ចូរទទួលពរតាមរយៈស្តេចដែលនៅក្រោមការដឹកនាំនៃសកម្មពលព្រះ!
«វិញ្ញាណនៃព្រះយេហូវ៉ានឹងសណ្ឋិតនៅលើអ្នកនោះ»។—អេ. ១១:២
១. ស្តីអំពីបញ្ហាពិភពលោក តើមនុស្សខ្លះបានសម្ដែងការព្រួយបារម្ភយ៉ាងដូចម្ដេច?
នៅឆ្នាំ២០០៦ លោកស្ទេផាន ហគីងដែលជាអ្នករូបវិទ្យាម្នាក់បានសួរថា៖«ក្នុងពិភពលោកដែលច្របូកច្របល់ខាងនយោបាយ សង្គម និងបរិស្ថាន តើមនុស្សជាតិអាចរស់បាន១០០ឆ្នាំទៀតយ៉ាងដូចម្ដេច?»។ ក្នុងទស្សនាវដ្ដីមួយ មានអត្ថបទដែលចែងថា៖ «យើងមិនបានបំបាត់ចោលភាពក្រីក្រឬធ្វើឲ្យមានសន្ដិភាពពាសពេញពិភពលោកទេ។ ក៏ប៉ុន្តែ តាមមើលទៅ យើងបានធ្វើឲ្យមានស្ថានភាពផ្ទុយពីនោះវិញ។ នេះមិនបានសេចក្ដីថា យើងមិនបានព្យាយាមសោះនោះទេ។ យើងបានសាកល្បងសព្វគ្រប់ហើយ ពោលគឺរបបកុម្មុយនីស្ត និងសេដ្ឋកិច្ចផ្សារសេរី ក៏បានសាកល្បងអង្គការសម្ព័ន្ធប្រជាជាតិ និងការរារាំងសង្គ្រាមនុយក្លេអ៊ែរ។ យើងបានធ្វើសង្គ្រាមជាច្រើនក្នុងបំណង‹បំបាត់សង្គ្រាម›ទាំងឡាយ តែមិនបានជោគជ័យទេ» (New Statesman)។
២. បន្ដិចទៀត តើព្រះយេហូវ៉ានឹងបង្ហាញយ៉ាងណាថាលោកមានសិទ្ធិត្រឹមត្រូវដើម្បីគ្រប់គ្រងលើផែនដី?
២ ពាក្យសម្ដីដូចខាងលើនេះ មិនធ្វើឲ្យពួកអ្នកបម្រើព្រះយេហូវ៉ាភ្ញាក់ផ្អើលទេ។ គម្ពីរប្រាប់យើងថាមនុស្សមិនបានត្រូវបង្កើតមកដើម្បីគ្រប់គ្រងដោយខ្លួនឯងឡើយ។ (យេ. ១០:២៣) មានតែព្រះយេហូវ៉ាប៉ុណ្ណោះទេដែលមានសិទ្ធិត្រឹមត្រូវធ្វើជាម្ចាស់ដ៏ឧត្តមបំផុតរបស់យើង។ ហេតុនេះ លោកមានសិទ្ធិបង្កើតខ្នាតតម្រាសម្រាប់យើង ប្រាប់យើងអំពីគោលដៅដែលយើងគួរមានក្នុងជីវិត ហើយណែនាំយើងឆ្ពោះទៅសម្រេចគោលដៅនោះ។ មួយវិញសោត បន្ដិចទៀតលោកនឹងប្រើអំណាចរបស់លោកដើម្បីបញ្ចប់ការសាកល្បងរបស់មនុស្សដើម្បីគ្រប់គ្រងដោយខ្លួនឯងដែលមិនបានជោគជ័យ។ ដំណាលគ្នានេះ លោកនឹងបំផ្លាញអស់អ្នកដែលបដិសេធសិទ្ធិគ្រប់គ្រងរបស់លោក។ បើព្រះយេហូវ៉ាមិនធ្វើដូច្នេះទេ នោះពួកគេនឹងធ្វើឲ្យមនុស្សនៅជាប់ជាខ្ញុំបម្រើនៃភាពខុសឆ្គង ភាពមិនល្អឥតខ្ចោះ និងជាខ្ញុំបម្រើមេកំណាចសាថានដែលជា«ព្រះនៃរបៀបរបបពិភពលោកនេះ»។—២កូ. ៤:៤
៣. តើអេសាយបានទាយយ៉ាងណាអំពីមេស្ស៊ី?
៣ ក្នុងពិភពលោកថ្មីដែលក្លាយទៅជាសួនឧទ្យាន ព្រះយេហូវ៉ានឹងប្រើសិទ្ធិគ្រប់គ្រងរបស់លោកដែលប្រកបដោយសេចក្ដីស្រឡាញ់ ដើម្បីជាប្រយោជន៍ដល់មនុស្សជាតិ តាមរយៈរាជាណាចក្រមេស្ស៊ី។ (ដាន. ៧:១៣, ១៤) ស្តីអំពីស្តេចនៃរាជាណាចក្រនោះ អេសាយបានទាយថា៖ «មានលំពង់១នឹងដុះចេញពីគល់របស់អ៊ីសាយ ហើយមែក១ដែលចេញពីឫសគាត់ នឹងកើតមានផលផ្លែ។ ព្រះវិញ្ញាណនៃព្រះយេហូវ៉ានឹងសណ្ឋិតនៅលើអ្នកនោះ គឺជាព្រះវិញ្ញាណនៃប្រាជ្ញានឹងយោបល់ ជាព្រះវិញ្ញាណនៃគំនិតវាងវៃនឹងឫទ្ធានុភាព ជាព្រះវិញ្ញាណនៃសេចក្ដីចេះដឹង នឹងសេចក្ដីកោតខ្លាចដល់ព្រះយេហូវ៉ា»។ (អេ. ១១:១, ២) ស្តីអំពីលោកយេស៊ូគ្រិស្តដែលជា‹លំពង់ដែលដុះចេញពីគល់របស់អ៊ីសាយ› តើតាមវិធីជាក់លាក់ណាដែលសកម្មពលរបស់ព្រះបានធ្វើឲ្យលោកមានគុណសម្បត្ដិគ្រប់គ្រាន់ដើម្បីគ្រប់គ្រងមនុស្ស? តើការគ្រប់គ្រងរបស់លោកនឹងនាំមកនូវពរអ្វីខ្លះ? តើយើងត្រូវធ្វើអ្វីដើម្បីទទួលពរទាំងនោះ?
ព្រះធ្វើឲ្យលោកយេស៊ូមានគុណសម្បត្ដិគ្រប់គ្រាន់ ដើម្បីគ្រប់គ្រង
៤-៦. ដើម្បីអាចបម្រើជាសម្ដេចសង្ឃ ចៅក្រម និងជាស្តេចដែលមានប្រាជ្ញានិងមានចិត្តមេត្ដាករុណា តើលោកយេស៊ូមានចំណេះបែបណា?
៤ ព្រះយេហូវ៉ាចង់ឲ្យមនុស្សដែលជាបណ្ដារាស្ត្ររបស់លោកបានល្អឥតខ្ចោះឡើងវិញ ក្រោមការដឹកនាំរបស់សម្ដេចសង្ឃ ចៅក្រម និងស្តេចដែលពិតជាមានប្រាជ្ញានិងមានចិត្តមេត្ដាករុណា។ នេះជាមូលហេតុដែលព្រះជ្រើសរើសលោកយេស៊ូគ្រិស្ត ដែលលោកបានជួយឲ្យមានគុណសម្បត្ដិគ្រប់គ្រាន់ដើម្បីទទួលភារកិច្ចសំខាន់បំផុតទាំងនោះ តាមរយៈសកម្មពលបរិសុទ្ធ។ សូមពិចារណាមូលហេតុខ្លះដែលលោកយេស៊ូនឹងបំពេញយ៉ាងល្អឥតខ្ចោះនូវភារកិច្ចដែលព្រះប្រគល់ឲ្យ។
៥ លោកយេស៊ូមានចំណេះជ្រៅជ្រះបំផុតអំពីព្រះ។ បុត្រតែមួយរបស់ព្រះបានស្គាល់បិតានៅស្ថានសួគ៌យូរជាងអ្នកណាទាំងអស់ ទំនងជារាប់ពាន់លានឆ្នាំមកហើយ។ ក្នុងអំឡុងគ្រានោះ លោកយេស៊ូទទួលបានចំណេះអំពីព្រះយេហូវ៉ាយ៉ាងពេញលេញដល់ម្ល៉េះបានជាគម្ពីរពណ៌នាអំពីលោកថា«លោកនិងព្រះដែលយើងមើលមិនឃើញ មានលក្ខណៈដូចគ្នាទាំងស្រុង»។ (កូឡ. ១:១៥) លោកយេស៊ូបានមានប្រសាសន៍ថា៖ «អ្នកណាដែលបានឃើញខ្ញុំ អ្នកនោះបានឃើញបិតាដែលនៅស្ថានសួគ៌ហើយ»។—យ៉ូន. ១៤:៩
៦ បន្ទាប់ពីព្រះយេហូវ៉ា លោកយេស៊ូមានចំណេះដឹងច្រើនជាងអ្វីៗទាំងអស់ដែលព្រះបានបង្កើតមក រួមទាំងមនុស្សជាតិ។ កូឡុស ១:១៦, ១៧ចែងថា៖ «អ្វីៗឯទៀតទាំងអស់នៅស្ថានសួគ៌និងនៅផែនដីបានត្រូវបង្កើតមកតាមរយៈលោក[បុត្ររបស់ព្រះ] គឺអ្វីដែលមនុស្សមើលឃើញនិងអ្វីដែលមនុស្សមើលមិនឃើញ . . . ម្យ៉ាងទៀត មានលោកមុនអ្វីៗឯទៀតទាំងអស់ ហើយតាមរយៈលោក អ្វីៗឯទៀតទាំងអស់បានត្រូវបង្កើតមក»។ សូមគិតអំពីចំណុចនេះ! ជា«មេជាង»របស់ព្រះ លោកយេស៊ូបានរួមចំណែកក្នុងការបង្កើតអ្វីៗឯទៀតទាំងអស់។ ហេតុនេះ លោកយល់យ៉ាងល្អិតល្អន់អំពីសកលលោកទាំងមូល រួមទាំងខួរក្បាលដ៏អស្ចារ្យរបស់មនុស្សផង។ ត្រូវហើយ គម្ពីរបានប្រៀបគ្រិស្តទៅនឹងប្រាជ្ញា ហើយនេះពិតជាសមត្រឹមត្រូវមែន!—សុភ. ៨:១២, ២២, ៣០, ៣១
៧, ៨. តើសកម្មពលរបស់ព្រះបានជួយលោកយេស៊ូយ៉ាងដូចម្ដេចក្នុងកិច្ចបម្រើផ្សាយរបស់លោក?
៧ លោកយេស៊ូបានត្រូវរើសតាំងដោយសកម្មពលបរិសុទ្ធរបស់ព្រះ។ លោកយេស៊ូបានពោលថា៖ «សកម្មពលរបស់ព្រះយេហូវ៉ាសណ្ឋិតលើខ្ញុំ ពីព្រោះលោកបានរើសតាំងខ្ញុំដើម្បីប្រកាសដំណឹងល្អដល់អ្នកក្រីក្រ ក៏បានចាត់ខ្ញុំឲ្យផ្សព្វផ្សាយប្រាប់អ្នកដែលជាប់ជាឈ្លើយអំពីការដោះលែង ប្រាប់អ្នកដែលងងឹតភ្នែកអំពីការមើលឃើញឡើងវិញ ហើយរំដោះអស់អ្នកដែលត្រូវគេជិះជាន់ ថែមទាំងផ្សព្វផ្សាយអំពីឆ្នាំដែលព្រះយេហូវ៉ាពេញចិត្ត»។ (លូក. ៤:១៨, ១៩) កាលដែលលោកយេស៊ូទទួលការជ្រមុជទឹក មើលទៅសកម្មពលបរិសុទ្ធបានឲ្យលោកដឹងអំពីអ្វីៗដែលលោកបានរៀនមុនលោកកើតជាមនុស្ស នេះរួមបញ្ចូលអ្វីដែលព្រះចង់ឲ្យលោកបំពេញក្នុងអំឡុងកិច្ចបម្រើរបស់លោកជាមេស្ស៊ី។—សូមអាន អេសាយ ៤២:១; លូកា ៣:២១, ២២; យ៉ូហាន ១២:៥០
៨ ដោយសារលោកយេស៊ូបានទទួលអំណាចពីសកម្មពលបរិសុទ្ធ ហើយមានរូបកាយនិងគំនិតល្អឥតខ្ចោះ នោះលោកមិនគ្រាន់តែជាបុរសឧត្តមបំផុតដែលធ្លាប់រស់នៅលើផែនដីប៉ុណ្ណោះទេ តែលោកក៏ជាគ្រូឧត្តមបំផុតដែរ។ ហេតុនេះ ពួកអ្នកដែលបានស្ដាប់លោក «បានកោតស្ងើចក្រៃលែងនឹងសេចក្ដីបង្រៀនរបស់លោក»។ (ម៉ាថ. ៧:២៨) មូលហេតុមួយ គឺលោកយេស៊ូអាចប្រាប់ពីដើមហេតុនៃបញ្ហារបស់មនុស្សជាតិ ពោលគឺអំពើខុសឆ្គង ភាពមិនល្អឥតខ្ចោះ និងកង្វះចំណេះដឹងអំពីព្រះ។ មួយវិញទៀត លោកក៏ជ្រាបអំពីគំនិតរបស់មនុស្ស ហើយបានប្រព្រឹត្តទៅលើពួកគេស្របតាមគំនិតនោះដែរ។—ម៉ាថ. ៩:៤; យ៉ូន. ១:៤៧
៩. ដោយសញ្ជឹងគិតអំពីអ្វីដែលលោកយេស៊ូបានឆ្លងកាត់ពេលលោកនៅផែនដី តើអ្នកមានទំនុកចិត្តកាន់តែខ្លាំងឡើងយ៉ាងណាទៅលើលោកយេស៊ូជាអ្នកគ្រប់គ្រង?
៩ លោកយេស៊ូបានរស់នៅជាមនុស្ស។ ដោយសារលោកយេស៊ូធ្លាប់រស់នៅជាមនុស្ស ហើយបានសេពគប់ជាមួយមនុស្សមិនល្អឥតខ្ចោះ នេះបានជួយលោកច្រើនណាស់ឲ្យមានគុណសម្បត្ដិគ្រប់គ្រាន់ដើម្បីធ្វើជាស្តេច។ សាវ័កប៉ូលបានសរសេរថា៖ «លោក[យេស៊ូ]ត្រូវក្លាយទៅជាដូច‹បងប្អូន›របស់លោកទាំងស្រុង ដើម្បីលោកអាចក្លាយទៅជាសម្ដេចសង្ឃដែលស្មោះត្រង់ហើយមានសេចក្ដីមេត្ដាករុណាក្នុងកិច្ចបម្រើព្រះ ដើម្បីជូនគ្រឿងបូជាសម្រាប់ផ្សះផ្សាចំណងមិត្តភាពរវាងមនុស្សនិងព្រះ ហើយលោះមនុស្សពីការខុសឆ្គងរបស់ពួកគេ។ ដោយសារលោកបានរងទុក្ខពេលដែលទទួលការល្បងល នោះលោកក៏អាចចូលមកជួយពួកអ្នកដែលកំពុងទទួលការល្បងលដែរ»។ (ហេ. ២:១៧, ១៨) ដោយសារលោកយេស៊ូ«បានទទួលការល្បងល» លោកអាចយល់អារម្មណ៍ពួកអ្នកដែលទទួលការល្បងល។ លោកយេស៊ូបានបង្ហាញឲ្យឃើញច្បាស់នូវចិត្តមេត្ដាករុណារបស់លោកក្នុងកិច្ចបម្រើផ្សាយរបស់លោក។ មនុស្សឈឺ មនុស្សពិការ អ្នកដែលត្រូវគេជិះជាន់ ហើយសូម្បីតែកូនក្មេងក៏មានអារម្មណ៍ស្រួលចង់ចូលមកជិតលោកដែរ។ (ម៉ាក. ៥:២២-២៤, ៣៨-៤២; ១០:១៤-១៦) មនុស្សរាបសានិងពួកអ្នកដែលមានចិត្តប្រាថ្នាយ៉ាងខ្លាំងចង់រៀនអំពីព្រះ ក៏ចង់មករកលោកដែរ។ ផ្ទុយទៅវិញ មនុស្សមានអំណួត មនុស្សក្រអឺតក្រទមនិងពួកអ្នកដែល«គ្មានសេចក្ដីស្រឡាញ់ចំពោះព្រះ»បានបដិសេធ ស្អប់ ហើយប្រឆាំងលោក។—យ៉ូន. ៥:៤០-៤២; ១១:៤៧-៥៣
១០. តើតាមរបៀបដ៏អស្ចារ្យណាដែលលោកយេស៊ូបានបង្ហាញសេចក្ដីស្រឡាញ់ចំពោះយើង?
១០ លោកយេស៊ូបានលះបង់ជីវិតដើម្បីជាប្រយោជន៍ដល់យើង។ ប្រហែលទីសំអាងជាក់ស្តែងបំផុតដែលបង្ហាញថាលោកយេស៊ូជាអ្នកគ្រប់គ្រងប្រសើរជាងគេ គឺដោយសារលោកសុខចិត្តស្លាប់ដើម្បីយើង។ (សូមអាន ទំនុកតម្កើង ៤០:៦-១០) គ្រិស្តបានមានវាចាថា៖ «គ្មានអ្នកណាមានសេចក្ដីស្រឡាញ់ច្រើនជាងអ្នកដែលលះបង់ជីវិតដើម្បីមិត្តសម្លាញ់របស់ខ្លួនឡើយ»។ (យ៉ូន. ១៥:១៣) ត្រូវហើយ មិនដូចអ្នកគ្រប់គ្រងជាមនុស្សមិនល្អឥតខ្ចោះ ដែលតែងតែរស់នៅយ៉ាងហ៊ឺហាដោយសារលុយកាក់ដែលបានមកពីបណ្ដារាស្ត្ររបស់ពួកគេ លោកយេស៊ូបានលះបង់ជីវិតដើម្បីមនុស្សជាតិ។—ម៉ាថ. ២០:២៨
លោកយេស៊ូទទួលអំណាច ដើម្បីប្រើថ្លៃលោះជាប្រយោជន៍ដល់មនុស្សជាតិ
១១. ហេតុអ្វីយើងអាចមានទំនុកចិត្តទាំងស្រុងទៅលើលោកយេស៊ូជាអ្នកលោះយើង?
១១ ក្នុងនាមជាសម្ដេចសង្ឃ លោកយេស៊ូគឺជាអ្នកនាំមុខក្នុងការប្រើគ្រឿងបូជារបស់លោកជាថ្លៃលោះដើម្បីជាប្រយោជន៍ដល់មនុស្សជាតិ នេះពិតជាសមត្រឹមត្រូវមែន! តាមពិត ក្នុងអំឡុងកិច្ចបម្រើរបស់លោក លោកយេស៊ូបានបង្ហាញទុកជាមុនអំពីអ្វីដែលលោកនឹងធ្វើជាអ្នកលោះយើងក្នុងអំឡុងការគ្រប់គ្រងមួយពាន់ឆ្នាំរបស់លោក ហើយបើយើងស្មោះត្រង់ យើងអាចទទួលប្រយោជន៍ពីការគ្រប់គ្រងនោះ។ លោកបានធ្វើឲ្យមនុស្សឈឺ មនុស្សពិការបានជា បានប្រោសមនុស្សស្លាប់ឲ្យរស់ឡើងវិញ ផ្ដល់អាហារឲ្យមនុស្សយ៉ាងច្រើន ហើយថែមទាំងបានគ្រប់គ្រងកម្លាំងធម្មជាតិទៀតផង។ (ម៉ាថ. ៨:២៦; ១៤:១៤-២១; លូក. ៧:១៤, ១៥) មួយវិញទៀត លោកបានធ្វើអ្វីៗទាំងអស់នេះ មិនមែនចង់បង្ហាញថាលោកមានអំណាចនិងឫទ្ធានុភាពទេ តែលោកចង់បង្ហាញចិត្តមេត្ដាករុណានិងសេចក្ដីស្រឡាញ់។ លោកបានស្រដីទៅកាន់បុរសកើតឃ្លង់ម្នាក់ដែលអង្វរលោកឲ្យធ្វើឲ្យគាត់ជាសះស្បើយថា៖ «ខ្ញុំចង់ធ្វើឲ្យអ្នកជាស្អាតមែន»។ (ម៉ាក. ១:៤០, ៤១) លោកយេស៊ូនឹងបង្ហាញសេចក្ដីមេត្ដាករុណាដដែលនោះក្នុងអំឡុងការគ្រប់គ្រងមួយពាន់ឆ្នាំរបស់លោក តែលោកនឹងធ្វើដូច្នេះនៅទូទាំងពិភពលោក។
១២. តើអេសាយ ១១:៩នឹងបានសម្រេចយ៉ាងដូចម្ដេច?
១២ គ្រិស្តនិងពួកអ្នកគ្រប់គ្រងជាមួយលោក ក៏នឹងបន្តកិច្ចការបង្រៀនមនុស្សដែរអំពីព្រះដែលលោកយេស៊ូបានចាប់ផ្ដើមជិត២.០០០ឆ្នាំមុន។ ដូច្នេះ ពាក្យនៅអេសាយ ១១:៩នឹងបានសម្រេច ពាក្យទាំងនោះគឺ«គ្រប់ទាំងអស់នឹងស្គាល់ព្រះយេហូវ៉ានៅពេញពាសលើផែនដី ដូចជាទឹកនៅពេញពាសក្នុងសមុទ្រដែរ»។ ការអប់រំនោះដែលមកពីព្រះច្បាស់ជារួមបញ្ចូលការណែនាំអំពីរបៀបថែរក្សាផែនដីនិងភាវរស់ ដូចព្រះបានបង្គាប់អាដាមឲ្យធ្វើពីដំបូង។ នៅដំណាច់ការគ្រប់គ្រងមួយពាន់ឆ្នាំ គោលបំណងដើមរបស់ព្រះដែលបានចែងនៅលោកុប្បត្តិ ១:២៨នឹងបានសម្រេច ហើយមនុស្សនឹងទទួលប្រយោជន៍យ៉ាងពេញលេញពីគ្រឿងបូជាដែលជាថ្លៃលោះ។
លោកយេស៊ូបានទទួលអំណាចវិនិច្ឆ័យសេចក្ដី
១៣. តើលោកយេស៊ូបានបង្ហាញយ៉ាងណាថាលោកស្រឡាញ់សេចក្ដីសុចរិត?
១៣ គ្រិស្តគឺជាអ្នក«ដែលព្រះបានចេញបង្គាប់ឲ្យធ្វើជាចៅក្រមនៃមនុស្សរស់និងមនុស្សស្លាប់»។ (សកម្ម. ១០:៤២) ដោយដឹងថាលោកយេស៊ូមិនអាចខូចរលួយ ហើយសេចក្ដីសុចរិតនិងសេចក្ដីស្មោះត្រង់គឺប្រៀបដូចជាខ្សែក្រវាត់ដែលក្រវាត់ចង្កេះរបស់លោកយ៉ាងតឹង នេះពិតជាលើកទឹកចិត្តយើងមែន! (អេ. ១១:៥) លោកបានបង្ហាញថាលោកស្អប់ការលោភលន់ អំពើពុតត្បុតនិងអំពើអាក្រក់ឯទៀត ហើយលោកបានរិះគន់យ៉ាងខ្លាំងពួកអ្នកដែលមិនខ្វល់នឹងទុក្ខវេទនារបស់អ្នកឯទៀត។ (ម៉ាថ. ២៣:១-៨, ២៥-២៨; ម៉ាក. ៣:៥) ម្យ៉ាងទៀត លោកយេស៊ូបានបង្ហាញថាសម្បកក្រៅរបស់មនុស្សមិនអាចបំភាន់លោកបានឡើយ ពីព្រោះ«លោកជ្រាបអំពីអ្វីដែលនៅក្នុងចិត្តមនុស្សជាតិ»។—យ៉ូន. ២:២៥
១៤. តើឥឡូវនេះលោកយេស៊ូកំពុងបង្ហាញយ៉ាងដូចម្ដេចថាលោកស្រឡាញ់សេចក្ដីសុចរិតនិងយុត្ដិធម៌? ហើយតើយើងគួរសួរខ្លួនយើងសំណួរអ្វី?
១៤ លោកយេស៊ូបន្តបង្ហាញថាលោកស្រឡាញ់សេចក្ដីសុចរិតនិងយុត្ដិធម៌ ដោយត្រួតពិនិត្យកិច្ចការផ្សព្វផ្សាយនិងការបង្រៀនធំបំផុតក្នុងប្រវត្ដិសាស្ត្រពិភពលោក។ កិច្ចការនេះត្រូវសម្រេចដល់កម្រិតដែលព្រះពេញចិត្តទាំងស្រុង ហើយគ្មានមនុស្សណា រដ្ឋាភិបាលណានិងវិញ្ញាណកំណាចណាអាចរារាំងកិច្ចការនេះបានឡើយ។ ដូច្នេះ យើងអាចទុកចិត្តទាំងស្រុងថាកាលណាចប់សង្គ្រាមហាម៉ាគេដូន សេចក្ដីយុត្ដិធម៌របស់ព្រះនឹងឈ្នះ។ (សូមអាន អេសាយ ១១:៤; ម៉ាថាយ ១៦:២៧) សូមសួរខ្លួនអ្នកថា៖ ‹ក្នុងកិច្ចផ្សព្វផ្សាយ តើខ្ញុំបង្ហាញចិត្តគំនិតរបស់លោកយេស៊ូចំពោះមនុស្សឬទេ? តើខ្ញុំបម្រើព្រះយេហូវ៉ាអស់ពីសមត្ថភាពរបស់ខ្ញុំឬទេ បើសុខភាពខ្ញុំឬកាលៈទេសៈរបស់ខ្ញុំដាក់កម្រិតទៅលើអ្វីដែលខ្ញុំអាចធ្វើ?›។
១៥. តើអ្នកគួរចាំអ្វីជានិច្ចដែលអាចជួយអ្នកឲ្យបម្រើព្រះអស់ពីសមត្ថភាពរបស់អ្នក?
១៥ បើយើងចាំជានិច្ចថាកិច្ចផ្សព្វផ្សាយគឺជាកិច្ចការរបស់ព្រះ នេះនឹងជួយយើងឲ្យបម្រើលោកអស់ពីកម្លាំងកាយចិត្ត។ លោកបានបង្គាប់ឲ្យធ្វើកិច្ចការនោះ លោកដឹកនាំកិច្ចការនោះតាមរយៈបុត្ររបស់លោក ហើយតាមរយៈសកម្មពលបរិសុទ្ធ លោកពង្រឹងកម្លាំងពួកអ្នកដែលរួមចំណែកក្នុងកិច្ចការនោះ។ តើអ្នកឲ្យតម្លៃឯកសិទ្ធិជាអ្នករួមការងារជាមួយនឹងព្រះ ហើយបម្រើព្រះជាមួយបុត្រលោកដែលនៅក្រោមការដឹកនាំនៃសកម្មពលបរិសុទ្ធឬទេ? គ្មានអ្នកណាក្រៅពីព្រះយេហូវ៉ាទេដែលជំរុញចិត្តមនុស្សជាង៧លាននាក់ដែលភាគច្រើនត្រូវគេចាត់ទុកថា«មិនបានរៀនសូត្រ»ឲ្យរួមចំណែកក្នុងការផ្សាយដំណឹងអំពីរាជាណាចក្រដល់មនុស្សនៅ២៣៦ប្រទេស។—សកម្ម. ៤:១៣
ចូរទទួលពរតាមរយៈគ្រិស្ត!
១៦. តើលោកុប្បត្តិ ២២:១៨ បង្ហើបឲ្យដឹងយ៉ាងណាអំពីពររបស់ព្រះ?
១៦ ព្រះយេហូវ៉ាបានប្រាប់អាប្រាហាំថា៖ «គ្រប់ទាំងសាសន៍នៅផែនដីនឹងបានពរដោយសារពូជឯង ពីព្រោះឯងបានស្ដាប់តាមពាក្យអញ»។ (លោ. ២២:១៨) នេះបង្ហើបឲ្យដឹងថា ពួកអ្នកដែលចាត់ទុកការបម្រើព្រះនិងបុត្រលោកជាកិត្ដិយស អាចទន្ទឹងរង់ចាំដោយមានទំនុកចិត្តថានឹងទទួលពរពីមេស្ស៊ីដែលជាពូជសន្យា ហើយសព្វថ្ងៃ ពួកគេជាប់រវល់ក្នុងការបម្រើព្រះដោយចាំពីពរទាំងនោះ។
១៧, ១៨. តើព្រះយេហូវ៉ាបានសន្យាអ្វីខ្លះនៅចោទិយកថា ២៨:២? ហើយតើនេះមានន័យយ៉ាងណាចំពោះយើង?
១៧ នៅពេលមួយ ព្រះយេហូវ៉ាបានមានប្រសាសន៍ទៅកាន់ពូជអាប្រាហាំ ពោលគឺប្រជាជាតិអ៊ីស្រាអែលថា៖ «អស់ទាំងពរទាំងនេះ[ដែលបានចែងក្នុងកិច្ចព្រមព្រៀងខាងច្បាប់]នឹងបានផ្សាយមកលើឯង ហើយរត់មករកឯងផង គឺបើឯងនឹងស្ដាប់តាមព្រះបន្ទូលនៃព្រះយេហូវ៉ាជាព្រះនៃឯង»។ (ចោ. ២៨:២) ពាក្យនេះក៏អាចជាប់ទាក់ទងនឹងអ្នកបម្រើព្រះសព្វថ្ងៃនេះដែរ។ បើអ្នកប្រាថ្នាចង់បានពរពីព្រះយេហូវ៉ា ចូរ«ស្ដាប់»ប្រសាសន៍លោកជានិច្ច។ រួចពររបស់លោកនឹង‹មកលើអ្នក ហើយរត់មករកអ្នក›។ ក៏ប៉ុន្តែ តើការ«ស្ដាប់»រួមបញ្ចូលអ្វីខ្លះ?
១៨ ការស្ដាប់ប្រាកដជារួមបញ្ចូលការពិចារណាយ៉ាងដិតដល់អំពីអ្វីដែលបណ្ដាំរបស់ព្រះបានចែង និងអំពីការណែនាំដែលប្រៀបដូចជាអាហារដែលព្រះផ្ដល់ឲ្យ។ (ម៉ាថ. ២៤:៤៥) នេះក៏មានន័យថាស្ដាប់បង្គាប់ព្រះនិងបុត្ររបស់លោកដែរ។ លោកយេស៊ូបានពោលថា៖ «មិនមែនអស់អ្នកដែលនិយាយមកខ្ញុំថា៖ ‹លោកម្ចាស់! លោកម្ចាស់!› នឹងចូលក្នុងរាជាណាចក្រស្ថានសួគ៌ឡើយ តែគឺអ្នកណាដែលធ្វើតាមបំណងប្រាថ្នានៃបិតារបស់ខ្ញុំដែលស្ថិតនៅស្ថានសួគ៌វិញ»។ (ម៉ាថ. ៧:២១) ម្យ៉ាងទៀត ស្ដាប់ព្រះមានន័យថាស្ម័គ្រចិត្តធ្វើតាមអ្វីដែលព្រះបានរៀបចំឡើង ពោលគឺក្រុមជំនុំគ្រិស្តសាសនិកដែលមានពួកអ្នកចាស់ទុំដែលជា«អំណោយជាមនុស្ស»។—អេភ. ៤:៨
១៩. តើយើងអាចទទួលពរតាមវិធីណា?
១៩ ក្នុងចំណោម«អំណោយជាមនុស្ស»ទាំងនោះគឺមានសមាជិកគណៈអភិបាលដែលតំណាងឲ្យក្រុមជំនុំគ្រិស្តសាសនិកទាំងមូល។ (សកម្ម. ១៥:២, ៦) តាមពិត ចិត្តគំនិតរបស់យើងចំពោះបងប្អូនរួមជំនឿរបស់គ្រិស្តគឺជាកត្ដាសំខាន់ដែលនឹងបញ្ជាក់ថាយើងនឹងត្រូវវិនិច្ឆ័យយ៉ាងដូចម្ដេចក្នុងអំឡុងគ្រាទុក្ខវេទនាដ៏ខ្លាំង។ (ម៉ាថ. ២៥:៣៤-៤០) ហេតុនេះ វិធីមួយដែលយើងអាចទទួលពរ គឺដោយគាំទ្រយ៉ាងស្មោះពួកអ្នកដែលព្រះបានរើសតាំង។
២០. (ក) តើអ្វីទៅជាភារកិច្ចសំខាន់ចម្បងរបស់«អំណោយជាមនុស្ស»? (ខ) តើតាមរបៀបណាដែលយើងអាចបង្ហាញថាយើងដឹងគុណបងប្អូនទាំងនោះ?
២០ «អំណោយជាមនុស្ស»ក៏រួមបញ្ចូលសមាជិកការិយាល័យសាខា អ្នកធ្វើដំណើរត្រួតពិនិត្យនិងពួកអ្នកចាស់ទុំក្នុងក្រុមជំនុំ ហើយពួកគាត់ទាំងអស់គ្នាបានត្រូវតែងតាំងដោយសកម្មពលបរិសុទ្ធ។ (សកម្ម. ២០:២៨) ភារកិច្ចសំខាន់ចម្បងរបស់បងប្អូនទាំងនេះគឺពង្រឹងរាស្ត្ររបស់ព្រះ «រហូតដល់ . . . ទាំងអស់គ្នាមានឯកភាពក្នុងជំនឿនិងចំណេះត្រឹមត្រូវអំពីបុត្រព្រះ រហូតដល់មានភាពជាបុរសពេញវ័យ ហើយស្មើកម្រិតកម្ពស់របស់គ្រិស្ត»។ (អេភ. ៤:១៣) ពិតមែន ពួកគាត់ក៏មិនល្អឥតខ្ចោះដូចយើងទាំងអស់គ្នាដែរ។ ក៏ប៉ុន្តែ យើងទទួលប្រយោជន៍ កាលណាយើងដឹងគុណចំពោះការណែនាំដែលប្រកបដោយសេចក្ដីស្រឡាញ់របស់ពួកគាត់ ហើយទទួលយកការណែនាំនោះ។—ហេ. ១៣:៧, ១៧
២១. ហេតុអ្វីជាការបន្ទាន់ឲ្យយើងស្ដាប់បង្គាប់បុត្ររបស់ព្រះ?
២១ បន្ដិចទៀត គ្រិស្តនឹងចាត់វិធានការប្រឆាំងរបៀបរបបដ៏អាក្រក់នៃពិភពលោកនេះ។ កាលណាការនោះកើតឡើង ជីវិតយើងនឹងអាស្រ័យទៅលើការវិនិច្ឆ័យរបស់លោកយេស៊ូ ពីព្រោះលោកបានទទួលអំណាចពីព្រះដើម្បីនាំ«មនុស្សមួយក្រុមធំ» ទៅឯ«រន្ធទឹកដែលផ្ដល់ជីវិត»។ (បប. ៧:៩, ១៦, ១៧) ដូច្នេះ ឥឡូវនេះ ចូរយើងខំប្រឹងអស់ពីសមត្ថភាពដើម្បីចុះចូលដោយស្ម័គ្រចិត្តនិងដោយចិត្តកតញ្ញូចំពោះស្តេចដែលនៅក្រោមការដឹកនាំនៃសកម្មពលរបស់ព្រះយេហូវ៉ា។
តើអ្នកបានរៀនអ្វីខ្លះពី . . .
[រូបភាពនៅទំព័រ២៣]
លោកយេស៊ូបង្ហាញឲ្យឃើញច្បាស់នូវចិត្តមេត្ដាករុណារបស់លោក ពេលលោកប្រោសកូនស្រីរបស់យ៉ែរ៉ូសឲ្យរស់ឡើងវិញ
[រូបភាពនៅទំព័រ២៤]
លោកយេស៊ូកំពុងត្រួតពិនិត្យ កិច្ចការផ្សព្វផ្សាយធំបំផុតក្នុងប្រវត្ដិសាស្ត្រ