សេចក្ដីរាយការណ៍ពីពួកអ្នកប្រកាសព្រះរាជាណាចក្រ
‹ធ្វើការជាអ្នកផ្សាយដំណឹងល្អ›
តើធ្វើជាអ្នកផ្សាយដំណឹងល្អមានន័យយ៉ាងដូចម្ដេច? ពាក្យនេះគឺមកពីពាក្យក្រិក អឿអ័ក្ចចឺលីស្ដិស eu·ag·ge·li·stesʹ ដែលជាប់ទាក់ទងយ៉ាងជិតដិតនឹងពាក្យ អឿអ័ក្ចចឺលីអន eu·ag·geʹli·on មានន័យថា«ដំណឹងល្អ»។ ដូច្នេះ អ្នកផ្សាយដំណឹងល្អគឺជាអ្នកផ្សាយប្រកាសឬអ្នកនាំសារដំណឹងល្អ។
គ្រីស្ទានពិតទាំងអស់គ្នាគឺជាអ្នកផ្សាយដំណឹងល្អ ពីព្រោះពួកគេប្រកាសដំណឹងល្អអំពីព្រះរាជាណាចក្រនៃព្រះ។ ដោយសមត្រឹមត្រូវ សាវ័កប៉ុលដាស់តឿនធីម៉ូថេឲ្យ‹ធ្វើការជាអ្នកផ្សាយដំណឹងល្អ›។ ធីម៉ូថេគឺនឹងធ្វើកិច្ចការនេះយ៉ាងមធ្យ័ត។ ប៉ុលតឿនប្រាប់គាត់ឲ្យ‹មានគំនិតនឹងធឹង ក្នុងគ្រប់ការទាំងអស់› ហើយ‹ទាំងបំពេញការងាររបស់គាត់គ្រប់ជំពូកផង›។—ធីម៉ូថេទី២ ៤:៥
យើងជាអ្នកផ្សាយដំណឹងល្អក៏ត្រូវតែធ្វើកិច្ចបំរើនេះយ៉ាងមធ្យ័តដែរ ហើយត្រូវ‹មានគំនិតនឹងធឹង› ឬនៅប្រុងស្មារតីជានិច្ចផង ដើម្បីផ្សាយប្រាប់ដំណឹងល្អនៅគ្រប់ឱកាស។ មនុស្សជាច្រើនបានស្គាល់ព្រះយេហូវ៉ាហើយដឹងអំពីសេចក្ដីសន្យារបស់ទ្រង់ ក្រោយពីបានទាក់ទងដោយស្មរបន្ទាល់ព្រះយេហូវ៉ា តាមរយៈការធ្វើបន្ទាល់ក្រៅផ្លូវការ។ ការនេះហើយដែលបានកើតឡើងដល់ស៊ីម័រ ដែលជាបុរសម្នាក់នៅប្រទេសបារបាដុស។
ស៊ីម័រជាគ្រូបង្រៀនសាលារដ្ឋ។ ឆាល្សជាគ្រូបង្រៀនមិនពេញពេលក្នុងសាលាជាមួយគ្នា ហើយជាស្មរបន្ទាល់ព្រះយេហូវ៉ាម្នាក់។ គាត់ជាអ្នកផ្សាយដំណឹងល្អដ៏មានស្មារតីរវាស ក៏ជាអ្នកបំរើពេញពេលឬជាអ្នកត្រួសត្រាយ ហើយយកគ្រប់ឱកាសដើម្បីផ្សាយប្រាប់ដំណឹងល្អដល់មនុស្សឯទៀត។ គឺដោយសារឆាល្សធ្វើបន្ទាល់ក្រៅផ្លូវការ ដែលស៊ីម័របានឮដំណឹងអំពីព្រះរាជាណាចក្រជាលើកដំបូង។
មិនយូរស៊ីម័រប្ដេជ្ញាផ្សាយប្រាប់សេចក្ដីពិតនៃព្រះគម្ពីរដែរ ឲ្យមនុស្សច្រើនថែមទៀតបានដឹងឮ។ ដូច្នេះគាត់ចាប់ផ្ដើមសន្ទនាជាធម្មតាជាមួយគេនៅកន្លែងធ្វើការ ជាពិសេសគឺជាមួយពួកកូនសិស្សរបស់គាត់។ ថ្វីបើនៅស្រុកខ្លះគេហាមមិនឲ្យបង្រៀនរឿងសាសនាក្នុងសាលារដ្ឋក៏ដោយ តែចំពោះគាត់វិញ គេបានចាត់ឲ្យបង្រៀនគុណសម្បត្ដិខាងសាសនានិងសីលធម៌។ តែឥឡូវទស្សនៈពីមុនរបស់ស៊ីម័រចំពោះសេចក្ដីទាំងនេះ គឺបានត្រូវប្ដូរជំនួសដោយចំណេះព្រះគម្ពីរដែលគាត់ទើបរៀនចេះថ្មីៗវិញ។ ដូច្នេះក្នុងគ្រាចេញពីរៀន គាត់និយាយប្រាប់កូនសិស្សរបស់គាត់ នូវសេចក្ដីសន្យារបស់ព្រះអំពីពិភពលោកថ្មី និងសេចក្ដីសង្ឃឹមអំពីជីវិតអស់កល្បជានិច្ច។
តើពួកក្មេងទាំងនេះឆ្លើយតបយ៉ាងដូចម្ដេច? ជាច្រើននាក់សម្ដែងការចាប់អារម្មណ៍ដ៏ពិតប្រាកដ ចំពោះដំណឹងល្អនៃព្រះរាជាណាចក្ររបស់ព្រះយេហូវ៉ា។ មិនយូរក្រោយមក ស៊ីម័រចាប់បង្រៀនព្រះគម្ពីរដល់កូនសិស្ស១៣នាក់។ ពួកគេមានការចាប់អារម្មណ៍ជាខ្លាំង បានជាគេណាត់រៀនព្រះគម្ពីរពីរដងក្នុងមួយអាទិត្យ។ ដល់ក្រោយមក ពួកគេភាគច្រើនក៏ចាប់ផ្ដើមចូលរួមក្នុងប្រជុំគ្រីស្ទាននៅសាលព្រះរាជាណាចក្រនៃស្មរបន្ទាល់ព្រះយេហូវ៉ានៅតំបន់នោះ។ មកដល់ឥឡូវនេះ ប្រាំបួននាក់បានថ្វាយខ្លួនធ្វើបុណ្យជ្រមុជទឹកជាស្មរបន្ទាល់ព្រះយេហូវ៉ា។ រីឯស៊ីម័រវិញ គាត់ឥឡូវបំពេញការងាររបស់គាត់គ្រប់ជំពូកដោយធ្វើជាអ្នកត្រួសត្រាយពេញពេលនិងជាអ្នកចាស់ទុំក្នុងក្រុមជំនុំមួយរបស់ស្មរបន្ទាល់ព្រះយេហូវ៉ានៅប្រទេសបារបាដុស។
នេះគ្រាន់តែជាឧទាហរណ៍មួយដែលបង្ហាញអំពីរបៀបដែលស្មរបន្ទាល់ព្រះយេហូវ៉ាទូទាំងពិភពលោក‹ធ្វើការជាអ្នកផ្សាយដំណឹងល្អ› ក្នុងមួយចំណែកដោយចូលរួមធ្វើបន្ទាល់ក្រៅផ្លូវការ។ ពួកគេធ្វើតាមពាក្យដាស់តឿនពីព្រះគម្ពីរ ដែលចែងក្នុងកូល៉ុស ៤:៥, ៦ ថា៖ «ចូរប្រព្រឹត្តនឹងពួកអ្នកក្រៅដោយប្រាជ្ញា ទាំងលៃយកឱកាសឲ្យទាន់ពេលផង ចូរឲ្យពាក្យសំដីរបស់អ្នករាល់គ្នា បានប្រកបដោយព្រះគុណជានិច្ច ទាំងបង់អំបិលផង ដើម្បីឲ្យដឹងជាបែបយ៉ាងណា ដែលគួរឆ្លើយដល់មនុស្សនិមួយៗ»។