ស្ត្រីទាំងឡាយ ហេតុអ្វីអ្នកគួរចុះចូលនឹងប្រមុខរបស់អ្នក?
«ប្រមុខរបស់ស្ត្រីទាំងឡាយគឺបុរស»។—១កូ. ១១:៣
១, ២. (ក) ស្តីអំពីការរៀបចំរបស់ព្រះយេហូវ៉ាអំពីប្រមុខនិងការចុះចូល តើសាវ័កប៉ូលបានសរសេរអ្វី? (ខ) តើអត្ថបទនេះនឹងពិចារណាសំណួរអ្វីខ្លះ?
ព្រះយេហូវ៉ាបានរៀបចំឲ្យមានលំដាប់ថ្នាក់ ដែលសាវ័កប៉ូលរៀបរាប់ពេលគាត់សរសេរថា៖«ប្រមុខរបស់បុរសទាំងឡាយគឺគ្រិស្ត» ហើយ«ប្រមុខរបស់គ្រិស្តគឺព្រះ»។ (១កូ. ១១:៣) អត្ថបទមុនបានបង្ហាញថាលោកយេស៊ូចាត់ទុកការចុះចូលនឹងព្រះយេហូវ៉ាជាប្រមុខ ជាឯកសិទ្ធិនិងជាអ្វីដែលនាំឲ្យលោកមានអំណរ ហើយក៏បង្ហាញថាបុរសដែលជាគ្រិស្តសាសនិកមានគ្រិស្តជាប្រមុខ។ គ្រិស្តបានប្រព្រឹត្តទៅលើមនុស្សដោយសេចក្ដីសប្បុរស ដោយសម្លូត យោគយល់ និងដោយមិនគិតអំពីប្រយោជន៍ខ្លួនលោក។ បុរសក្នុងក្រុមជំនុំត្រូវប្រព្រឹត្តដូច្នេះទៅលើអ្នកឯទៀត ជាពិសេសប្រពន្ធរបស់ខ្លួន។
២ ចុះចំពោះស្ត្រីវិញ? តើអ្នកណាជាប្រមុខរបស់ស្ត្រី? ប៉ូលបានសរសេរថា៖ «ប្រមុខរបស់ស្ត្រីទាំងឡាយគឺបុរស»។ តើស្ត្រីគួរមានទស្សនៈយ៉ាងណាចំពោះពាក្យនេះដែលព្រះបានដឹកនាំឲ្យសរសេរ? តើគោលការណ៍នេះសម្រាប់តែស្ត្រីដែលមានប្ដីជាអ្នករួមជំនឿឬ? តើការចុះចូលប្ដីជាប្រមុខតម្រូវឲ្យប្រពន្ធធ្វើជាដៃគូដែលគ្មានតួនាទីនិងសិទ្ធិក្នុងអាពាហ៍ពិពាហ៍ ហើយមិនអាចឲ្យយោបល់ពេលត្រូវធ្វើការសម្រេចចិត្តឬទេ? តើស្ត្រីធ្វើយ៉ាងណាដើម្បីឲ្យអ្នកឯទៀតសរសើរគាត់?
«អញនឹងធ្វើឲ្យមានម្នាក់ជាជំនួយ សម្រាប់ជួយវា»
៣, ៤. ហេតុអ្វីការរៀបចំឲ្យមានប្រមុខក្នុងអាពាហ៍ពិពាហ៍នាំឲ្យមានប្រយោជន៍?
៣ ព្រះបានកំណត់ឲ្យអ្នកខ្លះធ្វើជាប្រមុខលើអ្នកឯទៀត។ ក្រោយព្រះយេហូវ៉ាបានបង្កើតអាដាម លោកបានមានប្រសាសន៍ថា៖«មនុស្សនេះនៅតែម្នាក់ឯង នោះមិនស្រួលទេ អញនឹងធ្វើឲ្យមានម្នាក់ជាជំនួយសំរាប់ជួយវា»។ បន្ទាប់ពីព្រះបានបង្កើតនាងអេវ៉ា អាដាមសប្បាយចិត្តណាស់ដោយសារគាត់មានដៃគូនិងជំនួយ ហេតុនេះគាត់បាននិយាយថា៖ «នេះហើយជាឆ្អឹងពីឆ្អឹងអញ ជាសាច់ពីសាច់អញ»។ (លោ. ២:១៨-២៤) អាដាមនិងអេវ៉ាមានលទ្ធភាពក្លាយទៅជាឪពុកម្ដាយនៃមនុស្សជាតិទាំងមូលដែលល្អឥតខ្ចោះ ដែលនឹងរស់ជារៀងរហូតដោយមានសុភមង្គលក្នុងសួនឧទ្យាននៅទូទាំងផែនដី។
៤ ដោយសារឪពុកម្ដាយដំបូងរបស់យើងបានបះបោរប្រឆាំងព្រះ នោះស្ថានភាពដ៏ល្អឥតខ្ចោះនៅសួនអេដែនលែងមានទៀត។ (សូមអាន រ៉ូម ៥:១២) ប៉ុន្តែព្រះនៅតែមានទស្សនៈថាប្ដីជាប្រមុខរបស់ប្រពន្ធ។ ពេលប្ដីនិងប្រពន្ធធ្វើតាមការរៀបចំនោះ ពួកគេទទួលប្រយោជន៍ច្រើន ហើយថែមទាំងមានសុភមង្គលក្នុងអាពាហ៍ពិពាហ៍ផង។ ជាលទ្ធផល ពួកគេនឹងមានអារម្មណ៍ស្រដៀងនឹងអារម្មណ៍ដែលលោកយេស៊ូមាន ពេលលោកចុះចូលនឹងព្រះយេហូវ៉ាជាប្រមុខ។ មុនពេលលោកយេស៊ូមានកំណើតជាមនុស្ស លោកមាន«សេចក្ដីរីករាយនៅចំពោះ[ព្រះយេហូវ៉ា]ជានិច្ច»។ (សុភ. ៨:៣០) ដោយសារភាពមិនល្អឥតខ្ចោះ បុរសមិនអាចធ្វើជាប្រមុខដ៏ល្អឥតខ្ចោះទៀតទេ ហើយស្ត្រីក៏មិនអាចបង្ហាញការចុះចូលឲ្យបានល្អឥតខ្ចោះដែរ។ ប៉ុន្តែ ពេលប្ដីនិងប្រពន្ធខំធ្វើតាមរបៀបរៀបចំនេះអស់ពីសមត្ថភាព ពួកគេនឹងបានស្កប់ចិត្តច្រើនបំផុតដែលពួកគេអាចមាន ក្នុងអាពាហ៍ពិពាហ៍នាសម័យនេះ។
៥. ហេតុអ្វីគូអាពាហ៍ពិពាហ៍គួរធ្វើតាមឱវាទនៅសៀវភៅរ៉ូម ១២:១០?
៥ ដើម្បីមានជោគជ័យក្នុងអាពាហ៍ពិពាហ៍ ជាការសំខាន់ចាំបាច់ឲ្យគូអាពាហ៍ពិពាហ៍អនុវត្តតាមឱវាទនេះក្នុងគម្ពីរដែលសម្រាប់គ្រិស្តសាសនិកទាំងអស់។ ឱវាទនេះចែងថា៖ «ចូរស្រឡាញ់គ្នាជាបងប្អូនដោយមនោសញ្ចេតនាយ៉ាងជ្រាលជ្រៅ។ ក្នុងការលើកកិត្ដិយសគ្នាទៅវិញទៅមក ចូរលើកកិត្ដិយសគេមុន»។ (រ៉ូម ១២:១០) ម្យ៉ាងទៀត ទាំងប្ដីទាំងប្រពន្ធគួរខំប្រឹង«ប្រព្រឹត្តដោយសប្បុរសដល់គ្នាទៅវិញទៅមក មានសេចក្ដីអាណិតមេត្ដា ហើយអភ័យទោសឲ្យគ្នាទៅវិញទៅមកដោយគ្មានល័ក្ខខ័ណ្ឌ»។—អេភ. ៤:៣២
កាលណាប្ដីមិនមែនជាអ្នករួមជំនឿ
៦, ៧. បើប្រពន្ធជាគ្រិស្តសាសនិកចុះចូលប្ដីដែលមិនមែនជាអ្នករួមជឿ តើនឹងអាចមានលទ្ធផលអ្វី?
៦ ចុះយ៉ាងណា បើគូអាពាហ៍ពិពាហ៍របស់អ្នកមិនមែនជាអ្នកបម្រើព្រះយេហូវ៉ា? ជារឿយៗ គឺជាប្ដីដែលមិនមែនជាអ្នករួមជំនឿ។ ក្នុងករណីនេះ តើប្រពន្ធគួរប្រព្រឹត្តយ៉ាងណាចំពោះគាត់? បទគម្ពីរឆ្លើយថា៖ «ចូរអ្នករាល់គ្នាដែលជាប្រពន្ធចុះចូលនឹងប្ដីខ្លួន ដើម្បីឲ្យប្ដីណាដែលមិនធ្វើតាមបណ្ដាំរបស់ព្រះ ក្លាយទៅជាអ្នកដែលធ្វើតាមវិញ តាមរយៈការប្រព្រឹត្តរបស់អ្នករាល់គ្នាដែលជាប្រពន្ធ ដោយមិនចាំបាច់ឲ្យអ្នករាល់គ្នាបញ្ចេញពាក្យសម្ដីមួយម៉ាត់ឡើយ ពីព្រោះពួកគេឃើញដោយផ្ទាល់ភ្នែកនូវការប្រព្រឹត្តដ៏បរិសុទ្ធរបស់អ្នករាល់គ្នា គួបផ្សំជាមួយនឹងការគោរពដ៏ជ្រាលជ្រៅ»។—១ពេ. ៣:១, ២
៧ បណ្ដាំរបស់ព្រះប្រាប់ប្រពន្ធឲ្យរក្សាឲ្យមានចិត្តគំនិតចុះចូលប្ដីដែលមិនមែនជាអ្នករួមជំនឿ។ ការប្រព្រឹត្តដ៏ល្អរបស់គាត់អាចនាំឲ្យប្ដីពិចារណាអំពីអ្វីដែលជំរុញចិត្តប្រពន្ធឲ្យប្រព្រឹត្តតាមរបៀបដ៏ល្អប្រសើរយ៉ាងនេះ។ ជាលទ្ធផល ប្ដីអាចចង់ដឹងអំពីជំនឿរបស់ប្រពន្ធគាត់ ហើយប្រហែលនៅទីបំផុតទទួលយកសេចក្ដីពិត។
៨, ៩. ទោះបីប្រពន្ធដែលជាគ្រិស្តសាសនិកមានការប្រព្រឹត្តដ៏ល្អក៏ដោយ តែបើប្ដីដែលមិនមែនជាអ្នករួមជំនឿមិនព្រមទទួលយកសេចក្ដីពិត តើគាត់អាចធ្វើអ្វី?
៨ ចុះយ៉ាងណាវិញ បើប្ដីដែលមិនមែនជាអ្នករួមជំនឿមិនព្រមទទួលយកសេចក្ដីពិត? បទគម្ពីរលើកទឹកចិត្តប្រពន្ធដែលជាអ្នកបម្រើព្រះយេហូវ៉ាឲ្យបង្ហាញគុណសម្បត្ដិជាគ្រិស្តសាសនិករាល់ពេលវេលា ទោះជាមានការពិបាកយ៉ាងណាក៏ដោយ។ ជាឧទាហណ៍ កូរិនថូសទី១ ១៣:៤ចែងថា៖ «សេចក្ដីស្រឡាញ់មានចិត្តធ្ងន់»។ ដូច្នេះ ជាការល្អឲ្យប្រពន្ធដែលជាគ្រិស្តសាសនិកបន្តប្រព្រឹត្ត«ដោយមានចិត្តរាបទាបនិងចិត្តស្លូតបូតជានិច្ច ថែមទាំងមានចិត្តធ្ងន់»ហើយទ្រាំទ្រស្ថានភាពនោះដោយសេចក្ដីស្រឡាញ់។ (អេភ. ៤:២) ដោយមានជំនួយពីសកម្មពលព្រះ ប្រពន្ធអាចរក្សាឲ្យមានគុណសម្បត្ដិជាគ្រិស្តសាសនិក ទោះជាស្ថិតនៅក្នុងកាលៈទេសៈដ៏លំបាកក៏ដោយ។
៩ ប៉ូលបានសរសេរថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។ (ភី. ៤:១៣) សកម្មពលព្រះអាចជួយគូអាពាហ៍ពិពាហ៍ដែលជាគ្រិស្តសាសនិកឲ្យធ្វើអ្វីជាច្រើនដែលគាត់មិនអាចធ្វើបានទេ បើមិនមានជំនួយពីសកម្មពលព្រះ។ ជាឧទាហរណ៍ ពេលគូរបស់យើងធ្វើបាបយើង នោះធ្វើឲ្យយើងចង់តបតវិញ។ ក៏ប៉ុន្តែ គម្ពីរប្រាប់គ្រិស្តសាសនិកទាំងអស់ថា៖ «កុំតបស្នងការអាក្រក់ដល់អ្នកណាដែលធ្វើអាក្រក់ចំពោះអ្នកឲ្យសោះ . . . ព្រោះបទគម្ពីរចែងថា៖ ‹ព្រះយេហូវ៉ាមានប្រសាសន៍ថា ការសងសឹកជារបស់ខ្ញុំ ខ្ញុំនឹងសងគេវិញ›»។ (រ៉ូម ១២:១៧-១៩) ស្រដៀងគ្នាដែរ ថែស្សាឡូនិចទី១ ៥:១៥ឲ្យឱវាទយើងថា៖ «កុំឲ្យអ្នកណាធ្វើអំពើអាក្រក់តបស្នងនឹងអំពើអាក្រក់ឡើយ ប៉ុន្តែចូររកវិធីធ្វើអំពើល្អចំពោះគ្នាទៅវិញទៅមកនិងចំពោះអ្នកឯទៀតជានិច្ច»។ ដោយមានជំនួយពីសកម្មពលបរិសុទ្ធរបស់ព្រះយេហូវ៉ា យើងអាចធ្វើអ្វីដែលយើងមិនអាចធ្វើបានទេ បើពឹងលើកម្លាំងយើងផ្ទាល់។ ជាការសមត្រឹមត្រូវណាស់ដែលយើងអធិដ្ឋានសុំសកម្មពលបរិសុទ្ធរបស់ព្រះផ្ដល់អ្វីដែលយើងត្រូវមាន!
១០. ពេលអ្នកឯទៀតប្រើពាក្យសម្ដីឬធ្វើអ្វីដែលមិនល្អចំពោះលោកយេស៊ូ តើលោកបានធ្វើអ្វី?
១០ លោកយេស៊ូបានទុកគំរូដ៏អស្ចារ្យក្នុងការប្រព្រឹត្តទៅលើពួកអ្នកដែលបានប្រើពាក្យសម្ដីឬធ្វើអ្វីដែលមិនល្អចំពោះលោក។ ពេត្រុសទី១ ២:២៣ចែងថា៖ «ពេលដែលលោកត្រូវគេជេរប្រមាថ លោកមិនបានជេរប្រមាថគេវិញទេ។ ពេលដែលលោករងទុក្ខ នោះលោកមិនបានគំរាមកំហែងគេឡើយ ប៉ុន្តែលោកតែងតែផ្ញើខ្លួនទៅលើព្រះដែលវិនិច្ឆ័យដោយសុចរិតយុត្ដិធម៌»។ យើងបានត្រូវដាស់តឿនឲ្យធ្វើតាមគំរូដ៏ល្អរបស់លោក។ កុំឲ្យការប្រព្រឹត្តអាក្រក់របស់អ្នកឯទៀត ធ្វើឲ្យអ្នកខឹង។ គ្រិស្តសាសនិកទាំងអស់បានត្រូវដាស់តឿនឲ្យ«មានចិត្តអាណិតមេត្ដា មានចិត្តរាបទាប មិនមែនដោយធ្វើអំពើអាក្រក់សងអ្នកដែលធ្វើអំពើអាក្រក់មកលើខ្លួន ឬជេរប្រមាថសងអ្នកដែលជេរប្រមាថខ្លួនឡើយ»។—១ពេ. ៣:៨, ៩
តើគ្រាន់តែជាដៃគូដែលគ្មានតួនាទីនិងសិទ្ធិឬ?
១១. តើស្ត្រីខ្លះអាចរួមចំណែកក្នុងឯកសិទ្ធិដ៏អស្ចារ្យអ្វី?
១១ តើការចុះចូលប្ដីដែលជាប្រមុខមានន័យថាស្ត្រីជាគូអាពាហ៍ពិពាហ៍គ្មានតួនាទីនិងសិទ្ធិក្នុងរឿងក្រុមគ្រួសារឬរឿងឯទៀតឬទេ? មិនមែនទេ។ ព្រះយេហូវ៉ាផ្ដល់ឯកសិទ្ធិជាច្រើនឲ្យបុរសនិងស្ត្រី។ សូមគិតអំពីកិត្ដិយសដែលមនុស្ស១៤៤.០០០នាក់មានដោយធ្វើជាស្តេចនិងសង្ឃនៅស្ថានសួគ៌ក្រោមការគ្រប់គ្រងរបស់គ្រិស្តពេលលោកគ្រប់គ្រងលើផែនដី! ក្នុងចំណោមមនុស្ស១៤៤.០០០នាក់ក៏មានស្ត្រីដែរ។ (កាឡ. ៣:២៦-២៩) ច្បាស់ណាស់ ព្រះយេហូវ៉ាបានឲ្យស្ត្រីមានតួនាទីយ៉ាងសកម្មក្នុងរបៀបរៀបចំរបស់លោក។
១២, ១៣. សូមលើកឧទាហរណ៍មួយដែលបង្ហាញថាស្ត្រីបានប្រកាសទំនាយ។
១២ ជាឧទាហរណ៍ នៅសម័យគម្ពីរ ស្ត្រីខ្លះបានប្រកាសទំនាយ។ យ៉ូអែល ២:២៨, ២៩ បានទាយថា៖ «អញនឹងចាត់វិញ្ញាណរបស់អញទៅលើគ្រប់ទាំងមនុស្ស នោះកូនប្រុសស្រីរបស់ឯងនឹងទាយ . . . អញនឹងចាត់វិញ្ញាណរបស់អញ ទៅលើទាំងពួកទាសាទាសីដែរ»។
១៣ អ្នកកាន់តាមលោកយេស៊ូ ប្រហែល១២០នាក់ដែលបានជួបជុំគ្នានៅបន្ទប់ខាងលើក្នុងក្រុងយេរូសាឡិមនាបុណ្យថ្ងៃទី៥០ ឆ្នាំ៣៣គ.ស. ក៏មានស្ត្រីនិងបុរសដែរ។ ពួកគេទាំងអស់បានទទួលសកម្មពលបរិសុទ្ធរបស់ព្រះ។ ហេតុនេះពេត្រុសអាចដកស្រង់ពាក្យដែលអ្នកប្រកាសទំនាយយ៉ូអែលបានទាយ ហើយបានប្រើទំនាយនោះដើម្បីសំដៅទៅបុរសក៏ដូចទៅស្ត្រីដែរ។ ពេត្រុសបានពោលថា៖ «នេះជាអ្វីដែលបានត្រូវប្រកាសតាមរយៈយ៉ូអែល ជាអ្នកប្រកាសទំនាយថា៖ ‹ព្រះមានប្រសាសន៍ថា៖ នៅគ្រាចុងក្រោយ ខ្ញុំនឹងចាក់សកម្មពលខ្លះរបស់ខ្ញុំទៅលើមនុស្សគ្រប់ប្រភេទ ហើយកូនប្រុសនិងកូនស្រីរបស់អ្នករាល់គ្នានឹងប្រកាសទំនាយ . . . សូម្បីតែខ្ញុំបម្រើប្រុសខ្ញុំបម្រើស្រីរបស់ខ្ញុំ ក៏ខ្ញុំនឹងចាក់សកម្មពលខ្លះរបស់ខ្ញុំទៅលើពួកគេដែរ រួចពួកគេនឹងប្រកាសទំនាយ›»។—សកម្ម. ២:១៦-១៨
១៤. តើស្ត្រីមានតួនាទីយ៉ាងណាក្នុងការផ្សាយគ្រិស្តសាសនានៅសម័យដើម?
១៤ នៅសតវត្សរ៍ទី១ ស្ត្រីមានតួនាទីសំខាន់ក្នុងការផ្សាយគ្រិស្តសាសនា។ ពួកគេបានផ្សព្វផ្សាយដល់អ្នកឯទៀតអំពីរាជាណាចក្ររបស់ព្រះ ហើយបានធ្វើអ្វីដែលទាក់ទងនឹងការផ្សព្វផ្សាយនោះ។ (លូក. ៨:១-៣) ជាឧទាហរណ៍ សាវ័កប៉ូលបានហៅភីបេថា«ជាអ្នកបម្រើក្នុងក្រុមជំនុំនៅក្រុងសង់គ្រា»។ ម្យ៉ាងទៀត ពេលប៉ូលបានផ្ដាំសួរសុខទុក្ខបងប្អូនរួមជំនឿ គាត់បានលើកឈ្មោះស្ត្រីស្មោះត្រង់មួយចំនួន រួមទាំង«ទ្រីភេននិងទ្រីផូស ជាពួកស្ត្រីដែលកំពុងធ្វើការយ៉ាងនឿយហត់ក្នុងលោកម្ចាស់»។ គាត់ក៏បានផ្ដាំសួរសុខទុក្ខ«ពើស៊ីសជាទីស្រឡាញ់របស់យើង ព្រោះនាងបានធ្វើការជាច្រើនយ៉ាងនឿយហត់ក្នុងលោកម្ចាស់»។—រ៉ូម ១៦:១, ១២
១៥. នៅសម័យយើង តើស្ត្រីមានតួនាទីអ្វីក្នុងការផ្សាយគ្រិស្តសាសនា?
១៥ នៅសម័យយើង ក្នុងចំណោមមនុស្សជាង៧លាននាក់ដែលកំពុងផ្សព្វផ្សាយដំណឹងល្អអំពីរាជាណាចក្រព្រះនៅទូទាំងផែនដី នោះមួយចំនួនធំជាស្ត្រី ដែលមានគ្រប់វ័យ។ (ម៉ាថ. ២៤:១៤) ស្ត្រីជាច្រើននាក់ជាអ្នកបម្រើព្រះពេញពេល សាសនទូត និងជាសមាជិកនៃក្រុមគ្រួសារបេតអែល។ ដាវីឌដែលជាអ្នកតែងបទទំនុកតម្កើងបានច្រៀងថា៖ «ពេលព្រះអម្ចាស់ចេញបញ្ជា ពួកស្ត្រីដែលប្រៀបបាននឹងកងទ័ពមួយយ៉ាងធំ នាំគ្នាចេញទៅប្រកាសដំណឹង»។ (ទំន. ៦៨:១២, ខ.ស. [ទំនុក. ៦៨:១១]) នេះជាការពិតមែន! ព្រះយេហូវ៉ាឲ្យតម្លៃទៅលើស្ត្រីដែលមានតួនាទីក្នុងការប្រកាសដំណឹងល្អ និងក្នុងការសម្រេចគោលបំណងរបស់លោក។ ដូច្នេះ ពេលព្រះតម្រូវឲ្យស្ត្រីចុះចូល នេះប្រាកដជាមិនបានសេចក្ដីថាពួកគេគ្មានតួនាទីឬសិទ្ធិនោះឡើយ។
ស្ត្រីពីរនាក់ដែលបានបញ្ចេញមតិ និងចាត់វិធានការ
១៦, ១៧. តើគំរូរបស់សារ៉ាបង្ហាញយ៉ាងដូចម្ដេចថាស្ត្រីមិនមែនជាគូអាពាហ៍ពិពាហ៍ដែលគ្មានតួនាទីនិងសិទ្ធិទេ?
១៦ ដោយសារព្រះយេហូវ៉ាផ្ដល់ឯកសិទ្ធិជាច្រើនដល់ស្ត្រី ដូច្នេះប្ដីទាំងឡាយគួរពិគ្រោះជាមួយនឹងប្រពន្ធខ្លួនមុនសម្រេចចិត្តអំពីរឿងសំខាន់ៗមែនទេ? ជាការល្អឲ្យប្ដីធ្វើដូច្នេះ។ បទគម្ពីររៀបរាប់ករណីខ្លះដែលប្រពន្ធបាននិយាយឬប្រព្រឹត្តដោយមិនបានសួរយោបល់ប្ដីទេ។ សូមពិចារណាករណីពីរ។
១៧ សារ៉ាជាប្រពន្ធរបស់អាប្រាហាំបានបន្តប្រាប់គាត់ឲ្យបណ្ដេញប្រពន្ធទី២និងកូនប្រុសរបស់ស្ត្រីនោះចេញ ដោយសារពួកគេខ្វះការគោរព។ «សេចក្ដីនោះនាំឲ្យអ័ប្រាហាំពិបាកចិត្តណាស់» តែព្រះគឺមិនដូច្នោះទេ។ ព្រះយេហូវ៉ាបានប្រាប់អាប្រាហាំថា៖ «កុំឲ្យឯងពិបាកចិត្តដោយព្រោះកូនក្មេង ហើយនឹងបាវស្រីរបស់ឯងឡើយ ត្រូវស្ដាប់តាមគ្រប់ទាំងសេចក្ដីដែលសារ៉ាបានប្រាប់ឯងវិញ»។ (លោ. ២១:៨-១២) អាប្រាហាំបានស្ដាប់បង្គាប់ព្រះយេហូវ៉ា បានស្ដាប់តាមសារ៉ា ហើយបានធ្វើអ្វីដែលនាងសុំ។
១៨. តើអ័ប៊ីកែលបានចាត់វិធានការយ៉ាងណា?
១៨ សូមពិចារណាដែរអំពីអ័ប៊ីកែល ដែលជាប្រពន្ធរបស់ណាបាល។ កាលដែលដាវីឌបានរត់ភៀសខ្លួនពីស្តេចសូលដែលមានចិត្តច្រណែន គាត់នៅក្នុងជំរំក្បែរហ្វូងសត្វរបស់ណាបាល។ ដាវីឌនិងពួកបុរសរបស់គាត់មិនបានយកទ្រព្យសម្បត្ដិរបស់បុរសដែលជាអ្នកមានស្តុកស្តម្ភនោះទេ តែបានការពារវិញ។ ក៏ប៉ុន្តែ ណាបាល«ជាមនុស្សកាចអាក្រក់ក្នុងកិរិយាប្រព្រឹត្ត» ហើយបាន«ស្តីកិន»ដល់ពួកបុរសរបស់ដាវីឌ។ ណាបាលជា«មនុស្សកំណាច» ហើយប្រព្រឹត្តដូចមនុស្សដែលមាន«សេចក្ដីចំកួត»។ ពេលដែលពួកបុរសរបស់ដាវីឌបានសុំស្បៀងអាហារខ្លះពីគាត់ដោយការគោរព នោះគាត់បានបដិសេធ។ ពេលអ័ប៊ីកែលបានឮអ្វីដែលបានកើតឡើង តើនាងមានប្រតិកម្មយ៉ាងណា? ដោយឥតបានប្រាប់ណាបាល នាង«ប្រញឹកប្រញាប់ចាត់ចែងនំប៉័ង២០០ដុំ ថង់ស្បែកពេញដោយស្រាទំពាំងបាយជូរ២ ចៀមរៀបជាស្រេច៥ លាជ៥រង្វាល់ ផ្លែទំពាំងបាយជូរក្រៀម១០០ចង្កោម នឹងផ្លែល្វាក្រៀម២០០ផែន» ហើយឲ្យរបស់ទាំងនោះទៅដាវីឌនិងពួកបុរសរបស់គាត់។ តើអ័ប៊ីកែលបានធ្វើអ្វីដែលត្រឹមត្រូវឬទេ? ព្រឹត្ដិការណ៍ខ្លះដែលកើតឡើងក្រោយមកបានបង្ហាញថានាងបានធ្វើអ្វីដែលត្រឹមត្រូវ។ គម្ពីរចែងថា៖ «ព្រះយេហូវ៉ាទ្រង់វាយណាបាលឲ្យស្លាប់ទៅ»។ ក្រោយមក ដាវីឌបានរៀបការជាមួយអ័ប៊ីកែល។—១សាំ. ២៥:៣, ១៤-១៩, ២៣-២៥, ៣៨-៤២
‹ស្ត្រីដែលមានគេសរសើរ›
១៩, ២០. តើស្ត្រីដែលគេសរសើរមានលក្ខណៈអ្វីខ្លះ?
១៩ បទគម្ពីរសរសើរប្រពន្ធដែលប្រព្រឹត្តសមស្របតាមទស្សនៈរបស់ព្រះយេហូវ៉ា។ សៀវភៅសុភាសិតសរសើរ«ស្ត្រីគ្រប់លក្ខណ៍»ម្នាក់ថា៖ «ស្ត្រីយ៉ាងនោះមានដំឡៃជាជាងត្បូងទទឹមទៅទៀត ប្ដីនាងនឹងទុកចិត្តចំពោះនាង ហើយមិនត្រូវខ្វះខាតអ្វីឡើយ នាងនឹងធ្វើឲ្យប្ដីបានសេចក្ដីល្អ មិនមែនអាក្រក់ឡើយ រហូតដល់អស់១ជីវិតនាង»។ ម្យ៉ាងទៀត «នាងពោលដោយប្រាជ្ញាហើយនៅអណ្ដាតនាងមានសេចក្ដីសប្បុរស នាងថែមើលអស់ទាំងផ្លូវរបស់ពួកផ្ទះនាងយ៉ាងល្អ ឥតដែលបរិភោគអាហារដោយសេចក្ដីកំជិលឡើយ កូនរបស់នាងទាំងប៉ុន្មាន ក្រោកឈរឡើងគោរពដល់ម្ដាយ ថាជាអ្នកមានពរ ប្ដីក៏ក្រោកឈរឡើងសរសើរនាងដែរ»។—សុភ. ៣១:១០-១២, ២៦-២៨
២០ តើស្ត្រីដែលគេសរសើរមានលក្ខណៈអ្វីខ្លះ? សុភាសិត ៣១:៣០ចែងថា៖ «រូបឆោមឆាយជាសេចក្ដីបញ្ឆោត ហើយមុខស្រស់ល្អក៏ឥតប្រយោជន៍ដែរ តែស្ត្រីណាដែលកោតខ្លាចដល់ព្រះយេហូវ៉ា នោះនឹងមានគេសរសើរវិញ»។ ការកោតខ្លាចព្រះយេហូវ៉ារួមបញ្ចូលការចុះចូលដោយស្ម័គ្រចិត្តនឹងប្រមុខដែលលោកបានរៀបចំ។ «ប្រមុខរបស់ស្ត្រីទាំងឡាយគឺបុរស» ដូច«ប្រមុខរបស់បុរសទាំងឡាយគឺគ្រិស្ត» ហើយ«ប្រមុខរបស់គ្រិស្តគឺព្រះ»។—១កូ. ១១:៣
ចូរដឹងគុណព្រះចំពោះអំណោយរបស់លោក
២១, ២២. (ក) ដោយសារអាពាហ៍ពិពាហ៍ជាអំណោយពីព្រះ តើគ្រិស្តសាសនិកដែលបានរៀបការហើយ មានមូលហេតុអ្វីខ្លះដើម្បីដឹងគុណលោក? (ខ) ហេតុអ្វីយើងគួរគោរពការរៀបចំរបស់ព្រះយេហូវ៉ាស្តីអំពីអ្នកមានអំណាចនិងប្រមុខ? (សូមមើលប្រអប់នៅទំព័រ២២)
២១ គ្រិស្តសាសនិកដែលបានរៀបការហើយ មានមូលហេតុច្រើនមែនដើម្បីដឹងគុណព្រះ! ពួកគេអាចរួមរស់ជាមួយគ្នាជាគូស្វាមីភរិយាដែលមានសុភមង្គល។ ជាពិសេស ពួកគេអាចអរគុណព្រះចំពោះចំណងអាពាហ៍ពិពាហ៍ដែលជាអំណោយពីលោក ព្រោះនេះផ្ដល់ឱកាសឲ្យពួកគេរួមសុខរួមទុក្ខជាមួយគ្នា ហើយដើរជាមួយនឹងព្រះយេហូវ៉ា។ (រស់. ១:៩; មីកា ៦:៨) លោកដែលជាអ្នកផ្ដើមឲ្យមានអាពាហ៍ពិពាហ៍ជ្រាបយ៉ាងច្បាស់អំពីអ្វីដែលនាំឲ្យគូស្វាមីភរិយាមានសុភមង្គល។ បើគូស្វាមីភរិយាប្រព្រឹត្តតាមមាគ៌ារបស់ព្រះយេហូវ៉ាជានិច្ច នោះ‹សេចក្ដីអំណររបស់ព្រះយេហូវ៉ានឹងជាកំឡាំងនៃពួកគេ› ទោះបីរស់នៅក្នុងពិភពលោកដ៏ច្របូកច្របល់នេះក៏ដោយ។—នេហ. ៨:១០
២២ ប្ដីជាគ្រិស្តសាសនិកដែលស្រឡាញ់ប្រពន្ធរបស់ខ្លួនដូចស្រឡាញ់ខ្លួនគាត់នឹងធ្វើជាប្រមុខដែលចេះយល់ចិត្តយល់អារម្មណ៍ ហើយចេះថ្នាក់ថ្នមប្រពន្ធ។ ប្ដីនឹងស្រឡាញ់ប្រពន្ធគាត់ដែលកោតខ្លាចព្រះ ពីព្រោះនាងគាំទ្រគាត់ ហើយបង្ហាញការគោរពដ៏ជ្រាលជ្រៅចំពោះគាត់។ សំខាន់បំផុត ចំណងអាពាហ៍ពិពាហ៍របស់ពួកគេដែលជាគំរូល្អនឹងលើកកិត្ដិយសព្រះយេហូវ៉ា ដែលជាព្រះគួរឲ្យសរសើរ។
តើអ្នកចាំឬទេ?
• តើការរៀបចំរបស់ព្រះយេហូវ៉ាស្តីអំពីប្រមុខនិងការចុះចូលគឺជាអ្វី?
• ហេតុអ្វីគូអាពាហ៍ពិពាហ៍គួរលើកកិត្ដិយសគ្នាទៅវិញទៅមក?
• តើប្រពន្ធដែលជាអ្នកបម្រើព្រះយេហូវ៉ាគួរប្រព្រឹត្តយ៉ាងណាចំពោះប្ដីដែលមិនមែនជាអ្នករួមជំនឿ?
• ហេតុអ្វីបានជាប្ដីគួរពិគ្រោះជាមួយនឹងប្រពន្ធមុនសម្រេចចិត្តអំពីរឿងសំខាន់ៗ?
[ប្រអប់នៅទំព័រ២២]
ហេតុអ្វីគោរពអ្នកដែលមានអំណាច?
ព្រះយេហូវ៉ាបានរៀបចំឲ្យមានអ្នកមានអំណាចនិងប្រមុខក្នុងចំណោមពួកទេវតានិងមនុស្ស។ ការរៀបចំនេះមានប្រយោជន៍ទាំងចំពោះពួកទេវតាទាំងចំពោះមនុស្ស។ នេះផ្ដល់ឱកាសឲ្យពួកគេប្រើចិត្តសេរី និងលើកកិត្ដិយសព្រះដោយបម្រើលោកតាមរបៀបដែលនាំឲ្យមានសាមគ្គីភាពនិងសុខដុមរមនា។—ទំនុក. ១៣៣:១
ក្រុមជំនុំនៃគ្រិស្តសាសនិកដែលបានត្រូវរើសតាំងទទួលស្គាល់ថាលោកយេស៊ូគ្រិស្តមានអំណាចនិងជាប្រមុខលើពួកគេ។ (អេភ. ១:២២, ២៣) ដោយទទួលស្គាល់អំណាចរបស់ព្រះយេហូវ៉ា នោះនៅទីបំផុត «បុត្រនោះនឹងចុះចូលចំពោះព្រះដែលបានធ្វើឲ្យអ្វីៗទាំងអស់ចុះចូលចំពោះបុត្រនោះ ដើម្បីឲ្យព្រះធ្វើជាអ្វីៗទាំងអស់ដល់មនុស្សទាំងអស់»។ (១កូ. ១៥:២៧, ២៨) ដូច្នេះ ជាការសមត្រឹមត្រូវមែន ដែលអ្នកដែលបានប្រគល់ខ្លួនជូនព្រះសហការជាមួយនឹងអ្នកដែលជាប្រមុខក្នុងក្រុមជំនុំនិងក្នុងក្រុមគ្រួសារ! (១កូ. ១១:៣; ហេ. ១៣:១៧) ដោយធ្វើដូច្នេះ យើងនឹងទទួលប្រយោជន៍ដោយសារយើងទទួលការពេញចិត្តនិងពរពីព្រះយេហូវ៉ា។—អេ. ៤៨:១៧
[រូបភាពនៅទំព័រ១៩]
សេចក្ដីអធិដ្ឋានអាចជួយប្រពន្ធដែលជាគ្រិស្តសាសនិក ឲ្យបង្ហាញគុណសម្បត្ដិដែលព្រះពេញចិត្ត
[រូបភាពនៅទំព័រ២១]
ព្រះយេហូវ៉ាឲ្យតម្លៃដល់ស្ត្រីដែលមានតួនាទី ធ្វើឲ្យចម្រើនផលប្រយោជន៍ រាជាណាចក្ររបស់ព្រះ