ប្រអប់សំនួរ
▪ តើយើងអាចធ្វើអ្វីខ្លះ ដើម្បីជួយធ្វើឲ្យបានប្រសើរឡើងដល់ប្រសិទ្ធិភាពនៃកិច្ចប្រជុំរបស់យើង?
អ្នកខ្លះប្រហែលជាគិតថា ពួកអ្នកចាស់ទុំនិងពួកងារជំនួយ គឺទទួលខុសត្រូវទាំងស្រុងក្នុងការធ្វើឲ្យកិច្ចប្រជុំក្នុងក្រុមជំនុំបានជោគជ័យ ពីព្រោះពួកគេបង្រៀនហើយបកស្រាយប្រធានសឹងតែទាំងអស់ទៅហើយ។ ប៉ុន្តែ យើងទាំងអស់គ្នា អាចបណ្ដាលឲ្យកិច្ចប្រជុំបានទៅជាចាប់អារម្មណ៍ ហើយដែលមានប្រយោជន៍។ យើងអាចជួយធ្វើឲ្យកិច្ចប្រជុំមានប្រសិទ្ធិភាពទៀត ក្នុងរបៀប១០យ៉ាងជាបន្តបន្ទាប់ដូចនេះ៖
រៀបចំទុកជាមុន។ នៅពេលដែលយើងរៀបចំបានហ្មត់ចត់ នោះធ្វើឲ្យយើងចាប់អារម្មណ៍នឹងកិច្ចប្រជុំ។ នៅពេលដែលយើងរាល់គ្នាធ្វើបែបនេះ នោះកិច្ចប្រជុំនឹងបានរស់រវើក ហើយបានលើកទឹកចិត្តខ្លាំងឡើងថែមទៀត។ ទៅប្រជុំជារឿយៗ។ ចំនួនប្រជុំជនជាច្រើន នោះគឺជាការលើកទឹកចិត្តដល់មនុស្សគ្រប់គ្នាដែលបានមក ដោយពង្រឹងការអបអររបស់យើងចំពោះសារៈសំខាន់នៃការទៅប្រជុំ។ មកឲ្យទាន់ពេល។ បើសិនជាយើងអង្គុយមុននឹងកម្មវិធីចាប់ផ្ដើម នោះយើងអាចចូលរួមក្នុងការច្រៀងចំរៀងដែលបើកកម្មវិធី ហើយនិងស្ដាប់សេចក្ដីអធិស្ឋាន។ ដោយដូច្នេះយើងទទួលប្រយោជន៍ពេញលេញពីកិច្ចប្រជុំ។ មកដោយមានប្រដាប់ប្រដាគ្រប់មុខ។ ដោយយកព្រះគម្ពីរនិងប្រកាសនវត្ថុ ដែលនឹងពិគ្រោះនៅក្នុងកិច្ចប្រជុំ នោះយើងអាចពិនិត្យមើលតាម ហើយអាចយល់ច្បាស់លាស់នូវអ្វីដែលកំពុងតែពិគ្រោះ។ ចៀសវាងការរំខាន។ យើងអាចស្ដាប់បានល្អ ពេលដែលយើងអង្គុយនៅខាងមុខ។ ការនិយាយខ្សឹបៗហើយទៅបង្គន់ជាញឹកញយ អាចបណ្ដាលឲ្យយើងនិងអ្នកដទៃ មានការពិបាកនឹងប្រុងស្មារតី។ ចូរឲ្យបានជាអ្នកចូលរួម។ នៅពេលយើងជាច្រើននាក់លើកដៃហើយឆ្លើយ នោះមនុស្សជាច្រើនទៀតក៏បានលើកទឹកចិត្ត ហើយបានស្អាងចិត្តឡើង ដោយសេចក្ដីសម្ដែងនៃជំនឿ។ សូមឆ្លើយដ៏សង្ខេប។ នេះនឹងផ្ដល់ឱកាសឲ្យមនុស្សជាច្រើនចូលរួមឆ្លើយដែរ។ ការឆ្លើយដ៏សង្ខេបរបស់យើងត្រូវធ្វើឡើងលើពត៌មានដែលកំពុងតែពិគ្រោះនោះ។ បំពេញកិច្ចការ។ ជាសិស្សនៅក្នុងសាលាកិច្ចបំរើព្រះធិបតេយ្យឬក៏ជាអ្នកចូលរួមក្នុងការប្រជុំអប់រំកិច្ចបំរើ សូមរៀបចំឲ្យបានល្អ ហាត់និយាយទុកជាមុន ហើយធ្វើយ៉ាងណាដើម្បីនឹងបំពេញកិច្ចការរបស់អ្នក។ សរសើរពួកអ្នកដែលចូលរួម។ សូមប្រាប់អ្នកដទៃ ថាយើងអបអរការខំប្រឹងរបស់គេ។ នេះនឹងជួយលើកទឹកចិត្តគេ ហើយជំរុញគេឲ្យខំធ្វើឲ្យបានល្អថែមទៀតនៅអនាគត។ លើកទឹកចិត្តគ្នាទៅវិញទៅ។ ការជំរាបសួរដ៏ស្មោះ និងការសន្ទនាដ៏លើកទឹកចិត្ត ដែលធ្វើឡើងពីមុននិងក្រោយកិច្ចប្រជុំ នាំឲ្យមានការរីករាយនិងផលប្រយោជន៍ថែមទៀត ដែលយើងទទួលពីការទៅប្រជុំ។