ដួងតារាបង្ហាញពីអំណាចរបស់អ្នកបង្កើត
«ចូរងើយទៅលើមេឃ ហើយរំពៃមើលចុះ! តើនរណាបានបង្កើតផ្កាយទាំងនោះ? គឺព្រះអម្ចាស់ដែលបានហៅហ្វូងតារាទាំងនោះ អោយរះឡើងផ្គុំគ្នាជាកងទ័ព ព្រះអង្គហៅផ្កាយនីមួយៗតាមឈ្មោះរបស់វា។ ដោយសារមហិទ្ធិឫទ្ធិនិងព្រះចេស្ដាដ៏ខ្លាំងពូកែ ឥតមានផ្កាយណាមួយពុំព្រមរះនោះឡើយ»។—អេសាយ ៤០:២៦, ខ.ស.
ព្រះអាទិត្យជាតារាដែលមានទំហំជាមធ្យមប៉ុណ្ណោះ។ យ៉ាងណាក៏ដោយ ព្រះអាទិត្យមានទម្ងន់ធ្ងន់ជាងផែនដីដល់ទៅ៣៣០.០០០ដង! រីឯដួងតារាឯទៀតដែលនៅជិតផែនដី ភាគច្រើនមានទំហំតូចជាងព្រះអាទិត្យ។ ប៉ុន្តែ តារាខ្លះ (ដូចជាតារាដែលគេហៅថាV382 Cygni)មានទម្ងន់ធ្ងន់ជាងព្រះអាទិត្យដល់ទៅ២៧ដងផង!
តើព្រះអាទិត្យបញ្ចេញថាមពលខ្លាំងប៉ុណ្ណា? សូមគិតទៅមើល បើគេបង្កាត់ភ្នក់ភ្លើងឲ្យឆេះសន្ធោសន្ធៅដល់ម្ល៉េះបានជាជះកម្ដៅយ៉ាងឆ្ងាយដល់ទៅ១៥គីឡូម៉ែត្រផង តើភ្លើងនោះត្រូវមានកម្ដៅក្ដៅប៉ុណ្ណា? ឯព្រះអាទិត្យវិញ ដួងតារានោះស្ថិតនៅចម្ងាយប្រមាណជា១៥០លានគីឡូម៉ែត្រពីផែនដី។ ប៉ុន្តែ ពេលថ្ងៃក្ដៅចែងចាំង កម្ដៅនោះក៏អាចធ្វើឲ្យស្បែករលាកផង! គួរឲ្យអស្ចារ្យណាស់ដែលមានប្រមាណតែ១ភាគក្នុង១.០០០លាននៃថាមពលរបស់ព្រះអាទិត្យមកដល់ផែនដី។ យ៉ាងណាក៏ដោយ ថាមពលបន្ដិចបន្តួចនេះនៅតែល្មមគ្រប់គ្រាន់ដើម្បីចិញ្ចឹមជីវិតទាំងឡាយដែលមាននៅលើភពនេះ។
តាមការពិត អ្នកវិទ្យាសាស្ត្រយល់ថា បើមានភពដូចផែនដីចំនួន៣១លានលាន ព្រះអាទិត្យនៅតែបញ្ចេញថាមពលល្មមនឹងចិញ្ចឹមជីវិតនៅលើភពទាំងនោះបាន។ ម្យ៉ាងវិញទៀត យោងទៅតាមព័ត៌មានក្នុងបណ្ដាញអ៊ីនធឺណិត (របស់Space Weather Prediction Center—SWPC) បើគិតពីថាមពលដែលចេញពីព្រះអាទិត្យក្នុងរយៈពេលតែមួយវិនាទីប៉ុណ្ណោះ ថាមពលនោះល្មមនឹងផ្ដល់ឲ្យមាន«ភ្លើងគ្រប់គ្រាន់សម្រាប់៩.០០០.០០០ឆ្នាំ តាមដែលគេប្រើសព្វថ្ងៃ»នៅសហរដ្ឋអាម៉េរិក។
ស្នូលព្រះអាទិត្យបញ្ចេញថាមពលដែលមានលក្ខណៈប្រហាក់ប្រហែលនឹងម៉ាស៊ីនភ្លើងនុយក្លេអ៊ែរដែលបង្កើតភ្លើងដោយបំបែកបរមាណូ។ ព្រះអាទិត្យមានទំហំធំដល់ម្ល៉េះ និងស្នូលក្រាសដល់ម្ល៉េះបានជាច្រើនលានឆ្នាំកន្លងទៅទើបថាមពលក្នុងស្នូលអាចចេញរួច។ យោងទៅតាមព័ត៌មានក្នុងបណ្ដាញអ៊ីនធឺណិតនៅខាងលើ «បើព្រះអាទិត្យឈប់បញ្ចេញថាមពលនៅថ្ងៃនេះ ៥០.០០០.០០០ឆ្នាំទៅមុខទៀតទើបមនុស្សនៅផែនដីចាប់ភ្លឹក!»។
សូមគិតអំពីចំណុចមួយនេះទៀត។ ពេលរាត្រីមេឃស្រឡះ យើងងើយទៅលើឃើញរាប់ពាន់ដួងតារាកំពុងបញ្ចេញថាមពលខ្លាំងឥតគណនា ដូចព្រះអាទិត្យផងដែរ។ រីឯចំនួនតារាក្នុងសកលលោក អ្នកវិទ្យាសាស្ត្រយល់ថាមានដល់ទៅរាប់លានលានឯណោះ!
តើហ្វូងតារាទាំងអម្បាលម៉ានមកពីណា? ទោះជាមិនយល់នូវមូលហេតុក៏ដោយ អ្នកស្រាវជ្រាវភាគច្រើនជឿថា ប្រមាណ១៤លានលានឆ្នាំមុន សកលលោកបានផ្ទុះឡើងក្នុងមួយប៉ប្រិចភ្នែក។ រីឯគម្ពីរវិញ កំណត់ហេតុរៀបរាប់យ៉ាងសង្ខេបថា៖‹កាលដើមដំបូង ព្រះបានបង្កើតផ្ទៃមេឃនឹងផែនដី›។ (លោកុប្បត្តិ ១:១) គឺច្បាស់ហើយថា ព្រះដែលបានបង្កើតដួងតារាទាំងឡាយពោរពេញទៅដោយថាមពល ពិតជាមាន«តេជានុភាព»ឬអំណាច«ដ៏ខ្លាំងក្លា»។—អេសាយ ៤០:២៦
ការប្រព្រឹត្តដែលបង្ហាញពីអំណាចរបស់អ្នកបង្កើត
អស់អ្នកដែលធ្វើតាមឆន្ទៈរបស់ព្រះយេហូវ៉ា បានទ្រទ្រង់ដោយអំណាចរបស់លោកដែលជាអ្នកបង្កើត។ ជាឧទាហរណ៍ លោកប៉ុលបានបង្រៀនអ្នកដទៃអំពីអ្នកបង្កើតយ៉ាងអស់ពីកម្លាំងកាយកម្លាំងចិត្ត។ ណាមួយទៀត ពេលកំពុងធ្វើការល្អនោះ ប៉ុលក៏មានគេបៀតបៀនយ៉ាងខ្លាំងដែរ។ បើគាត់ជាមនុស្សធម្មតាៗដូចយើង ធ្វើដូចម្ដេចឲ្យគាត់សម្រេចការទាំងអស់នោះបាន? ប៉ុលទទួលស្គាល់ថា គាត់មានកម្លាំងដោយសារ«ឥទ្ធិឫទ្ធិដ៏លើសលប់»ដែលមកពីព្រះ។—កូរិនថូសទី២ ៤:៧-៩
រីឯអស់អ្នកដែលបំពានច្បាប់របស់ព្រះយេហូវ៉ាដោយចេតនា ពួកគេបានបំផ្លាញចោលដោយអំណាចរបស់លោកដែលជាអ្នកបង្កើត។ ព្រះយេស៊ូគ្រិស្តបានចង្អុលបញ្ជាក់ពីការបំផ្លាញទីក្រុងសូដុំមនិងក្រុងកូម៉ូរ៉ា ព្រមទាំងសេចក្ដីហិនវិនាសនៅសម័យលោកណូអេដោយទឹកជំនន់ ថាជាការប្រព្រឹត្តដែលបង្ហាញពីអំណាចរបស់ព្រះយេហូវ៉ា។ ព្រះយេស៊ូក៏បានទាយថា មិនយូរប៉ុន្មានទៀតមនុស្សដែលធ្វើអំពើប្រាសចាកគោលការណ៍ក្នុងគម្ពីរ នឹងវិនាសទៅដែរ ទុកជាការប្រព្រឹត្តដែលបង្ហាញពីអំណាចរបស់អ្នកបង្កើត។—ម៉ាថាយ ២៤:៣, ៣៧-៣៩; លូកា ១៧:២៦-៣០
មានអារម្មណ៍យ៉ាងណា?
ពេលគយគន់មើលដួងតារានិងរំពឹងគិតពីអំណាចរបស់អ្នកបង្កើតដែលបង្ហាញតាមរយៈរបស់ដ៏អស្ចារ្យទាំងនេះ យើងប្រហែលជាមានអារម្មណ៍ដូចស្តេចដាវីឌដែលបានលាន់មាត់ថា៖ ‹កាលណាទូលបង្គំពិចារណាមើលផ្ទៃមេឃ ជាការដែលព្រះបានធ្វើ គឺទាំងខែនឹងផ្កាយដែលលោកបានប្រតិស្ឋានទុក នោះតើមនុស្សជាអ្វីដែលព្រះអង្គនឹករឭកដល់គេ ហើយកូនមនុស្សផងដែលលោកប្រោសដូច្នេះ?›។—ទំនុកដំកើង ៨:៣, ៤
ពេលគិតពីទំហំនៃសកលលោកដ៏ធំល្វឹងល្វើយ នេះជួយរំលឹកយើងថា យើងប្រៀបដូចជាកម្ទេចធូលីដីដ៏តូចល្អិត ដល់ម្ល៉េះបានជាគប្បីឲ្យយើងមានចិត្តរាបទាប។ យ៉ាងណាក៏ដោយ អំណាចខ្លាំងក្លារបស់អ្នកបង្កើតមិនគួរបណ្ដាលឲ្យយើងស្លន់ស្លោរហូតដល់ភាន់ស្មារតីឡើយ។ ព្រះយេហូវ៉ាបានបណ្ដាលឲ្យលោកអេសាយដែលជាអ្នកប្រកាសទំនាយ ឲ្យសរសេរពាក្យដ៏គួរឲ្យសម្រាលទុក្ខថា៖ ‹ព្រះរមែងចំរើនកម្លាំងដល់អ្នកដែលល្វើយ ហើយចំណែកអ្នកដែលគ្មានកំឡាំងសោះ នោះលោកក៏ប្រទានឲ្យ។ ទោះទាំងពួកជំទង់ គេនឹងល្វើយហើយនឿយហត់ទៅបាន ពួកកំឡោះក៏នឹងដួលជ្រលាកបានផង តែអស់អ្នកណាដែលសង្ឃឹមដល់ព្រះយេហូវ៉ាវិញ នោះនឹងមានកំឡាំងចំរើនជានិច្ច គេនឹងហើរឡើងទៅលើដោយស្លាបដូចជាឥន្ទ្រី គេនឹងរត់ទៅឥតដែលហត់ ហើយនឹងដើរឥតដែលល្វើយឡើយ›។—អេសាយ ៤០:២៩-៣១
បើយើងប្រាថ្នាចង់ធ្វើតាមឆន្ទៈរបស់អ្នកបង្កើត យើងអាចទុកចិត្តថា ព្រះយេហូវ៉ានឹងប្រទានកម្លាំងឲ្យយើងដើម្បីចេះស៊ូទ្រាំ។ ប៉ុន្តែ យើងត្រូវតែសុំជំនួយពីអ្នកបង្កើតវិញ។ (លូកា ១១:១៣) ពេលព្រះយេហូវ៉ាជួយគាំទ្រយើង យើងអាចស៊ូទ្រាំនឹងទុក្ខលំបាកបែបណាក៏ដោយ ព្រមទាំងមានកម្លាំងដើម្បីធ្វើអ្វីដែលល្អផង។—ភីលីព ៤:១៣
[ឃ្លាអក្សរធំនៅទំព័រ៧]
យើងអាចមានកម្លាំងធ្វើអ្វីដែលល្អ បើមានជំនួយពីអ្នកបង្កើត
[រូបភាពនៅទំព័រ៧]
កាឡាក់ស៊ីប្រភេទផ្សេងៗ
[រូបភាពនៅទំព័រ៧]
ព្រះអាទិត្យមានទម្ងន់ធ្ងន់ជាងផែនដី ដល់ទៅ៣៣០.០០០ដង!
[Picture Credit Line on page ៧]
Pleiades: NASA, ESA and AURA/Caltech; all others above: National Optical Astronomy Observatories