«ចូរមានចិត្តអត់ធ្មត់»
១ កាលដែលយើងឃើញទីបញ្ចប់នៃរបបដ៏ចាស់របស់សាតាំង កាន់តែជិតដល់ហើយនោះ គឺជាការសំខាន់ណាស់ ដែលយើង«មានចិត្តអត់ធ្មត់» ពេលរង់ចាំថ្ងៃនៃព្រះយេហូវ៉ាដើម្បីទទួលការសង្គ្រោះ។ ជាពិសេសនៅគ្រាដែលកាន់តែជិតណាស់ទៅហើយនេះ ដែលពួកសត្រូវដ៏អាក្រក់នេះ គឺកំពុងតែខំប្រឹងដើម្បីបំបែរស្មារតីរបស់យើង ចេញពីរឿងដ៏សំខាន់បំផុតនៃអធិបតេយ្យភាពរបស់ព្រះយេហូវ៉ា និងល្បួងយើងឲ្យយើងត្រូវបង្វែរ ដោយអ្វីដែលជាប្រយោជន៍ផ្ទាល់ខ្លួនដែលគណនាមិនបាន។ តាមរបៀបនេះ នោះសាតាំងនឹងបំភាន់យើងឲ្យឈប់ឬក៏បង្អន់ ក្នុងកិច្ចការផ្សព្វផ្សាយព្រះរាជាណាចក្រ។ (យ៉ាកុប ៥:៧, ៨; ម៉ាថាយ ២៤:១៣, ១៤) តើតាមរបៀបណាដែលយើងអាចសម្ដែងចិត្តអត់ធ្មត់ ដែលត្រូវការជាចាំបាច់នោះ?
២ ដោយចិត្តអត់ទ្រាំ: នៅពេលដែលយើងជួបភាពកន្តើយ ឬក៏ការប្រឆាំងក្នុងកិច្ចបំរើផ្សាយរបស់យើង ការអត់ទ្រាំនឹងជួយយើងឲ្យតស៊ូក្នុងការផ្សព្វផ្សាយ។ យើងនឹងមិនងាយខ្លាច ឬក៏អាក់អន់ចិត្ត ប្រសិនបើមនុស្សដែលយើងជួបនិយាយយ៉ាងកំបុត ឬក៏មិនសប្បុរសនោះឡើយ។ (ពេត្រុសទី១ ២:២៣) កម្លាំងដែលនៅខាងក្នុងនេះ នឹងបង្ការយើងពីការនិយាយដ៏អវិជ្ជមានអំពីមនុស្សក្នុងតំបន់របស់យើង ដែលបង្ហាញនូវភាពកន្តើយឬក៏ភាពស្អប់ដល់កិច្ចការរបស់យើង ពីព្រោះយើងដឹងថា ការនិយាយបែបនេះ នឹងធ្វើឲ្យយើងធ្លាក់ទឹកចិត្ត និងអស់អ្នកដែលផ្សាយជាមួយនឹងយើងក្នុងកិច្ចបំរើផ្សាយនេះ។
៣ ដោយការតស៊ូដ៏អត់ធ្មត់: គឺអាចទៅជាបន្ទុកយ៉ាងធ្ងន់ទៅលើការអត់ធ្មត់របស់យើង ក្រោយពីយើងមានការពិគ្រោះដ៏ល្អមួយក្នុងកិច្ចបំរើផ្សាយ ដែលយើងមិនអាចរកមនុស្សចាប់អារម្មណ៍នោះ នៅឯផ្ទះម្ដងទៀតបាន។ យើងក៏មានចិត្តដូច្នេះដែរ បើអស់អ្នកដែលយើងសិក្សាជាមួយនោះ មានការយឺតនឹងរីកចំរើន ឬយឺតនឹងគាំទ្រចំពោះសេចក្ដីពិតនោះ។ ក៏ប៉ុន្តែ ធម្មតាការតស៊ូដ៏អត់ធ្មត់ នឹងត្រូវទទួលរង្វាន់ដោយមានលទ្ធផលល្អ។ (កាឡាទី ៦:៩) បងស្រីម្នាក់បានត្រឡប់ទៅជួបនឹងក្មេងស្រីម្នាក់ជាច្រើនដង មុននឹងការសិក្សាព្រះគម្ពីរបានត្រូវចាប់ផ្ដើម។ នៅលើកទីមួយដល់លើកទីប្រាំនៃការត្រឡប់ទៅជួបនោះ ស្ត្រីនេះមានការរវល់នឹងរឿងផ្សេងទៀត។ នៅលើកទីប្រាំមួយ នោះបងស្រីបានទទឹកជោគពីព្រោះមានព្យុះនិងរន្ទះផ្គរ ហើយឥតបានជួបនរណាម្នាក់នៅឯផ្ទះឡើយ។ យ៉ាងណាក៏ដោយ គាត់បានសម្រេចចិត្តនឹងទៅជួបស្ត្រីនេះម្ដងទៀត។ បងស្រីក៏ទៅជួបម្ដងទៀត ហើយឃើញថា ស្ត្រីនេះប្រុងនឹងសិក្សា។ ក្រោយមក សិស្សនេះមានការរីកចំរើនយ៉ាងលឿន និងក្រោយមួយរយៈខ្លី នាងបានថ្វាយជីវិតនាងជូនព្រះយេហូវ៉ា។
៤ យើងដឹងថា ថ្ងៃនៃព្រះយេហូវ៉ានឹងមិនយឺតយ៉ាវឡើយ។ ដូច្នេះ យើងរង់ចាំឲ្យទ្រង់សម្រេចកិច្ចការនេះ ដោយដឹងថា ការអត់ធ្មត់របស់ព្រះ នឹងបង្កើតបានផលល្អ។ (ហាបាគុក ២:៣; ពេត្រុសទី២ ៣:៩-១៥) យើងត្រូវតែមានចិត្តអត់ធ្មត់ ដូចព្រះយេហូវ៉ាដែរ និងមិនឈប់ក្នុងកិច្ចបំរើផ្សាយរបស់យើងឡើយ។ «ដោយចិត្តជឿ ហើយអត់ធន់» នោះសូមទុកចិត្តលើព្រះយេហូវ៉ា ឲ្យប្រទានជូនអ្នកនូវរង្វាន់ចំពោះការខំប្រឹងធ្វើការរបស់អ្នក។—ហេព្រើរ ៦:១០-១២