សំណួរពីអ្នកអាន
តើព្រះមានដើមកំណើតឬទេ?
▪ គម្ពីរប្រាប់ថាព្រះគ្មានដើមកំណើតទេ។ ព្រះរស់នៅជានិច្ចកាល។ ទោះជាយើងពិបាកយល់ទស្សនៈដែលថាព្រះរស់ជារៀងរហូតក្ដី យើងមិនអាចបដិសេធថាទស្សនៈនេះមិនត្រឹមត្រូវ ដោយសារតែយើងមិនអាចយល់ច្បាស់អំពីទស្សនៈនេះប៉ុណ្ណោះឡើយ។
តើជាការសមហេតុសមផលឬទេឲ្យយើងយល់អ្វីៗទាំងអស់អំពីផ្លូវរបស់ព្រះ? សាវ័កប៉ូលបានប្រកាសថា៖«ពរ ប្រាជ្ញា និងចំណេះរបស់ព្រះគឺបរិបូរណាស់ហ្ន៎! ការវិនិច្ឆ័យរបស់លោកគ្មានអ្នកណាអាចស្វែងយល់បានទេ ហើយផ្លូវរបស់លោកគ្មានអ្នកណាអាចវាស់ស្ទង់បានឡើយ!»។ (រ៉ូម ១១:៣៣) ខួរក្បាលរបស់យើងមិនអាចយល់ទាំងអស់នូវប្រាជ្ញានិងចំណេះដ៏ជ្រៅរបស់ព្រះបានទេ ដូចទារកក៏មិនអាចយល់ការប្រព្រឹត្តទាំងអស់របស់ឪពុកម្ដាយវាដែរ។ ពាក្យរបស់ប៉ូលទាំងនេះដែលគាត់បានសរសេរក្រោមការដឹកនាំរបស់ព្រះ គឺបានសរសេរជាចម្បងអំពីភាពល្អឯកនៃប្រាជ្ញានិងសេចក្ដីមេត្ដាករុណារបស់ព្រះ។ ទោះជាយ៉ាងណាក្ដី ពាក្យរបស់គាត់បង្ហើបឲ្យដឹងថា លក្ខណៈខ្លះៗរបស់ព្រះយេហូវ៉ានិងរបៀបដែលលោកប្រព្រឹត្តគឺជ្រៅពេកដែលយើងពិបាកយល់ណាស់។ តាមមើលទៅ លក្ខណៈមួយក្នុងចំណោមលក្ខណៈទាំងនោះ គឺថាព្រះគ្មានដើមកំណើត។ ប៉ុន្តែ យើងអាចមានទំនុកចិត្តទាំងស្រុងទៅលើអ្វីដែលគម្ពីរបង្រៀនអំពីព្រះ។ លោកយេស៊ូគ្រិស្តបានមានប្រសាសន៍អំពីសំណេរដ៏ពិសិដ្ឋថា៖ «បណ្ដាំរបស់លោកជាសេចក្ដីពិត»។—យ៉ូហាន ១៧:១៧
ម៉ូសេបានអធិដ្ឋានទៅព្រះយេហូវ៉ាថា៖ «ចាប់តាំងពីអស់កល្ប រៀងទៅដល់អស់កល្បជានិច្ច នោះគឺទ្រង់ហើយជាព្រះ»។ (ទំនុកតម្កើង ៩០:២) នៅខនេះ ម៉ូសេបានរៀបរាប់អំពីពេលវេលាដែលព្រះរស់នៅ។ មួយសំដៅទៅពេលអនាគត។ ព្រះយេហូវ៉ា«រស់ជារៀងរហូត»។ (ការបើកបង្ហាញ ៤:១០) យ៉ាងនេះ ការរស់នៅរបស់ព្រះគឺនឹងមានរហូតទៅដល់អនាគតកាលដែលគ្មានទីបញ្ចប់។ មួយទៀតគឺសំដៅទៅអតីតកាល។ បើនិយាយឲ្យចំទៅ គ្មានអ្នកណាបង្កើតព្រះ ហើយព្រះក៏គ្មានដើមកំណើតដែរ។ ផ្ទុយទៅវិញ តាំងពីអតីតកាលដែលរកកំណត់មិនបាន គឺមានព្រះហើយ។
អ្វីដែលអរូបី ធម្មតាគឺពិបាកយល់។ ប៉ុន្តែ ជួនកាលយើងត្រូវទទួលយកចំណុចខ្លះដែលពិបាកយល់ ដូចជាលេខវិជ្ជមាន និងលេខអវិជ្ជមាន។ យើងមិនអាចរាប់លេខអស់ទេ គឺមានតាំងពីដកអនន្តដល់បូកអនន្ត។ យើងអាចប្រើឧទាហរណ៍នេះដើម្បីយល់អំពីអាយុរបស់ព្រះដែលជាអ្នកបង្កើត មែនទេ?
គឺត្រឹមត្រូវដែលមានតែព្រះប៉ុណ្ណោះដែលមានឋានៈដ៏ល្អឯកជា«ស្តេចដែលរស់ជារៀងរហូត»។ (ធីម៉ូថេទី១ ១:១៧) សូមគិតទៅមើល លោកយេស៊ូគ្រិស្ត បណ្ដាទេវតានៅស្ថានសួគ៌ និងមនុស្សជាតិនៅផែនដី ទាំងអស់មានដើមកំណើតដោយសារព្រះបានបង្កើតពួកគាត់មក។ (កូឡុស ១:១៥, ១៦) ចំណែកឯព្រះវិញ គ្មានអ្នកណាបង្កើតលោកទេ។ ការប្រកាន់គំនិតដែលថាព្រះមានអ្នកបង្កើត នាំឲ្យមានសំណួរអសារឥតការដែលមិនចេះអស់ថា នរណាបង្កើតព្រះ។ មានតែព្រះយេហូវ៉ាប៉ុណ្ណោះដែលរស់«ចាប់តាំងពីអស់កល្ប រៀងទៅដល់អស់កល្បជានិច្ច»។ (ទំនុកតម្កើង ៩០:២) ដូច្នេះ ព្រះយេហូវ៉ារស់នៅ«ជានិច្ចកាល» មុនលោកបង្កើតអ្វីៗទាំងអស់។—យូដាស ២៥
សូមចាំថា គំនិតដែលថាព្រះបានរស់នៅជារៀងរហូតមិនមែនគ្រាន់តែផ្អែកលើហេតុការណ៍ពិតប៉ុណ្ណោះទេ។ ការពិនិត្យមើលយ៉ាងដិតដល់នូវសេចក្ដីអធិដ្ឋានរបស់ម៉ូសេបង្ហាញឲ្យឃើញថា ដោយសារព្រះរស់នៅជារៀងរហូត នោះលោកមានសមត្ថភាពផ្ដល់ឲ្យយើងនូវជីវិតដែលគ្មានទីបញ្ចប់។ ផ្ទុយស្រឡះពីយើងដែលមានជីវិតខ្លី ព្រះបានត្រូវរៀបរាប់ថាជា«ទីអាស្រ័យនៅនៃយើងខ្ញុំនៅអស់ទាំងដំណតមក»។ ក្នុងនាមជាបិតាដែលប្រកបដោយសេចក្ដីស្រឡាញ់ ព្រះយេហូវ៉ាបានជួយ កំពុងជួយ និងតែងតែជួយរាស្ត្ររបស់លោក។ សូមលោកអ្នកមានទំនុកចិត្តលើសេចក្ដីពិតដ៏អស្ចារ្យនេះ!—ទំនុកតម្កើង ៩០:១