ពរឬក៏សេចក្ដីបណ្ដាសា—មានការជ្រើសរើស!
«អញបានដាក់សំញែងទាំងជីវិត នឹងសេចក្ដីស្លាប់ ទាំងព្រះពរ នឹងសេចក្ដីបណ្ដាសា នៅមុខឯងរាល់គ្នា ដូច្នេះចូររើសយកជីវិតចុះ ដើម្បីឲ្យឯងបានរស់នៅ»។—ចោទិយកថា ៣០:១៩
១. តើមនុស្សត្រូវបានផ្ដល់នូវសមត្ថភាពអ្វី?
ព្រះយេហូវ៉ាបានបង្កើតយើង—មនុស្សដ៏មានប្រាជ្ញារបស់ទ្រង់—ឲ្យជាបុគ្គលដែលមានសេរីភាពខាងសីលធម៌។ ព្រះមិនបានបង្កើតយើងមកឲ្យដូចជាម៉ាស៊ីន ឬរូបយន្តនោះឡើយ ប៉ុន្តែបានប្រទានឯកសិទ្ធិនិងភារៈកិច្ចនៃការជ្រើសរើស។ (ទំនុកដំកើង ១០០:៣) មនុស្សដំបូង—អ័ដាមនិងអេវ៉ា—មានសេរីភាពក្នុងការជ្រើសរើសយកផ្លូវរបស់គេ ហើយពួកគេទទួលក៏ការខុសត្រូវដល់ព្រះចំពោះការជ្រើសរើសរបស់គេដែរ។
២. តើការជ្រើសរើសអ្វីដែលអ័ដាមបានធ្វើ ហើយមានលទ្ធផលយ៉ាងណា?
២ ព្រះអាទិទេពបានប្រទានពរអចិន្ត្រៃយ៍យ៉ាងបរិបូរសំរាប់ជីវិតមនុស្សនៅលើផែនដីមនោរម្យ។ ហេតុអ្វីក៏គោលបំណងនេះមិនទាន់បានសម្រេចដូច្នេះ? នេះគឺពីព្រោះអ័ដាមបានជ្រើសរើសខុស។ ព្រះយេហូវ៉ាបានដាក់បញ្ជានេះមកលើបុរសថា៖ «ឯងនឹងស៊ីផ្លែឈើទាំងអស់ក្នុងសួនច្បារនេះបានតាមចិត្ត តែឯត្រង់ដើមដឹងខុសត្រូវ នោះមិនត្រូវឲ្យឯងស៊ីផលឡើយដ្បិតនៅថ្ងៃណាដែលឯងស៊ី នោះនឹងត្រូវស្លាប់ជាមិនខាន»។ (លោកុប្បត្តិ ២:១៦, ១៧) បើសិនជាអ័ដាមបានសម្រេចចិត្តគោរពតាម នោះមាតាបិតាដំបូងរបស់យើងនឹងបានពរជាមិនខាន។ ការមិនគោរពតាមបាននាំឲ្យមានសេចក្ដីស្លាប់។ (លោកុប្បត្តិ ៣:៦, ១៨, ១៩) ដូច្នេះ អំពើបាបនិងសេចក្ដីស្លាប់ក៏បានឆ្លងរាលដាលដល់កូនចៅរបស់អ័ដាមទាំងអស់ដែរ។—រ៉ូម ៥:១២
ការអាចទទួលពរបាន
៣. តើតាមរបៀបណាដែលព្រះធានារ៉ាប់រងថា គោលបំណងរបស់ទ្រង់សំរាប់មនុស្សលោកនឹងបានសម្រេច?
៣ ព្រះយេហូវ៉ាបានស្ថាបនាមធ្យោបាយមួយ ដែលនឹងធ្វើឲ្យគោលបំណងរបស់ទ្រង់ក្នុងការប្រទានពរមនុស្សលោកបានសម្រេចនៅពេលក្រោយមក។ ទ្រង់បានទាយប្រាប់អំពីពូជមួយ ដោយមានបន្ទូលក្នុងសួនអេដែនថា៖ «អញនឹងធ្វើឲ្យឯងហើយនឹងស្ត្រី គឺទាំងពូជឯងនឹងពូជនាងមានសេចក្ដីខ្មាំងនឹងគ្នា ពូជនាងនឹងកិនក្បាលឯង ហើយឯងនឹងចឹកកែងជើងគេ»។ (លោកុប្បត្តិ ៣:១៥) ក្រោយមក ព្រះបានសន្យាថា មនុស្សដែលគោរពតាមព្រះនឹងទទួលពរ តាមរយៈពូជនេះ ដែលជាកូនចៅនៃលោកអ័ប្រាហាំ។—លោកុប្បត្តិ ២២:១៥-១៨
៤. តើព្រះយេហូវ៉ាបានធ្វើការរៀបចំអ្វីក្នុងការប្រទានពរដល់មនុស្សលោក?
៤ ពូជដែលបានសន្យាមកនេះ បានសម្ដែងឲ្យឃើញថាជាព្រះយេស៊ូគ្រីស្ទ។ ចំពោះមុខនាទីរបស់ព្រះយេស៊ូក្នុងការរៀបចំរបស់ព្រះយេហូវ៉ា សំរាប់ប្រទានពរដល់មនុស្សលោក សាវ័កប៉ុលបានសរសេរថា៖ «តែឯព្រះ ទ្រង់សំដែងសេចក្ដីស្រឡាញ់របស់ទ្រង់ដល់យើងរាល់គ្នាឲ្យឃើញច្បាស់ ដោយព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង»។ (រ៉ូម ៥:៨) ពួកមនុស្សលោកមានបាបដែលបានគោរពតាមព្រះ ហើយបានជឿក្នុងយញ្ញបូជាលោះរបស់ព្រះយេស៊ូគ្រីស្ទ នឹងទទួលបានពរជាច្រើន។ (កិច្ចការ ៤:១២) តើអ្នកនឹងជ្រើសរើសយកការគោរពតាមនិងពរទេ? ការមិនគោរពតាមនឹងទទួលអ្វីខុសស្រឡះ។
ចុះយ៉ាងណាវិញចំពោះសេចក្ដីបណ្ដាសា?
៥. តើអ្វីជាអត្ថន័យនៃពាក្យ«សេចក្ដីបណ្ដាសា»?
៥ ពាក្យផ្ទុយនឹងពរគឺសេចក្ដីបណ្ដាសា។ «សេចក្ដីបណ្ដាសា»មានន័យថា ការនិយាយអាក្រក់អំពីអ្នកណាម្នាក់ ឬកាត់ទោសអាក្រក់នឹងគាត់។ ពាក្យហេព្រើរ qela·lahʹ ដែលចេញពីពាក្យដើម qa·lalʹ ន័យចំៗគឺ«ឲ្យបានភ្លឺ»។ ប៉ុន្តែ នៅពេលដែលយកពាក្យនេះមកប្រើជាប្រៀបប្រដូច នេះមានន័យថា‹ការនិយាយបង្អាប់› ឬក៏‹ការប្រព្រឹត្តមើលងាយ›។—លេវីវិន័យ ២០:៩; សាំយូអែលទី២ ១៩:៤៣
៦. តើព្រឹត្ដិការណ៍អ្វីដែលកើតឡើងដល់អេលីសេនៅជិតក្រុងបេត-អែលពីដើម?
៦ សូមពិចារណាមើលគំរូដ៏អស្ចារ្យមួយ នៃការចាត់វិធានការភ្លាមដែលទាក់ទងសេចក្ដីបណ្ដាសាមួយ។ នេះបានកើតឡើងកាលដែលព្យាការីរបស់ព្រះ ឈ្មោះ អេលីសេ កំពុងតែដើរពីក្រុងយេរីខូរទៅក្រុងបេត-អែល។ ដំណើររឿងនេះបានចែងប្រាប់ថា៖ «កាលលោកកំពុងតែឡើងតាមផ្លូវទៅ នោះមានពួកក្មេងជំទង់ប្រុសៗ ចេញពីទីក្រុងមក ពោលមើលងាយដល់លោក៖ ‹អាទំពែកអើយ ចូរឡើងទៅចុះ! អាទំពែកអើយ ចូរឡើងទៅចុះ›! លោកក៏បែរមើលមកក្រោយឃើញ ហើយដាក់បណ្ដាសាដល់វា ដោយនូវព្រះនាមព្រះយេហូវ៉ា ស្រាប់តែមានខ្លាឃ្មុំញី២ចេញពីព្រៃមក ហែកក្មេងទាំងនោះ អស់៤២នាក់ទៅ»។ (ពង្សាវតារក្សត្រទី២ ២:២៣, ២៤) ចំពោះពាក្យដែលលោកអេលីសេបានដាក់បណ្ដាសាដល់កូនក្មេងដែលមើលងាយលោក នោះគឺមិនបានលាតត្រដាងឲ្យដឹងទេ។ ប៉ុន្តែ ការកាត់ទោសដោយពាក្យសំដីនោះគឺមានប្រសិទ្ធិភាព ពីព្រោះត្រូវបានធ្វើឡើងក្នុងព្រះនាមព្រះយេហូវ៉ាដោយព្យាការីរបស់ព្រះ ដែលធ្វើតាមបំណងព្រះហឫទ័យរបស់ទ្រង់។
៧. តើអ្វីដែលបានកើតឡើងដល់កូនក្មេងដែលសើចចំអកដាក់អេលីសេ ហើយហេតុអ្វី?
៧ មូលហេតុដ៏ធំមួយចំពោះការសើចចំអកមើលងាយ គឺប្រហែលជាពីព្រោះអេលីសេបានយកក្រមារបស់លោកអេលីយ៉ាមកពាក់ ហើយពួកក្មេងទាំងនេះមិនចង់បានព្យាការីបែបនោះទេ។ (ពង្សាវតារក្សត្រទី២ ២:១៣) ដើម្បីឆ្លើយតបនឹងការប្រកួតថាលោកមានតំណែងបន្ទាប់ពីអេលីយ៉ា ហើយដើម្បីបង្រៀនពួកក្មេងទាំងនោះនិងឪពុកម្ដាយរបស់គេ ឲ្យចេះគោរពដ៏ត្រឹមត្រូវដល់ព្យាការីរបស់ព្រះយេហូវ៉ា លោកអេលីសេបានដាក់បណ្ដាសាដល់ពួកសើចចំអកនោះក្នុងព្រះនាមនៃព្រះរបស់លោកអេលីយ៉ា។ ព្រះយេហូវ៉ាសម្ដែងការយល់ព្រមនឹងលោកអេលីសេ ជាព្យាការីរបស់ទ្រង់ ដោយឲ្យខ្លាឃ្មុំពីរចេញពីព្រៃ ហែកអស់ក្មេងដែលបានសើចចំអក៤២នាក់។ ព្រះយេហូវ៉ាបានចាត់វិធានការដោយមិនរួញរា ពីព្រោះពួកគេគ្មានការគោរពសោះឡើយដល់ផ្លូវគមនាគមន៍ដែលទ្រង់បានប្រើនៅលើផែនដីនៅគ្រានោះ។
៨. តើប្រជាជនអ៊ីស្រាអែលសុខចិត្តធ្វើអ្វី ហើយនឹងសង្ឃឹមបានអ្វី?
៨ ជាច្រើនឆ្នាំមុននេះ ពួកអ៊ីស្រាអែលក៏បានបង្ហាញការមិនចេះគោរពចំពោះការរៀបចំរបស់ព្រះដែរ។ រឿងនេះបានកើតឡើងដូច្នេះថា៖ ក្នុងឆ្នាំ១៥១៣ម.ស.យ. ព្រះយេហូវ៉ាបានសម្ដែងការអនុគ្រោះដល់ប្រជាជនអ៊ីស្រាអែល ដោយរំដោះពួកគេចេញពីការឃុំឃាំងនៃពួកអេស៊ីប ហាក់បីដូចជា«លើស្លាបឥន្ទ្រី»។ មិនយូរប៉ុន្មានក្រោយមក ពួកគេបានសន្យានឹងគោរពតាមព្រះ។ ចូរកត់សម្គាល់នូវរបៀបដែលការគោរពតាមទាក់ទងនឹងការទទួលការយល់ព្រមពីព្រះ។ ព្រះយេហូវ៉ាបានមានបន្ទូលទៅលោកម៉ូសេថា៖ «ដូច្នេះបើឯងរាល់គ្នានឹងស្ដាប់តាមអញឥឡូវ ហើយកាត់តាមសេចក្ដីសញ្ញារបស់អញ នោះឯងរាល់គ្នានឹងបានដាច់ជារបស់ផងអញ លើសជាងអស់ទាំងសាសន៍ ដ្បិតផែនដីទាំងមូលជារបស់ផងអញ»។ ក្រោយមក ប្រជាជនបានតបឆ្លើយដោយម៉ឺងម៉ាត់ថា៖ «យើងខ្ញុំរាល់គ្នានឹងធ្វើតាមគ្រប់សេចក្ដី ដែលព្រះយេហូវ៉ាទ្រង់មានបន្ទូលមក»។ (និក្ខមនំ ១៩:៤, ៥, ៨; ២៤:៣) ពួកអ៊ីស្រាអែលបានអះអាងថាគេស្រឡាញ់ព្រះយេហូវ៉ា ដែលបានថ្វាយខ្លួនទៅទ្រង់ ហើយបានស្បថថានឹងគោរពតាមទ្រង់។ ការធ្វើដូច្នេះនឹងមានការប្រទានពរជាច្រើន។
៩, ១០. កាលដែលម៉ូសេនៅលើភ្នំស៊ីណាយ តើពួកអ៊ីស្រាអែលធ្វើអ្វី ហើយមានកម្មផលអ្វី?
៩ មុននឹងគោលការណ៍នៃកិច្ចព្រមព្រៀងនេះបានឆ្លាក់លើថ្ម ដោយ‹អង្គុលីព្រះហស្ត› គឺត្រូវតែមានសេចក្ដីបណ្ដាសាពីព្រះជាចាំបាច់។ (និក្ខមនំ ៣១:១៨) ហេតុអ្វីក៏សមនឹងទទួលលទ្ធផលអាក្រក់ដូច្នេះ? តើពួកអ៊ីស្រាអែលមិនបានសុខចិត្តនឹងធ្វើតាមអ្វីៗដែលព្រះយេហូវ៉ាមានបន្ទូលទេឬ? ត្រូវហើយ តាមពាក្យសំដី គេចង់បានពរ ប៉ុន្តែតាមសកម្មភាព ពួកគេបានជ្រើសរើសយកផ្លូវដែលសមទទួលនឹងសេចក្ដីបណ្ដាសា។
១០ ក្នុងកំឡុង៤០ថ្ងៃ នៅពេលដែលម៉ូសេនៅលើភ្នំស៊ីណាយដើម្បីទទួលក្រិត្យទាំងដប់ប្រការ ពួកអ៊ីស្រាអែលមិនបានចាំនឹងពាក្យសន្យាដើមរបស់គេនៃភក្ដីភាពចំពោះព្រះយេហូវ៉ាទេ។ ដំណើររឿងចែងថា៖ «កាលបណ្ដាជនទាំងឡាយបានឃើញថា ម៉ូសេក្រចុះមកពីលើភ្នំវិញដូច្នេះ នោះគេប្រជុំគ្នាទៅឯអើរ៉ុនជំរាបថា៖ ‹សូមលោកធ្វើព្រះសំរាប់យើងរាល់គ្នា ឲ្យបាននាំមុខយើងផង ដ្បិតឯម៉ូសេ ជាអ្នកដែលនាំយើងចេញពីស្រុកអេស៊ីព្ទមកនោះ យើងរាល់គ្នាមិនដឹងជាលោកមានគ្រោះថ្នាក់អ្វីទេ› »។ (និក្ខមនំ ៣២:១) នេះជាគំរូមួយទៀតនៃអាកប្បកិរិយាដ៏មិនចេះគោរព ដែលបានសម្ដែងចំពោះភ្នាក់ងារមនុស្ស ដែលព្រះយេហូវ៉ាបានប្រើនៅគ្រានោះ ដើម្បីដឹកនាំនិងណែនាំប្រជារាស្ត្ររបស់ទ្រង់។ ពួកអ៊ីស្រាអែលត្រូវបានល្បួងឲ្យធ្វើតាមសរណវត្ថុបូជារបស់ពួកអេស៊ីប ហើយបានទទួលកម្មផលដ៏ធ្ងន់ នៅពេលដែលមនុស្ស៣.០០០នាក់ត្រូវបានសម្លាប់ចោលដោយដាវក្នុងមួយថ្ងៃ។—និក្ខមនំ ៣២:២-៦, ២៥-២៩
ការប្រកាសពរនិងសេចក្ដីបណ្ដាសា
១១. តើសេចក្ដីបង្គាប់អ្វីចំពោះពរនិងសេចក្ដីបណ្ដាសាដែលយ៉ូស្វេបានធ្វើ?
១១ មកដល់ចុងបញ្ចប់នៃការធ្វើដំណើរ៤០ឆ្នាំក្នុងទីរហោស្ថានរបស់ពួកអ៊ីស្រាអែល ម៉ូសេបានរៀបរាប់អំពីពរដែលគេនឹងទទួល បើជ្រើសរើសផ្លូវនៃការគោរពតាមព្រះ។ លោកក៏បានរៀបរាប់អំពីសេចក្ដីបណ្ដាសាដែរ ដែលពួកអ៊ីស្រាអែលនឹងពិសោធបើសិនជាពួកគេបានជ្រើសរើសមិនគោរពតាមព្រះយេហូវ៉ា។ (ចោទិយកថា ២៧:១១–២៨:១០) មិនយូរប៉ុន្មានក្រោយពីពួកអ៊ីស្រាអែលបានចូលទៅក្នុងស្រុកដែលបានសន្យាមកនោះ យ៉ូស្វេបានទទួលអនុវត្តសេចក្ដីបង្គាប់របស់លោកម៉ូសេ ដែលទាក់ទងនឹងពរហើយសេចក្ដីបណ្ដាសា។ កុលសម្ព័ន្ធប្រាំមួយបានឈរនៅជើងភ្នំអេបាល ហើយកុលសម្ព័ន្ធប្រាំមួយទៀតបានឈរនៅពីមុខភ្នំកេរិស៊ីម។ ពួកលេវីបានឈរនៅកណ្ដាល។ តាមមើលទៅ កុលសម្ព័ន្ធដែលបានឈរនៅពីមុខភ្នំអេបាល បានតបឆ្លើយថា៖ «អាម៉ែន»! ដល់សេចក្ដីបណ្ដា ដែលបានអានសំដៅទៅពួកគេ។ ពួកអ្នកឯទៀតបានតបឆ្លើយនឹងពរដែលពួកលេវីបានអានដល់ពួកគេ ដែលឈរនៅជើងភ្នំកេរិស៊ីម។—យ៉ូស្វេ ៨:៣០-៣៥
១២. តើសេចក្ដីបណ្ដាសាអ្វីខ្លះដែលពួកលេវីបានប្រកាស?
១២ សូមគិតថាអ្នកកំពុងតែឮពួកលេវីថ្លែងថា៖ «ត្រូវបណ្ដាសាហើយ អ្នកណាដែលឆ្លាក់ ឬសិតធ្វើរូប ដែលជាទីស្អប់ខ្ពើមដល់ព្រះយេហូវ៉ា គឺជារបស់ដែលដៃជាងធ្វើ រួចយកទៅដាក់នៅទីសំងាត់។ . . . ត្រូវបណ្ដាសាហើយ អ្នកណាដែលមើលងាយដល់ឪពុកម្ដាយខ្លួន។ . . . ត្រូវបណ្ដាសាហើយ អ្នកណាដែលបន្ថយគោលចារឹករបស់អ្នកជិតខាងខ្លួន។ . . . ត្រូវបណ្ដាសាហើយ អ្នកណាដែលធ្វើឲ្យមនុស្សខ្វាក់វង្វេងចេញពីផ្លូវទៅ។ . . . ត្រូវបណ្ដាសាហើយ អ្នកណាដែលបង្វែរសេចក្ដីយុត្ដិធម៌ពីអ្នកដទៃ នឹងកូនកំព្រា ហើយនឹងស្រីមេម៉ាយ។ . . . ត្រូវបណ្ដាសាហើយ អ្នកណាដែលរួមដំណេកនឹងប្រពន្ធរបស់ឪពុកខ្លួន ដ្បិតអ្នកនោះបានបើកសំលៀករបស់ឪពុកហើយ។ . . . ត្រូវបណ្ដាសាហើយ អ្នកណាដែលរួមសង្វាសនឹងសត្វណាមួយ។ . . . ត្រូវបណ្ដាសាហើយ អ្នកណាដែលរួមដំណេកនឹងបងឬប្អូនស្រី ជាកូនរបស់ឪពុកឬម្ដាយតែមួយ។ . . . ត្រូវបណ្ដាសាហើយ អ្នកណាដែលរួមដំណេកនឹងម្ដាយក្មេងរបស់ខ្លួន។ . . . ត្រូវបណ្ដាហើយ អ្នកណាដែលវាយអ្នកជិតខាងខ្លួនដោយសំងាត់។ . . . ត្រូវបណ្ដាសាហើយ អ្នកណាដែលស៊ីសំណូកដើម្បីនឹងសំឡាប់មនុស្សណាដែលឥតទោស។ . . . ត្រូវបណ្ដាសាហើយ អ្នកណាដែលមិនយកចិត្តទុកដាក់នឹងអស់ទាំងពាក្យក្នុងក្រិត្យវិន័យនេះ ព្រមទាំងប្រព្រឹត្តតាមផង»។ ក្រោយពីសេចក្ដីបណ្ដាសានិមួយៗ កុលសម្ព័ន្ធនៅពីមុខភ្នំអេបេលឆ្លើយថា៖ «អាម៉ែន»!—ចោទិយកថា ២៧:១៥-២៦
១៣. តាមពាក្យរបស់អ្នក តើអ្នកមានយោបល់យ៉ាងណាខ្លះចំពោះពរដែលពួកលេវីបានប្រកាស?
១៣ ឥឡូវនេះ សូមគិតថាអ្នកកំពុងតែឮពួកអ្នកដែលបានឈរនៅពីមុខភ្នំកេរិស៊ីម ឆ្លើយយ៉ាងឮដល់ពរនិមួយៗ កាលដែលពួកលេវីថ្លែងថា៖ «ឯងនឹងមានពរនៅក្នុងក្រុង ហើយនឹងមានពរនៅស្រែចំការដែរ ផលដែលកើតពីពោះឯងមក ព្រមទាំងផលកើតពីដីឯង នឹងផលកើតពីសត្វឯង គឺជាសេចក្ដីចំរើនរបស់គោ នឹងកូនទាំងប៉ុន្មានរបស់ចៀមឯង នោះនឹងមានពរគ្រប់ទាំងអស់។ ឯកំប្រោងនឹងស្បៀងអាហាររបស់ឯង នោះនឹងមានពរដែរ ឯងនឹងមានពរក្នុងកាលដែលឯងចូលមក ហើយនឹងមានពរក្នុងកាលដែលចេញទៅផង»។—ចោទិយកថា ២៨:៣-៦
១៤. តើទៅលើមូលដ្ឋានអ្វីដែលពួកអ៊ីស្រាអែលនឹងបានទទួលពរ?
១៤ តើអ្វីទៅជាមូលដ្ឋាននៃការទទួលពរទាំងនេះ? ដំណើររឿងចែងថា៖ «បើសិនជាខំប្រឹងស្ដាប់ តាមព្រះបន្ទូលនៃព្រះយេហូវ៉ា ជាព្រះនៃឯង ឲ្យអស់ពីចិត្តព្រមទាំងប្រយ័តនឹងប្រព្រឹត្តតាមអស់ទាំងបញ្ញត្តទ្រង់ ដែលអញបង្គាប់ដល់ឯងនៅថ្ងៃនេះ នោះព្រះយេហូវ៉ា ជាព្រះនៃឯង ទ្រង់នឹងលើកឯងឡើងជាខ្ពស់ លើសជាងអស់ទាំងសាសន៍នៅផែនដីទាំងប៉ុន្មាន។ រួចអស់ទាំងពរទាំងនេះនឹងបានផ្សាយមកលើឯង ហើយរត់មករកឯងផង គឺបើឯងនឹងស្ដាប់តាមព្រះបន្ទូលនៃព្រះយេហូវ៉ាជាព្រះនៃឯង»។ (ចោទិយកថា ២៨:១, ២) ត្រូវហើយ កូនសោនៃការទទួលពរពីព្រះ នោះគឺការគោរពតាមព្រះ។ ប៉ុន្តែ ចុះយ៉ាងណាដែរ ចំពោះយើងសព្វថ្ងៃនេះ? តើយើងម្នាក់ៗនឹងជ្រើសរើសយកពរនិងជីវិត ដោយបន្ត‹ស្ដាប់តាមបន្ទូលរបស់ព្រះយេហូវ៉ា›ទេ?—ចោទិយកថា ៣០:១៩, ២០
ការពិនិត្យមើលឲ្យបានដិតដល់
១៥. តើអ្វីជាចំណុចក្នុងពរដែលបានកត់ទុកក្នុងចោទិយកថា ២៨:៣ ហើយតើយើងអាចទទួលប្រយោជន៍ពីនេះយ៉ាងដូចម្ដេច?
១៥ សូមឲ្យយើងពិចារណាមើលពរខ្លះៗដែលពួកអ៊ីស្រាអែលអាចទទួល បើគេគោរពតាមព្រះយេហូវ៉ា។ ជាឧទាហរណ៍ ចោទិយកថា ២៨:៣ ចែងថា៖ «ឯងនឹងមានពរនៅក្នុងក្រុង ហើយនឹងមានពរនៅស្រែចំការដែរ»។ ការទទួលពរពីព្រះមិនមែនអាស្រ័យទៅលើកន្លែងឬកិច្ចការនោះទេ។ បុគ្គលខ្លះប្រហែលជាមានអារម្មណ៍ជាប់អន្ទាក់ក្នុងកាលៈទេសៈរបស់គេ ប្រហែលដោយសារគេរស់នៅក្នុងកន្លែងដែលក្រខ្សត់ឬក្នុងប្រទេសដែលមានសង្គ្រាម។ បុគ្គលឯទៀតប្រហែលជាចង់បំរើព្រះយេហូវ៉ាក្នុងកន្លែងផ្សេងទៀតយ៉ាងខ្លាំង។ បុរសគ្រីស្ទានខ្លះប្រហែលជាបាក់ទឹកចិត្ត ពីព្រោះគេមិនបានតែងតាំងឲ្យធ្វើជាអ្នកងារជំនួយ ឬជាអ្នកចាស់ទុំក្នុងក្រុមជំនុំ។ នៅពេលខ្លះ ស្ត្រីគ្រីស្ទានប្រហែលជាបាក់ទឹកចិត្ត ពីព្រោះពួកគេមិនអាចចូលធ្វើកិច្ចបំរើពេញពេល ជាអ្នកត្រួសត្រាយ ឬជាសាសនទូត។ ប៉ុន្តែ មនុស្សគ្រប់គ្នាដែល‹ស្ដាប់តាមព្រះយេហូវ៉ា ហើយខំប្រឹងធ្វើតាមតម្រូវដែលទ្រង់ចង់ឲ្យយើងធ្វើនោះ› នឹងបានពរនៅឥឡូវនេះ ហើយរហូតអស់កល្បជានិច្ច។
១៦. តើគោលការណ៍នៃចោទិយកថា ២៨:៤ កំពុងតែពិសោធដោយអង្គការរបស់ព្រះយេហូវ៉ាសព្វថ្ងៃនេះយ៉ាងដូចម្ដេច?
១៦ ចោទិយកថា ២៨:៤ ចែងថា៖ «ផលដែលកើតពីពោះឯងមក ព្រមទាំងផលកើតពីដីឯង នឹងកើតពីសត្វឯង គឺជាសេចក្ដីចំរើនរបស់គោ នឹងកូនទាំងប៉ុន្មានរបស់ចៀមឯង នោះនឹងមានពរគ្រប់ទាំងអស់»។ ការប្រើសព្វនាមឯកវចនៈហេព្រើរ បានឲ្យអត្ថន័យ«ឯង» បញ្ជាក់ថានេះជាការពិសោធផ្ទាល់ខ្លួននៃបុគ្គលអ៊ីស្រាអែលដែលស្ដាប់ធ្វើតាម។ ចុះយ៉ាងណាវិញដែរ ចំពោះអ្នកបំរើព្រះយេហូវ៉ាដែលគោរពតាមសព្វថ្ងៃនេះ? ការរីកចំរើនពេញពិភពលោក ហើយការរីកឡើងក្នុងអង្គការរបស់ស្មរបន្ទាល់ព្រះយេហូវ៉ា គឺជាលទ្ធផលនៃការប្រទានពរពីព្រះដល់ការខំខ្នះខ្នែងនៃពួកអ្នកផ្សាយដំណឹងល្អនៃព្រះរាជាណាចក្រជាង៥.០០០.០០០នាក់។ (ម៉ាកុស ១៣:១០) ហើយការរីកចំរើនថែមទៀតគឺឃើញជាក់ស្តែង ពីព្រោះមានមនុស្សជាង១៣.០០០.០០០នាក់ បានមកឯអាហារពេលល្ងាចរបស់ព្រះអម្ចាស់ក្នុងឆ្នាំ១៩៩៥។ តើអ្នកកំពុងតែទទួលពរនៃព្រះរាជាណាចក្រទេ?
ការជ្រើសរើសរបស់ពួកអ៊ីស្រាអែលបានធ្វើឲ្យមានខុសប្លែក
១៧. ជាពរឬក៏ជាសេចក្ដីបណ្ដាសា‹រត់មករក› ស្រេចទៅលើអ្វី?
១៧ ជាលទ្ធផល ពរនឹងរត់មករកពួកអ៊ីស្រាអែលដែលគោរពតាម។ នេះត្រូវបានសន្យាថា៖ «រួចអស់ទាំងពរទាំងនេះនឹងបានផ្សាយមកលើឯង ហើយរត់មករកឯងផង»។ (ចោទិយកថា ២៨:២) ស្រដៀងគ្នានេះ ក៏បានចែងអំពីសេចក្ដីបណ្ដាសាថា៖ «អស់ទាំងសេចក្ដីបណ្ដាសាទាំងនេះ នឹងផ្សាយមកលើឯង ហើយរត់មករកឯងផង»។ (ចោទិយកថា ២៨:១៥) បើសិនអ្នកជាជនអ៊ីស្រាអែលពីដើម តើជាពរឬក៏ជាសេចក្ដីបណ្ដាសា ដែលនឹង‹រត់មករក›អ្នក? នោះគឺស្រេចទៅលើអ្នកបានគោរពព្រះឬអ្នកមិនបានគោរពតាមទ្រង់។
១៨. តើពួកអ៊ីស្រាអែលអាចចៀសវាងសេចក្ដីបណ្ដាសាយ៉ាងដូចម្ដេច?
១៨ នៅចោទិយកថា ២៨:១៥-៦៨ កម្មផលដ៏ឈឺចាប់នៃការមិនគោរពតាម ត្រូវបានរៀបរាប់មកជាសេចក្ដីបណ្ដាសា។ សេចក្ដីបណ្ដាសាទាំងនេះខ្លះជាអ្វីដែលផ្ទុយនឹងពរសំរាប់ជនដែលគោរពតាមព្រះ ដែលបានរៀបរាប់មកក្នុងចោទិយកថា ២៨:៣-១៤។ ប្រជាជនអ៊ីស្រាអែលបានទទួលសេចក្ដីបណ្ដាសាដ៏ធ្ងន់ជារឿយៗ ពីព្រោះពួកគេបានជ្រើសរើសយកការថ្វាយបង្គំព្រះមិនពិត។ (អែសរ៉ា ៩:៧; យេរេមា ៦:៦-៨; ៤៤:២-៦) ជាការគួរឲ្យសោកស្ដាយមែន! កម្មផលបែបនេះគឺអាចចៀសវាងបាន ដោយជ្រើសរើសដ៏ត្រឹមត្រូវ គឺដោយគោរពច្បាប់និងគោលការណ៍ដ៏ត្រឹមត្រូវរបស់ព្រះយេហូវ៉ា ដែលឲ្យអត្ថន័យយ៉ាងច្បាស់លាស់អំពីអ្វីដែលល្អនិងអាក្រក់។ មនុស្សជាច្រើនសព្វថ្ងៃនេះរងទុក្ខការឈឺចាប់និងសោកនាដកម្ម ពីព្រោះពួកគេបានរើសយកការប្រព្រឹត្តដែលផ្ទុយនឹងគោលការណ៍របស់ព្រះគម្ពីរ ដោយកាន់តាមសាសនាមិនពិត ប្រព្រឹត្តអំពើអសីលធម៌ខាងកាម ប្រើគ្រឿងញៀនខុសច្បាប់ ការផឹកស្រាហួសហេតុ និងអ្វីផ្សេងៗទៀត។ ដូចក្នុងអ៊ីស្រាអែលពីសម័យបុរាណនិងក្នុងស្រុកយូដា ការជ្រើសរើសយកដ៏អាក្រក់បែបនេះ នឹងធ្វើឲ្យព្រះមិនសព្វព្រះហឫទ័យ ហើយធ្វើឲ្យមានការឈឺចាប់ដោយមិនចាំបាច់។—អេសាយ ៦៥:១២-១៤
១៩. ចូររៀបរាប់ស្ថានភាព នៅពេលដែលយូដានិងអ៊ីស្រាអែលបានជ្រើសរើសការគោរពតាមព្រះយេហូវ៉ា។
១៩ ពរគឺមានយ៉ាងបរិបូរ ហើយមានភាពស្ងៀមស្ងាត់ នៅពេលណាដែលពួកអ៊ីស្រាអែលបានគោរពតាមព្រះយេហូវ៉ា។ ជាឧទាហរណ៍ ចំពោះសម័យរបស់ស្តេចសាឡូម៉ូន យើងអានថា៖ «ឯពួកយូដា នឹងពួកអ៊ីស្រាអែល គេមានគ្នាសន្ធឹកដូចជាខ្សាច់ដែលនៅមាត់សមុទ្រ ក៏តែងតែបរិភោគ ហើយលេងសប្បាយ . . . ពួកយូដា នឹងពួកអ៊ីស្រាអែលគេនៅដោយសុខសាន្តត្រាណ គ្រប់គ្នានៅក្រោមទ្រើងទំពាំងបាយជូរ ហើយក្រោមដើមល្វារបស់ខ្លួន ចាប់តាំងពីក្រុងដាន់រហូតដល់បៀរ-សេបា ដរាបដល់អស់ព្រះជន្មនៃសាឡូម៉ូន»។ (ពង្សាវតារក្សត្រទី១ ៤:២០-២៥) សូម្បីតែក្នុងសម័យរបស់ស្តេចដាវីឌក៏ដោយ ដែលមានសត្រូវជាច្រើនប្រឆាំងព្រះ សាសន៍នោះមានការគាំទ្រពីព្រះយេហូវ៉ា ហើយទទួលពរនៅពេលដែលពួកគេបានជ្រើសរើសគោរពតាមព្រះនៃសេចក្ដីពិត។—សាំយូអែលទី២ ៧:២៨, ២៩; ៨:១-១៥
២០. តើព្រះទុកចិត្តយ៉ាងណាចំពោះមនុស្សលោក?
២០ តើអ្នកនឹងគោរពតាមព្រះ ឬក៏អ្នកនឹងមិនគោរពតាមទ្រង់? ពួកអ៊ីស្រាអែលមានការជ្រើសរើស។ ថ្វីបើយើងគ្រប់ៗគ្នាមានបាបពីអ័ដាមជាមរតកក៏ដោយ យើងក៏បានទទួលអំណោយនៃការជ្រើសរើសដោយសេរីដែរ។ ថ្វីបើមានសាតាំង លោកីយ៍ដ៏អាក្រក់ជួជាតិនេះ ហើយភាពឥតគ្រប់ល័ក្ខណ៍របស់យើងក៏ដោយ យើងក៏អាចជ្រើសរើសដ៏ត្រឹមត្រូវដែរ។ ម្យ៉ាងទៀត ព្រះអាទិទេពរបស់យើងទុកចិត្តថា ក្នុងការប្រឈមមុខនឹងសេចក្ដីទុក្ខលំបាកនិងការល្បួង គឺនឹងមានអស់អ្នកដែលជ្រើសរើសដ៏ត្រឹមត្រូវ មិនគ្រាន់តែតាមពាក្យសំដីប៉ុណ្ណោះ តែតាមសកម្មភាពរបស់គេ។ (ពេត្រុសទី១ ៥:៨-១០) តើអ្នកនឹងនៅចំណោមពួកគេទេ?
២១. តើនឹងពិចារណាមើលអ្វីក្នុងអត្ថបទជាបន្ទាប់?
២១ ក្នុងអត្ថបទជាបន្ទាប់ យើងនឹងអាចថ្លឹងថ្លែងអាកប្បកិរិយានិងសកម្មភាពរបស់យើងជាមួយនឹងគំរូពីដើម។ សូមឲ្យយើងម្នាក់ៗតបឆ្លើយដោយអំណរគុណដល់បន្ទូលរបស់ព្រះ តាមរយៈលោកម៉ូសេថា៖ «អញបានដាក់សំញែងទាំងជីវិត នឹងសេចក្ដីស្លាប់ ទាំងព្រះពរ នឹងសេចក្ដីបណ្ដាសា នៅមុខឯងរាល់គ្នា ដូច្នេះចូររើសយកជីវិតចុះ ដើម្បីឲ្យឯងបានរស់នៅ»។—ចោទិយកថា ៣០:១៩
តើអ្នកនឹងឆ្លើយយ៉ាងដូចម្ដេច?
◻ តើតាមរបៀបណាដែលព្រះយេហូវ៉ាបានធ្វើឲ្យមានពរដល់មនុស្សមានបាប?
◻ តើអ្វីជាសេចក្ដីបណ្ដាសា?
◻ តើពួកអ៊ីស្រាអែលអាចទទួលពរយ៉ាងដូចម្ដេច ជាជាងសេចក្ដីបណ្ដាសា?
◻ តើអ្វីជាពរដែលអ៊ីស្រាអែលបានទទួលដោយការគោរពតាមព្រះ?
[រូបភាពនៅទំព័រ២២]
ពួកអ៊ីស្រាអែលបានឈរនៅពីមុខភ្នំកេរិស៊ីម និងភ្នំអេបាល
[អ្នកផ្ដល់សិទ្ធិ]
Pictorial Archive (Near Eastern History) Est.