តើអ្នកមើលឃើញតែអាការៈក្រៅទេឬ?
១ នៅពេលយើងបំពេញកិច្ចបំរើសាធារណៈរបស់យើង គំនិតដែលយើងមានភ្លាមៗអំពីមនុស្សខ្លះៗនោះ ប្រហែលជានាំឲ្យយើងស្ទាក់ស្ទើរក្នុងការផ្សាយដំណឹងល្អចំពោះគេ។ ជាឧទាហរណ៍ តើអ្នកនឹងមានប្រតិកម្មយ៉ាងណាវិញ បើសិនជាមានបុរសម្នាក់ដែលមានមុខសាហាវ តែងតែសម្លឹងអ្នក ពេលដែលអ្នកត្រឡប់ទៅជួបអ្នកជិតខាងរបស់គាត់នោះ ដែលបានបង្ហាញការចាប់អារម្មណ៍លើសេចក្ដីពិត? បងស្រីត្រួសត្រាយម្នាក់ ដែលបានពិសោធន៍នេះ បានសម្រេចចិត្តទៅជួបបុរសនោះហើយនិយាយជាមួយគាត់។ បុរសនោះបានគារវៈតាមរបៀបឈ្លើយ។ ក៏ប៉ុន្តែ គួរឲ្យភ្ញាក់ផ្អើលមែន ដែលគាត់បានស្ដាប់សារព្រះគម្ពីរហើយបានយល់ព្រមសិក្សាដោយមានចិត្តរំភើប។ ជាលទ្ធផលពីការមិនវិនិច្ឆ័យដោយសារអាការៈក្រៅ ផ្លូវមួយបានត្រូវបើកដើម្បីឲ្យបុរសនោះព្រមទាំងប្រពន្ធរបស់គាត់រៀនសេចក្ដីពិត។
២ បងស្រីមួយទៀតបានត្រូវបន្លាចដោយអាការៈក្រៅរបស់យុវបុរសម្នាក់ដែលមានសក់វែង។ ក៏ប៉ុន្តែ បានបន្តក្នុងការផ្សព្វផ្សាយយ៉ាងខ្លីឲ្យគាត់ ពេលគាត់ចូលក្នុងហាងដែលបងស្រីនោះធ្វើការ។ ការខិតខំរបស់បងស្រីបានបង្កើតផល ហើយឥឡូវនេះយុវបុរសនោះ ជាស្មរបន្ទាល់ម្នាក់ដែលបានទទួលធ្វើបុណ្យជ្រមុជទឹក។ តើអ្វីដែលនឹងបង្ការយើងមិនឲ្យធ្វើការវិនិច្ឆ័យភ្លាមៗថាមនុស្សបែបនេះនឹងមិនតបឆ្លើយទេនោះ?
៣ ការធ្វើតម្រាប់តាមគំរូរបស់ព្រះយេស៊ូ: ព្រះយេស៊ូបានជ្រាបថា ទ្រង់នឹងសោយទិវង្គតដើម្បីមនុស្សទាំងអស់។ ដូច្នេះ ទ្រង់មិនបានត្រូវញញើតដោយអាការៈក្រៅរបស់មនុស្សដទៃទេ។ ទ្រង់បានទទួលស្គាល់ថា សូម្បីតែមនុស្សដែលមានកេរ្ដិ៍ឈ្មោះអាក្រក់ ក៏អាចយល់ព្រមប្រែចិត្តបើសិនជាគេទទួលជំនួយនិងការជំរុញចិត្តដ៏ត្រឹមត្រូវ។ (ម៉ាថាយ ៩:៩-១៣) ទ្រង់ក៏បានព្យាយាមជួយទាំងអ្នកមានទាំងអ្នកក្រ។ (ម៉ាថាយ ១១:៥; ម៉ាកុស ១០:១៧-២២) ចូរឲ្យយើងមិនវិនិច្ឆ័យមនុស្សដែលយើងជួបក្នុងកិច្ចបំរើ ដោយសារអាការៈក្រៅរបស់គេ ទាំងធ្វើឲ្យខ្លួនខ្វាក់មិនអាចឃើញសភាពចិត្តល្អ។ (ម៉ាថាយ ៧:១; យ៉ូហាន ៧:២៤) តើអ្វីដែលអាចជួយយើងធ្វើតម្រាប់តាមគំរូដ៏ប្រសើររបស់ព្រះយេស៊ូ?
៤ តាមរយៈការសិក្សាព្រះគម្ពីររបស់យើង នោះយើងបានទទួលស្គាល់ថា ព្រះបន្ទូលរបស់ព្រះមានឥទ្ធិពលកែប្រែគំនិត ចរិយា និងបុគ្គលិកលក្ខណៈរបស់នរណាម្នាក់បាន។ (អេភេសូរ ៤:២២-២៤; ហេព្រើរ ៤:១២) ដូច្នេះ កាលដែលយើងត្រូវប្រុងប្រយ័ត្នឲ្យមែនទែន នោះយើងគួររក្សាឲ្យមានអាកប្បកិរិយាមួយដ៏វិជ្ជមាន ហើយពឹងលើព្រះយេហូវ៉ា ជាអ្នកដែលមើលធ្លុះចិត្តមនុស្សជាតិ។—សាំយូអែលទី១ ១៦:៧; កិច្ចការ ១០:៣៤, ៣៥
៥ ទោះបីអាការៈក្រៅរបស់គេគឺយ៉ាងណាក៏ដោយ ចូរឲ្យការផ្សព្វផ្សាយរបស់យើងនូវដំណឹងល្អជាមួយមនុស្សគ្រប់បែបយ៉ាងដោយមិនរើសមុខនោះ រួមចំណែកក្នុងចំរូតដ៏ធំក្នុងថ្ងៃជាន់ក្រោយបង្អស់នេះ។—ធីម៉ូថេទី១ ២:៣, ៤