តើលោកអ្នកដឹងឬទេ?
នៅសម័យគម្ពីរ តើអ្នកចាត់ចែងមានភារកិច្ចអ្វីខ្លះ?
នៅសម័យគម្ពីរ អ្នកចាត់ចែងមានភារកិច្ចមើលការខុសត្រូវលើកិច្ចការផ្ទះ ឬទ្រព្យសម្បត្ដិរបស់ម្ចាស់។ ពាក្យភាសាក្រិចនិងភាសាហេប្រឺដែលបកប្រែថា«អ្នកចាត់ចែង» ជួនកាលសំដៅលើអ្នកត្រួតពិនិត្យ ឬអ្នកមើលការខុសត្រូវលើកិច្ចការផ្ទះ។
ពេលយ៉ូសែបដែលជាកូនប្រុសរបស់យ៉ាកុប នៅជាខ្ញុំបម្រើក្នុងស្រុកអេស៊ីប យ៉ូសែបបានទៅជាអ្នកចាត់ចែងក្នុងផ្ទះរបស់ម្ចាស់គាត់។ ម្ចាស់របស់គាត់ដែលជាជនជាតិអេស៊ីប បាន‹ទុករបស់ទាំងអស់នៅក្នុងកណ្ដាប់ដៃយ៉ូសែប›។ (លោ. ៣៩:២-៦) ក្រោយមក ពេលដែលយ៉ូសែបបានទៅជាអ្នកគ្រប់គ្រងដែលមានអំណាចនៅស្រុកអេស៊ីប គាត់បានតែងតាំងអ្នកចាត់ចែងម្នាក់ឲ្យមើលការខុសត្រូវលើកិច្ចការផ្ទះរបស់គាត់។—លោ. ៤៤:៤
នៅសម័យលោកយេស៊ូ ម្ចាស់ដីច្រើនតែរស់នៅក្រុងដែលឆ្ងាយពីកសិដ្ឋានរបស់ពួកគេ។ ដូច្នេះ ម្ចាស់ដីបានតែងតាំងអ្នកចាត់ចែងឲ្យត្រួតពិនិត្យសកម្មភាពប្រចាំថ្ងៃរបស់កម្មករដែលមើលថែកសិដ្ឋាននោះ។
តើនរណាមានគុណសម្បត្ដិគ្រប់គ្រាន់ដើម្បីធ្វើជាអ្នកចាត់ចែង? អ្នកនិពន្ធម្នាក់នៅសតវត្សរ៍ទី១ ដែលជាជនជាតិរ៉ូមឈ្មោះខាលីយ៉ាមិឡា បានរៀបរាប់ថាខ្ញុំបម្រើដែលបានត្រូវតែងតាំងឲ្យធ្វើជាអ្នកចាត់ចែង ឬអ្នកត្រួតពិនិត្យ គួរតែជាបុគ្គលម្នាក់ដែលធ្លាប់«រៀនធ្វើកិច្ចការបានយ៉ាងល្អ»។ គាត់គួរជាអ្នកដែលនឹង«ធ្វើឲ្យប្រាកដថាកម្មករធ្វើកិច្ចការ ប៉ុន្តែគាត់មិនប្រព្រឹត្តដោយគ្មានមេត្ដាឡើយ»។ គាត់បានបន្ថែមថា៖ «អ្វីដ៏សំខាន់បំផុតសម្រាប់អ្នកចាត់ចែងគឺគាត់គួរតែចង់រៀនអ្វីថ្មីៗជានិច្ច ហើយថាគាត់មិនគួរគិតថាគាត់ដឹងរឿងសព្វគ្រប់ទេ»។
បណ្ដាំរបស់ព្រះប្រើឧទាហរណ៍អំពីអ្នកចាត់ចែងនិងកិច្ចការរបស់គាត់ ដើម្បីពន្យល់អំពីសកម្មភាពខ្លះៗដែលកើតឡើងក្នុងក្រុមជំនុំគ្រិស្តសាសនិក។ ជាឧទាហរណ៍ សាវ័កពេត្រុសបានលើកទឹកចិត្តគ្រិស្តសាសនិកឲ្យប្រើសមត្ថភាពដែលព្រះបានផ្ដល់ឲ្យពួកគេដើម្បីបម្រើគ្នាទៅវិញទៅមក «ក្នុងនាមជាអ្នកបម្រើល្អប្រសើរដែលបានទទួលគុណដ៏វិសេសលើសលប់របស់ព្រះ»។—១ពេ. ៤:១០
នៅលូកា ១៦:១-៨ លោកយេស៊ូបានប្រើឧទាហរណ៍អំពីអ្នកចាត់ចែងម្នាក់។ បន្ថែមទៅទៀត ក្នុងទំនាយស្តីអំពីសញ្ញាសម្គាល់នៃវត្តមានរបស់លោកយេស៊ូជាស្តេច លោកបានសន្យានឹងអ្នកកាន់តាមលោកថាលោកនឹងតែងតាំង«ខ្ញុំបម្រើដ៏ស្មោះត្រង់ហើយចេះពិចារណា» ឬក៏«អ្នកបម្រើ[ឬ«ចាត់ចែងកិច្ចការផ្ទះ»]ដ៏ស្មោះត្រង់»។ ភារកិច្ចដ៏សំខាន់របស់អ្នកចាត់ចែងនោះ គឺផ្ដល់ឲ្យពួកអ្នកកាន់តាមគ្រិស្តនូវសេចក្ដីបង្រៀនដែលប្រៀបដូចជាអាហារតាមត្រូវពេលជាទៀងទាត់ ក្នុងអំឡុងគ្រាចុងបញ្ចប់នេះ។ (ម៉ាថ. ២៤:៤៥-៤៧; លូក. ១២:៤២; កំ.ស.) យើងសប្បាយរីករាយដែលយើងអាចទទួលសៀវភៅនិងអ្វីៗជាច្រើនដែលអ្នកបម្រើដ៏ស្មោះត្រង់រៀបចំនិងផ្ដល់ឲ្យនៅទូទាំងពិភពលោក។