បងប្រុសខេណិត ឃុកនិងបងស្រីចេមីដែលជាប្រពន្ធរបស់គាត់
សមាជិកថ្មីនៃគណៈអភិបាល
នៅពេលព្រឹកថ្ងៃពុធ ទី២៤ ខែមករា ឆ្នាំ២០១៨ ក្រុមគ្រួសារបេតអែលនៅសហរដ្ឋអាម៉េរិកនិងប្រទេសកាណាដា សប្បាយរីករាយដោយបានឮសេចក្ដីជូនដំណឹងដ៏ពិសេសមួយ គឺថាបងប្រុសខេណិត ឃុក បានត្រូវតែងតាំងជាសមាជិកគណៈអភិបាលនៃសាក្សីព្រះយេហូវ៉ា។
បងឃុកបានកើតនិងធំឡើងនៅរដ្ឋប៉ិនស៊ីវ៉ានី សហរដ្ឋអាម៉េរិក។ ពេលគាត់រៀនជិតចប់វិទ្យាល័យ គាត់បានរៀនសេចក្ដីពិតពីសិស្សរួមថ្នាក់ ហើយក្រោយមកគាត់បានទទួលការជ្រមុជទឹកនៅថ្ងៃទី៧ ខែមិថុនា ឆ្នាំ១៩៨០។ គាត់បានចាប់ផ្ដើមបម្រើជាអ្នកត្រួសត្រាយពេញពេល នៅថ្ងៃទី១ ខែកញ្ញា ឆ្នាំ១៩៨២។ ក្រោយពីត្រួសត្រាយអស់រយៈពេលពីរឆ្នាំ គាត់បានត្រូវអញ្ជើញឲ្យចូលបម្រើនៅបេតអែល ហើយបានចាប់ផ្ដើមបំពេញកិច្ចបម្រើរបស់គាត់នៅបេតអែលក្រុងវ៉លឃីល រដ្ឋញូវយ៉ក នៅថ្ងៃទី១២ ខែតុលា ឆ្នាំ១៩៨៤។
អស់រយៈពេល២៥ឆ្នាំ បងឃុកបានបំពេញភារកិច្ចផ្សេងៗទាំងខាងផ្នែកបោះពុម្ពទាំងខាងផ្នែកការិយាល័យបេតអែល។ ក្នុងអំឡុងពេលនោះ នាឆ្នាំ១៩៩៦ គាត់បានរៀបការជាមួយនឹងបងស្រីចេមី ហើយបងចេមីបានបម្រើជាមួយនឹងគាត់នៅបេតអែលក្រុងវ៉លឃីល។ នៅខែធ្នូ ឆ្នាំ២០០៩ បងឃុកនិងប្រពន្ធរបស់គាត់បានត្រូវចាត់ឲ្យទៅបម្រើនៅមជ្ឈមណ្ឌលអប់រំនៃសមាគមប៉មយាម នៅក្រុងផាតឺសិន រដ្ឋញូវយ៉ក។ នៅទីនោះបងឃុកទទួលភារកិច្ចនៅផ្នែកឆ្លើយតបនឹងសំណួរពីអ្នកអាន។ នៅខែមេសា ឆ្នាំ២០១៦ ក្រោយពីត្រឡប់ទៅបេតអែលនាក្រុងវ៉លឃីលមួយរយៈពេលខ្លី បងឃុកនិងប្រពន្ធរបស់គាត់បានត្រូវចាត់ឲ្យទៅបម្រើនៅបេតអែលនាតំបន់ប៊្រុគ្លីន រដ្ឋញូវយ៉ក។ ប្រាំខែក្រោយមក ពួកគាត់បានរើទៅមន្ទីរចាត់ការពិភពលោក នៅក្រុងវ័រវិក រដ្ឋញូវយ៉ក។ នៅខែមករា ឆ្នាំ២០១៧ បងឃុកបានត្រូវតែងតាំងឲ្យបម្រើជាជំនួយការគណៈកម្មាធិការខាងការនិពន្ធនៃគណៈអភិបាល។