ដំណឹងល្អតាមប្រព័ន្ធអ៊ីនធឺណិត
ដោយសារសម័យយើងជឿនលឿនខាងបច្ចេកវិជ្ជា មនុស្សខ្លះទទួលព័ត៌មានតាមរយៈគ្រឿងអេឡិចត្រូនិក ដែលរួមមានប្រព័ន្ធអ៊ីនធឺណិតផងដែរ។ ដូច្នេះ អង្គការយើងបានចាប់ផ្ដើមបញ្ចូលព័ត៌មានត្រឹមត្រូវស្តីអំពីជំនឿនិងសកម្មភាពរបស់សាក្សីព្រះយេហូវ៉ាទៅក្នុងប្រព័ន្ធអ៊ីនធឺណិត។
អាសយដ្ឋានគេហទំព័ររបស់យើងគឺwww.jw.org ដែលក្នុងនោះមានសៀវភៅ សៀវភៅស្តើង និងទស្សនាវដ្ដីប៉មយាម ជាភាសាអង់គ្លេស ខ្មែរ និងភាសាផ្សេងទៀតជាច្រើន។ សៀវភៅនានាដែលមានក្នុងគេហទំព័រនេះ អាចទទួលតាមរយៈក្រុមជំនុំ ហើយកំពុងប្រើក្នុងកិច្ចផ្សព្វផ្សាយ។ គេហទំព័ររបស់យើងមិនមែនមានគោលដៅចេញសៀវភៅថ្មីនោះទេ តែដើម្បីឲ្យមនុស្សទាំងឡាយអាចអានព័ត៌មានទាំងនោះតាមប្រព័ន្ធអ៊ីនធឺណិតវិញ។
សូមកុំខ្លាចប្រាប់អាសយដ្ឋានគេហទំព័រនេះដល់មនុស្សដែលប្រហែលជាចង់ចាប់ផ្ដើមរៀនសេចក្ដីពិតក្នុងគម្ពីរដោយប្រើប្រព័ន្ធអ៊ីនធឺណិត។ ជាឧទាហរណ៍ ពេលជូនទស្សនាវដ្ដីប៉មយាម អ្នកអាចបង្ហាញអាសយដ្ឋានគេហទំព័រនៅទំព័រទី៣២ ហើយបញ្ជាក់ថាក្នុងគេហទំព័រនេះមានព័ត៌មានច្រើនថែមទៀតជាភាសាខ្មែរ។ ដោយប្រើវិធីនេះ មនុស្សទូទៅអាចទទួលព័ត៌មាន ស្តីអំពីប្រធានបទផ្សេងៗជាច្រើន។