួកគេត្អូញត្អែរថា៖ «អ្នកនេះ តើមិនមែនឈ្មោះយេស៊ូវ ជាកូនយ៉ូសែប ដែលយើងស្គាល់ឪពុកម្ដាយគាត់ទេឬអី ចុះដូចម្ដេចឡើយបានជាគាត់និយាយថា គាត់ចុះពីស្ថានសួគ៌មកដូច្នេះ›»? (យ៉ូហាន ៦:៣៨, ៤២) ក្នុងការស្តីបន្ទោសពួកគេ ព្រះយេស៊ូបានប្រកាសថា៖ «គ្មានអ្នកណាអាចនឹងមកឯខ្ញុំបានទេ លើកតែព្រះវរបិតា ដែលចាត់ខ្ញុំឲ្យមក ទ្រង់ទាញនាំគេប៉ុណ្ណោះ ហើយខ្ញុំនឹងឲ្យអ្នកនោះរស់ឡើងវិញ នៅថ្ងៃចុងបំផុតដែរ»។—យ៉ូហាន ៦:៤៤
២. តើមានមូលដ្ឋានអ្វីចំពោះការជឿទៅលើសេចក្ដីសន្យារបស់ព្រះយេស៊ូអំពីដំណើររស់ឡើងវិញ?
២ នេះជាសេចក្ដីសន្យាដ៏អស្ចារ្យមែន—ដោយបានរស់ឡើងវិញនៅក្នុងថ្ងៃចុងក្រោយបង្អស់ នៅពេលដែលរាជាណាចក្ររបស់ព្រះសោយរាជ្យនោះ! យើងអាចជឿសេចក្ដីសន្យានេះបាន ពីព្រោះព្រះវរបិតា គឺជាព្រះយេហូវ៉ាបានធានារ៉ាប់រងអំពីរឿងនេះ។ (យ៉ូប ១៤:១៣-១៥; អេសាយ ២៦:១៩) ត្រូវហើយ ព្រះយេហូវ៉ា ដែលបង្រៀនថា មនុស្សស្លាប់នឹងរស់ឡើងវិញ ជា«គ្រូបង្រៀនដ៏ខ្ពង់ខ្ពស់បំផុត»។ (យ៉ូប ៣៦:២២ សេចក្ដីបកប្រែព្រះគម្ពីរអង់គ្លេសសំរាប់សព្វថ្ងៃនេះ) ក្នុងការសំដៅទៅនឹងសេចក្ដីបង្រៀនរបស់ព្រះវរបិតារបស់ទ្រង់ ព្រះយេស៊ូបានមានបន្ទូលជាបន្ទាប់ថា៖ «នៅក្នុងគម្ពីរពួកហោរាមានសេចក្ដីចែងទុកមកថា៖ ‹ព្រះទ្រង់[ព្រះយេហូវ៉ា]បង្រៀនគេទាំងអស់គ្នា›»។—យ៉ូហាន ៦:៤៥
៣. តើមានសំនួរអ្វីខ្លះដែលយើងនឹងត្រូវតែពិចារណាមើល?
៣ យ៉ាងប្រាកដណាស់ នេះជាឯកសិទ្ធិដ៏ល្អមែន ចំពោះអ្នកណាដែលនៅក្នុងចំណោមនៃអស់អ្នកដែលព្យាការីអេសាយបានសរសេរមកថា៖ «ឯកូនចៅទាំងប៉ុន្មានរបស់ឯង នឹងធ្វើជាសិស្សរបស់ព្រះយេហូវ៉ា»។ (អេសាយ ៥៤:១៣) តើយើងអាចធ្វើដូច្នេះបានឬទេ? តើពួកណាដែលហាក់បីដូចជាកូនចៅចំពោះទ្រង់ ហើយបានទទួលនូវការបង្រៀនពីទ្រង់នោះ? តើការបង្រៀនរបស់ព្រះយេហូវ៉ាដ៏សំខាន់ណាខ្លះដែលយើងត្រូវតែដឹង ហើយប្រព្រឹត្តតាម ដើម្បីឲ្យទទួលបានប្រសិទ្ធិពរពីទ្រង់នោះ? តើព្រះយេហូវ៉ាបានបង្រៀនយ៉ាងណាដែរនៅអតីតកាល ហើយតើទ្រង់បង្រៀនតាមរបៀបដូចគ្នានៅសព្វថ្ងៃនេះទេ? នេះជាសំនួរទាំងឡាយដែលយើងនឹងពិចារណាមើល។
ព្រះវរបិតា គ្រូ ប្ដី
៤. តើពួកណាជាបុត្រារបស់ព្រះយេហូវ៉ាដំបូងដែលទទួលការបង្រៀនពីទ្រង់នោះ?
៤ ព្រះយេហូវ៉ាបានក្លាយទៅជាព្រះវរបិតានិងគ្រូជាលើកដំបូង នៅពេលដែលទ្រង់បានបង្កើតរាជបុត្រាតែមួយគត់ដែលកើតផ្ទាល់ពីទ្រង់ គឺព្រះយេស៊ូមុនទ្រង់មានកំណើតជាមនុស្ស។ បុគ្គលម្នាក់នេះត្រូវបានហៅជា«ព្រះបន្ទូល» ពីព្រោះទ្រង់ជាអ្នកនាំពាក្យរបស់ព្រះយេហូវ៉ា។ (យ៉ូហាន ១:១, ១៤; ៣:១៦) ព្រះបន្ទូលបានបំរើ«ជិតទ្រង់[ព្រះវរបិតា]ដូចជាមេជាង» ហើយទ្រង់បានរៀនចេះយ៉ាងច្រើនពីការបង្រៀនរបស់ព្រះវរបិតា។ (សុភាសិត ៨:២២, ៣០) តាមការពិត ទ្រង់បានក្លាយទៅជាភ្នាក់ងារ ដែលតាមរយៈនេះ ព្រះវរបិតាបានបង្កើតរបស់សព្វសារពើ រួមបញ្ចូលទាំង«ពួកកូនព្រះ»ខាងវិញ្ញាណផង។ ពួកគេច្បាស់ជាមានការអរសប្បាយណាស់ ដែលព្រះបានបង្រៀនពួកគេនោះ! (យ៉ូប ១:៦; ២:១; ៣៨:៧; កូល៉ុស ១:១៥-១៧) នៅពេលក្រោយមក មនុស្សទីមួយ អ័ដាមត្រូវបានបង្កើតមក។ គាត់ក៏ជា«កូនព្រះ»ដែរ ហើយព្រះគម្ពីរចែងប្រាប់ថាព្រះយេហូវ៉ាបានបង្រៀនគាត់។—លូកា ៣:៣៨; លោកុប្បត្តិ ២:៧, ១៦, ១៧
៥. តើឯកសិទ្ធិដ៏មានតម្លៃណាដែលអ័ដាមបានបាត់បង់នោះ ប៉ុន្តែតើព្រះយេហូវ៉ាបានបង្រៀនពួកណា ហើយហេតុអ្វី?
៥ គួរឲ្យស្ដាយណាស់ ដោយការមិនគោរពស្ដាប់បង្គាប់របស់គាត់ អ័ដាមបានបាត់បង់នូវឯកសិទ្ធិនៃការបន្តធ្វើជាពួកកូនរបស់ព្រះ។ ដូច្នេះកូនចៅរបស់គាត់ មិនអាចទាមទាររកទំនាក់ទំនងធ្វើជាពួកកូនរបស់ព្រះ ដោយសារមានកំណើតមកនោះបានឡើយ។ ប៉ុន្តែ ព្រះយេហូវ៉ាបានបង្រៀនពួកមនុស្សមិនល្អឥតខ្ចោះ ដែលមកស្វែងរកការណែនាំពីទ្រង់។ ជាឧទាហរណ៍ លោកណូអេជា«អ្នកសុចរិត» ដែល«ដើរជាមួយនឹងព្រះ» ដូច្នេះហើយបានជាព្រះយេហូវ៉ាបានបង្រៀនលោកណូអេ។ (លោកុប្បត្តិ ៦:៩, ១៣-៧:៥) ដោយការស្ដាប់បង្គាប់ព្រះ លោកអ័ប្រាហាំបានបញ្ជាក់ថាគាត់ជា‹មិត្តរបស់ព្រះយេហូវ៉ា› ដូច្នេះហើយបានជាព្រះយេហូវ៉ាបានបង្រៀនលោកដែរ។—យ៉ាកុប ២:២៣; លោកុប្បត្តិ ១២:១-៤; ១៥:១-៨; ២២:១, ២
៦. តើពួកណាដែលព្រះយេហូវ៉ាបានចាត់ទុកជា«ពួកកូន»របស់ទ្រង់ ហើយតើទ្រង់ជាគ្រូប្រភេទណាចំពោះពួកគេ?
៦ នៅពេលជាច្រើនក្រោយមក ក្នុងកំឡុងសម័យនៃលោកម៉ូសេ ព្រះយេហូវ៉ាបានចូលកិច្ចព្រមព្រៀងជាមួយនឹងសាសន៍អ៊ីស្រាអែល។ ជាលទ្ធផល សាសន៍នោះបានក្លាយទៅជាប្រជារាស្ត្ររបស់ទ្រង់ ហើយបានចាត់ទុកជា«កូន»របស់ទ្រង់។ ព្រះបានមានបន្ទូលថា៖ «អ៊ីស្រាអែលជាកូនអញ»។ (និក្ខមនំ ៤:២២, ២៣; ១៩:៣-៦; ចោទិយកថា ១៤:១, ២) ដោយសារទំនាក់ទំនងនៃកិច្ចព្រមព្រៀងនោះ ពួកអ៊ីស្រាអែលអាចនិយាយ ដូចជាបានកត់ទុកមកដោយព្យាការីរបស់អេសាយថា៖ «ឱព្រះយេហូវ៉ាអើយ ទ្រង់ជាព្រះវរបិតានៃយើងខ្ញុំ»។ (អេសាយ ៦៣:១៦) ព្រះយេហូវ៉ាបានទទួលភារកិច្ចរបស់ទ្រង់ជាព្រះវរបិតា ហើយបានបង្រៀនកូនចៅរបស់ទ្រង់ គឺពួកអ៊ីស្រាអែលដោយសេចក្ដីស្រឡាញ់។ (ទំនុកដំកើង ៧១:១៧; អេសាយ ៤៨:១៧, ១៨) តាមការពិត នៅពេលដែលពួកគេមិនបានមានការស្មោះត្រង់ ទ្រង់បានអង្វរពួកគេដោយសេចក្ដីមេត្ដាករុណាថា៖ «ឱពួកក្មេងៗដែលរាថយអើយ ចូរវិលមកវិញចុះ»។—យេរេមា ៣:១៤
៧. តើពួកអ៊ីស្រាអែលមានទំនាក់ទំនងយ៉ាងណាជាមួយព្រះយេហូវ៉ា?
៧ ជាលទ្ធផលពីទំនាក់ទំនងនៃកិច្ចព្រមព្រៀងជាមួយពួកអ៊ីស្រាអែល ជាអត្ថបដិរូប ព្រះយេហូវ៉ាក៏បានក្លាយទៅជាប្ដីនៃសាសន៍នោះដែរ ហើយសាសន៍នោះក៏បានក្លាយទៅជាប្រពន្ធរបស់ទ្រង់ជាអត្ថបដិរូប។ ចំពោះនាង ព្យាការីអេសាយបានសរសេរថា៖ «ដ្បិតព្រះដែលបង្កើតឯងមក ទ្រង់ជាប្ដីរបស់ឯងហើយ ព្រះនាមទ្រង់ គឺព្រះយេហូវ៉ានៃពួកពលបរិវារ»។ (អេសាយ ៥៤:៥; យេរេមា ៣១:៣២) ថ្វីបើព្រះយេហូវ៉ាបានបំពេញមុខនាទីរបស់ទ្រង់ជាប្ដីដ៏ថ្លៃថ្នូរក្ដី សាសន៍អ៊ីស្រាអែលបានក្លាយទៅជាប្រពន្ធដែលមានចិត្តមិនស្មោះត្រង់ទៅវិញ។ ព្រះយេហូវ៉ាទ្រង់បានមានបន្ទូលថា៖ «ឱពូជពង្សអ៊ីស្រាអែលអើយ ពិតប្រាកដជាឯងបានប្រព្រឹត្តអំពើក្បត់ចំពោះអញ ប្រៀបដូចជាប្រពន្ធប្រព្រឹត្តក្បត់ចាកចោលប្ដីខ្លួន»។ (យេរេមា ៣:២០) ព្រះយេហូវ៉ានៅតែអង្វរដល់ពួកកូនចៅរបស់ប្រពន្ធដែលគ្មានជំនឿនោះ ហើយទ្រង់បានបន្តធ្វើជាអ្នក‹បង្រៀនដ៏ធំអស្ចារ្យ›ជានិច្ច។—អេសាយ ៣០:២០; របាក្សត្រទី២ ៣៦:១៥
៨. ថ្វីបើសាសន៍អ៊ីស្រាអែលត្រូវបានព្រះយេហូវ៉ាបដិសេធចោលក្ដី តើប្រពន្ធជាអត្ថបដិរូបដ៏ពិតណាដែលទ្រង់នៅមាននោះ?
៨ នៅពេលដែលពួកអ៊ីស្រាអែលបានបដិសេធចោលរាជបុត្រារបស់ទ្រង់ ព្រះយេស៊ូគ្រីស្ទ ហើយធ្វើគត់ដល់ទ្រង់នោះ នៅទីបំផុតព្រះក៏បានបដិសេធចោលនាងទៅ។ ដូច្នេះសាសន៍យូដាក៏លែងមានសិទ្ធិធ្វើជាប្រពន្ធជាអត្ថបដិរូបដល់ទ្រង់ទៀតឡើយ ហើយទ្រង់ក៏មិនជាប្ដីនិងគ្រូដល់ពួកកូនចៅដ៏រឹងចចេសរបស់នាងទៀតដែរ។ (ម៉ាថាយ ២៣:៣៧, ៣៨) ប៉ុន្តែ សាសន៍អ៊ីស្រាអែលគ្រាន់តែជាគំរូ ឬក៏ជាតំណាងប្រពន្ធប៉ុណ្ណោះទេ។ សាវ័កប៉ុលបានដកស្រង់ចេញពីអេសាយ ៥៤:១ ដែលចែងប្រាប់អំពី«ស្ត្រីអារ» ដែលមានការខុសគ្នាហើយប្លែកពី«ស្ត្រីដែលមានប្ដី» ដែលជាសាសន៍នៃអ៊ីស្រាអែលខាងសាច់ឈាម។ ប៉ុលបានសម្ដែងថា ជនគ្រីស្ទានចាក់ប្រេងតាំងជាកូនចៅនៃ«ស្ត្រីអារ» ដែលគាត់បានហៅថាជា«យេរូសាឡិមដែលនៅស្ថានលើ»។ ស្ត្រីជាអត្ថបដិរូបដ៏ពិតនេះគឺមានរួមបញ្ចូលសត្តនិករវិញ្ញាណនៃអង្គការសួគ៌ារបស់ព្រះ។—កាឡាទី ៤:២៦, ២៧
៩. (ក) តើព្រះយេស៊ូសំដៅទៅពួកណា នៅពេលដែលទ្រង់បានមានបន្ទូលអំពី‹ពួកកូនចៅរបស់ឯងនឹងធ្វើជាសិស្សរបស់ព្រះយេហូវ៉ានោះ›? (ខ) ទៅលើមូលដ្ឋានអ្វីដែលប្រជាជនក្លាយទៅជាពួកកូនខាងវិញ្ញាណរបស់ព្រះ?
៩ ដូច្នេះនៅក្នុងសាលាប្រជុំឯកាពើណិម កាលដែលព្រះយេស៊ូបានដកស្រង់ពីទំនាយរបស់អេសាយ ដែលថា៖ «កូនចៅទាំងប៉ុន្មានរបស់ឯងនឹងធ្វើជាសិស្សរបស់ព្រះយេហូវ៉ា» ទ្រង់កំពុងតែមានបន្ទូលអំពីអស់អ្នកដែលនឹងក្លាយទៅជា«ពួកកូន»នៃ«ក្រុងយេរូសាឡិមដែលនៅស្ថានលើ» គឺអង្គការសួគ៌ាដែលមានដូចជាប្រពន្ធរបស់ព្រះ។ ដោយទទួលយកការបង្រៀនពីអាណត្ដិជនរបស់ព្រះពីស្ថានសួគ៌ គឺជាព្រះយេស៊ូគ្រីស្ទនោះ ពួកជនជាតិយូដាដែលបានស្ដាប់នោះ អាចទៅជាកូនចៅរបស់ព្រះ ដែលជាស្ត្រីអារខាងស្ថានសួគ៌ពីមុន ហើយនឹងរួមគ្នាធ្វើជា«សាសន៍បរិសុទ្ធ»គឺ«អ៊ីស្រាអែលរបស់ព្រះ»ខាងវិញ្ញាណ។ (ពេត្រុសទី១ ២:៩, ១០; កាឡាទី ៦:១៦) ក្នុងការរៀបរាប់នូវឱកាសដ៏ធំដែលព្រះយេស៊ូបានបើកទៅដល់ពួកអ្នកដែលនឹងក្លាយទៅជាកូនរបស់ព្រះនោះ សាវ័កយ៉ូហានបានសរសេរថា៖ «ទ្រង់បានយាងមកគង់នៅផែនដីរបស់ទ្រង់ តែរាស្ត្រទ្រង់មិនបានទទួលទ្រង់សោះ ប៉ុន្តែអស់អ្នកណាដែលទទួលទ្រង់ គឺអស់អ្នកដែលជឿដល់ព្រះនាមទ្រង់ នោះទ្រង់បានប្រទានអំណាច ឲ្យបានត្រឡប់ជាកូនព្រះ»។—យ៉ូហាន ១:១១, ១២
ការបង្រៀនដ៏សំខាន់របស់ព្រះយេហូវ៉ា
១០. ក្រោយពីការបះបោរភ្លាមនៅក្នុងសួនអេដែន តើព្រះយេហូវ៉ាបានបង្រៀនអ្វីអំពី«ពូជ» ហើយតើពូជនេះជាអ្នកណា?
១០ ព្រះយេហូវ៉ា ជាព្រះវរបិតាដែលប្រកបទៅដោយសេចក្ដីស្រឡាញ់ បានប្រាប់កូនចៅរបស់ទ្រង់អំពីគោលបំណងរបស់ទ្រង់។ ដូច្នេះហើយ នៅពេលដែលទេវតាបះបោរមួយបានល្បួងមនុស្សជាតិមួយគូដំបូងឲ្យមិនគោរពព្រះនោះ ព្រះយេហូវ៉ាបានប្រទានប្រាប់ពួកគេនូវអ្វីដែលទ្រង់នឹងត្រូវធ្វើភ្លាម ដើម្បីនឹងបំពេញគោលបំណងរបស់ទ្រង់ ក្នុងការធ្វើឲ្យផែនដីបានទៅជាសួនមនោរម្យ។ ទ្រង់បានមានបន្ទូលថា ទ្រង់នឹងដាក់ការសំអប់រវាង«ពស់ពីបុរាណ» ដែលជាអារក្សសាតាំងនិង«ស្ត្រី»។ រួចមក ទ្រង់បានពន្យល់ថា «ពូជ»របស់ស្ត្រីនឹង«កិនក្បាល»សម្លាប់សាតាំង។ (លោកុប្បត្តិ ៣:១-៦, ១៥; វិវរណៈ ១២:៩; ២០:៩, ១០) ដូចជាយើងបានកត់សម្គាល់មកហើយ ស្ត្រី—នៅពេលក្រោយមកត្រូវបានសម្គាល់ជា«ក្រុងយេរូសាឡិមដែលនៅស្ថានលើ»—ជាអង្គការសួគ៌ារបស់ព្រះដែលមានសត្តវិញ្ញាណ។ ប៉ុន្តែ តើអ្នកណាជា«ពូជ»របស់នាង? ពូជនេះជារាជបុត្រារបស់ព្រះ គឺព្រះយេស៊ូគ្រីស្ទ ជាបុគ្គលដែលបានបញ្ជូនមកពីស្ថានសួគ៌ ហើយជាបុគ្គលដែលនឹងកំទេចចោលសាតាំងជាយថាហេតុ។—កាឡាទី ៤:៤; ហេព្រើរ ២:១៤; យ៉ូហានទី១ ៣:៨
១១, ១២. តើព្រះយេហូវ៉ាបានពង្រីកការបង្រៀនដ៏សំខាន់របស់ទ្រង់ចំពោះ«ពូជ»នេះដោយយ៉ាងណា?
១១ ព្រះយេហូវ៉ាបានពង្រីកការបង្រៀនដ៏សំខាន់នេះចំពោះ«ពូជ» នៅពេលដែលទ្រង់បានសន្យាដល់អ័ប្រាហាំថា៖ «នោះអញនឹងឲ្យពរដល់ឯង ហើយនឹងចំរើនពូជឯងឲ្យមានគ្នាសន្ធឹកដូចផ្កាយនៅលើមេឃ . . . គ្រប់ទាំងសាសន៍នៅផែនដីនឹងបានពរដោយសារពូជឯង ពីព្រោះឯងបានស្ដាប់តាមពាក្យអញ»។ (លោកុប្បត្តិ ២២:១៧, ១៨) ព្រះយេហូវ៉ាបានប្រើសាវ័កប៉ុលឲ្យពន្យល់ថា ព្រះយេស៊ូគ្រីស្ទជាពូជរបស់អ័ប្រាហាំដែលបានសន្យាមកនោះ ប៉ុន្តែថានៅមានអ្នកដទៃទៀតដែលនឹងក្លាយទៅជាផ្នែកនៃ«ពូជ»នោះ។ ប៉ុលបានសរសេរថា៖ «បើអ្នករាល់គ្នាជារបស់ផងព្រះគ្រីស្ទ នោះក៏ពេញជាពូជរបស់លោកអ័ប្រាហាំហើយ ក៏ជាអ្នកគ្រងមរដកតាមសេចក្ដីសន្យាផង»។—កាឡាទី ៣:១៦, ២៩
១២ ព្រះយេហូវ៉ាក៏បានសម្ដែងប្រាប់ថា ព្រះគ្រីស្ទជាពូជ នឹងកើតមកពីតំណនៃពូជស្តេចយូដា ហើយថា«បណ្ដាជនទាំងឡាយនឹងចុះចូលចំពោះទ្រង់»។ (លោកុប្បត្តិ ៤៩:១០) ចំពោះស្តេចដាវីឌនៃកុលសម្ព័ន្ធយូដា ព្រះយេហូវ៉ាបានសន្យាថា៖ «អញនឹងធ្វើឲ្យពូជពង្សដាវីឌនៅជាប់ជាដរាប ហើយឲ្យរាជ្យបាននៅអស់កាលដែលផ្ទៃមេឃមាននៅផង ពូជពង្សដាវីឌនឹងស្ថិតស្ថេរនៅជារៀងរាបដរាប ហើយរាជ្យនឹងជាប់នៅចំពោះអញដូចជាព្រះអាទិត្យដែរ»។ (ទំនុកដំកើង ៨៩:៣, ៤, ២៩, ៣៦) នៅពេលដែលទេវតាកាព្រីយ៉ែលបានប្រកាសអំពីកំណើតរបស់យេស៊ូ លោកបានពន្យល់ថាបុត្រនោះ ជាអ្នកគ្រប់គ្រងដែលព្រះបានតែងតាំង ជាពូជនៃដាវីឌ។ កាព្រីយ៉ែលបានមានប្រសាសន៍ថា៖ «បុត្រនោះនឹងបានជាធំឧត្តម ហើយគេនឹងហៅទ្រង់ ជាព្រះរាជបុត្រានៃព្រះដ៏ខ្ពស់បំផុត ព្រះអម្ចាស់ដ៏ជាព្រះ ទ្រង់នឹងប្រទានរាជ្យនៃហ្លួងដាវីឌ . . . ហើយរាជ្យទ្រង់នឹងមិនផុតឡើយ»។—លូកា ១:៣២, ៣៣; អេសាយ ៩:៦, ៧; ដានីយ៉ែល ៧:១៣, ១៤
១៣. ដើម្បីនឹងទទួលប្រសិទ្ធិពរពីព្រះយេហូវ៉ា តើយើងត្រូវតែតបឆ្លើយនឹងការបង្រៀនរបស់ទ្រង់ដូចម្ដេច?
១៣ ដើម្បីនឹងទទួលប្រសិទ្ធិពរពីព្រះយេហូវ៉ា យើងត្រូវតែដឹង ហើយប្រព្រឹត្តតាមការបង្រៀនដ៏សំខាន់នេះអំពីរាជាណាចក្ររបស់ព្រះ។ យើងត្រូវតែជឿថា ព្រះយេស៊ូបានយាងមកពីស្ថានសួគ៌ ថាទ្រង់ជាស្តេចដែលព្រះបានតែងតាំងឡើង—ជាពូជស្តេចដែលនឹងត្រួតត្រាលើការស្ដារឡើងវិញនៃទីមនោរម្យលើផែនដី—ហើយថាទ្រង់នឹងប្រោសពួកមនុស្សស្លាប់ឲ្យរស់ឡើងវិញ។ (លូកា ២៣:៤២, ៤៣; យ៉ូហាន ១៨:៣៣-៣៧) នៅឯភូមិកាពើណិម នៅពេលដែលព្រះយេស៊ូបានមានបន្ទូលអំពីការប្រោសមនុស្សស្លាប់ឲ្យរស់ឡើងវិញ នេះជាការជាក់ស្តែងណាស់ ចំពោះពួកយូដាថាទ្រង់បានមានបន្ទូលអំពីសេចក្ដីពិត។ គ្រាន់តែពីរបីសប្ដាហ៍មុននោះ ប្រហែលជានៅឯភូមិកាពើណិមនេះ ដែលទ្រង់បានប្រោសឲ្យកូនស្រីរបស់មេទាហាននៃសាលាប្រជុំ! (លូកា ៨:៤៩-៥៦) យ៉ាងប្រាកដណាស់ យើងក៏មានមូលហេតុគ្រប់គ្រាន់ដែរ ក្នុងការជឿអំពីរឿងនេះ ហើយប្រព្រឹត្តតាមសេចក្ដីសង្ឃឹមដែលព្រះយេហូវ៉ាបានបង្រៀនអំពីរាជាណាចក្ររបស់ទ្រង់!
១៤, ១៥. (ក) តើព្រះរាជាណាចក្ររបស់ព្រះយេហូវ៉ាសំខាន់យ៉ាងណាចំពោះព្រះយេស៊ូ? (ខ) តើយើងត្រូវតែយល់អ្វី ដើម្បីឲ្យអាចពន្យល់អំពីព្រះរាជាណាចក្ររបស់ព្រះយេហូវ៉ានោះ?
១៤ ព្រះយេស៊ូបានបូជាព្រះជន្មរបស់ទ្រង់ដើម្បីនឹងបង្រៀនអំពីរាជាណាចក្ររបស់ព្រះយេហូវ៉ា។ នេះជាប្រធានដ៏សំខាន់ក្នុងការផ្សាយរបស់ទ្រង់ ហើយព្រមទាំងបង្រៀនឲ្យពួកកាន់តាមទ្រង់អធិស្ឋានអំពីព្រះរាជាណាចក្រនេះផង។ (ម៉ាថាយ ៦:៩, ១០; លូកា ៤:៤៣) ពួកយូដាខាងសាច់ឈាមនឹងត្រូវបានធ្វើជា‹ពួកកូនរបស់ព្រះរាជាណាចក្រ›នោះ ប៉ុន្តែដោយសារតែពួកគេគ្មានជំនឿ ពួកគេភាគច្រើនពុំបានទទួលឯកសិទ្ធិនេះឡើយ។ (ម៉ាថាយ ៨:១២; ២១:៤៣) ព្រះយេស៊ូបានសម្ដែងប្រាប់ថាមានតែ«ពួកហ្វូងតូច»ទេ ដែលនឹងទទួលឯកសិទ្ធិក្លាយទៅជា‹ពួកកូនរបស់ព្រះរាជាណាចក្រ›។ «ពួកកូន»ទាំងនេះក្លាយទៅជា‹អ្នកគ្រងមរតកជាមួយនឹងព្រះគ្រីស្ទ›នៅក្នុងព្រះរាជាណាចក្រសួគ៌ារបស់ទ្រង់។—លូកា ១២:៣២; ម៉ាថាយ ១៣:៣៨; រ៉ូម ៨:១៤-១៧; យ៉ាកុប ២:៥
១៥ តើព្រះយេស៊ូនឹងយកពួកគ្រងមរតកនៃព្រះរាជាណាចក្រប៉ុន្មាននាក់ ដើម្បីនឹងសោយរាជ្យជាមួយទ្រង់ទៅលើផែនដីនោះ? គឺមានតែ១៤៤.០០០នាក់ទេ បើយោងទៅតាមព្រះគម្ពីរនោះ។ (យ៉ូហាន ១៤:២, ៣; ធីម៉ូថេទី២ ២:១២; វិវរណៈ ៥:១០; ១៤:១-៣; ២០:៤) ប៉ុន្តែព្រះយេស៊ូបានមានបន្ទូលថា ទ្រង់មាន«ចៀមឯទៀត» ដែលនឹងទៅជាអនុរាស្ត្រនៅលើផែនដីក្រោមការគ្រប់គ្រងនៃព្រះរាជាណាចក្រ។ ពួកទាំងនេះនឹងមានសុខភាពដ៏ល្អឥតខ្ចោះ ហើយនឹងទទួលសន្ដិភាពជានិរន្តរ៍នៅលើផែនដីមនោរម្យ។ (យ៉ូហាន ១០:១៦; ទំនុកដំកើង ៣៧:២៩; វិវរណៈ ២១:៣, ៤) យើងត្រូវតែយល់ ហើយអាចពន្យល់ការបង្រៀនរបស់ព្រះយេហូវ៉ាអំពីព្រះរាជាណាចក្រទៅអ្នកដទៃ។
១៦. តើការបង្រៀនដ៏សំខាន់ណារបស់ព្រះយេហូវ៉ា ដែលយើងត្រូវតែរៀនហើយប្រព្រឹត្តតាមនោះ?
១៦ សាវ័កប៉ុលបានសម្គាល់នូវការបង្រៀនរបស់ព្រះយេហូវ៉ាដ៏សំខាន់មួយទៀត។ គាត់បានមានប្រសាសន៍ថា៖ «ពីព្រោះព្រះទ្រង់បង្រៀន ឲ្យអ្នករាល់គ្នាស្រឡាញ់គ្នាទៅវិញទៅមកហើយ»។ (ថែស្សាឡូនីចទី១ ៤:៩) ដើម្បីធ្វើឲ្យព្រះយេហូវ៉ាគាប់ព្រះហឫទ័យ យើងត្រូវតែសម្ដែងសេចក្ដីស្រឡាញ់បែបនេះ។ ព្រះគម្ពីរចែងថា៖ «ព្រះទ្រង់ជាសេចក្ដីស្រឡាញ់» ហើយយើងក៏ត្រូវតែប្រព្រឹត្តតាមគំរូរបស់ទ្រង់ ក្នុងការបង្ហាញនូវសេចក្ដីស្រឡាញ់នេះ។ (យ៉ូហានទី១ ៤:៨; អេភេសូរ ៥:១, ២) ជាការគួរឲ្យស្ដាយណាស់ ដែលមនុស្សជាច្រើនពុំបានរៀនបង្ហាញសេចក្ដីស្រឡាញ់ដល់មនុស្សគ្នីគ្នា ដូចជាព្រះបានបង្រៀនយើងឲ្យធ្វើនោះ។ ចុះចំពោះយើង យ៉ាងណាវិញដែរ? តើយើងបានប្រព្រឹត្តតាមការបង្រៀនរបស់ព្រះយេហូវ៉ានេះទេ?
១៧. តើអាកប្បកិរិយារបស់អ្នកណាដែលយើងត្រូវតែប្រព្រឹត្តតាម?
១៧ ជាការដ៏សំខាន់ណាស់ដែលយើងត្រូវតែស្ដាប់តាមការបង្រៀនរបស់ព្រះយេហូវ៉ា។ សូមឲ្យអាកប្បកិរិយារបស់យើង បានដូចអ្នកតែងបទទំនុកដំកើងព្រះគម្ពីរ ដែលបានសរសេរថា៖ «ឱព្រះយេហូវ៉ាអើយ សូមបង្ហាញអស់ទាំងផ្លូវរបស់ទ្រង់ដល់ទូលបង្គំ សូមបង្រៀនទូលបង្គំក្នុងផ្លូវច្រករបស់ទ្រង់ សូមនាំ ហើយបង្រៀនទូលបង្គំក្នុងសេចក្ដីពិតរបស់ទ្រង់ផង»។ «សូមបង្រៀនអស់ទាំងបញ្ញត្តរបស់ទ្រង់ដល់ទូលបង្គំ សូមបង្រៀនឲ្យទូលបង្គំមានប្រាជ្ញាធ្លុះយល់ ហើយចេះដឹងយ៉ាងល្អ . . . សូមបង្រៀនអស់ទាំងច្បាប់ទ្រង់ដល់ទូលបង្គំផង»។ (ទំនុកដំកើង ២៥:៤, ៥; ១១៩:១២, ៦៦, ១០៨) បើសិនជាអ្នកមានចិត្តគំនិតដូចអ្នកតែងបទទំនុកដំកើង អ្នកក៏អាចនៅក្នុងចំណោមនៃពួកហ្វូងធំដែលព្រះយេហូវ៉ាបានបង្រៀននោះដែរ។
ពួកហ្វូងធំដែលបានបង្រៀន
១៨. តើព្យាការីអេសាយបានទាយប្រាប់អ្វីដែលនឹងកើតឡើងក្នុងសម័យយើងនេះ?
១៨ ព្យាការីអេសាយបានទាយប្រាប់នូវអ្វីដែលនឹងកើតឡើងក្នុងសម័យយើង៖ «នៅជាន់ក្រោយបង្អស់ នោះភ្នំ ជាទីស្អាងព្រះវិហារនៃព្រះយេហូវ៉ា នឹងបានតាំងឡើងខ្ពស់លើសជាងអស់ទាំងភ្នំធំៗ . . . ឯប្រជាជាតិជាច្រើន គេនឹងទៅដោយពោលថា៖ ‹ចូរយើងឡើងទៅឯភ្នំនៃព្រះយេហូវ៉ា ដល់ព្រះវិហារនៃព្រះរបស់ពួកយ៉ាកុបចុះ។ ទ្រង់នឹងបង្រៀនយើងពីផ្លូវរបស់ទ្រង់›»។ (អេសាយ ២:២, ៣; មីកា ៤:២) តើពួកទាំងនេះដែលព្រះយេហូវ៉ាបានបង្រៀននោះ ជាពួកណា?
១៩. តើពួកណាដែលរួមបញ្ចូលក្នុងចំណោមពួកអ្នកដែលព្រះយេហូវ៉ាបានបង្រៀននោះ?
១៩ ពួកគេរួមបញ្ចូលពួកអ្នកផ្សេងៗទៀត ក្រៅពីពួកអ្នកដែលនឹងសោយរាជ្យជាមួយព្រះគ្រីស្ទនៅក្នុងស្ថានសួគ៌។ ដូចជាបានកត់សម្គាល់ពីមុនមកហើយ ព្រះយេស៊ូបានមានបន្ទូលថា ទ្រង់មាន«ចៀមឯទៀត»—អនុរាស្ត្រនៃព្រះរាជាណាចក្រនៅលើផែនដី—ក្រៅពីពួក«ហ្វូងតូច»ដែលបានព្រះរាជាណាចក្រជាមរតក។ (យ៉ូហាន ១០:១៦; លូកា ១២:៣២) «ពួកហ្វូងធំ»ដែលនឹងរួចរស់ជីវិតពី«សេចក្ដីវេទនាជាខ្លាំង»គឺជាពួកក្រុមនៃចៀមឯទៀត ហើយពួកគេមានឋានៈដែលព្រះយេហូវ៉ាយល់ព្រម ដោយសារពួកគេមានជំនឿទៅលើលោហិតរបស់ព្រះយេស៊ូ។ (វិវរណៈ ៧:៩, ១៤) ថ្វីបើពួកចៀមឯទៀតមិនបានរួមបញ្ចូលចំៗក្នុងចំណោម«ពួកកូនចៅ»ដែលបានចែងមកនៅអេសាយ ៥៤:១៣ក្ដី ពួកគេបានទទួលប្រសិទ្ធិពរដោយព្រះយេហូវ៉ាបានបង្រៀនពួកគេ។ ដូច្នេះហើយ ពួកគេហៅព្រះយ៉ាងត្រឹមត្រូវថាជា«ព្រះវរបិតា» ពីព្រោះទ្រង់នឹងទៅជាជីតារបស់គេតាមរយៈព្រះយេស៊ូគ្រីស្ទ«ព្រះវរបិតាដ៏គង់នៅអស់កល្ប»។—ម៉ាថាយ ៦:៩; អេសាយ ៩:៦
របៀបដែលព្រះយេហូវ៉ាបង្រៀនយើង
២០. តើតាមរបៀបណាដែលព្រះយេហូវ៉ាបង្រៀននោះ?
២០ ព្រះយេហូវ៉ាបង្រៀនយើងតាមរបៀបច្រើនណាស់។ ជាឧទាហរណ៍ ទ្រង់បង្រៀនយើងតាមកិច្ចការដែលទ្រង់បានបង្កើតមក ដែលបញ្ជាក់ប្រាប់យើងអំពីវិជ្ជាមាននិងប្រាជ្ញាដ៏ឧត្តមរបស់ទ្រង់។ (យ៉ូប ១២:៧-៩; ទំនុកដំកើង ១៩:១, ២; រ៉ូម ១:២០) ម្យ៉ាងវិញទៀត ទ្រង់បង្រៀនយើងតាមរយៈការធ្វើគមនាគមន៍ ដូចជាទ្រង់បានបង្រៀនព្រះយេស៊ូមុននឹងមានកំណើតជាមនុស្សនោះ។ ស្រដៀងនេះដែរ នៅក្នុងគ្រាបីដង ទ្រង់បានមានបន្ទូលផ្ទាល់ពីស្ថានសួគ៌ដល់ប្រជារាស្ត្រនៅលើផែនដី។—ម៉ាថាយ ៣:១៧; ១៧:៥; យ៉ូហាន ១២:២៨
២១ តើទេវតាមួយណាដែលព្រះយេហូវ៉ាបានប្រើ ជាពិសេសធ្វើជាអ្នកតំណាងរបស់ទ្រង់ ប៉ុន្តែយ៉ាងម៉េចក៏យើងដឹងថា មានអ្នកដទៃទៀតដែលព្រះបានប្រើដែរនោះ?
២១ ព្រះយេហូវ៉ាក៏បានប្រើទេវតាជាអ្នកតំណាងដើម្បីនឹងបង្រៀនដែរ គឺរួមបញ្ចូលបុត្រច្បងរបស់ទ្រង់គឺ«ព្រះបន្ទូល»។ (យ៉ូហាន ១:១-៣) ថ្វីបើព្រះយេហូវ៉ាប្រហែលជាអាចមានបន្ទូលផ្ទាល់ទៅមនុស្សល្អឥតខ្ចោះ អ័ដាម នៅក្នុងសួនច្បារអេដែននោះ ព្រះក៏ប្រហែលជាបានប្រើព្រះយេស៊ូមុនទ្រង់ជាមនុស្សដើម្បីនឹងមានបន្ទូលសំរាប់ដែរ។ (លោកុប្បត្តិ ២:១៦, ១៧) បុគ្គលម្នាក់នេះក៏ប្រហែលជា«ទេវតានៃព្រះដែលបាននាំមុខពួកអ៊ីស្រាអែល» ហើយចំពោះទេវតានេះ ព្រះយេហូវ៉ាបានបញ្ជាប្រាប់ពួកមនុស្សថា៖ «ចូរប្រយ័ត្ននឹងស្ដាប់បង្គាប់តាមទ្រង់»។ (និក្ខមនំ ១៤:១៩; ២៣:២០, ២១) យ៉ាងច្បាស់ណាស់ ព្រះយេស៊ូមុនទ្រង់ជាមនុស្ស ជា«កំពូលលើពួកពលផងព្រះយេហូវ៉ា» ដែលបានលេចឡើងដល់យ៉ូស្វេដើម្បីនឹងពង្រឹងកម្លាំងដល់គាត់។ (យ៉ូស្វេ ៥:១៤, ១៥) ព្រះយេហូវ៉ាក៏បានប្រើពួកទេវតាឯទៀតដើម្បីនឹងប្រទានឲ្យការបង្រៀនរបស់ទ្រង់ ដូចជាពួកទេវតាដែលទ្រង់បានប្រើដើម្បីនឹងផ្ដល់ក្រិត្យវិន័យរបស់លោកម៉ូសេ។—និក្ខមនំ ២០:១; កាឡាទី ៣:១៩; ហេព្រើរ ២:២, ៣
២២. (ក) តើពួកណាដែលនៅលើផែនដីដែលព្រះយេហូវ៉ាបានប្រើដើម្បីនឹងបង្រៀន? (ខ) តើតាមរយៈដ៏សំខាន់ណា ដែលព្រះយេហូវ៉ាបង្រៀនមនុស្សយើងនៅសព្វថ្ងៃនេះ?
២២ ម្យ៉ាងវិញទៀត ព្រះយេហូវ៉ាបានប្រើមនុស្សជាអ្នកតំណាងដើម្បីនឹងបង្រៀន។ ឪពុកម្ដាយនៅប្រទេសអ៊ីស្រាអែលបានតម្រូវឲ្យបង្រៀនកូនចៅរបស់គេ ពួកព្យាការី ពួកសង្ឃ ស្តេច និងពួកលេវីបានបង្រៀនច្បាប់របស់ព្រះយេហូវ៉ាទៅដល់សាសន៍ទាំងមូល។ (ចោទិយកថា ១១:១៨-២១; សាំយូអែលទី១ ១២:២០-២៥; របាក្សត្រទី២ ១៧:៧-៩) ព្រះយេស៊ូជាអ្នកនាំពាក្យដ៏សំខាន់បំផុតរបស់ព្រះនៅលើផែនដីនេះ។ (ហេព្រើរ ១:១, ២) ព្រះយេស៊ូតែងតែបានមានបន្ទូលថា អ្វីដែលទ្រង់បានបង្រៀន គឺជាអ្វីដែលទ្រង់បានរៀនមកពីព្រះវរបិតារបស់ទ្រង់។ ដូច្នេះជាលទ្ធផល ពួកអ្នកស្ដាប់របស់ទ្រង់ ក៏កំពុងតែបានបង្រៀនដោយព្រះយេហូវ៉ាវិញដែរ។ (យ៉ូហាន ៧:១៦; ៨:២៨; ១២:៤៩; ១៤:៩, ១០) ព្រះយេហូវ៉ាបានកត់ទុកពាក្យបន្ទូលរបស់ទ្រង់ ហើយនៅសម័យយើងនេះ ទ្រង់បង្រៀនមនុស្សតាមបទគម្ពីរដែលទ្រង់បានបណ្ដាលឲ្យព្រះវិញ្ញាណបរិសុទ្ធតែងមក។—រ៉ូម ១៥:៤; ធីម៉ូថេទី២ ៣:១៦
២៣. តើមានសំនួរអ្វីខ្លះដែលយើងនឹងត្រូវតែពិចារណាក្នុងអត្ថបទជាបន្ទាប់?
២៣ យើងកំពុងតែរស់នៅក្នុងគ្រាដ៏សំខាន់បំផុត ពីព្រោះព្រះគម្ពីរសន្យាថា ‹នៅជាន់ក្រោយបង្អស់[ពេលដែលយើងកំពុងតែរស់នៅនេះ] មនុស្សជាច្រើននឹងត្រូវបានបង្រៀនអំពីផ្លូវរបស់ព្រះយេហូវ៉ា›។ (អេសាយ ២:២, ៣) តើការបង្រៀននេះត្រូវបានផ្ដល់មកយ៉ាងដូចម្ដេច? តើយើងត្រូវធ្វើអ្វីដើម្បីនឹងទទួលប្រយោជន៍ពីកម្មវិធីបង្រៀនរបស់ព្រះយេហូវ៉ាដ៏ធំដែលមាននៅសព្វថ្ងៃនេះ ព្រមទាំងឲ្យបានចូលរួមនោះ? យើងនឹងពិចារណាមើលអំពីសំនួរបែបនេះនៅក្នុងអត្ថបទជាបន្ទាប់។
តើអ្នកនឹងឆ្លើយយ៉ាងណា?
◻ តើព្រះយេហូវ៉ាក្លាយទៅជាព្រះវរបិតា ជាគ្រូ និងប្ដីដោយយ៉ាងណា?
◻ តើព្រះយេហូវ៉ាបង្រៀនយ៉ាងណាអំពី«ពូជ»?
◻ តើការបង្រៀនដ៏សំខាន់ណារបស់ព្រះដែលយើងត្រូវតែធ្វើតាមនោះ?
◻ តើព្រះយេហូវ៉ាបង្រៀនយើងដោយយ៉ាងណា?
[រូបភាពនៅទំព័រ១២]
ការប្រោសកូនស្រីរបស់យៃរ៉ុសឲ្យរស់ឡើងវិញ ផ្ដល់នូវមូលដ្ឋានដ៏ល្អក្នុងការជឿទៅលើសេចក្ដីសន្យារបស់ព្រះយេស៊ូអំពីដំណើររស់ឡើងវិញ