បណ្ណាល័យអ៊ីនធឺណិតរបស់ប៉មយាម
ប៉មយាម
បណ្ណាល័យអ៊ីនធឺណិត
ខ្មែរ
  • គម្ពីរ
  • សៀវភៅផ្សេងៗ
  • កិច្ចប្រជុំ
  • w96 ១/៥ ទំ. ២៧-៣២
  • ចូរអរសប្បាយឥឡូវនេះនិងជានិរន្ដរ៍

សុំទោស គ្មានវីដេអូទេ

សុំទោស វីដេអូមានបញ្ហា

  • ចូរអរសប្បាយឥឡូវនេះនិងជានិរន្ដរ៍
  • ១៩៩៦ ទស្សនាវដ្ដីប៉មយាមប្រកាសអំពីរាជាណាចក្ររបស់ព្រះយេហូវ៉ា
  • ចំណងជើងតូច
  • អត្ថបទស្រដៀងគ្នា
  • ការ​សម្រេច​ក្នុង​សម័យ​យើង​នេះ
  • តើ​អ្នក​ជា​ផ្នែក​នៃ​ការ​សម្រេច​នោះ​ទេ?
  • ការ​សម្រេច​នៅ​អនាគត!
  • យើងមានហេតុនឹងអរសប្បាយ
    ១៩៩៦ ទស្សនាវដ្ដីប៉មយាមប្រកាសអំពីរាជាណាចក្ររបស់ព្រះយេហូវ៉ា
  • តើមានសួនមនោរម្យសំរាប់អ្នកឬទេ?
    ទស្សនាវដ្ដីប៉មយាមប្រកាសអំពីរាជាណាចក្ររបស់ព្រះយេហូវ៉ា ២០០៥
  • របៀបព្រះយេហូវ៉ាជួយយើងឲ្យស៊ូទ្រាំដោយមានអំណរ
    ទស្សនាវដ្ដីប៉មយាមប្រកាសអំពីរាជាណាចក្ររបស់ព្រះយេហូវ៉ា (សម្រាប់សិក្សា) ២០២២
  • រាជាណាចក្រធ្វើឲ្យបំណងប្រាថ្នារបស់ព្រះសម្រេចនៅផែនដី
    រាជាណាចក្ររបស់ព្រះចាប់ផ្ដើមគ្រប់គ្រងហើយ!
មើលបន្ថែមទៀត
១៩៩៦ ទស្សនាវដ្ដីប៉មយាមប្រកាសអំពីរាជាណាចក្ររបស់ព្រះយេហូវ៉ា
w96 ១/៥ ទំ. ២៧-៣២

ចូរ​អរ​សប្បាយ​ឥឡូវ​នេះ​និង​ជា​និរន្តរ៍

«ប៉ុន្តែ​ត្រូវ​ឲ្យ​ឯង​រាល់​គ្នា​មាន​សេចក្ដី​អំណរ ហើយ​រីករាយ​ឡើង​ជា​ដរាប ចំពោះ​ការ​ដែល​អញ​បង្កើត​នោះ។ ដ្បិត​មើល! អញ​នឹង​ធ្វើ​ឲ្យ​ក្រុង​យេរូសាឡិម​បាន​ជា​ទី​រីករាយ ហើយ​ប្រជាជន​ទាំង​ឡាយ​ជា​សេចក្ដី​អំណរ»។—អេសាយ ៦៥:១៨

១. តើ​ការ​ថ្វាយ​បង្គំ​ពិត​មាន​លទ្ធផល​យ៉ាង​ណា​មក​លើ​បុគ្គល​ជា​ច្រើន​សតវត្ស​មក​នេះ?

ជា​ច្រើន​សតវត្ស​កន្លង​មក មនុស្ស​ជា​អនេក​បាន​អរ​សប្បាយ​ក្នុង​ការ​បំរើ​ព្រះ​ពិត​តែ​មួយ ព្រះ​យេហូវ៉ា។ ដាវីឌ​ជា​បុគ្គល​ម្នាក់​ដែល​បាន​អរ​សប្បាយ​ក្នុង​ការ​ថ្វាយ​បង្គំ​ពិត។ ព្រះ​គម្ពីរ​បាន​ចែង​មក​ថា កាល​ដែល​ហិប​នៃ​កិច្ច​ព្រម​ព្រៀង​របស់​ព្រះ​យេហូវ៉ា​បាន​យក​មក​ក្រុង​យេរូសាឡិម «ដាវីឌ​នឹង​ជំនួរ​វង្ស​នៃ​សាសន៍​អ៊ីស្រាអែល​ទាំង​អស់ បាន​នាំ​ហឹប​នៃ​ព្រះ​យេហូវ៉ា​ឡើង​មក​ដោយ​សំឡេង​ហ៊ោ​ឡើង»។ (សាំយូអែលទី២ ៦:១៥) អំណរ​បែប​នេះ​ក្នុង​ការ​បំរើ​ព្រះ​យេហូវ៉ា មិន​មែន​គ្រាន់​តែ​ជា​អ្វី​នៅ​អតីតកាល​ទេ។ អ្នកក៏​អាច​ទទួល​បាន​ដែរ។ ហើយ​បន្ដិច​ទៀត អ្នក​អាច​ទទួល​អំណរ​មួយ​ភាគ​ថ្មី​ជា​មិន​ខាន!

២. ក្រៅ​ពី​ការ​សម្រេច​ដំបូង​នៃ​អេសាយ ជំពូក៣៥ និង​ពួក​យូដា​ដែល​វិល​ត្រឡប់​មក​វិញ តើ​ពួក​ណា​សព្វ​ថ្ងៃ​នេះ ទាក់​ទង​នឹង​ការ​សម្រេច​មួយ​ទៀត?

២ ក្នុង​អត្ថបទ​មុន យើង​បាន​ពិនិត្យ​មើល​ការ​សម្រេច​លើក​ទី​មួយ​នៃ​ទំនាយ​ដ៏​អស្ចារ្យ ដែល​បាន​ចែង​មក​ក្នុង​អេសាយ ជំពូក៣៥។ យើង​អាច​ហៅ​នេះ​ជា​ទំនាយ​នៃ​ការ​ស្ថាបនា​ឡើង​វិញ ពីព្រោះ​នេះ​ជា​អ្វី​ដែល​បាន​កើត​ឡើង​ចំពោះ​ពួក​យូដា​សម័យ​បុរាណ។ វា​មាន​ការ​សម្រេច​ដូច​នេះ​ដែរ​សម័យ​យើង។ តើ​យ៉ាង​ដូច​ម្ដេច​ទៅ? គឺ​ព្រះ​យេហូវ៉ា​បាន​ទាក់ទង​ជា​មួយ​អ៊ីស្រាអែល​ខាង​វិញ្ញាណ ចាប់​ផ្ដើម​ពី​ពួក​សាវ័ក​របស់​ព្រះ​យេស៊ូ​និង​ពួក​ឯ​ទៀត​នៅ​ភិន្ដាកុស ឆ្នាំ​៣៣ ស.យ.។ មាន​មនុស្ស​មួយ​ចំនួន​ដែល​បាន​តាំង​ឡើង​ដោយ​ព្រះ​វិញ្ញាណ​បរិសុទ្ធ​របស់​ព្រះ ហើយ​បាន​ទៅ​ជា​ផ្នែក​នៃ​អ្វី​ដែល​សាវ័ក​ប៉ុល​ហៅ​ថា «អ៊ីស្រាអែល​នៃ​ព្រះ»។ (កាឡាទី ៦:១៦; រ៉ូម ៨:១៥​-​១៧) ចាំ​ទេ ពេត្រុសទី១ ២:៩ ពួក​គ្រីស្ទាន​ទាំង​នេះ​ក៏​ត្រូវ​បាន​ហៅ​ជា «ពូជ​ជ្រើសរើស ជា​ពួក​សង្ឃ​ហ្លួង ជា​សាសន៍​បរិសុទ្ធ ជា​រាស្ត្រ​ដ៏​ជា​កេរ្ដិ៍​អាករ​នៃ​ព្រះ»។ ពេត្រុស​បាន​និយាយ​ប្រាប់​អំពី​កិច្ចការ​ដែល​ឲ្យ​ទៅ​ពួក​អ៊ីស្រាអែល​ខាង​វិញ្ញាណ​៖ « ‹ដើម្បី​ឲ្យ​អ្នក​រាល់​គ្នា​បាន​សំដែង​ចេញ​ឲ្យ​ឃើញ​អស់​ទាំង​លក្ខណៈ›​របស់​ព្រះ​ដែល​ទ្រង់​បាន​ហៅ​អ្នក​រាល់​គ្នា​ចេញ​ពី​សេចក្ដី​ងងឹត​មក​ក្នុង​ពន្លឺ​អស្ចារ្យ​របស់​ទ្រង់»។

ការ​សម្រេច​ក្នុង​សម័យ​យើង​នេះ

៣, ៤. តើ​មាន​ស្ថានការណ៍​យ៉ាងណា កាល​ដែល​អេសាយ ជំពូក៣៤ បាន​សម្រេច​ក្នុង​សម័យ​ថ្មី​នេះ?

៣ មាន​គ្រា​មួយ​នៅ​ដើម​សតវត្ស​នេះ ដែល​ពួក​សំណល់​នៃ​អ៊ីស្រាអែល​ខាង​វិញ្ញាណ​លើ​ផែនដី មិន​មាន​សកម្មភាព​ទៀងទាត់​ក្នុង​ការ​ប្រកាស​សារ​នេះ។ ពួក​គេ​មិន​បាន​អរ​សប្បាយ​យ៉ាង​ពេញលេញ​ទេ​ក្នុង​ពន្លឺ​ដ៏​អស្ចារ្យ​របស់​ព្រះ។ ជា​ការ​ពិត ពួក​គេ​ស្ថិត​នៅ​ក្នុង​សេចក្ដី​ងងឹតយ៉ាងខ្លាំង។ តើ​នេះ​កើត​ឡើង​នៅ​ពេល​ណា? ហើយ​តើ​ព្រះ​យេហូវ៉ា​បាន​ធ្វើ​យ៉ាង​ណា​អំពី​ការ​នេះ?

៤ គឺ​បាន​កើត​ឡើង​ក្នុង​កំឡុង​សង្គ្រាមលោក​លើក​ទីមួយ ដែល​មិន​យូរ​ប៉ុន្មាន​ក្រោយ​ពី​ព្រះ​រាជាណាចក្រ​នៃ​ព្រះមេស្ស៊ី​របស់​ព្រះ​បាន​ស្ថាបនា​ឡើង​នៅ​ស្ថានសួគ៌​ក្នុង​ឆ្នាំ​១៩១៤។ ពួក​សាសន៍​ទាំង​ឡាយ ដោយ​មាន​ការ​គាំទ្រ​ពី​ពួក​បព្វជិត​នៃ​គ្រីស្ទ​សាសនា​ក្នុង​ប្រទេស​ផ្សេងៗ បាន​សម្ដែង​កំហឹង​ជា​ខ្លាំងនឹង​គ្នា​ទៅ​វិញ​ទៅ​មក។ (វិវរណៈ ១១:១៧, ១៨) ត្រូវ​ហើយ ព្រះ​បាន​ប្រឆាំង​ពិភព​គ្រីស្ទ​សាសនា​ដ៏​ក្បត់​ជំនឿ ដោយ​មាន​ក្រុម​បព្វជិត​លើក​ខ្លួន​ឯង​ខ្ពស់ ដូច​ជា​ទ្រង់​បាន​ប្រឆាំង​នឹង​សាសន៍​អេដំម​ដ៏​ក្រអឺត​នោះ​ដែរ។ ដូច្នេះ ពិភព​គ្រីស្ទ​សាសនា ដែល​តំណាង​អេដំម គឺ​កំពុង​តែ​រង់ចាំ​ទទួល​ការ​សម្រេច​សម័យ​ថ្មី​នៃ​ទំនាយ​ក្នុង​អេសាយ ជំពូក៣៤។ ការ​សម្រេចនេះ ដែល​ជា​ការ​បំផ្លាញ​ចោល​ជា​អចិន្ត្រៃយ៍ គឺ​ពិត​ប្រាកដ​ណាស់ ដូច​ការ​សម្រេច​លើក​ទី​មួយ​មក​លើ​ពួក​អេដំម​ពី​បុរាណ​ដែរ។—វិវរណៈ ១៨:៤​-​៨, ១៩​-​២១

៥. តើ​អេសាយ ជំពូក៣៥ បាន​សម្រេច​យ៉ាង​ណា​ខ្លះ​នៅ​សម័យ​យើង​នេះ?

៥ ចុះ​ទំនាយ​ក្នុង​អេសាយ ជំពូក៣៥ ដែល​ដាក់​ទម្ងន់​ទៅ​លើ​អំណរ​នោះ យ៉ាង​ណា​ដែរ? ទំនាយ​នេះ​ក៏​បាន​ទទួល​ការ​សម្រេច​ដែរ​នៅ​សម័យ​យើង។ តើ​យ៉ាង​ដូច​ម្ដេច​ទៅ? គឺ​បាន​សម្រេច​ឡើង​ក្នុង​ការ​ដោះ​លែង​អ៊ីស្រាអែល​ខាង​វិញ្ញាណ​ពី​ការ​ជាប់​ឃុំ​ឃាំង​មួយ​ប្រភេទ។ ចូរ​ឲ្យ​យើង​ពិនិត្យ​មើល​ហេតុ​ការណ៍​ដែល​ពិត​ជា​ប្រវត្ដិសាស្ត្រ​ថ្មីៗ​នៃ​ព្រះ​ធិបតេយ្យ ដែល​កើត​ឡើង​ក្នុង​រយៈ​អាយុ​របស់​មនុស្ស​នៅ​រស់​ជា​ច្រើន។

៦. ហេតុ​អ្វី​ក៏​អាច​និយាយ​បាន​ថា ពួក​សំណល់​នៃ​ពួក​អ៊ីស្រាអែល​ខាង​វិញ្ញាណ​បាន​ស្ថិត​ក្នុង​ស្ថានភាព​ជាប់​ឃុំ​ឃាំង?

៦ ក្នុង​មួយ​រយៈ​ពេល​ដ៏​ខ្លី​ក្នុង​កំឡុង​សង្គ្រាម​លោកលើក​ទីមួយ ពួក​សំណល់​នៃ​អ៊ីស្រាអែល​ខាង​វិញ្ញាណ មិន​បាន​រក្សា​ឲ្យ​បាន​ស្អាត​ពេញទី ហើយ​មិន​បាន​ធ្វើ​ស្រប​តាម​ព្រះ​ហឫទ័យ​របស់​ព្រះ​ទេ។ ពួក​គេ​ខ្លះ​បាន​ប្រឡាក់​នឹង​លទ្ធិ​បង្រៀន​មិន​ពិត ហើយ​បាន​សម្រេច​ចិត្ត​គាំទ្រ​សាសន៍​ធ្វើ​សង្គ្រាម​ណា​មួយ ដោយ​មិន​បាន​កាន់​អព្យាក្រឹតភាព​នៅ​ចំពោះ​ព្រះ​យេហូវ៉ា។ ក្នុង​កំឡុង​សម័យ​សង្គ្រាម​ទាំង​នោះ ពួក​គេ​បាន​រង​ទុក្ខ​ការ​បៀតបៀន​គ្រប់​បែប​យ៉ាង ហើយ​ប្រកាស​វត្ថុ​ខាង​ព្រះ​គម្ពីរ​របស់​គេ​ក៏​ត្រូវ​បាន​ហាមប្រាម​ក្នុង​ស្រុក​ជា​ច្រើន។ នៅ​ទីបំផុត បងប្អូន​របស់​យើង​ខ្លះ​ដែល​មាន​ឋានៈ​ធំ​ដំ ត្រូវ​បាន​គេ​កាត់​ឲ្យ​ជាប់​ទោស ហើយ​បាន​ដាក់​គុក​ដោយសារ​ការ​ចោទ​ប្រកាន់​មិន​ពិត។ ដូច្នេះ​ហើយ ក្នុង​ន័យ​មួយ នេះ​មិន​ជា​ការ​ពិបាក​យល់​ទេ ថា​ប្រជា​រាស្ត្រ​របស់​ព្រះ​បាន​ស្ថិត​នៅ​ក្នុង​ភាព​ជាប់​ឃុំ​ឃាំង ជាជាង​មាន​សេរីភាព។ (ប្រៀបធៀប យ៉ូហាន ៨:៣១, ៣២) ពួក​គេ​ខ្វះ​ការ​យល់​ដឹង​ខាង​វិញ្ញាណ​ជា​ច្រើន។ (អេភេសូរ ១:១៦​-​១៨) ចំពោះ​ការ​សរសើរ​ព្រះ​វិញ ពួក​គេ​សម្ដែង​ភាព​គ ដែល​ជា​លទ្ធផល គេ​មិន​បាន​បង្កើត​ផលផ្លែ​អ្វី​សោះ​ខាង​វិញ្ញាណ។ (អេសាយ ៣២:៣, ៤; រ៉ូម ១៤:១១; ភីលីព ២:១១) តើ​អ្នក​ឃើញ​នូវ​របៀប​ដែល​ការ​នេះ​មាន​ភាព​ដូច​គ្នា​នឹង​ស្ថានការណ៍​នៃ​ពួក​យូដា​ពី​បុរាណ ដែល​ជាប់​ឃុំ​ឃាំង​ក្នុង​បាប៊ីឡូន​ទេ?

៧, ៨. តើ​ពួក​សំណល់​នៅ​សម័យ​ថ្មី​នេះ​បាន​ពិសោធ​ការ​ស្ថាបនា​ឡើង​វិញ​ប្រភេទ​ណា?

៧ ប៉ុន្តែ តើ​ព្រះ​នឹង​ទុក​ពួក​អ្នក​បំរើ​ទ្រង់​នៅ​សម័យ​ថ្មី​នេះ​ក្នុង​ស្ថានភាព​នោះ​ទេ? មិន​ទេ គឺ​ទ្រង់​ប្ដេជ្ញា​នឹង​ស្ថាបនា​ពួក​គេ​ឡើង​វិញ ឲ្យ​ស្រប​តាម​សេចក្ដី​ដែល​អេសាយ​បាន​ទាយ​មក។ ដូច្នេះ​ហើយ ទំនាយ​ដដែល​នេះ​ក្នុង​ជំពូក៣៥ បាន​សម្រេច​យ៉ាង​ពិសេស​ក្នុង​សម័យ​យើង​នេះ គឺ​ជា​ការ​ធ្វើ​ឲ្យ​ពួក​សំណល់​នៃ​អ៊ីស្រាអែល​ខាង​វិញ្ញាណ បាន​រុងរឿង​និង​បាន​សុខភាព​ល្អ​ឡើង​វិញ​ក្នុង​សួន​មនោរម្យ​ខាង​វិញ្ញាណ។ ហេព្រើរ ១២:១២ ប៉ុល​បាន​អនុវត្ត​អេសាយ ៣៥:៣ ក្នុង​ន័យ​អត្ថបដិរូប ដើម្បី​គាំទ្រ​ភាព​ត្រឹម​ត្រូវ​នៃ​ការ​អនុវត្ត​ខាង​វិញ្ញាណ​របស់​យើង​នូវ​ផ្នែក​នៃ​ទំនាយ​អេសាយ​នេះ។

៨ ក្នុង​កំឡុង​ពេល​ក្រោយ​ពី​សង្គ្រាម ពួក​អ្នក​សំណល់​ចាក់​ប្រេង​តាំង​នៃ​ពួក​អ៊ីស្រាអែល​ខាង​វិញ្ញាណ​បាន​ចេញ​ពី​ការ​ជាប់​ឃុំ​ឃាំង បើនិយាយជា​ពាក្យ​ប្រៀប។ ព្រះ​យេហូវ៉ា​បាន​ប្រើ​ព្រះ​យេស៊ូ​គ្រីស្ទ ជា​ស៊ីរូស​ដ៏​ធំ​ដើម្បី​រំដោះ​ពួក​គេ។ ដូច្នេះ ពួក​សំណល់​នេះ​អាច​ធ្វើ​កិច្ចការ​សង់​ឡើង​វិញ ប្រៀប​ដូច​នឹង​កិច្ចការ​របស់​ពួក​សំណល់​យូដា​ពី​បុរាណ ដែល​បាន​វិល​ត្រឡប់​ទៅ​ស្រុក​គេ ដើម្បី​សង់​ព្រះ​វិហារក្នុង​យេរូសាឡិម​ឡើង​វិញ។ ម្យ៉ាង​ទៀត ពួក​អ៊ីស្រាអែល​ខាង​វិញ្ញាណ​នៅ​សម័យ​ថ្មី​នេះ អាច​ចាប់​ផ្ដើម​បង្ក​បង្កើត​សួន​មនោរម្យ​ខាង​វិញ្ញាណ​ដ៏​ខៀវ​ស្រងាត់​មួយ ជា​សួនច្បារ​អេដែន​អត្ថបដិរូប។

៩. តើ​សេចក្ដី​ដែល​បាន​រៀប​រាប់​មក​ក្នុង​អេសាយ ៣៥:១, ២, ៥​-​៧ លូត​លាស់​ឡើង​នៅ​សម័យ​យើង​យ៉ាង​ដូច​ម្ដេច?

៩ ដោយ​ចាំ​សេចក្ដី​ខាង​លើ​នេះ ចូរ​ឲ្យ​យើង​ពិចារណា​មើល​អេសាយ ជំពូក៣៥​ម្ដង​ទៀត ហើយ​មុន​ដំបូង​យើង​មើល​ខ១ និង​ខ២។ តំបន់​ដែល​ហួតហែងពីដើម ឥឡូវ​បាន​ចាប់​ផ្ដើម​មាន​ផ្កា​ឡើង ហើយ​ឲ្យ​ផល​ល្អ​ដូច​ជា​តំបន់​សារ៉ុន​ពី​បុរាណ។ រួច ចូរ​មើល​ខ៥ ទៅ៧។ ពួក​សំណល់ ដែល​មួយ​ចំនួន​នៅ​រស់​ហើយ​សកម្ម​ក្នុង​កិច្ច​បំរើ​របស់​ព្រះ​យេហូវ៉ា​នៅ​ឡើយ បាន​យល់​ឃើញ​យ៉ាង​ច្បាស់​អំពី​អត្ថន័យ​នៃ​ព្រឹត្ដិការណ៍​ដែល​បាន​កើត​ឡើង​ក្នុង​ឆ្នាំ​១៩១៤​និង​ក្រោយ​មក​ទៀត។ ការ​នេះ​ក៏​មាន​ឥទ្ធិពល​មក​លើ​យើង​ជា​ច្រើន ដែល​ជា​អ្នក​«ហ្វូង​យ៉ាង​ធំ» ដែល​ឥឡូវ​នេះ​កំពុង​តែ​បំរើ​ព្រះ​ជា​មួយ​ពួក​សំណល់។—វិវរណៈ ៧:៩

តើ​អ្នក​ជា​ផ្នែក​នៃ​ការ​សម្រេច​នោះ​ទេ?

១០, ១១. (ក) តើ​អ្នក​ជាប់​ទាក់ទង​យ៉ាង​ណា​ក្នុង​ការ​សម្រេច​នៃ​ទំនាយ​អេសាយ ៣៥:៥​-​៧? (ខ) តើ​អ្នក​មាន​អារម្មណ៍​យ៉ាង​ណា​អំពី​ការ​ប្រែប្រួល​ទាំង​នេះ?

១០ ឧទាហរណ៍ មុន​អ្នក​បាន​ជួប​ស្មរបន្ទាល់​ព្រះ​យេហូវ៉ា តើ​អ្នក​មាន​អាន​ព្រះ​គម្ពីរ​យ៉ាង​ទៀងទាត់​ទេ? បើសិន​ជា​អ្នក​អាន តើ​អ្នក​យល់​បាន​ប៉ុន្មាន? ឥឡូវ​នេះ អ្នក​ដឹង​សេចក្ដី​ពិត​អំពី​ស្ថានភាព​នៃ​មនុស្ស​ស្លាប់។ ប្រហែល​ជា​អ្នក​អាច​បង្ហាញ​បទ​គម្ពីរ​ដល់​អ្នក​ចាប់​អារម្មណ៍​អំពី​រឿង​នេះ ដូច​ជា​នៅ​លោកុប្បត្តិ ជំពូក២ សាស្ដា ជំពូក៩ និង​អេសេគាល ជំពូក១៨ ព្រម​ទាំង​បទ​គម្ពីរ​ជា​ច្រើន​ឯ​ទៀត។ មែន​ហើយ អ្នក​ប្រហែល​ជា​យល់​ដឹង​មុខ​វិជ្ជា​ជា​ច្រើន ឬ​បញ្ហា​ផ្សេងៗ ដែល​ព្រះ​គម្ពីរ​បង្រៀន។ បើ​និយាយ​ឲ្យ​ចំ​ទៅ អ្នកយល់ព្រះ​គម្ពីរ និង​អាច​ពន្យល់​រឿង​ជា​ច្រើន​ដល់​អ្នក​ដទៃ ដូច​ជា​អ្នក​បាន​ធ្វើ​រួច​មក​ហើយ។

១១ ជា​ការ​ប្រសើរ បើ​យើង​ម្នាក់ៗ​សួរ​ថា ‹តើ​តាម​របៀប​ណា​ដែល​ខ្ញុំ​បាន​រៀន​ដឹង​សេចក្ដី​ពិត​នៃ​ព្រះ​គម្ពីរ? មុន​នឹង​សិក្សា​ជា​មួយ​ប្រជា​រាស្ត្រ​របស់​ព្រះ​យេហូវ៉ា តើ​ខ្ញុំ​អាច​រក​បទ​គម្ពីរ​ដែល​បាន​ជំរាប​មក​នៅ​ខាង​លើ​នេះ​បាន​ទេ? តើ​ខ្ញុំ​អាច​យល់​អត្ថន័យ​នៃ​បទ​គម្ពីរ​ទាំង​នោះ ហើយ​សន្និដ្ឋាន​ឲ្យ​បាន​ត្រឹម​ត្រូវ​អំពី​ភាព​ខ្លឹមសារ​របស់​វា​បាន​ទេ›? បើ​ឆ្លើយ​យ៉ាង​ស្មោះ​នឹង​សំនួរ​ទាំង​នេះ នោះ​គឺ​មិន​អាច​ទេ។ អ្នក​មិន​គួរ​អាក់អន់​ចិត្ត​នឹង​សេចក្ដី​ថ្លែង​ទាំង​នេះ​ឡើយ តែ​គឺ​អាច​និយាយ​ថា អ្នក​ពីដើម​ខ្វាក់​ចំពោះ​បទ​គម្ពីរ​ទាំង​នេះ​និង​ចំពោះ​អត្ថន័យ​របស់​វា។ មែន​ទេ? បទ​គម្ពីរ​ទាំង​នោះ គឺ​ក្នុង​ព្រះ​គម្ពីរ តែ​អ្នក​មិន​អាច​យល់​អត្ថន័យ​ខ្លឹមសារ​របស់​វា។ ដូច្នេះ តើ​តាម​របៀប​ណា​ដែល​ភ្នែក​របស់​អ្នក​បាន​ភ្លឺ​ឡើង​ខាង​វិញ្ញាណ​នោះ? គឺ​តាម​របៀប​ដែល​ព្រះ​យេហូវ៉ា​ធ្វើឲ្យ​ភ្នែក​របស់​ពួក​សំណល់​ចាក់​ប្រេង​តាំងបានភ្លឺឡើង ក្នុង​ការ​បំពេញ​ទំនាយ​អេសាយ ៣៥:៥។ រួច​មក ភ្នែកអ្នក​ក៏​ត្រូវ​បានភ្លឺឡើង​ដែរ។ អ្នក​លែង​នៅ​ក្នុង​សេចក្ដី​ងងឹត​ខាង​វិញ្ញាណ​ទៀត​ហើយ។ អ្នក​អាច​យល់​ឃើញ។—ប្រៀបធៀប វិវរណៈ ៣:១៧, ១៨

១២. (ក) ហេតុ​អ្វី​ក៏​យើង​អាច​និយាយ​ថា នេះ​មិន​មែន​ជា​គ្រា​សំរាប់​ការ​ប្រោស​ឲ្យ​ជា​រូប​កាយ​ដោយ​អព្ភូតហេតុ? (ខ) តើ​ករណី​នៃ​បង​ប្រុស ហ្វ្រេន្ស បង្ហាញ​យ៉ាង​ណា​អំពី​របៀប​ដែល​អេសាយ ៣៥:៥ បាន​សម្រេច​នៅ​សម័យ​យើង?

១២ សិស្ស​ព្រះ​គម្ពីរ​ដ៏​វាងវៃ​ដែល​រៀន​ចេះ​ដឹង​នូវ​ការ​ទាក់ទង​របស់​ព្រះ​ជា​ច្រើន​សតវត្ស​មក ដឹង​ថា គ្រា​ក្នុង​សតវត្ស​នេះ គឺ​មិន​មែន​ជា​គ្រា​សំរាប់​ប្រោស​ឲ្យ​ជា​ដល់​រូប​រាង​កាយ​ដោយ​អព្ភូតហេតុ​ឡើយ។ (កូរិនថូសទី១ ១៣:៨​-​១០) ដូច្នេះ យើង​មិន​សង្ឃឹម​ថា ព្រះ​យេស៊ូ​គ្រីស្ទ​នឹង​បើក​ភ្នែក​មនុស្ស​ខ្វាក់​ណា ដើម្បី​បង្ហាញ​ថា ទ្រង់​ជា​ព្រះមេស្ស៊ី ជា​ព្យាការី​របស់​ព្រះ​នោះ​ឡើយ។ (យ៉ូហាន ៩:១​-​៧, ៣០​-​៣៣) ហើយ​ទ្រង់​ក៏​មិន​ប្រោស​ឲ្យ​មនុស្ស​ថ្លង់​ឮ​វិញ​ដែរ។ លោក​ហ្រីឌីរិក ហ្វ្រេន្ស ដែល​ជា​អ្នក​ចាក់​ប្រេង​តាំង​ម្នាក់​និង​ជា​ប្រធាន​សមាគម​ប៉មយាម បាន​ខ្វាក់​ភ្នែក​សឹង​តែ​មើល​មិន​ឃើញ​កាល​ជិត​ដល់​អាយុ១០០ឆ្នាំ ហើយ​លោក​ត្រូវ​តែ​ប្រើ​គ្រឿង​ជំនួយ​ត្រចៀក។ លោក​មិន​អាច​មើល​អក្សរ​ឃើញ​ជា​យូរ​ឆ្នាំ​មក​ហើយ តែ​អ្នក​ណា​នឹង​គិត​ថា​លោក​ជា​ខ្វាក់ ឬ​ថ្លង់​ក្នុង​ការ​យល់​ដឹង​ន័យ​នៃ​អេសាយ ៣៥:៥នោះ? ការ​យល់​ដឹង​ជា​ច្រើន​ខាង​វិញ្ញាណ​របស់​លោក​ជា​ប្រសិទ្ធិពរ​ដល់​ប្រជា​រាស្ត្រ​របស់​ព្រះ​នៅ​ពាស​ពេញ​ពិភពលោក។

១៣. តើ​ប្រជា​រាស្ត្រ​របស់​ព្រះ​នៅ​សម័យ​ថ្មី​នេះ បាន​ពិសោធ​ការ​ស្ថាបនា​ឡើង​វិញ​មួយ​ណា?

១៣ ចុះ​អណ្ដាត​របស់​អ្នក​យ៉ាង​ណា​ដែរ? ពួក​ចាក់​ប្រេង​តាំង​របស់​ព្រះ​ប្រហែល​ជា​មនុស្ស​គ​ក្នុង​កំឡុង​ការ​ជាប់​ឃុំ​ឃាំង​ខាង​វិញ្ញាណ​របស់​គេ។ ប៉ុន្តែ ក្រោយ​ពី​ព្រះ​បាន​ប្រោស​ស្ថានភាព​របស់​គេ​ឲ្យ​ដូច​ដើម​វិញ អណ្ដាត​របស់​គេ​ចាប់​ផ្ដើម​ស្រែក​ឡើង​យ៉ាង​រីករាយ បន្លឺ​សេចក្ដី​ដែល​គេ​បាន​ដឹង​អំពី​ព្រះ​រាជាណាចក្រ​របស់​ព្រះ​ដែល​បាន​ស្ថាបនា​រួច ហើយ​អំពី​កិច្ច​សន្យា​របស់​ទ្រង់​សំរាប់​អនាគត។ ពួក​គេ​ប្រហែល​ជា​បាន​ជួយ​ដោះ​លែង​អណ្ដាត​របស់​អ្នក​ដែរ។ តើ​ពីមុនៗ​អ្នក​បាន​និយាយ​ប្រាប់​ប៉ុន្មាន​ដល់​អ្នក​ដទៃ​អំពី​សេចក្ដី​ពិត​ក្នុង​ព្រះ​គម្ពីរ? ប្រហែល​ជា​នៅ​ពេល​មួយ អ្នក​បាន​គិត​ថា ‹ខ្ញុំ​ចូល​ចិត្ត​សិក្សា​មែន តែ​ខ្ញុំ​នឹង​មិន​ទៅ​និយាយ​ប្រាប់​មនុស្ស​ចំឡែក​ណា​ឡើយ›។ យ៉ាង​ណា​ក្ដី តើ​មិន​ពិត​ទេ​ឬ ដែល​«អណ្ដាត​របស់​មនុស្ស​គ» ឥឡូវ​នេះ ‹កំពុង​តែ​ច្រៀងឡើង​យ៉ាង​រីករាយ​នោះ›?—អេសាយ ៣៥:៦

១៤, ១៥. តើ​មនុស្ស​ជា​ច្រើន​បាន​ដើរ​លើ​«ផ្លូវ​បរិសុទ្ធ»​យ៉ាង​ដូច​ម្ដេច​បាន​នៅ​សម័យ​យើង?

១៤ ពួក​យូដា​ពី​បុរាណ​ដែល​រំដោះ​ពី​បាប៊ីឡូន បាន​ធ្វើ​ដំណើរ​យ៉ាង​យូរ​ត្រឡប់​ទៅ​ស្រុក​គេ​វិញ។ តើ​ការ​នេះ​ស្មើ​នឹង​អ្វី​នៅ​សម័យ​យើង​នេះ? ចូរ​អាន​អេសាយ ៣៥:៨​៖ «នៅ​ទី​នោះ​នឹង​មាន​ថ្នល់​១ ជា​ផ្លូវ​ដែល​គេ​នឹង​ហៅ​ថា ‹ផ្លូវ​បរិសុទ្ធ› ពួក​មនុស្ស​ស្មោកគ្រោក​នឹង​មិន​ដែល​ដើរ​តាម​ផ្លូវ​នោះ​ឡើយ»។

១៥ តាំង​ពី​បាន​ដោះ​លែង​ពី​ការ​ជាប់​ឃុំ​ឃាំង​ខាង​វិញ្ញាណ ដែល​ឥឡូវ​នេះ​មាន​ពួក​ចៀម​ឯ​ទៀត​រាប់​លាន​នាក់​ចូល​រួបរួម​ជា​មួយ​ពួក​គេ ពួក​សំណល់​ចាក់​ប្រេង​តាំង បាន​ចេញ​ពី​បាប៊ីឡូន​ដ៏​ធំ​តាម​ថ្នល់​ប្រៀបប្រដូច​មួយ គឺ​ជា​ផ្លូវ​បរិសុទ្ធ​ដ៏​ស្អាត​ដែល​នាំ​គេ​ទៅ​ឯ​សួន​មនោរម្យ​ខាង​វិញ្ញាណ។ យើង​ខំ​ប្រឹងប្រែង​ជា​ខ្លាំង ដើម្បី​ឲ្យ​អាច​ចូល​បាន​ហើយ​អាច​នៅ​លើ​ផ្លូវ​បរិសុទ្ធ​នោះ។ ចូរ​គិត​អំពី​ខ្លួន​អ្នក​ចុះ។ តើ​បមាណីយ​សីលធម៌​របស់​អ្នក​និង​គោលការណ៍​ដែល​អ្នក​កាន់​តាម​ឥឡូវ​នេះ មិន​ខ្ពស់​ជាង​កាល​ដែល​អ្នក​នៅ​ក្នុង​លោកីយ៍​ទេ​ឬ? តើ​អ្នក​មិន​ខំ​ប្រឹងប្រែង​ធ្វើឲ្យ​គំនិត​និង​អាកប្បកិរិយា​របស់​អ្នក​ស្រប​តាម​ព្រះ​ទេ​ឬ?—រ៉ូម ៨:១២, ១៣; អេភេសូរ ៤:២២​-​២៤

១៦. កាល​ដែល​យើង​ដើរ​លើ​ផ្លូវ​បរិសុទ្ធ តើ​យើង​អាច​មាន​ស្ថានភាព​បែប​ណា?

១៦ កាល​ដែល​អ្នក​បន្ត​ធ្វើ​ដំណើរ​លើ​ផ្លូវ​បរិសុទ្ធ​នេះ អ្នក​មិន​ត្រូវ​ព្រួយ​បារម្ភ​នឹង​មនុស្ស​តិរច្ឆាន​ឡើយ។ ពិត​មែន​ហើយ ក្នុង​លោកីយ៍​នេះ អ្នក​ត្រូវ​តែ​ប្រយ័ត្ន​នឹង​មនុស្ស​លោភ ឬ​មនុស្ស​អាក្រក់ ដើម្បី​កុំ​ឲ្យ​ពួក​គេស៊ី​អ្នក​ទាំង​រស់ ជា​ការ​និយាយ​ប្រៀបប្រដូច។ មនុស្ស​ជា​ច្រើន​តែង​តែ​លោភ​លន់​ហួស​ហេតុ​ក្នុង​របៀប​ដែល​គេ​ទាក់​ទង់​ជា​មួយ​អ្នក​ឯ​ទៀត។ ជា​ការ​ផ្ទុយ​ស្រឡះ​ទៅ​វិញ​ក្នុង​ចំណោម​ប្រជា​រាស្ត្រ​របស់​ព្រះ! នៅ​ទី​នោះ អ្នក​នៅ​ក្នុង​បរិយាការ​ដែល​ការពារ។ ពិត​មែន​ហើយ បងប្អូន​គ្រីស្ទាន​គ្នា​ឯង​មិន​មែន​ជា​មនុស្ស​ល្អ​ឥតខ្ចោះ​ទេ ដូច្នេះ​ហើយ​ជួន​កាល​ក៏​មាន​ការ​ធ្វើ​ខុស ឬ​ការ​អាក់អន់​ចិត្ត​ណា​មួយ។ ក៏​ប៉ុន្តែ អ្នក​ដឹង​ថា បងប្អូន​របស់​អ្នក​មិន​មែន​ចង់​បញ្ឈឺ​អ្នក ឬ​ត្របាក់​អ្នក​នោះ​ទេ។ (ទំនុកដំកើង ៥៧:៤; អេសេគាល ២២:២៥; លូកា ២០:៤៥​-​៤៧; កិច្ចការ ២០:២៩; កូរិនថូសទី២ ១១:១៩, ២០; កាឡាទី ៥:១៥) ផ្ទុយ​ទៅ​វិញ ពួក​គេ​សម្ដែង​ការ​យក​ចិត្ត​ទុក​ដាក់​នឹង​អ្នក។ ពួក​គេ​បាន​ជួយ​អ្នក ហើយ​គេ​ចង់​បំរើ​ព្រះ​ជា​មួយ​អ្នក។

១៧, ១៨. ក្នុង​ន័យ​យ៉ាង​ណា​ដែល​ឥឡូវ​នេះ​មាន​សួន​មនោរម្យ ហើយ​តើ​នេះ​មាន​ឥទ្ធិពល​យ៉ាង​ណា​មក​លើ​យើង?

១៧ ដូច្នេះ​ហើយ យើង​អាច​មើល​អេសាយ ជំពូក៣៥ ដោយ​នឹក​ចាំ​ដល់​ការ​សម្រេច​ថ្មីៗ​នៃ​ខ១ ទៅ​ខ៨។ តើ​មិន​ច្បាស់​ទេ​ឬ ដែល​យើង​បាន​រក​ឃើញ​អ្វី​មួយ​ដែល​អាច​ហៅ​យ៉ាង​ត្រឹម​ត្រូវ​ថា សួន​មនោរម្យ​ខាង​វិញ្ញាណ​នោះ? នេះ​មិន​ល្អ​ឥតខ្ចោះ​ទេ—គឺ​មិន​ទាន់​នៅ​ឡើយ។ ប៉ុន្តែ​នេះ​គឺ​ពិត​ជា​សួន​មនោរម្យ​មួយ ដ្បិត​នៅ​ទី​នេះ ដូច​ជា​បាន​ចែង​មក​ក្នុង​ខ២ យើង​អាច​«ឃើញ​សិរី​ល្អ​របស់​ព្រះ​យេហូវ៉ា​គឺ​ជា​សេចក្ដី​រុង​រឿង​របស់​ព្រះ​នៃ​យើង​រាល់​គ្នា»​រួច​ហើយ។ ហើយ​តើ​មាន​លទ្ធផល​យ៉ាង​ណា? ខ១០​ចែង​ថា​៖ «ឯ​ពួក​អ្នក​ដែល​ព្រះ​យេហូវ៉ា​បាន​ប្រោស​ឲ្យ​រួច គេ​នឹង​វិល​មក​វិញ គេ​នឹង​មក​ដល់​ក្រុង​ស៊ីយ៉ូន​ដោយ​ច្រៀង ហើយ​នឹង​មាន​សេចក្ដី​អំណរ​ដ៏​នៅ​អស់កល្ប​ជានិច្ច ពាក់​នៅ​លើ​ក្បាល​គេ គេ​នឹង​បាន​សេចក្ដី​ត្រេកអរ នឹង​សេចក្ដី​រីករាយ ឯ​អស់​ទាំង​សេចក្ដី​ទុក្ខ​ព្រួយ នឹង​ដំងូរ​ទាំង​ប៉ុន្មាន​នោះ​នឹង​រត់​បាត់​ទៅ»។ ប្រាកដ​ហើយ ការ​ចាក​ចេញ​ពី​សាសនា​មិន​ពិត​និង​ការ​កាន់​តាម​សាសនា​ពិត​ដោយ​មាន​ការ​គាំទ្រ​ពី​ព្រះ​របស់​យើង គឺ​ជា​ការ​ធ្វើ​ឲ្យ​មាន​អំណរ​មែន។

១៨ អំណរ​ដែល​ទាក់ទង​នឹង​ការ​ថ្វាយ​បង្គំ​ពិត​ចេះ​តែ​កើន​ឡើង​ជានិច្ច មែន​ទេ? អ្នក​ឃើញ​ជន​ចាប់​អារម្មណ៍​ថ្មី​ធ្វើ​ការ​កែ​ប្រែ ហើយ​នៅ​ជាប់​ក្នុង​សេចក្ដី​ពិត​នៃ​ព្រះ​គម្ពីរ។ អ្នក​សង្កេត​ឃើញ​ក្មេងៗ​ដែល​ធំ​ពេញ​វ័យ​ឡើង ហើយ​បាន​រីក​ចំរើន​ខាង​វិញ្ញាណ​ក្នុង​ក្រុមជំនុំ។ នៅឯបុណ្យ​ជ្រមុជ​ទឹក អ្នក​មើល​បុគ្គល​ដែល​អ្នក​ស្គាល់​ជ្រមុជ​ទឹក។ តើ​ការ​ទាំង​នេះ​មិន​មែន​ជា​ហេតុ​ដែល​ធ្វើ​ឲ្យ​មាន​អំណរ​ទេ​ឬ អំណរ​ច្រើន​នៅ​សព្វ​ថ្ងៃ​នេះ? មែន​ហើយ ជា​ការ​អរ​សប្បាយ​ណាស់ ដោយ​មាន​អ្នក​ឯ​ទៀត​ចូល​រួបរួម​ជា​មួយ​យើង​ក្នុង​សេរីភាព​ខាង​វិញ្ញាណ​និង​ស្ថាន​ភាព​នៃ​សួន​មនោរម្យ!

ការ​សម្រេច​នៅ​អនាគត!

១៩. តើ​អេសាយ ជំពូក៣៥ ដាក់​ក្នុង​យើង​នូវ​ការ​សង្ឃឹម​ចំពោះ​អនាគត​អ្វី?

១៩ មក​ដល់​ឥឡូវ​នេះ យើង​បាន​ពិនិត្យ​មើល​អេសាយ ជំពូក៣៥ ការ​សម្រេច​លើក​ទីមួយ ដែល​ជា​ការ​វិល​ត្រឡប់​នៃ​ពួក​យូដា និង​ការ​សម្រេច​ខាង​វិញ្ញាណ​ដែល​មាន​ឡើង​ក្នុង​សព្វ​ថ្ងៃ​នេះ។ តែ​នោះ​មិន​ទាន់​ចប់​ទេ។ គឺ​មាន​ច្រើន​ទៀត។ នេះ​ទាក់ទង​នឹង​ការ​ធានា​អះអាង​ក្នុង​ព្រះ​គម្ពីរ​អំពី​ការ​ធ្វើ​ឲ្យ​ផែនដី​មាន​ស្ថានភាព​ជា​សួន​មនោរម្យ​ឡើង​វិញ​នៅ​ខាង​មុខ​នេះ។—ទំនុកដំកើង ៣៧:១០, ១១; វិវរណៈ ២១:៤, ៥

២០, ២១. ហេតុអ្វីក៏ជា​ការ​សម​ហេតុ​សម​ផល​និង​ត្រឹម​ត្រូវ​ក្នុង​បទ​គម្ពីរ ក្នុង​ការ​ជឿ​ថា អេសាយ ជំពូក៣៥នៅ​មាន​ការ​សម្រេច​មួយ​ទៀត?

២០ មិន​ជា​ការ​ត្រឹម​ត្រូវ​ទេ​ចំពោះ​ព្រះ​យេហូវ៉ា​ក្នុង​ការ​ផ្ដល់​ឲ្យ​ការ​រៀប​រាប់​ដ៏​ច្បាស់​ក្រឡែត​អំពី​សួន​មនោរម្យ ហើយ​ក្រោយ​មក​សម្រេច​តែ​អ្វីៗ​ខាង​វិញ្ញាណ​ប៉ុណ្ណោះ។ នេះ​មិន​មែន​មាន​សេចក្ដី​ថា ការ​សម្រេច​ខាង​វិញ្ញាណ​មិន​សំខាន់​នោះ​ឡើយ។ ទោះបី​ជា​សួន​មនោរម្យ​ត្រូវ​បាន​ស្ថាបនា​ហើយ​ក្ដី នោះ​យើង​នឹង​មិន​ស្កប់​ចិត្ត​ទេ បើសិន​ជា​នៅ​ក្នុង​ចំណោម​ទេសភាព​ដ៏​ស្រស់​ស្អាត​និង​ពពួក​សត្វ​ដ៏​សុខសាន្ត​ទាំង​នោះ នៅ​មាន​មនុស្ស​ពុក​រលួយ​ខាង​វិញ្ញាណ និង​មនុស្ស​ដែល​ប្រព្រឹត្ត​ដូច​សត្វ​សាហាវ។ (ប្រៀបធៀប ទីតុស ១:១២) មែន​ហើយ សេចក្ដី​ខាង​វិញ្ញាណ​ត្រូវ​តែ​មាន​មុន​គេ ដ្បិត​វា​សំខាន់​បំផុត។

២១ ទោះ​ជា​យ៉ាង​ណា​ក្ដី សួន​មនោរម្យ​នៅ​ខាង​មុខ​នេះ នឹង​មិន​បញ្ចប់​ទិដ្ឋភាព​ខាង​វិញ្ញាណ​ដែល​យើង​កំពុង​តែ​ទទួល​នៅ​សព្វ​ថ្ងៃ​នេះ ហើយ​នៅ​អនាគត​យើង​នឹង​ទទួល​រឹតតែ​ច្រើន​ទៀត។ យើង​មាន​មូលហេតុ​ល្អ​ក្នុង​ការ​សង្ឃឹម​ថា​នឹង​មាន​ការ​សម្រេច​ត្រង់ៗ​នៃ​ទំនាយ​ជា​ច្រើន ដូច​ជា​ទំនាយ​អេសាយ ជំពូក៣៥។ ហេតុ​អ្វី? ពីព្រោះ​នៅជំពូក៦៥ អេសាយ​បាន​ទាយ​ថា​នឹង​មាន «ផ្ទៃ​មេឃ​ថ្មី ហើយ​នឹង​ផែនដី​ថ្មី»។ សាវ័ក​ពេត្រុស​បាន​អនុវត្ត​ទៅ​លើ​បទ​គម្ពីរ​នេះ កាល​ដែល​គាត់​រៀប​រាប់​ប្រាប់​អំពី​អ្វីៗ​ដែល​នឹង​កើត​ឡើង​ក្រោយ​ពី​ថ្ងៃ​នៃ​ព្រះ​យេហូវ៉ា។ (អេសាយ ៦៥:១៧,១៨; ពេត្រុសទី២ ៣:១០​-​១៣) ពេត្រុស​បង្ហាញ​ថា លក្ខណៈ​ផ្សេងៗ​ដែល​អេសាយ​បាន​រៀប​រាប់​មក នឹង​មាន​ជា​ពិត​ប្រាកដ នៅ​ពេល​ដែល «ផែនដី​ថ្មី» ទៅ​ជា​ការ​ពិត។ នេះ​រាប់​បញ្ចូល​ទាំង​សេចក្ដី​រៀប​រាប់​ដែល​អ្នក​ធ្លាប់​ពិសោធ—ដូច​ជា​ការ​សង់​ផ្ទះ​និង​រស់​នៅ​ក្នុង​នោះ ការ​ធ្វើ​ចំការ​ទំពាំង​បាយ​ជូរ​និង​បរិភោគ​ផលផ្លែ ការ​ពេញ​ចិត្ត​នឹង​កិច្ចការ​ដែល​ធ្វើ​ដោយ​ដៃ​ខ្លួន ឆ្កែ​ព្រៃ​និង​កូន​ចៀម​រស់​នៅ​ជា​មួយ​គ្នា ហើយ​គ្មាន​ការ​ធ្វើ​ទុក្ខ​អ្វី​នៅ​ជុំវិញ​ផែនដី​ឡើយ។ បើ​និយាយ​ឲ្យ​ចំ​ទៅ គឺ​មាន​ជីវិត​យឺន​យូរ ផ្ទះ​ដ៏​សុខ​ស្រួល អាហារ​គ្រប់គ្រាន់ កិច្ចការ​ដែល​ពេញ​ចិត្ត និង​សន្ដិភាព​ក្នុង​ចំណោម​ពពួក​សត្វ​ហើយ​រវាង​សត្វ​និង​មនុស្ស។

២២, ២៣. ការ​សម្រេច​នៅ​អនាគត​នៃ​អេសាយ ជំពូក៣៥ ផ្ដល់​ឲ្យ​មូលហេតុ​ណា​ខ្លះ​សំរាប់​អំណរ?

២២ តើ​អ្នក​មិន​ពេញ​ចិត្ត​នឹង​អនាគត​បែប​នេះ​ទេ​ឬ? អ្នក​គួរ​តែ​ពេញ​ចិត្ត ដ្បិត​នេះ​ជា​របៀប​ដែល​ព្រះ​បាន​បង្កើត​យើង​ឲ្យ​រស់។ (លោកុប្បត្តិ ២:៧​-​៩) ដូច្នេះ តើ​ទំនាយ​នៅ​អេសាយ ជំពូក៣៥ដែល​យើង​កំពុង​តែ​ពិចារណា​មើល​នេះ មាន​ន័យ​យ៉ាង​ណា? គឺ​មាន​ន័យ​ថា យើង​រឹតតែ​មាន​ហេតុ​ច្រើន​ទៀត​ក្នុង​ការ​អរ​សប្បាយ។ វាល​ខ្សាច់​មែន​ទែន​និង​ទី​ហួតហែង​នឹង​មាន​ផ្កា​ឡើង ធ្វើ​ឲ្យ​យើង​អរ​សប្បាយ។ បន្ទាប់​មក មនុស្ស​ខ្វាក់​ដែល​មាន​ភ្នែក​ពណ៌ខៀវ ឬ​ពណ៌ត្នោត ឬ​ពណ៌​ល្អៗ​ឯ​ទៀត នឹង​អាច​មើល​ឃើញ​វិញ។ រីឯ​បងប្អូន​របស់​យើង​ណា​ដែល​ថ្លង់ ឬ​មិន​សូវ​ឮ នឹង​អាច​ឮ​យ៉ាង​ច្បាស់​ឡើង​វិញ។ ជា​ការ​សប្បាយ​រីករាយ​ណាស់​ហ្ន៎ ដោយ​អាច​ប្រើ​សមត្ថភាព​នោះ ដើម្បី​ស្ដាប់​ពាក្យ​បន្ទូល​របស់​ព្រះ​ដែល​អាន​និង​ពន្យល់​មក ហើយ​អាច​ស្ដាប់​សូរ​ខ្យល់​បក់​រវើយៗ​នៃ​ដើម​ឈើ សូរ​សំណើច​របស់​កូន​ក្មេង និង​ចំរៀង​បក្សា​បក្សី!

២៣ នេះ​ក៏​មាន​ន័យ​ទៀត​ថា ពួក​អ្នក​ពិការ​និង​ពួក​អ្នក​មាន​ជម្ងឺ​សន្លាក់​ដៃ​ជើង​សព្វ​ថ្ងៃ​នេះ នឹង​អាច​កំរើក​ដើរ​ដោយ​ឥត​ឈឺ​អ្វី​ឡើយ។ នេះ​ជា​ការ​ធូរ​ស្រាល​ម្ល៉េះ​ហ្ន៎! បន្ទាប់​មក នឹង​មាន​ទឹក​ជា​ច្រើន​នឹង​បាញ់​ចេញ​មក​ពី​វាល​ខ្សាច់។ យើង​នឹង​ឃើញ​ទឹក​ខ្ជោល​ឡើង​និង​ឮ​សូរ​ពពុះ​ទឹក។ យើង​នឹង​អាច​ដើរ​លេង​នៅ​ទី​នោះ ហើយ​ទៅ​ប៉ះ​ស្មៅ​ខ្ចី​និង​ដើម​កក់។ វា​ពិត​ជា​នឹង​ទៅ​ជា​សួន​មនោរម្យ​ដែល​ស្អាង​ឡើង​វិញ។ តើ​នឹង​សប្បាយ​យ៉ាង​ណា​ទៅ ដោយ​នៅ​ជិត​សត្វ​សិង្ហ ឬ​សត្វ​សាហាវ​ឯ​ទៀត​ដោយ​មិន​ភ័យ​ខ្លាច​នោះ? យើង​មិន​ចាំបាច់​រៀប​រាប់​ប្រាប់​អំពី​ការ​នេះ​ទេ ដ្បិត​យើង​ទាំង​អស់​គ្នា​បាន​ស្រមៃ​មើល​ទៅ​ទេសភាព​នោះ​រួច​ទៅ​ហើយ។

២៤. ហេតុ​អ្វី​ក៏​អ្នក​អាច​យល់​ស្រប​តាម​ពាក្យ​ក្នុង​អេសាយ ៣៥:១០?

២៤ អេសាយ​ធានា​អះអាង​នឹង​យើង​ថា​៖ «ពួក​អ្នក​ដែល​ព្រះ​យេហូវ៉ា​បាន​ប្រោស​ឲ្យ​រួច គេ​នឹង​វិល​មក​វិញ គេ​នឹង​មក​ដល់​ក្រុង​ស៊ីយ៉ូន​ដោយ​ច្រៀង ហើយ​នឹង​មាន​សេចក្ដី​អំណរ​ដ៏​នៅ​អស់កល្ប​ជានិច្ច ពាក់​នៅ​លើ​ក្បាល​គេ»។ ដូច្នេះ យើង​អាច​យល់​ស្រប​ថា យើង​មាន​ហេតុ​នឹង​អរ​សប្បាយ។ គឺ​អំណរ​ទៅ​លើ​អ្វីៗ​ដែល​ព្រះ​យេហូវ៉ា​កំពុង​តែ​ធ្វើ​ឲ្យ​ប្រជា​រាស្ត្រ​របស់​ទ្រង់​នៅ​ក្នុង​សួន​មនោរម្យ​ខាង​វិញ្ញាណ ហើយ​ជា​អំណរ​ទៅ​លើ​អ្វីៗ​ដែល​យើង​អាច​សង្ឃឹម​នឹង​ទទួល​បាន​ក្នុង​សួន​មនោរម្យ​មែន​ទែន​នៅ​ពេល​ឆាប់ៗ​ខាង​មុខ​នេះ។ រួច​អេសាយ​បាន​សរសេរ​អំពី​យើង​ជា​អ្នក​អរ​សប្បាយ​នោះ​ថា​៖ «គេ​នឹង​បាន​សេចក្ដី​ត្រេកអរ នឹង​សេចក្ដី​រីករាយ ឯ​អស់​ទាំង​សេចក្ដី​ទុក្ខ​ព្រួយ នឹង​ដំងូរ​ទាំង​ប៉ុន្មាន​នោះ​នឹង​រត់​បាត់​ទៅ»។—អេសាយ ៣៥:១០

តើអ្នក​ចាំ​ទេ?

◻ តើ​អ្វី​ជា​ការ​សម្រេច​លើក​ទីពីរ ដែល​អេសាយ ជំពូក៣៥ បាន​មាន?

◻ បើ​និយាយ​ខាង​វិញ្ញាណ តើ​មាន​អ្វី​ខ្លះ​ដែល​ស្មើ​នឹង​ការ​ប្រែប្រួល​ដោយ​អព្ភូតហេតុ​ដែល​អេសាយ​បាន​ទាយ​មក?

◻ តើ​អ្នក​បាន​ចូល​រួបរួម​យ៉ាង​ណា​ខ្លះ​ក្នុង​ការ​សម្រេច​នៃ​ទំនាយ​នេះ?

◻ ហេតុ​ក៏​អាច​និយាយ​ថា អេសាយ ជំពូក៣៥ ធ្វើ​ឲ្យ​យើង​ពោរពេញ​ទៅ​ដោយ​ការ​សង្ឃឹម​ចំពោះ​អនាគត?

[រូបភាព​នៅ​ទំព័រ​២៨]

គុក​នៅ​ផ្លូវ​រេម៉ូន្ត​នៅ​ទី​ក្រុង​ប៊្រុគ្លីន នៃ​រដ្ឋ​ញូវយ៉ក ជា​កន្លែង​ដែល​បង​ប្រុស​ធំដុំ​ប្រាំ​ពីរ​នាក់​ត្រូវ​បាន​គេ​ឃុំ​ឃាំង​ក្នុង​ខែ​មិថុនា ឆ្នាំ​១៩១៨

[រូបភាព​នៅ​ទំព័រ​៣០]

ថ្វី​បើ​ងងឹត​ភ្នែក​ក្នុង​កាល​ចាស់​ជរា​ទៅ ចំណេះ​ខាង​វិញ្ញាណ​របស់​បង​ប្រុស​ហ្វ្រេន្ស​នៅ​ខ្លាំង​ជានិច្ច

[រូបភាព​នៅ​ទំព័រ​៣១]

ការ​លូត​លាស់​ខាង​វិញ្ញាណ​និង​ការ​រីក​ចំរើន​ជា​ហេតុ​ដែល​ធ្វើ​មាន​អំណរ

    សៀវភៅភាសាខ្មែរ (១៩៩១-២០២៥)
    ចេញពីគណនី
    ចូលគណនី
    • ខ្មែរ
    • ចែករំលែក
    • ជម្រើស
    • Copyright © 2025 Watch Tower Bible and Tract Society of Pennsylvania
    • ល័ក្ខខ័ណ្ឌប្រើប្រាស់
    • គោលការណ៍ស្ដីអំពីព័ត៌មានផ្ទាល់ខ្លួនរបស់លោកអ្នក
    • កំណត់ឯកជនភាព
    • JW.ORG
    • ចូលគណនី
    ចែករំលែក