«កុំឲ្យដៃឯងអន់ថយឲ្យសោះ»
«កុំឲ្យដៃឯងអន់ថយឲ្យសោះ។ ព្រះយេហូវ៉ា ដ៏ជាព្រះនៃឯង ទ្រង់គង់នៅកណ្ដាលឯង ទ្រង់ជាព្រះដ៏មានឥទ្ធិឫទ្ធិ ដើម្បីជួយសង្គ្រោះ»។—សេផានា ៣:១៦, ១៧
១. តើអ្នកប្រាជ្ញខាងព្រះគម្ពីរម្នាក់មានប្រសាសន៍យ៉ាងណាអំពីទំនាយសេផានា?
ទំនាយរបស់សេផានាសំដៅទៅហួសការសំរេចលើកទីមួយក្នុងសតវត្សទីប្រាំពីរនិងប្រាំមួយមុនសករាជយើងទៅទៀត។ ក្នុងអត្ថាធិប្បាយរបស់គាត់អំពីសេផានា សាស្ដ្រាចារ្យ ខាល ឃាល សរសេរថា៖ «ទំនាយរបស់សេផានា . . . មិនត្រឹមតែចាប់ផ្ដើមដោយប្រកាសអំពីសេចក្ដីជំនុំជំរះមកលើពិភពលោកទាំងមូល ដែលចេញពីនោះ មានសេចក្ដីជំនុំជំរះមកលើយូដាដោយសារអំពើបាបរបស់ខ្លួន ហើយក៏មកលើពួកសាសន៍នៃពិភពលោកដោយសារការឃោរឃៅចំពោះប្រជារាស្ត្ររបស់ព្រះយេហូវ៉ា តែទំនាយនេះទាក់ទងនឹងរឿងនេះទូទាំងថ្ងៃដ៏ធំរន្ធត់នៃព្រះយេហូវ៉ា»។
២. តើមានភាពស្រដៀងគ្នាណាខ្លះ រវាងស្ថានភាពក្នុងជំនាន់សេផានា និងស្ថានការណ៍ក្នុងពិភពគ្រីស្ទសាសនាសព្វថ្ងៃនេះ?
២ សព្វថ្ងៃនេះ ការសំរេចក្ដីរបស់ព្រះយេហូវ៉ា គឺត្រូវប្រមូលពួកសាសន៍ដើម្បីបំផ្លាញចោល ដែលមានទំហំធំជាងជំនាន់សេផានា។ (សេផានា ៣:៨) ជាពិសេស ពួកសាសន៍ទាំងនោះដែលអះអាងថាជាគ្រីស្ទាន នឹងជាប់ទោសជាងគេចំពោះព្រះនេត្រនៃព្រះ។ ដូចពួកយេរូសាឡិមដែលបានទទួលទណ្ឌកម្មដ៏ខ្លាំងដោយព្រោះតែការមិនស្មោះត្រង់ចំពោះព្រះយេហូវ៉ា ពិភពគ្រីស្ទសាសនាក៏ត្រូវតែទទួលខុសត្រូវដែរចំពោះមារយាទអាក្រក់របស់គេ។ សេចក្ដីជំនុំជំរះរបស់ព្រះដែលបានប្រកាសប្រាប់យូដានិងយេរូសាឡិមក្នុងជំនាន់សេផានា ក៏សំដៅដោយទំហំធំធេងទៅលើគ្រីស្ទសាសនានិងនិកាយនានានៃពិភពគ្រីស្ទសាសនាដែរ។ ពួកគេក៏បានធ្វើឲ្យកខ្វក់ដល់ការថ្វាយបង្គំបរិសុទ្ធ ដោយព្រោះលទ្ធិបង្រៀនរបស់គេដែលបង្ខូចកេរ្ដិ៍ឈ្មោះព្រះ ដែលភាគច្រើនមានដើមកំណើតពីពាហិរជន។ ពួកគេបានបូជាកូនរាប់លាននាក់របស់គេឲ្យធ្វើជាទាហាន ដែលភាគច្រើនបានបាត់បង់ជីវិត។ ថែមទៅទៀត ពួកអ្នកដែលដូចយេរូសាឡិមនេះ លាយសាសនាគ្រីស្ទានជាមួយនឹងហោរាសាស្ត្រ អំពើចេតោនិយម និងកាមអសីលធម៌ដ៏ថោកទាប ដូចនឹងការថ្វាយបង្គំព្រះបាលដែរ។—សេផានា ១:៤, ៥
៣. តើអាចនិយាយយ៉ាងណាខ្លះអំពីពួកមេដឹកនាំនិងរដ្ឋាភិបាលខាងនយោបាយសព្វថ្ងៃនេះ ហើយតើសេផានាបានទាយប្រាប់អ្វីខ្លះ?
៣ ពួកមេដឹកនាំខាងនយោបាយជាច្រើននៃពិភពគ្រីស្ទសាសនា ចូលចិត្តមានមុខមាត់ធំដុំក្នុងវិហារ។ ប៉ុន្តែដូច«ពួកចៅហ្វាយ»នៃយូដាដែរ ពួកគេជាច្រើនកេងប្រវ័ញ្ចពីមនុស្សដូចជា«សិង្ហកំពុងគ្រហឹម» និង «ឆ្កែព្រៃ»ដែលស្រេកឃ្លាន។ (សេផានា ៣:១-៣) ពួកបាវខាងនយោបាយនៃពួកនេះ «បំពេញផ្ទះរបស់ចៅហ្វាយគេ ដោយសេចក្ដីច្រឡោតនឹងសេចក្ដីឆបោក»។ (សេផានា ១:៩) ការស៊ីសំណូកនិងអំពើពុករលួយជាការមានទូទៅ។ រីឯរដ្ឋាភិបាលខាងនយោបាយនៅខាងក្នុងនិងខាងក្រៅពិភពគ្រីស្ទសាសនា ពួកគេជាច្រើន‹លើកដំកើងខ្លួន›ទាស់នឹងប្រជារាស្ត្ររបស់ព្រះយេហូវ៉ានៃពួកពលបរិវារ ជាពួកស្មរបន្ទាល់ ដោយចាត់ទុកពួកគេជា«និកាយ»ដ៏ស្អប់ខ្ពើមមួយ។ (សេផានា ២:៨; កិច្ចការ ២៤:៥, ១៤) ចំពោះពួកមេដឹកនាំខាងនយោបាយទាំងនេះនិងពួកគូកនរបស់គេ សេផានាបានទាយថា៖ «ទោះទាំងប្រាក់ នឹងមាសរបស់គេ ក៏មិនអាចនឹងជួយគេឲ្យរួច ក្នុងថ្ងៃនៃសេចក្ដីខ្ញាល់របស់ព្រះយេហូវ៉ាដែរ គឺស្រុកទាំងមូលនឹងត្រូវឆេះអស់ទៅ ដោយភ្លើងនៃសេចក្ដីប្រចណ្ឌរបស់ទ្រង់ ដ្បិតទ្រង់នឹងធ្វើឲ្យផុតទៅ អើទ្រង់នឹងធ្វើឲ្យអស់អ្នក ដែលអាស្រ័យនៅក្នុងស្រុកបានផុតទៅជាមួយរំពេច»។—សេផានា ១:១៨
«បានបាំងទុកនៅក្នុងថ្ងៃនៃសេចក្ដីខ្ញាល់របស់ព្រះយេហូវ៉ា»
៤. តើអ្វីបង្ហាញថានឹងមានពួករួចរស់ជីវិតនៅថ្ងៃដ៏ធំរបស់ព្រះយេហូវ៉ា ប៉ុន្តែតើពួកគេត្រូវតែធ្វើអ្វី?
៤ ពួកអ្នកស្រុកយូដាមិនបានត្រូវកំទេចចោលទាំងអស់គ្នាទេក្នុងសតវត្សទីប្រាំពីរ ម.ស.យ.។ ស្រដៀងគ្នាដែរ នៅថ្ងៃដ៏ធំរបស់ព្រះយេហូវ៉ានឹងមានមនុស្សដែលរួចរស់ជីវិត។ តាមរយៈព្យាការីសេផានា ព្រះយេហូវ៉ាមានបន្ទូលទៅកាន់ពួកទាំងនេះថា៖ «មុនកំណត់ដែលត្រូវសំរេចតាមច្បាប់ គឺមុនដែលថ្ងៃនោះកន្លងបាត់ទៅដូចជាអង្កាម មុនដែលសេចក្ដីខ្ញាល់ដ៏សហ័សរបស់ព្រះយេហូវ៉ាមកលើអ្នករាល់ អើមុនដែលថ្ងៃមកដល់ ក្នុងកាលដែលសេចក្ដីខ្ញាល់របស់ព្រះយេហូវ៉ាមកលើអ្នករាល់គ្នា អស់អ្នករាបសានៅផែនដីដែលរក្សាអស់ទាំងបញ្ញត្តច្បាប់របស់ព្រះយេហូវ៉ាអើយ។ ចូរស្វែងរកទ្រង់ ចូរស្វែងរកសេចក្ដីសុចរិត ចូរស្វែងរកសេចក្ដីសុភាពចុះ ប្រហែលជាអ្នករាល់គ្នានឹងបានបាំងទុក នៅក្នុងថ្ងៃនៃសេចក្ដីខ្ញាល់របស់ព្រះយេហូវ៉ាទេដឹង»។—សេផានា ២:២, ៣
៥. ក្នុងគ្រាចុងបញ្ចប់នេះ ពួកណាជាពួកដំបូងដែលធ្វើតាមសេចក្ដីព្រមានរបស់សេផានា ហើយតើព្រះយេហូវ៉ាបានប្រើពួកគេយ៉ាងណាខ្លះ?
៥ ក្នុងគ្រាចុងបញ្ចប់នៃលោកីយ៍នេះ ពួកដំបូងដែលធ្វើតាមសេចក្ដីអញ្ជើញនៃទំនាយនេះ គឺពួកអ្នកសំណល់នៃអ៊ីស្រាអែលខាងវិញ្ញាណ ពួកគ្រីស្ទានចាក់ប្រេងតាំង។ (រ៉ូម ២:២៨, ២៩; ៩:៦; កាឡាទី ៦:១៦) ដោយបានស្វែងរកសេចក្ដីសុចរិតនិងសេចក្ដីសុភាព ហើយបានសំដែងការគោរពដល់ការសំរេចក្ដីរបស់ព្រះយេហូវ៉ា ពួកគេក៏ត្រូវបានសង្គ្រោះពីបាប៊ីឡូនដ៏ធំ គឺពីចក្រភពលោកនៃសាសនាមិនពិត ហើយបានទទួលការគាប់ព្រះទ័យព្រះវិញក្នុងឆ្នាំ១៩១៩។ តាំងពីពេលនោះមក គឺជាពិសេស តាំងពីឆ្នាំ១៩២២ ពួកអ្នកសំណល់ដ៏ស្មោះត្រង់នេះបានប្រកាសយ៉ាងក្លាហាន នូវសេចក្ដីជំនុំជំរះរបស់ព្រះយេហូវ៉ាមកលើសាសនានានានិងនិកាយផ្សេងៗនៃពិភពគ្រីស្ទសាសនា និងមកលើពួកសាសន៍ខាងនយោបាយផងដែរ។
៦. (ក) តើសេផានាបានទាយប្រាប់អ្វីខ្លះអំពីពួកអ្នកសំណល់ស្មោះត្រង់? (ខ) តើទំនាយនេះបានសំរេចយ៉ាងណាខ្លះ?
៦ អំពីពួកអ្នកសំណល់ស្មោះត្រង់នេះ សេផានាបានទាយថា៖ «អញនឹងទុកជនមួយពួកដែលវេទនា ហើយកំសត់ទុគ៌តនៅកណ្ដាលឯង។ ឯពួកនោះ គេនឹងពឹងដល់ព្រះនាមនៃព្រះយេហូវ៉ា។ ពួកសំណល់នៃអ៊ីស្រាអែល នឹងមិនប្រព្រឹត្តអំពើទុច្ចរិត ឬពោលកុហកទៀតឡើយ។ ក៏នឹងឥតឃើញមានអណ្ដាតឆបោកនៅក្នុងមាត់គេដែរ ដ្បិតគេនឹងរកស៊ីហើយដេកចុះ ឥតមានអ្នកណាបំភ័យគេឡើយ»។ (សេផានា ៣:១២, ១៣) ពួកគ្រីស្ទានចាក់ប្រេងតាំងទាំងនេះតែងតែរក្សាទុកព្រះនាមរបស់ព្រះយេហូវ៉ាជាសំខាន់បំផុត ជាពិសេស តាំងពីឆ្នាំ១៩៣១ ពេលដែលពួកគេបានទទួលឈ្មោះស្មរបន្ទាល់ព្រះយេហូវ៉ា។ (អេសាយ ៤៣:១០-១២) ដោយបង្ហាញប្រាប់អំពីរឿងអធិបតេយ្យភាពនៃព្រះយេហូវ៉ា ពួកគេបានឲ្យកិត្ដិយសដល់ព្រះនាមរបស់ទ្រង់ ហើយនេះបានទៅជាទីជ្រកកោនសំរាប់ពួកគេ។ (សុភាសិត ១៨:១០) ព្រះយេហូវ៉ាបានបំប៉នអាហារខាងវិញ្ញាណជាបរិបូរឲ្យពួកគេ ហើយពួកគេរស់នៅដោយឥតភ័យខ្លាចក្នុងសួនមនោរម្យខាងវិញ្ញាណ។—សេផានា ៣:១៦, ១៧
«ឲ្យមានឈ្មោះ ហើយឲ្យជាទីសរសើរនៅកណ្ដាលអស់ទាំងសាសន៍»
៧, ៨. (ក) តើមានទំនាយណាទៀតដែលបានសំរេចមកលើពួកសំណល់នៃអ៊ីស្រាអែលខាងវិញ្ញាណ? (ខ) តើមនុស្សរាប់លាននាក់បានទទួលស្គាល់អ្វី ហើយតើខ្លួនអ្នកផ្ទាល់មានអារម្មណ៍យ៉ាងណាដែរអំពីរឿងនេះ?
៧ ការកាន់ខ្ជាប់ដ៏ជ្រៅនៃពួកអ្នកសំណល់ទៅនឹងព្រះនាមរបស់ព្រះយេហូវ៉ានិងគោលការណ៍សុចរិតនៃព្រះបន្ទូលរបស់ទ្រង់ គឺមានគេសង្កេតឃើញ។ មនុស្សស្មោះត្រង់បានសង្កេតឃើញភាពខុសគ្នារវាងចរិយានៃពួកអ្នកសំណល់ និងអំពើពុករលួយ អំពើលាក់ពុតនៃការដឹកនាំនយោបាយនិងសាសនានៃលោកីយ៍នេះ។ ព្រះយេហូវ៉ាបានប្រទានពរដល់«ពួកសំណល់នៃអ៊ីស្រាអែល[ខាងវិញ្ញាណ]»។ ទ្រង់បានឲ្យកិត្ដិយសដល់ពួកគេឲ្យមានសិទ្ធិកាន់ព្រះនាមរបស់ទ្រង់ ហើយទ្រង់បានធ្វើឲ្យពួកគេមានកេរ្ដិ៍ឈ្មោះល្អក្នុងចំណោមពួកមនុស្សនៅផែនដី។ នេះដូចសេផានាទាយមកថា៖ « ‹នៅគ្រានោះ អញនឹងនាំឯងរាល់គ្នាចូលមក ហើយនៅគ្រានោះ អញនឹងប្រមូលឯងឲ្យមូលគ្នា ដ្បិតអញនឹងលើកឯងរាល់គ្នាឲ្យមានឈ្មោះ ហើយឲ្យជាទីសរសើរ នៅកណ្ដាលអស់ទាំងសាសន៍នៅផែនដី គឺក្នុងកាលដែលអញនាំពួកឯងដែលជាប់ជាឈ្លើយមកវិញ នៅចំពោះភ្នែកឯងរាល់គ្នា› នេះជាព្រះបន្ទូលនៃព្រះយេហូវ៉ា»។—សេផានា ៣:២០
៨ តាំងពីឆ្នាំ១៩៣៥មក មនុស្សរាប់លាននាក់បានទទួលស្គាល់ថា ព្រះយេហូវ៉ាប្រទានពរដល់ពួកអ្នកសំណល់មែន។ ពួកគេសប្បាយចិត្តនឹងធ្វើតាមពួកយូដា ឬអ៊ីស្រាអែលខាងវិញ្ញាណនេះ ដោយនិយាយថា៖ « ‹យើងខ្ញុំនឹងទៅជាមួយនឹងអ្នកដែរ ពីព្រោះយើងខ្ញុំបានឮថា ព្រះទ្រង់គង់ជាមួយនឹងអ្នករាល់គ្នា»។ (សាការី ៨:២៣) ពួក«ចៀមឯទៀត»ទាំងនេះ ចាត់ទុកពួកសំណល់ចាក់ប្រេងតាំងជា‹អ្នកបំរើស្មោះត្រង់ហើយឈ្លាសវៃ› ដែលព្រះគ្រីស្ទបានតាំងឲ្យត្រួតលើ«ពួកផ្ទះលោក[នៅផែនដី]»។ ពួកគេទទួលយកដោយដឹងគុណនូវអាហារខាងវិញ្ញាណ ដែលក្រុមអ្នកបំរើបានរៀបចំមក«តាមត្រូវពេល»។—យ៉ូហាន ១០:១៦; ម៉ាថាយ ២៤:៤៥-៤៧
៩. តើមនុស្សរាប់លាននាក់រៀននិយាយ«ភាសា»អ្វី ហើយអ្វីជាកិច្ចការដ៏ធំដែលពួកចៀមឯទៀត‹រួមចិត្តគ្នា›បំរើជាមួយពួកអ្នកសំណល់ចាក់ប្រេងតាំង?
៩ នៅជិតពួកអ្នកសំណល់ ពួកចៀមឯទៀតរាប់លាននាក់នេះកំពុងតែរៀនរស់នៅ ហើយរៀននិយាយឲ្យស្របតាម«ភាសាបរិសុទ្ធ»។a ព្រះយេហូវ៉ាទាយតាមរយៈសេផានាថា៖ «នៅគ្រានោះ អញនឹងឲ្យជនជាតិទាំងឡាយ មានបបូរមាត់ស្អាត[ភាសាបរិសុទ្ធ ព.ថ.] ដើម្បីឲ្យគេបានអំពាវនាវដល់ព្រះនាមព្រះយេហូវ៉ាទាំងអស់គ្នា ហើយព្រមចិត្តគ្នានឹងគោរពដល់ទ្រង់»។ (សេផានា ៣:៩) ត្រូវហើយ ពួកចៀមឯទៀតសាមគ្គីគ្នាបំរើព្រះយេហូវ៉ាជាមួយសមាជិកចាក់ប្រេងតាំងនៃ«ហ្វូងតូច» ដើម្បីសំរេចកិច្ចការបន្ទាន់នៃការផ្សាយ«ដំណឹងល្អនេះ ដែលសំដែងពីនគរ . . . ទុកជាទីបន្ទាល់ដល់អស់ទាំងសាសន៍»។—លូកា ១២:៣២; ម៉ាថាយ ២៤:១៤
‹ថ្ងៃរបស់ព្រះយេហូវ៉ានឹងមក›
១០. តើពួកអ្នកសំណល់ចាក់ប្រេងតាំងតែងតែជឿជាក់អ្វី ហើយជាក្រុម តើពួកគេនឹងរស់ដរាបឃើញអ្វីកើតឡើង?
១០ ពួកអ្នកសំណល់ចាក់ប្រេងតាំងនៅចាំជានិច្ចនូវពាក្យសំដីរបស់ពេត្រុសដែលព្រះបណ្ដាលមក គឺថា៖ «[ព្រះយេហូវ៉ា]មិនផ្អាកសេចក្ដីសន្យារបស់ទ្រង់ ដូចជាមានអ្នកខ្លះគិតស្មាននោះទេ គឺទ្រង់មានព្រះហឫទ័យអត់ធ្មត់នឹងយើងរាល់គ្នាវិញ ដោយមិនចង់ឲ្យអ្នកណាមួយវិនាសឡើយ គឺចង់ឲ្យមនុស្សទាំងអស់បានប្រែចិត្តវិញ រីឯថ្ងៃនៃ[ព្រះយេហូវ៉ា] នោះនឹងមកដូចជាចោរប្លន់»។ (ពេត្រុសទី២ ៣:៩, ១០) ពួកសមាជិកនៃក្រុមអ្នកបំរើស្មោះត្រង់មិនដែលសង្ស័យសោះឡើយអំពីថ្ងៃនៃព្រះយេហូវ៉ាដែលកំពុងតែមកក្នុងសម័យយើងនេះ។ ថ្ងៃដ៏ធំនោះនឹងចាប់ផ្ដើមឡើងដោយប្រហារសេចក្ដីជំនុំជំរះរបស់ព្រះមកលើពិភពគ្រីស្ទសាសនា ដែលដូចក្រុងយេរូសាឡិមពីដើម ហើយក៏មកលើសំណល់ទាំងប៉ុន្មាននៃបាប៊ីឡូនដ៏ធំដែរ។—សេផានា ១:២-៤; វិវរណៈ ១៧:១, ៥; ១៩:១, ២
១១, ១២. (ក) តើទំនាយសេផានាមួយផ្នែកណាទៀត ដែលបានសំរេចមកលើពួកអ្នកសំណល់? (ខ) តើតាមរបៀបណាដែលពួកអ្នកសំណល់ចាក់ប្រេងតាំងបានគោរពតាមបញ្ជា«កុំឲ្យដៃឯងអន់ថយឲ្យសោះ»?
១១ ពួកអ្នកសំណល់ស្មោះត្រង់សប្បាយរីករាយណាស់ ដែលខ្លួនត្រូវបានសង្គ្រោះក្នុងឆ្នាំ១៩១៩ពីការជាប់ឃុំឃាំងនឹងបាប៊ីឡូនដ៏ធំ ជាចក្រភពលោកនៃសាសនាមិនពិត។ ពួកគេបានពិសោធការសំរេចនៃទំនាយសេផានានេះ៖ «ឱកូនស្រីស៊ីយ៉ូនអើយ ចូរច្រៀងឡើង! ឱអ៊ីស្រាអែលអើយ ចូរស្រែកឡើងចុះ! ឱកូនស្រីយេរូសាឡិមអើយ ចូរអរសប្បាយ ហើយរីករាយឲ្យអស់អំពីចិត្តទៅ! ព្រះយេហូវ៉ា ទ្រង់បានលើកទោសឯងចោល។ ទ្រង់បានបោះខ្មាំងសត្រូវរបស់ឯងចេញហើយ។ ឯស្តេចនៃសាសន៍អ៊ីស្រាអែល គឺព្រះយេហូវ៉ា ទ្រង់គង់នៅកណ្ដាលឯង។ ឯងមិនត្រូវរងការអាក្រក់ទៀតឡើយ។ នៅថ្ងៃនោះ នឹងមានពាក្យពោលដល់ក្រុងយេរូសាឡិមថា៖ ‹កុំឲ្យខ្លាចឡើយ ឱស៊ីយ៉ូនអើយ កុំឲ្យដៃឯងអន់ថយឲ្យសោះ។ ព្រះយេហូវ៉ា ដ៏ជាព្រះនៃឯង ទ្រង់គង់នៅកណ្ដាលឯង ទ្រង់ជាព្រះដ៏មានឥទ្ធិឫទ្ធិ ដើម្បីជួយសង្គ្រោះ› »។—សេផានា ៣:១៤-១៧
១២ ដោយជឿជាក់ហើយមានភស្តុតាងជាច្រើនថាព្រះយេហូវ៉ាគាំទ្រពួកគេ ពួកអ្នកសំណល់ចាក់ប្រេងតាំងបានចេញទៅយ៉ាងអង់អាច ដើម្បីសំរេចកិច្ចការដែលព្រះប្រទានឲ្យគេ។ ពួកគេបានផ្សាយដំណឹងល្អនៃព្រះរាជាណាចក្រ ហើយបានប្រកាសប្រាប់អំពីសេចក្ដីជំនុំជំរះរបស់ព្រះយេហូវ៉ាទាស់នឹងពិភពគ្រីស្ទសាសនា គឺបាប៊ីឡូនដ៏ធំទាំងមូល និងរបបដ៏អាក្រក់ជួជាតិទាំងអស់របស់សាតាំង។ ដោយបានឆ្លងកាត់ការលំបាកជាខ្លាំងជាច្រើនទសវត្សពីឆ្នាំ១៩១៩មក ពួកគេបានគោរពតាមបញ្ជារបស់ព្រះ៖ «កុំឲ្យខ្លាចឡើយ ឱស៊ីយ៉ូនអើយ កុំឲ្យដៃឯងអន់ថយឲ្យសោះ»។ ពួកគេមិនបានឲ្យដៃរបស់គេអន់ថយឡើយ ក្នុងការចែកចាយខិត្តប័ណ្ណ ទស្សនាវដ្ដី សៀវភៅ និងកូនសៀវភៅរាប់លានកោដិ ដើម្បីប្រកាសអំពីព្រះរាជាណាចក្ររបស់ព្រះយេហូវ៉ា។ ពួកគេជាគំរូដ៏លើកទឹកចិត្តចំពោះពួកចៀមឯទៀត ដែលតាំងពីឆ្នាំ១៩៣៥ បាននាំគ្នាចូលទៅខាងពួកគេ។
«កុំឲ្យដៃឯងអន់ថយឲ្យសោះ»
១៣, ១៤. (ក) ហេតុអ្វីក៏ពួកយូដាខ្លះឈប់បំរើព្រះយេហូវ៉ា ហើយនេះបង្ហាញឲ្យឃើញយ៉ាងណា? (ខ) អ្វីជាការមិនមានប្រាជ្ញាសំរាប់យើងធ្វើ ហើយកិច្ចការអ្វីដែលយើងមិនគួរបង្អន់ដៃនោះ?
១៣ កាលដែលយើង‹រង់ចាំ›ថ្ងៃដ៏ធំនៃព្រះយេហូវ៉ា តើតាមរបៀបណាដែលយើងអាចទទួលជំនួយដ៏មានប្រយោជន៍ពីទំនាយសេផានា? ទីមួយ យើងត្រូវប្រយ័ត្នកុំឲ្យខ្លួនដូចពួកយូដាក្នុងជំនាន់សេផានា ដែលឈប់ដើរតាមព្រះយេហូវ៉ា ដោយព្រោះតែពួកគេសង្ស័យអំពីរយៈពេលមកដល់នៃថ្ងៃរបស់ព្រះយេហូវ៉ា។ ពួកយូដាទាំងនេះមិនបានសំដែងការសង្ស័យរបស់ខ្លួនឲ្យគេឃើញទេ តែដំណើរប្រព្រឹត្តរបស់គេបង្ហាញថា ពួកគេច្បាស់ជាមិនជឿថា ថ្ងៃរបស់ព្រះយេហូវ៉ាជិតមកដល់នោះ។ ពួកគេយកចិត្តទុកដាក់តែនឹងការប្រមូលទ្រព្យសម្បត្ដិ ជាជាងរង់ចាំមើលព្រះយេហូវ៉ា។—សេផានា ១:១២, ១៣; ៣:៨
១៤ សព្វថ្ងៃនេះមិនមែនជាពេលដែលយើងត្រូវបណ្ដោយឲ្យការសង្ស័យចាក់ឫសក្នុងចិត្តរបស់យើងទេ។ មិនជាការមានប្រាជ្ញាទេ បើក្នុងគំនិតឬចិត្តរបស់យើងចេះតែភ្លេចនូវថ្ងៃរបស់ព្រះយេហូវ៉ាដែលកំពុងតែមកនេះ។ (ពេត្រុសទី២ ៣:១-៤, ១០) យើងមិនគួរឈប់ដើរតាមព្រះយេហូវ៉ា ឬ ‹បង្អន់ដៃយើង›ក្នុងការបំរើទ្រង់ឡើយ។ នេះរាប់បញ្ចូលដោយមិន«ធ្វើការដោយដៃខ្ជិលច្រអូស» ក្នុងការផ្សាយ«ដំណឹងល្អ»របស់យើង។—សុភាសិត ១០:៤; ម៉ាកុស ១៣:១០
ការប្រយុទ្ធនឹងភាពមិនអើពើ
១៥. តើអ្វីដែលអាចបណ្ដាលឲ្យយើងបង្អន់ដៃក្នុងការបំរើព្រះយេហូវ៉ា ហើយបញ្ហានេះត្រូវបានទាយប្រាប់យ៉ាងណាខ្លះក្នុងទំនាយសេផានា?
១៥ ទីពីរ យើងត្រូវតែប្រយ័ត្នខ្លួននឹងឥទ្ធិពលដែលធ្វើឲ្យទន់ខ្សោយនៃភាពមិនអើពើ។ ក្នុងបស្ចិមប្រទេសជាច្រើន ការមិនខ្វល់ខ្វាយអំពីបញ្ហាខាងវិញ្ញាណ អាចទៅជាមូលហេតុមួយនៃការបាក់ទឹកចិត្តក្នុងចំណោមពួកអ្នកផ្សាយដំណឹងល្អខ្លះ។ ភាពមិនអើពើបែបនេះក៏មាននៅក្នុងជំនាន់សេផានាដែរ។ ព្រះយេហូវ៉ាបានមានបន្ទូលតាមរយៈសេផានាថា៖ «អញនឹងធ្វើទោសដល់ពួកអ្នកដែល . . . គិតក្នុងចិត្តថា ‹ព្រះយេហូវ៉ានឹងមិនធ្វើ ទោះល្អឬអាក្រក់ផង› »។ (សេផានា ១:១២) សរសេរអំពីវគ្គនេះក្នុងសៀវភៅឈ្មោះព្រះគម្ពីរខេម្ព្រីជសំរាប់សាលានិងអនុវិទ្យាល័យ លោក អេ. ប៊ី. ដាវីឌសុនថ្លែងថា វគ្គនេះសំដៅទៅមនុស្សដែល«ធ្លាក់ដល់កំរិតដែលលែងមានអារម្មណ៍អើពើទៀត ឬដល់ថ្នាក់លែងជឿថាព្រះធ្វើអន្តរាគមន៍ក្នុងកិច្ចការរបស់មនុស្ស»។
១៦. តើអ្វីជាស្ថានភាពនៃគំនិតដែលមានក្នុងចំណោមសមាជិកជាច្រើននៃនិកាយពិភពគ្រីស្ទសាសនា តែតើព្រះយេហូវ៉ាប្រទានឲ្យយើងនូវការលើកទឹកចិត្តអ្វី?
១៦ ក្នុងកន្លែងជាច្រើននៅផែនដីនេះ ភាពមិនអើពើជាអាកប្បកិរិយាដែលមានទូទៅសព្វថ្ងៃនេះ ជាពិសេសក្នុងប្រទេសដែលសម្បូណ៌ដោយទ្រព្យធន។ សូម្បីតែសមាជិកនៃនិកាយក្នុងពិភពគ្រីស្ទសាសនា ក៏មិនជឿថាព្រះយេហូវ៉ានឹងធ្វើអន្តរាគមន៍ក្នុងកិច្ចការរបស់មនុស្សនៅសម័យយើងនេះ។ ពួកគេបដិសេធការខំប្រឹងប្រែងរបស់យើងក្នុងការផ្សាយដំណឹងល្អអំពីព្រះរាជាណាចក្រដល់គេ ដោយការញញឹមមិនជឿ ឬដោយពាក្យមួយម៉ាត់ថា«ខ្ញុំមិនចូលចិត្តទេ»! នៅក្រោមស្ថានភាពបែបនេះ ដែលការខំតស៊ូក្នុងកិច្ចការផ្សាយអាចទៅជាការពិបាកមែន។ នេះនឹងសាកល្បងដល់ការអត់ធ្មត់របស់យើង។ ប៉ុន្តែ តាមរយៈទំនាយសេផានា ព្រះយេហូវ៉ាលើកទឹកចិត្តប្រជារាស្ត្រស្មោះត្រង់របស់ទ្រង់ ដោយមានបន្ទូលថា៖ «កុំឲ្យដៃឯងអន់ថយឲ្យសោះ។ ព្រះយេហូវ៉ា ដ៏ជាព្រះនៃឯង ទ្រង់គង់នៅកណ្ដាលឯង ទ្រង់ជាព្រះដ៏មានឥទ្ធិឫទ្ធិ ដើម្បីជួយសង្គ្រោះ ទ្រង់នឹងមានសេចក្ដីរីករាយអរសប្បាយចំពោះឯង។ ទ្រង់នឹងសំរាកក្នុងសេចក្ដីស្រឡាញ់របស់ទ្រង់។ ក៏នឹងអរសប្បាយនឹងឯង ដោយសំឡេងច្រៀង»។ —សេផានា ៣:១៦, ១៧
១៧. តើមានគំរូល្អអ្វីខ្លះ ដែលពួកអ្នកថ្មីក្នុងចំណោមពួកចៀមឯទៀតគួរតែធ្វើតាម ហើយធ្វើតាមយ៉ាងណា?
១៧ ការពិតក្នុងប្រវត្ដិសាស្ត្រទំនើបនៃប្រជារាស្ត្ររបស់ព្រះយេហូវ៉ា គឺថា ពួកអ្នកសំណល់និងពួកចំណាស់ក្នុងចំណោមពួកចៀមឯទៀត បានសំរេចកិច្ចការដ៏អស្ចារ្យនៃការប្រមូលមនុស្សក្នុងថ្ងៃចុងក្រោយបង្អស់នេះ។ ពួកគ្រីស្ទានស្មោះត្រង់ទាំងអស់នេះបានសំដែងការអត់ធ្មត់ជាច្រើនទសវត្ស។ ពួកគេមិនបណ្ដោយឲ្យភាពមិនអើពើរបស់មនុស្សជាច្រើនក្នុងពិភពគ្រីស្ទសាសនា ធ្វើឲ្យគេបាក់ទឹកចិត្តឡើយ។ ដូច្នេះ ចូរឲ្យពួកអ្នកថ្មីក្នុងចំណោមពួកចៀមឯទៀត កុំបាក់ទឹកចិត្តឲ្យសោះ ដោយភាពមិនអើពើដល់បញ្ហាខាងវិញ្ញាណ ដែលមានទូទៅសព្វថ្ងៃនេះក្នុងស្រុកជាច្រើន។ ចូរឲ្យពួកគេកុំ‹បង្អន់ដៃ›របស់គេឲ្យសោះ ឬកុំខ្ជិល។ ចូរឲ្យពួកគេឆ្លៀតយកគ្រប់ឱកាស ដើម្បីផ្សាយទស្សនាវដ្ដីប៉មយាម ភ្ញាក់រឭក! និងប្រកាសវត្ថុល្អៗឯទៀត ដែលបានរៀបចំមកយ៉ាងពិសេសសំរាប់ជួយមនុស្សដែលមានលក្ខណៈដូចចៀម ឲ្យរៀនសេចក្ដីពិតអំពីថ្ងៃនៃព្រះយេហូវ៉ានិងពរជាច្រើនដែលមានជាបន្តបន្ទាប់។
ឆ្ពោះទៅមុខកាលកំពុងរង់ចាំថ្ងៃដ៏ធំ!
១៨, ១៩. (ក) តើមានការលើកទឹកចិត្តឲ្យអត់ធ្មត់អ្វីខ្លះ ដែលយើងរកឃើញក្នុងម៉ាថាយ ២៤:១៣ និង អេសាយ ៣៥:៣, ៤? (ខ) តើយើងនឹងបានប្រសិទ្ធិពរយ៉ាងណា បើសិនជាយើងព្រមចិត្តគ្នាឆ្ពោះទៅមុខក្នុងការបំរើព្រះយេហូវ៉ា?
១៨ ព្រះយេស៊ូមានបន្ទូលថា៖ «អ្នកណាដែលកាន់ខ្ជាប់ ដរាបដល់ចុងបំផុតវិញ អ្នកនោះនឹងបានសង្គ្រោះ»។ (ម៉ាថាយ ២៤:១៣) ដូច្នេះ មិនត្រូវឲ្យមាន«ដៃដែលខ្សោយ» ឬ ‹ជង្គង់ញ័រ›ទេ កាលដែលយើងរង់ចាំថ្ងៃដ៏ធំនៃព្រះយេហូវ៉ា! (អេសាយ ៣៥:៣, ៤) ដោយលើកទឹកចិត្ត ទំនាយសេផានាចែងអំពីព្រះយេហូវ៉ាថា៖ «ទ្រង់ជាព្រះដ៏មានឥទ្ធិឫទ្ធិ ដើម្បីជួយសង្គ្រោះ»។ (សេផានា ៣:១៧) មែនហើយ ព្រះយេហូវ៉ានឹងសង្គ្រោះ«ហ្វូងយ៉ាងធំ» ក្នុងដំណាក់ចុងក្រោយបង្អស់នៃ«សេចក្ដីវេទនាជាខ្លាំង» នៅពេលដែលទ្រង់បញ្ជាបុត្រារបស់ទ្រង់ឲ្យកំទេចចោលពួកសាសន៍នយោបាយដែលចេះតែ«ដំកើងខ្លួន»ទាស់នឹងរាស្ត្ររបស់ទ្រង់។—វិវរណៈ ៧:៩, ១៤; សេផានា ២:១០, ១១; ទំនុកដំកើង ២:៧-៩
១៩ កាលដែលថ្ងៃដ៏ធំនៃព្រះយេហូវ៉ាកំពុងតែមក ចូរយើងឆ្ពោះទៅមុខជានិច្ចក្នុងការ«ព្រមចិត្តគ្នា»ខំបំរើទ្រង់! (សេផានា ៣:៩) ដោយធ្វើដូច្នេះ យើងនិងពួកអ្នកដទៃជាច្រើនឯទៀតនឹងត្រូវដាក់ក្នុងកន្លែងដែលនឹង«បាំងទុក នៅក្នុងថ្ងៃនៃសេចក្ដីខ្ញាល់របស់ព្រះយេហូវ៉ា» ហើយនឹងឃើញព្រះនាមដ៏បរិសុទ្ធរបស់ទ្រង់បានបរិសុទ្ធ។
[កំណត់សម្គាល់]
a ចំពោះការពិគ្រោះដ៏ល្អិតល្អន់អំពី«ភាសាបរិសុទ្ធ» សូមមើលប៉មយាម ១ មេសា ១៩៩១ ទំព័រ ២០-៥ និង ១ ឧសភា ១៩៩១ ទំព័រ ១០-២០ (ភាសាអង់គ្លេស)
សាឡើងវិញ
◻ តើស្ថានការណ៍សាសនាក្នុងពិភពគ្រីស្ទសាសនាដូចយ៉ាងណាខ្លះនឹងជំនាន់សេផានា?
◻ តើពួកមេដឹកនាំនយោបាយជាច្រើនសព្វថ្ងៃនេះ ដូចយ៉ាងណាខ្លះនឹង «ពួកចៅហ្វាយ»ក្នុងជំនាន់សេផានា?
◻ តើកិច្ចសន្យាមួយណាក្នុងសេផានាដែលបានសំរេចមកលើពួកអ្នកសំណល់?
◻ តើមនុស្សរាប់លាននាក់បានទទួលស្គាល់អ្វី?
◻ ហេតុអ្វីក៏យើងមិនត្រូវបង្អន់ដៃរបស់យើងក្នុងការបំរើព្រះយេហូវ៉ា?
[រូបភាពនៅទំព័រ១៥]
ដូចសេផានា ពួកអ្នកសំណល់ស្មោះត្រង់នៃគ្រីស្ទានចាក់ប្រេងតាំងបានប្រកាសសេចក្ដីជំនុំជំរះរបស់ព្រះយេហូវ៉ាដោយឥតខ្លាច
[រូបភាពនៅទំព័រ១៨]
«ពួកចៀមឯទៀត»មិនបណ្ដោយឲ្យភាពមិនអើពើរបស់មនុស្សធ្វើឲ្យគេបាក់ទឹកចិត្តឡើយ