ពូជរបស់ពស់—លាតត្រដាងឲ្យឃើញយ៉ាងណា?
«អញនឹងធ្វើឲ្យឯងហើយនឹងស្ត្រី គឺទាំងពូជឯងនឹងពូជនាងមានសេចក្ដីខ្មាំងនឹងគ្នា»។—លោកុប្បត្តិ ៣:១៥
១. (ក) ហេតុអ្វីក៏ព្រះយេហូវ៉ាជាព្រះដ៏សប្បាយរីករាយ? (ខ) តើទ្រង់បានធ្វើអ្វីខ្លះ ដើម្បីឲ្យយើងអាចទទួលការសប្បាយរីករាយនេះដែរ?
ព្រះយេហូវ៉ាជាព្រះដ៏សប្បាយរីករាយ ហើយមានមូលហេតុត្រឹមត្រូវចំពោះការនេះ។ ទ្រង់ជាព្រះមហាឧត្តម ជាព្រះទីមួយដែលប្រទានរបស់ល្អៗ ហើយគ្មានអ្វីអាចធ្វើឲ្យខកខានដល់ការសំរេចគោលបំណងរបស់ទ្រង់ឡើយ។ (អេសាយ ៥៥:១០, ១១; ធីម៉ូថេទី១ ១:១១; យ៉ាកុប ១:១៧) ទ្រង់ចង់ឲ្យពួកអ្នកបំរើរបស់ទ្រង់ទទួលការសប្បាយរីករាយនេះដែរ ហើយទ្រង់នឹងឲ្យគេមានមូលហេតុត្រឹមត្រូវចំពោះការនេះ។ ដូច្នេះ នៅគ្រាងងឹតបំផុតមួយក្នុងប្រវត្ដិសាស្ត្រមនុស្ស—គឺការបះបោរនៅសួនអេដែន—ទ្រង់បានប្រទានមូលដ្ឋានឲ្យយើងមើលទៅអនាគតដោយសេចក្ដីសង្ឃឹម។—រ៉ូម ៨:១៩-២១
២. នៅពេលប្រកាសសេចក្ដីជំនុំជំរះមកលើពួកបះបោរនៅសួនអេដែន តើតាមរបៀបណាដែលព្រះយេហូវ៉ាប្រទានមូលដ្ឋានសំរាប់សេចក្ដីសង្ឃឹមដល់កូនចៅរបស់អ័ដាមនិងអេវ៉ា?
២ បុត្រវិញ្ញាណមួយរូបនៃព្រះយេហូវ៉ា ដោយប្រឆាំងហើយនិយាយបង្ខូចព្រះ បានធ្វើខ្លួនវាទៅជាអារក្សសាតាំង។ មនុស្សដំបូង នាងអេវ៉ាហើយរួចមកអ័ដាម បានធ្លាក់នៅក្រោមអានុភាពរបស់វា ហើយបានបំពានច្បាប់របស់ព្រះយេហូវ៉ាដែលចែងយ៉ាងច្បាស់ក្រឡែត។ ពួកគេត្រូវបានកាត់ទោសឲ្យស្លាប់យ៉ាងសមត្រឹមត្រូវ។ (លោកុប្បត្តិ ៣:១-២៤) ប៉ុន្តែ នៅពេលព្រះយេហូវ៉ាប្រកាសសេចក្ដីជំនុំជំរះមកលើពួកបះបោរទាំងនេះ ទ្រង់បានប្រទានមូលដ្ឋាននៃសេចក្ដីសង្ឃឹមដល់កូនចៅរបស់អ័ដាមនិងអេវ៉ា។ តើតាមរបៀបណា? ដូចបានកត់ទុកមកនៅលោកុប្បត្តិ ៣:១៥ ព្រះយេហូវ៉ាមានបន្ទូលថា៖ «អញនឹងធ្វើឲ្យឯងហើយនឹងស្ត្រី គឺទាំងពូជឯងនឹងពូជនាងមានសេចក្ដីខ្មាំងនឹងគ្នា ពូជនាងនឹងកិនក្បាលឯង ហើយឯងនឹងចឹកកែងជើងគេ»។ ទំនាយនេះជាកូនសោមួយបើកឲ្យយល់ព្រះគម្ពីរទាំងមូល ព្រមទាំងព្រឹត្ដិការណ៍នាអតីតកាលនិងនាបច្ចុប្បន្ននេះ ដែលជាប់ទាក់ទងលោកីយ៍និងពួកអ្នកបំរើព្រះយេហូវ៉ា។
ទំនាយនេះមានន័យយ៉ាងណា
៣. យោងទៅតាមលោកុប្បត្តិ ៣:១៥ ចូរសំគាល់ (ក) ពស់ (ខ) «ស្ត្រី» (គ) «ពូជ»របស់ពស់ (ឃ) «ពូជ»របស់ស្ត្រី។
៣ ដើម្បីឲ្យយល់សារៈសំខាន់នៃទំនាយនេះ ចូរពិចារណាមើលលក្ខណៈផ្សេងៗរបស់វា។ សាមីខ្លួននៅលោកុប្បត្តិ ៣:១៥ គឺពស់—នេះមិនមែនសត្វពស់មែនទែនទេ តែជាបុគ្គលដែលប្រើពស់នោះ។ (វិវរណៈ ១២:៩) «ស្ត្រី» មិនមែននាងអេវ៉ាទេ តែជាអង្គការស្ថានសួគ៌របស់ព្រះយេហូវ៉ា ដែលត្រូវជាម្ដាយរបស់ពួកអ្នកបំរើចាក់ប្រេងតាំងរបស់ទ្រង់នៅផែនដី។ (កាឡាទី ៤:២៦) «ពូជ»របស់ពស់ គឺជាពូជរបស់សាតាំង ជាកូនចៅរបស់វា—ពួកបិសាច ពួកមនុស្ស និងអង្គការរបស់មនុស្សដែលសំដែងលក្ខណៈរបស់សាតាំង ហើយសំដែងការស្អប់ដល់«ពូជ»របស់ស្ត្រី។ (យ៉ូហាន ១៥:១៩; ១៧:១៥) «ពូជ»របស់ស្ត្រី ទីមួយគឺព្រះយេស៊ូគ្រីស្ទ ដែលបានចាក់ប្រេងតាំងដោយព្រះវិញ្ញាណបរិសុទ្ធក្នុងឆ្នាំ២៩ ស.យ.។ ផ្នែកទីពីរនៃពូជសន្យានោះ គឺជាពួក១៤៤.០០០នាក់ ដែលបាន«កើតជាថ្មី . . . ពីទឹក ហើយអំពីព្រះវិញ្ញាណ» ហើយជាអ្នកគ្រងមរដកនៃព្រះរាជាណាចក្រស្ថានសួគ៌ជាមួយព្រះគ្រីស្ទ។ គេបានចាប់ផ្ដើមរួបបញ្ចូលពួកទាំងនេះជាពូជរបស់ស្ត្រីតាំងពីបុណ្យភិន្ដាកុស ឆ្នាំ៣៣ ស.យ.មកម្ល៉េះ។—យ៉ូហាន ៣:៣, ៥; កាឡាទី ៣:១៦, ២៩
៤. តើតាមរបៀបណាដែលលោកុប្បត្តិ ៣:១៥ ជាប់ទាក់ទងនឹងផែនដីមនោរម្យ ដែលពោរពេញទៅដោយមនុស្សរួចពីបាបនិងសេចក្ដីស្លាប់?
៤ សាតាំងបានប្រើសត្វពស់មែនទែននៅក្នុងសួនអេដែនជាអ្នកនាំពាក្យ ដែលការបោកប្រាសរបស់វានាំឲ្យមនុស្សបាត់បង់សួនមនោរម្យ។ លោកុប្បត្តិ ៣:១៥ ចង្អុលទៅគ្រាមួយ ជាគ្រាដែលបុគ្គលដែលបានប្រើសត្វពស់នោះ នឹងត្រូវកំទេចចោល។ រួចមក ផ្លូវនឹងបានបើកឡើងវិញឲ្យពួកអ្នកបំរើព្រះចូលរស់នៅក្នុងទីមនោរម្យ ដែលឥតមានបាបនិងសេចក្ដីស្លាប់។ នោះជាគ្រាដ៏សប្បាយរីករាយណាស់ហ្ន៎!—វិវរណៈ ២០:១-៣; ២១:១-៥
៥. តើកូនចៅខាងវិញ្ញាណរបស់អារក្សមានលក្ខណៈយ៉ាងណាខ្លះ?
៥ ក្រោយពីការបះបោរនៅក្នុងសួនអេដែន បុគ្គលនិងអង្គការមួយចំនួនបានចាប់ផ្ដើមលេចចេញមក ដែលសំដែងលក្ខណៈដូចអារក្សសាតាំងដែរ—គឺការបះបោរ ការភូតភរ ការនិយាយបង្ខូច និងការកាប់សំឡាប់គ្នា ព្រមទាំងប្រឆាំងនឹងគោលបំណងរបស់ព្រះយេហូវ៉ានិងពួកអ្នកថ្វាយបង្គំទ្រង់។ លក្ខណៈទាំងនោះបានសំគាល់ឲ្យឃើញពូជ កូនចៅខាងវិញ្ញាណរបស់អារក្ស។ ក្នុងចំណោមបុគ្គលទាំងនេះ មានកាអ៊ីន ដែលបានសំឡាប់អេបិល នៅពេលដែលព្រះយេហូវ៉ាសព្វព្រះហឫទ័យនឹងការថ្វាយបង្គំរបស់អេបិលជាជាងរបស់កាអ៊ីន។ (យ៉ូហានទី១ ៣:១០-១២) នីមរ៉ុឌជាបុគ្គលម្នាក់ទៀត ដែលឈ្មោះរបស់គាត់ផ្ទាល់បានសំគាល់ជាអ្នកបះបោរម្នាក់ ហើយបានក្លាយទៅជាអ្នកប្រមាញ់និងមេដឹកនាំដ៏ខ្លាំងក្លា ប្រឆាំងព្រះយេហូវ៉ា។ (លោកុប្បត្តិ ១០:៩) ថែមទៅទៀត មានរាជាណាចក្រជាច្រើននៅសម័យបុរាណលេចចេញមក រួមទាំងបាប៊ីឡូន ដែលរដ្ឋរបស់គេគាំទ្រសាសនាដែលបានដុះចេញពីសេចក្ដីមិនពិត ហើយរាជាណាចក្រទាំងនេះបានជិះជាន់យ៉ាងសាហាវលើពួកអ្នកថ្វាយបង្គំរបស់ព្រះយេហូវ៉ា។—យេរេមា ៥០:២៩
‹ឯងហើយនឹងស្ត្រីមានសេចក្ដីខ្មាំងនឹងគ្នា›
៦. តើសាតាំងបានសំដែងការស្អប់ដល់ស្ត្រីនៃព្រះយេហូវ៉ាតាមរបៀបណាខ្លះ?
៦ ក្នុងកំឡុងពេលទាំងអស់នេះ គឺមានការស្អប់រវាងពស់និងស្ត្រីនៃព្រះយេហូវ៉ា គឺរវាងអារក្សសាតាំងនិងអង្គការនៃបុគ្គលវិញ្ញាណស្មោះត្រង់នៅស្ថានសួគ៌នៃព្រះយេហូវ៉ា។ ការស្អប់របស់សាតាំងបានបញ្ចេញឲ្យឃើញ កាលដែលវានិយាយឡកឡឺយដាក់ព្រះយេហូវ៉ា ហើយខំរំខានដល់អង្គការស្ថានសួគ៌នៃព្រះយេហូវ៉ា ដោយល្បួងពួកទេវតាឲ្យបោះបង់ទីលំនៅត្រឹមត្រូវរបស់គេ។ (សុភាសិត ២៧:១១; យូដាស ៦) នេះបង្ហាញឲ្យឃើញទៀត នៅពេលដែលសាតាំងប្រើពួកបិសាចរបស់វាឲ្យខំជ្រៀតជ្រែកជាមួយពួកទេវទូតដែលព្រះយេហូវ៉ាបានបញ្ជូន។ (ដានីយ៉ែល ១០:១៣, ១៤, ២០, ២១) នេះរឹតតែជាក់ស្តែងឡើងក្នុងសតវត្សទី២០នេះ នៅពេលដែលសាតាំងខំព្យាយាមបំផ្លាញព្រះរាជាណាចក្រនៃព្រះមេស្ស៊ីកាលទើបកើត។—វិវរណៈ ១២:១-៤
៧. ហេតុអ្វីក៏ពួកទេវតាស្មោះត្រង់នៃព្រះយេហូវ៉ាមានអារម្មណ៍ស្អប់ខ្ពើមដល់ពស់និមិត្តរូប តែពួកគេបានទប់ទល់យ៉ាងណា?
៧ រីឯស្ត្រីនៃព្រះយេហូវ៉ា ជាក្រុមទេវតាស្មោះត្រង់ ក៏មានការស្អប់ចំពោះពស់និមិត្តរូបនេះដែរ។ សាតាំងបាននិយាយបង្ខូចកេរ្ដិ៍ឈ្មោះល្អរបស់ព្រះ វាបានចោទទៅលើចិត្តស្មោះគ្រប់ល័ក្ខណ៍នៃបុគ្គលមានប្រាជ្ញាគ្រប់ៗរូបរបស់ព្រះ រួមទាំងពួកទេវតាទាំងអស់ ហើយវាកំពុងតែខំព្យាយាមបង្ខូចដល់សេចក្ដីស្មោះត្រង់របស់គេចំពោះព្រះ។ (វិវរណៈ ១២:៤ក) ពួកទេវតាស្មោះត្រង់ ចេរូប៊ីន និងសេរភីម ច្បាស់ជាមានអារម្មណ៍ស្អប់ខ្ពើមដល់បុគ្គលម្នាក់នេះណាស់ ដែលធ្វើខ្លួនវាទៅជាអារក្សនិងសាតាំង។ ក៏ប៉ុន្តែ ពួកគេរង់ចាំដល់ព្រះយេហូវ៉ា ឲ្យដោះស្រាយបញ្ហានេះនៅពេលកំណត់និងតាមវិធីរបស់ទ្រង់។—ប្រៀបធៀប យូដាស ៩
ការស្អប់ដល់ពូជស្ត្រីរបស់ព្រះ
៨. តើសាតាំងរង់ចាំមើលអ្នកណា?
៨ នៅគ្រាដដែលនោះ សាតាំងកំពុងតែរង់ចាំមើលពូជស្ត្រីដែលបានទាយមក ជាពូជដែលព្រះយេហូវ៉ាបានមានបន្ទូលថានឹងកិនក្បាលពស់។ នៅពេលដែលទេវតាពីស្ថានសួគ៌ប្រកាសថាព្រះយេស៊ូ បានប្រសូតនៅបេថ្លេហិម ជា«ព្រះអង្គសង្គ្រោះ១អង្គ . . . គឺជាព្រះគ្រីស្ទដ៏ជាព្រះអម្ចាស់» នេះជាការបញ្ជាក់ច្បាស់ថាទ្រង់នឹងទៅជាពូជរបស់ស្ត្រីដែលបានទាយមក។—លូកា ២:១០, ១១
៩. បន្ទាប់ពីកំណើតរបស់ព្រះយេស៊ូ តើសាតាំងបានបង្ហាញការស្អប់ដ៏សាហាវយ៉ាងណាខ្លះ?
៩ បន្ដិចទៀត ការស្អប់ដ៏សាហាវរបស់សាតាំងនឹងឃើញច្បាស់ នៅពេលដែលវាទាញចិត្តពួកហោរាសាស្ត្រដែលជាពាហិរជន ឲ្យធ្វើបេសកកម្មមួយ ដែលមុនដំបូងនាំពួកគេទៅដល់ស្តេចហេរ៉ូឌនៅយេរូសាឡិម ហើយក្រោយមក មកដល់ផ្ទះនៅបេថ្លេហិម ជាកន្លែងដែលពួកគេបានរកឃើញកុមារយេស៊ូនិងមាតារបស់ទ្រង់ នាងម៉ារា។ មិនយូរប៉ុន្មានក្រោយមក ស្តេចហេរ៉ូឌបានបញ្ជាឲ្យសំឡាប់ក្មេងប្រុសពីអាយុពីរឆ្នាំចុះ នៅក្នុងបេថ្លេហិមនិងនៅជុំវិញនោះ។ ចំពោះការនេះ ស្តេចហេរ៉ូឌបានសំដែងការស្អប់ដល់ពូជនោះដូចសាតាំងដែរ។ ស្តេចហេរ៉ូឌបានជ្រាបយ៉ាងច្បាស់ថា ទ្រង់កំពុងព្យាយាមកំចាត់ចោលជីវិតរបស់បុគ្គលដែលនឹងទៅជាព្រះមេស្ស៊ី។ (ម៉ាថាយ ២:១-៦, ១៦) ប្រវត្ដិសាស្ត្របង្ហាញថា ស្តេចហេរ៉ូឌជាមនុស្សគ្មានមេត្ដា ប៉ិនប្រសប់ និងជាឃាតករ—គឺពិតជាពូជមួយរបស់ពស់។
១០. (ក) ក្រោយពីព្រះយេស៊ូជ្រមុជទឹករួច តើសាតាំងបានព្យាយាមធ្វើឲ្យបរាជ័យយ៉ាងណាខ្លះដល់គោលបំណងរបស់ព្រះយេហូវ៉ាអំពីពូជសន្យា? (ខ) តើតាមរបៀបណាខ្លះ ដែលសាតាំងបានប្រើពួកមេដឹកនាំសាសនាយូដាដើម្បីសំរេចគោលបំណងវា?
១០ បន្ទាប់ពីព្រះយេស៊ូបានទទួលការចាក់ប្រេងតាំងដោយព្រះវិញ្ញាណបរិសុទ្ធនៅឆ្នាំ២៩ ស.យ. ហើយបន្ទាប់ពីព្រះយេហូវ៉ាបានមានបន្ទូលពីស្ថានសួគ៌ ទទួលស្គាល់ព្រះយេស៊ូជាបុត្រារបស់ទ្រង់ សាតាំងបានព្យាយាមល្បួងព្រះយេស៊ូជាច្រើនលើកច្រើនសា ដើម្បីធ្វើឲ្យបរាជ័យដល់គោលបំណងរបស់ព្រះយេហូវ៉ាអំពីបុត្រានេះ។ (ម៉ាថាយ ៤:១-១០) ដោយពុំបានជោគជ័យ វាក៏បានបែរទៅប្រើភ្នាក់ងារមនុស្សដើម្បីសំរេចបំណងរបស់វា។ ពួកមេដឹកនាំសាសនាដ៏លាក់ពុត ជាពួកអ្នកដែលវាបានប្រើដើម្បីប៉ុនប៉ងបង្ខូចកិត្ដិយសរបស់ព្រះយេស៊ូ។ ពួកគេបានប្រើពាក្យភូតភរ ពាក្យបង្កាច់ ជាមធ្យោបាយដែលសាតាំងបានប្រើខ្លួនវាផ្ទាល់។ នៅពេលដែលព្រះយេស៊ូមានបន្ទូលប្រាប់ជនពិការម្នាក់ថា «ចូរសង្ឃឹមឡើង . . . បាបឯងបានអត់ទោសឲ្យឯងហើយ» ពួកអាចារ្យខាងវិន័យបានហៅទ្រង់ថាជាអ្នកប្រមាថមើលងាយព្រះ ដោយមិនទាំងចាំមើលជននោះបានជាឬអត់។ (ម៉ាថាយ ៩:២-៧) នៅពេលដែលព្រះយេស៊ូបានប្រោសមនុស្សឲ្យជានៅថ្ងៃឈប់សំរាក ពួកផារីស៊ីបានហៅទ្រង់ថាជាអ្នកបំពានច្បាប់នៃថ្ងៃឈប់សំរាក ហើយក៏បានពិគ្រោះគ្នារកមធ្យោបាយធ្វើគុតទ្រង់។ (ម៉ាថាយ ១២:៩-១៤; យ៉ូហាន ៥:១-១៨) នៅពេលដែលព្រះយេស៊ូបានបណ្ដេញអារក្សចេញ ពួកផារីស៊ីបានចោទថាទ្រង់ចូលដៃជាមួយ«បេលសេប៊ូល ជាមេអារក្ស»។ (ម៉ាថាយ ១២:២២-២៤) ក្រោយពីលោកឡាសារត្រូវបានប្រោសឲ្យរស់ឡើងវិញ មនុស្សជាច្រើនបានជឿដល់ព្រះយេស៊ូ ប៉ុន្តែពួកមេសង្គ្រាជនិងពួកផារីស៊ី ម្ដងនេះទៀត បានមកពិគ្រោះរកមធ្យោបាយធ្វើគុតទ្រង់។—យ៉ូហាន ១១:៤៧-៥៣
១១. បីថ្ងៃមុនព្រះយេស៊ូសោយទិវង្គត
១១ នៅខែណៃសែន ទី១១ ឆ្នាំ៣៣ ស.យ. ថ្វីបើបានដឹងយ៉ាងច្បាស់អំពីគម្រោងការណ៍របស់គេក៏ដោយ ព្រះយេស៊ូបានយាងចូលទៅក្នុងទីធ្លាព្រះវិហារនៅយេរូសាឡិមដោយឥតខ្លាច ហើយនៅទីនោះទ្រង់បានប្រកាសសេចក្ដីជំនុំជំរះដែលត្រូវធ្លាក់មកលើពួកគេ។ ជាក្រុម ពួកអាចារ្យខាងវិន័យនិងពួកផារីស៊ីបានសំដែងម្ដងហើយម្ដងទៀតថាគេជាមនុស្សប្រភេទណា ដូច្នេះព្រះយេស៊ូបានមានបន្ទូលថា៖ «វេទនាដល់អ្នករាល់គ្នា ពួកអាចារ្យ នឹងពួកផារិស៊ី ជាមនុស្សកំពុតអើយ ដ្បិតអ្នករាល់គ្នាបិទនគរស្ថានសួគ៌នៅមុខមនុស្ស ខ្លួនអ្នករាល់គ្នាមិនព្រមចូល ហើយក៏មិនបើកដល់អស់អ្នកដែលកំពុងតែចូល ឲ្យគេចូលដែរ»។ ព្រះយេស៊ូបានប្រកាសយ៉ាងចំៗថាពួកគេជាផ្នែកនៃពូជរបស់ពស់ ដោយមានបន្ទូលថា៖ «ឱសត្វពស់ ឱពូជពស់វែកអើយ ធ្វើដូចម្ដេចឲ្យអ្នករាល់គ្នារួចពីទោស នៅក្នុងនរកបាន»? (ម៉ាថាយ ២៣:១៣, ៣៣) ពាក្យបន្ទូលរបស់ទ្រង់នេះធ្វើឲ្យយើងនឹកដល់ទំនាយនៅលោកុប្បត្តិ ៣:១៥។
១២, ១៣. (ក) តើតាមរបៀបណាដែលពួកសង្គ្រាជនិងពួកអាចារ្យសំដែងឲ្យឃើញថា អ្នកណាជាឪពុកខាងវិញ្ញាណរបស់គេនោះ? (ខ) តើពួកណាដែលបានចូលរួមជាមួយគេ? (គ) ក្នុងការសំរេចទំនាយលោកុប្បត្តិ ៣:១៥ តើពូជរបស់ស្ត្រីត្រូវបានចឹកកែងជើងយ៉ាងណា?
១២ ក្រោយពីបានឮពាក្យបន្ទូលរបស់ព្រះយេស៊ូហើយ តើពួកគេមានចិត្តនឹកស្ដាយ ហើយទូលអង្វរសុំសេចក្ដីមេត្ដាពីព្រះទេ? តើគេបានប្រែចិត្តពីអំពើអាក្រក់ជួជាតិរបស់គេទេ? អត់ទេ! ដ្បិតម៉ាកុស ១៤:១ រាយការណ៍ថា នៅថ្ងៃស្អែកឡើង គឺនៅឯទីប្រជុំមួយនៅក្នុងទីធ្លារបស់មេសង្គ្រាជ «ពួកសង្គ្រាជ និងពួកអាចារ្យ គេរកឱកាសនឹងចាប់ទ្រង់ ដោយឧបាយកល ដើម្បីនឹងសំឡាប់ទ្រង់ចោល»។ ពួកគេបន្តសំដែងចរិតកាចសាហាវរបស់សាតាំង ដែលព្រះយេស៊ូបានមានបន្ទូលប្រាប់ពីមុនថាវាជាអ្នកសំឡាប់គេ។ (យ៉ូហាន ៨:៤៤) មិនយូរប៉ុន្មាន យូដាស អ៊ីស្ការីយ៉ុត បានចូលរួមជាមួយពួកគេ ដែលសាតាំងបានទាញឲ្យទៅជាអ្នកក្បត់ជំនឿ។ យូដាសបានបោះបង់ចោលពូជដែលគ្មានទោសនៃស្ត្រីរបស់ព្រះ ហើយបានចូលរួមជាមួយពូជរបស់ពស់។
១៣ ព្រលឹមនៃថ្ងៃទី១៤ខែណៃសែន សមាជិកនៃតុលាការជាន់ខ្ពស់នៃសាសន៍យូដា បាននាំយកព្រះយេស៊ូជាអ្នកទោសទៅឯចៅហ្វាយខេត្តរ៉ូម៉ាំងម្នាក់។ នៅវេលានោះ ពួកសង្គ្រាជបានដឹកនាំក្នុងការស្រែកឲ្យគេព្យួរទ្រង់។ នៅពេលលោកពីឡាត់សួរថា «តើឲ្យខ្ញុំឆ្កាងស្តេចនៃអ្នករាល់គ្នាឬអី»? ពួកសង្គ្រាជឆ្លើយថា «យើងខ្ញុំមានស្តេចតែសេសារទេ»។ (យ៉ូហាន ១៩:៦, ១៥) គឺច្បាស់ណាស់ ពួកគេបានសំដែងខ្លួនគេគ្រប់បែបយ៉ាងថា គេជាផ្នែកនៃពូជរបស់ពស់។ ប៉ុន្តែ មិនមែនមានតែពួកគេប៉ុណ្ណេះទេ។ ឯកសារមួយនៅម៉ាថាយ ២៧:២៤, ២៥ រាយការណ៍ថា៖ «នោះលោក[ពីឡាត់]យកទឹកមកលាងដៃ នៅមុខហ្វូងមនុស្ស»។ រួចបណ្ដាជនទាំងអស់គ្នានិយាយថា៖ «ចូរឲ្យឈាមវាធ្លាក់មកលើយើងរាល់គ្នា នឹងកូនចៅរបស់យើងចុះ»។ ដូច្នេះ ពួកយូដាជាច្រើននៅជំនាន់នោះបានសំដែងខ្លួនគេជាផ្នែកនៃពូជរបស់ពស់។ មុននឹងថ្ងៃនោះកន្លងផុតទៅ ព្រះយេស៊ូបានផុតព្រះជន្ម។ ដោយប្រើពូជមើលឃើញរបស់វានេះ សាតាំងបានចឹកកែងជើងពូជនៃស្ត្រីរបស់ព្រះ។
១៤. ហេតុអ្វីក៏ការចឹកកែងជើងពូជរបស់ស្ត្រី មិនមានន័យថាសាតាំងឈ្នះ?
១៤ តើសាតាំងបានឈ្នះឬ? មិនបានឈ្នះទេ! ព្រះយេស៊ូគ្រីស្ទបានឈ្នះលោកីយ៍នេះ ហើយក៏មានជ័យជំនះលើពួកមេដឹកនាំរបស់វាដែរ។ (យ៉ូហាន ១៤:៣០, ៣១; ១៦:៣៣) ទ្រង់បានរក្សាភក្ដីភាពចំពោះព្រះយេហូវ៉ារហូតដល់ចូលទិវង្គត។ ការសោយទិវង្គតរបស់ទ្រង់ជាមនុស្សល្អគ្រប់ល័ក្ខណ៍ ផ្ដល់ឲ្យតម្លៃលោះដែលត្រូវការចាំបាច់សំរាប់ទិញមកវិញនូវសិទ្ធិជីវិត ដែលអ័ដាមបានបាត់បង់។ ដូច្នេះ ទ្រង់បើកផ្លូវនៃជីវិតអស់កល្បជានិច្ច ឲ្យអ្នកណាដែលនឹងអនុវត្តជំនឿទៅលើសំវិធានការនោះនិងគោរពតាមច្បាប់របស់ព្រះ។ (ម៉ាថាយ ២០:២៨; យ៉ូហាន ៣:១៦) ព្រះយេហូវ៉ាបានប្រោសព្រះយេស៊ូឲ្យមានព្រះជន្មអមតៈនៅស្ថានសួគ៌។ នៅគ្រាកំណត់របស់ព្រះយេហូវ៉ា ព្រះយេស៊ូនឹងកិនក្បាលសាតាំងឲ្យសាបសូន្យទៅ។ នៅលោកុប្បត្តិ ២២:១៦-១៨ បានទាយថាព្រះយេហូវ៉ានឹងប្រទានព្រះគុណដល់គ្រួសារទាំងអស់នៅផែនដី ដែលខំឆ្លៀតយកប្រយោជន៍ពីពូជស្មោះត្រង់នោះ។
១៥. (ក) បន្ទាប់ពីព្រះយេស៊ូសោយទិវង្គត
១៥ បន្ទាប់ពីព្រះយេស៊ូសោយទិវង្គត ពួកគ្រីស្ទានចាក់ប្រេងតាំងបានបន្តលាតត្រដាងពូជរបស់ពស់ ដូចព្រះអម្ចាស់បានធ្វើមកដែរ។ ដឹកនាំដោយព្រះវិញ្ញាណបរិសុទ្ធ សាវ័កប៉ុលបានព្រមានអំពី ‹មនុស្សទទឹងច្បាប់› ដែលនឹងលេចមក«ទាំងធ្វើការ ដូចជាអារក្សសាតាំង»។ (ថែស្សាឡូនីចទី២ ២:៣-១០) ក្រុម«មនុស្ស»នេះសំដែងឲ្យឃើញថាខ្លួនជាគណៈបព្វជិតនៃពិភពគ្រីស្ទសាសនា។ រួចមក ពូជរបស់ពស់នេះបានធ្វើបាបយ៉ាងសាហាវដល់ពួកសិស្សរបស់ព្រះយេស៊ូគ្រីស្ទ។ ក្នុងទំនាយកត់ទុកនៅវិវរណៈ ១២:១៧ សាវ័កយ៉ូហានបង្ហាញថា សាតាំងនឹងបន្តធ្វើចំបាំងទាស់នឹងពួកសំណល់នៃពូជរបស់ស្ត្រីនៃព្រះរហូតមកដល់សម័យយើងនេះ។ ការនេះបានកើតឡើងមែន។ នៅក្នុងប្រទេសជាច្រើន គេបានដាក់បំរាមដល់ស្មរបន្ទាល់ព្រះយេហូវ៉ា វាយតប់ ចាប់ដាក់គុក ឬចាប់យកទៅដាក់ជំរំឃុំឃាំង ដោយព្រោះតែគេគាំទ្រយ៉ាងម៉ឺងម៉ាត់នូវព្រះរាជាណាចក្ររបស់ព្រះនិងផ្លូវសុចរិតរបស់ទ្រង់។
ការលាតត្រដាងពូជរបស់ពស់នៅសម័យទំនើបនេះ
១៦. នៅសម័យទំនើបនេះ តើពួកណាខ្លះត្រូវបានលាតត្រដាងជាផ្នែកនៃពូជរបស់ពស់ ហើយតាមរបៀបណា?
១៦ ក្នុងការយកត្រាប់តាមព្រះយេស៊ូគ្រីស្ទ ពួកគ្រីស្ទានពិតមិនបានបង្អន់ដៃក្នុងការលាតត្រដាងយ៉ាងក្លាហានអំពីពស់និងពូជរបស់វាឡើយ។ នៅឆ្នាំ១៩១៧ និស្សិតព្រះគម្ពីរ ជាឈ្មោះដើមរបស់ស្មរបន្ទាល់ព្រះយេហូវ៉ា បានបោះពុម្ពផ្សាយសៀវភៅការបញ្ចប់សេចក្ដីអាថ៌កំបាំង ដែលនៅក្នុងនោះ ពួកគេបានបើកឲ្យឃើញអំពើពុករលួយរបស់គណៈបព្វជិតនៃពិភពគ្រីស្ទសាសនា។ រួចមកនៅក្នុងឆ្នាំ១៩២៤ គេបានបោះពុម្ពផ្សាយសន្លឹកប័ណ្ណដែលមានចំណងជើង ពួកបព្វជិតបានជាប់ចោទហើយ។ ប័ណ្ណនេះត្រូវបានគេចែកចាយក្នុងអន្តរជាតិអស់ហាសិបលានសន្លឹក។ ក្នុងឆ្នាំ១៩៣៧ លោកជេ. អេហ្វ. រ៉ូធើហ្វឹត ជាប្រធានសមាគមប៉មយាម បានថ្លែងសុន្ទរកថាដែលមានចំណងជើង «ការលាតត្រដាង» និង «សាសនានិងសាសនាគ្រីស្ទាន» ជាការលាតត្រដាងយ៉ាងខ្លាំងអំពីពូជរបស់សាតាំង។ ប៉ុន្មានឆ្នាំក្រោយមក លោកបានថ្លែងសុន្ទរកថា«ប្រឈមមុខនឹងការពិត» តាមរយៈទូរស័ព្ទវិទ្យុពីក្រុងឡុនដុន ប្រទេសអង់គ្លេស ទៅអ្នកស្ដាប់នៅ៥០ទីមហាសន្និបាតនៅប្រទេសផ្សេងៗ។ មួយខែក្រោយមក បណ្ដាញវិទ្យុធំមួយក្នុងសហរដ្ឋអាមេរិកបានឃោសនាសុន្ទរកថា«កលាបនិយម ឬ សេរីភាព»។ បន្ថែមទៅលើការលាតត្រដាងដ៏ខ្លាំងនេះទៀត មានសៀវភៅដូចជា សត្រូវ និង សាសនា ហើយកូនសៀវភៅឈ្មោះការបើកឲ្យឃើញ។ ដោយស្របទៅតាមអ្វីៗដែលបានបោះពុម្ពផ្សាយតាំងពីទសវត្សនៃឆ្នាំ១៩២០ សៀវភៅវិវរណៈ—កំពូលអស្ចារ្យជិតមកដល់ហើយ!a ឥឡូវនេះផ្សាយចេញជា៦៥ភាសា បង្ហាញប្រាប់អំពីពួកមេដឹកនាំខាងនយោបាយដ៏ពុករលួយ និងពួកឈ្មួញគ្មានវិន័យដ៏លោភលន់ ជាសមាជិកធំដុំនៃពូជមើលឃើញរបស់ពស់។ កាលណាពួកមេដឹកនាំខាងនយោបាយប្រើមធ្យោបាយភូតភរដើម្បីបញ្ឆោតប្រជារាស្ត្ររបស់គេ មិនចេះគោរពដល់ពិសិដ្ឋភាពនៃឈាម ហើយជិះជាន់ពួកអ្នកបំរើព្រះយេហូវ៉ា (បង្ហាញការស្អប់ដល់ពូជរបស់ស្ត្រីនៃព្រះ) ពួកគេច្បាស់ជាបង្ហាញថាខ្លួនគេជាផ្នែកនៃពូជរបស់ពស់។ យ៉ាងដូច្នេះដែរចំពោះពួកឈ្មួញ ដែលគ្មានរអែងដល់មនសិការ ដែលនិយាយភូតភរដើម្បីឲ្យបានចំណេញ ហើយផលិតផល ឬ លក់ផលដែលធ្វើឲ្យកើតរោគ។
១៧. តើទ្វារឱកាសអ្វីដែលនៅបើកចំហឲ្យពួកធំដុំដែលចេញពីប្រព័ន្ធនៃលោកីយ៍នេះ?
១៧ មិនមែនគ្រប់ៗគ្នាដែលទាក់ទងក្នុងសាសនាលោកីយ៍ នយោបាយ ឬជំនួញ នឹងបន្តធ្វើជាផ្នែកនៃពូជរបស់ពស់ឡើយ។ ពួកមនុស្សទាំងនេះខ្លះនឹងសរសើរដល់ស្មរបន្ទាល់ព្រះយេហូវ៉ា។ ពួកគេប្រើអំណាចរបស់គេដើម្បីជួយពួកស្មរបន្ទាល់ ហើយដល់ក្រោយមក ថែមទាំងទទួលយកការថ្វាយបង្គំពិត។ (ប្រៀបធៀប កិច្ចការ ១៣:៧, ១២; ១៧:៣២-៣៤) សេចក្ដីអំពាវនាវនេះត្រូវបានសំដែងដល់មនុស្សបែបនេះថា៖ «ដូច្នេះឱពួកមហាក្សត្រទាំងប៉ុន្មានអើយ ចូរប្រព្រឹត្តដោយប្រាជ្ញាចុះ ឱពួកអស់ទាំងចៅក្រមនៅផែនដីអើយ ចូរទទួលសេចក្ដីផ្ចាលចុះ ចូរគោរពដល់ព្រះយេហូវ៉ា ដោយកោតខ្លាច ហើយមានសេចក្ដីអំណរ ដោយញ័ររន្ធត់ ចូរថើបព្រះរាជបុត្រា ក្រែងទ្រង់ខ្ញាល់ឡើង ហើយឯងរាល់គ្នាត្រូវវិនាសតាមផ្លូវ ដ្បិតបន្ដិចទៀត សេចក្ដីខ្ញាល់របស់ទ្រង់នឹងឆួលឡើង មានពរហើយ អស់អ្នកណាដែលយកទ្រង់ជាទីពឹងជ្រក»។ (ទំនុកដំកើង ២:១០-១២) ពិតមែនហើយ ចំពោះអស់អ្នកដែលចង់បានព្រះគុណរបស់ព្រះយេហូវ៉ា ចូរចាត់វិធានការឥឡូវនេះភ្លាម មុននឹងចៅក្រមនៃស្ថានសួគ៌បិទទ្វារឱកាសនេះ!
១៨. ថ្វីបើពួកគេមិនមែនជាផ្នែកនៃពូជរបស់ស្ត្រី តើពួកថ្វាយបង្គំព្រះយេហូវ៉ានេះជាពួកណា?
១៨ មានតែពួកអ្នកដែលនឹងគ្រងរាជ្យនៅស្ថានសួគ៌ទេដែលជាផ្នែកនៃពូជរបស់ស្ត្រី។ ពួកនេះមានចំនួនតិចទៅៗ។ (វិវរណៈ ៧:៤, ៩) ក៏ប៉ុន្តែ មានពួកឯទៀតដែលជាហ្វូងធំ ត្រូវហើយ ពួកគេមានគ្នារាប់លាននាក់ ដែលជាអ្នកថ្វាយបង្គំព្រះយេហូវ៉ា ពួកគេរង់ចាំទទួលជីវិតអស់កល្បជានិច្ចនៅផែនដីមនោរម្យ។ ដោយពាក្យសំដីនិងអំពើរបស់គេ ពួកគេនិយាយទៅពួកចាក់ប្រេងតាំងរបស់ព្រះយេហូវ៉ាថា៖ «យើងខ្ញុំនឹងទៅជាមួយនឹងអ្នកដែរ ពីព្រោះយើងខ្ញុំបានឮថា ព្រះទ្រង់គង់ជាមួយនឹងអ្នករាល់គ្នា»។—សាការី ៨:២៣
១៩. (ក) តើមនុស្សគ្រប់ៗគ្នាត្រូវតែសំរេចចិត្តយ៉ាងណា? (ខ) តើការអំពាវនាវឲ្យចាត់វិធានការដោយប្រាជ្ញាកាលដែលនៅមានឱកាស នោះសំដៅទៅពួកណា?
១៩ ឥឡូវនេះហើយជាគ្រាដែលមនុស្សគ្រប់គ្នាត្រូវតែសំរេចចិត្ត។ តើពួកគេចង់ថ្វាយបង្គំព្រះយេហូវ៉ា ហើយលើកដំកើងអធិបតេយ្យភាពរបស់ទ្រង់ទេ ឬ តើពួកគេបណ្ដោយឲ្យសាតាំងធ្វើជាមេដឹកនាំរបស់គេ ដោយធ្វើតាមអ្វីៗដែលគាប់ចិត្តវា? មនុស្សជាងប្រាំលាននាក់មកពីគ្រប់សាសន៍បានចូលទៅខាងព្រះយេហូវ៉ាជាមួយពួកសំណល់នៃពូជរបស់ស្ត្រី នៃពួកគ្រងរាជ្យ។ មានមនុស្សប្រាំបីលាននាក់ទៀត ដែលមានចំណូលចិត្ត ពួកគេកំពុងតែសិក្សាជាមួយពួកស្មរបន្ទាល់ ឬមកប្រជុំរបស់គេ។ ស្មរបន្ទាល់ព្រះយេហូវ៉ាសូមជំរាបដល់មនុស្សទាំងនេះថា៖ ទ្វារឱកាសនៅបើកចំហនៅឡើយ។ ចូរចូលទៅខាងព្រះយេហូវ៉ាទាំងស្រុង។ ចូរទទួលស្គាល់ថាព្រះយេស៊ូគ្រីស្ទជាពូជសន្យា។ ចូរចូលរួបរួមយ៉ាងសប្បាយរីករាយជាមួយអង្គការមើលឃើញរបស់ព្រះយេហូវ៉ា។ សូមឲ្យអ្នកទទួលពរគ្រប់បែបយ៉ាង ដែលទ្រង់នឹងប្រទានមកតាមរយៈរាជ្យរបស់ស្តេច យេស៊ូគ្រីស្ទ។
[កំណត់សម្គាល់]
a បោះពុម្ពដោយសមាគមប៉មយាមខាងព្រះគម្ពីរនិងខិតប័ណ្ណនៃរដ្ឋញូវយ៉ក
តើអ្នកនៅចាំទេ?
◻ តើពស់ជាអ្នកណាក្នុងលោកុប្បត្តិ ៣:១៥ ហើយស្ត្រីជាអ្នកណា?
◻ តើពូជរបស់ពស់មានលក្ខណៈអ្វីខ្លះ?
◻ តើតាមរបៀបណាដែលព្រះយេស៊ូលាតត្រដាងពូជរបស់ពស់?
◻ នៅសម័យទំនើបនេះ តើពួកអ្នកណាខ្លះដែលត្រូវបានលាតត្រដាងជាផ្នែកនៃពូជរបស់ពស់?
◻ តើត្រូវចាត់វិធានការជាបន្ទាន់យ៉ាងណា ដើម្បីកុំឲ្យគេច្រឡំថាអ្នកជាផ្នែកនៃពូជរបស់ពស់?
តើទ្រង់បានសំគាល់ពួកណាខ្លះ ជាផ្នែកនៃពូជរបស់ពស់ ហើយហេតុអ្វី?
តើពួកសិស្សរបស់ទ្រង់បានបន្តលាតត្រដាងពូជរបស់ពស់យ៉ាងណាខ្លះ? (ខ) តើពូជរបស់ពស់បានបញ្ចេញការស្អប់យ៉ាងណាទៀតមកដល់សម័យយើងនេះ?
[រូបភាពនៅទំព័រ៩]
ព្រះយេស៊ូបានលាតត្រដាងពួកមេដឹកនាំសាសនាដ៏លាក់ពុត ជាផ្នែកនៃពូជរបស់ពស់