តើអ្នកកំពុងតែប្រព្រឹត្តតបនឹងសេចក្ដីស្រឡាញ់របស់ព្រះគ្រីស្ទឬទេ?
១ ដោយគិតពិចារណាអំពីដំណើរព្រះជន្មម្ចាស់របស់គាត់ នោះសាវ័កយ៉ូហានបានសរសេរថា៖«ដែល[ព្រះយេស៊ូ]បានស្រឡាញ់ដល់ពួកទ្រង់នៅក្នុងលោកីយនេះ នោះទ្រង់ក៏ចេះតែស្រឡាញ់គេ ដរាបដល់ចុងបំផុត»។ (យ៉ូហាន ១៣:១) រយៈពេលក្នុងខែបុណ្យរំឭកនេះ អារម្មណ៍របស់យើងត្រូវផ្ដោតទៅលើការសម្ដែងដ៏ប្រសើរបំផុតនៃសេចក្ដីស្រឡាញ់របស់ព្រះគ្រីស្ទ។ យើងអាចប្រព្រឹត្តតបនឹងសេចក្ដីស្រឡាញ់នោះ ដោយការអនុវត្តន៍ជំនឿទៅលើតម្លៃលោះ និងដោយការរួមចំណែកយ៉ាងសង្វាតក្នុងកិច្ចផ្សាយ និងដោយការ«កាន់ខ្ជាប់ ដរាបដល់ចុងបំផុត» ដូចព្រះយេស៊ូដែរ។—ម៉ាថាយ ២៤:១៣; ២៨:១៩, ២០; យ៉ូហាន ៣:១៦
២ ការប្រព្រឹត្តតបនឹងសេចក្ដីស្រឡាញ់របស់ព្រះគ្រីស្ទ: ក្នុងសប្ដាហ៍ចុងក្រោយនៃព្រះជន្មរបស់ព្រះយេស៊ូ ទ្រង់បានធ្វើការយ៉ាងសកម្ម។ (ម៉ាថាយ ២១:២៣; ២៣:១; ២៤:៣) ជាអ្នកត្រាប់តាមព្រះគ្រីស្ទ នោះយើងក៏ត្រូវបានជំរុញដោយសេចក្ដីស្រឡាញ់ ឲ្យ«ខំប្រឹងយ៉ាងអស់ពីចិត្ត»ក្នុងការបំរើព្រះយេហូវ៉ា។ (លូកា ១៣:២៤) តើអ្នកអាចឆ្លៀតយកប្រយោជន៍ពីការរៀបចំឲ្យចំរើនសកម្មភាពផ្សព្វផ្សាយក្នុងកំឡុងខែមេសា ដោយការចំរើនចំនួនម៉ោងដែលអ្នកចំណាយក្នុងកិច្ចផ្សាយឬទេ?
៣ ឆ្នាំនេះ អាហារល្ងាចរបស់ព្រះអម្ចាស់ គឺចំពេលល្ងាចថ្ងៃពុធ ទី១៩ ខែមេសា។ តើមនុស្សប៉ុន្មាននាក់នឹងចូលរួមពិធីដ៏សំខាន់នេះ? បញ្ហានោះភាគច្រើនអាស្រ័យទៅលើយើង។ តើអ្នកបានកត់បញ្ជីឈ្មោះអស់អ្នកដែលអ្នកមានបំណងអញ្ជើញ ដូចជាសិស្សព្រះគម្ពីររបស់អ្នកនិងអ្នកចាប់អារម្មណ៍ឯទៀត ញាតិសន្ដាន អ្នកធ្វើការជាមួយអ្នក និងសិស្សរួមថ្នាក់ឬទេ? តើអ្នកបានទាក់ទងនិងអញ្ជើញគេដោយស្មោះស្ម័គ្រពីចិត្តហើយឬនៅ? តើអ្នកនឹងរំឭកគេពីរបីថ្ងៃមុនបុណ្យរំឭកទេ? តើគេត្រូវការជំនួយពីអ្នកដើម្បីធ្វើដំណើរទៅទីនោះទេ? ពួកអ្នកចាស់ទុំក៏កំពុងតែអញ្ជើញអស់អ្នកណាដែលបានទៅជាឥតសកម្មភាពក្នុងកិច្ចផ្សព្វផ្សាយដែរ។ ដែលបុណ្យរំឭកនេះនឹងធ្វើឡើងក្នុងកំឡុងសប្ដាហ៍ជាជាងនៅចុងសប្ដាហ៍ នោះមិនមានសេចក្ដីថាពិធីនេះគឺមិនសំខាន់ឲ្យទាំងអស់គ្នាចូលរួមទេ។
៤ រៀបចំជាមុន: គឺជាសំខាន់ដែលយើងរៀបចំនិងមានគំនិតត្រឹមត្រូវ ពេលយើងចូលរួមពិធីបុណ្យរំឭក។ ប៉ុលបានដាស់តឿនអ្នកជឿគ្នីគ្នាឲ្យចាំមិនភ្លេចនូវសេចក្ដីសំខាន់នៃពិធីនេះ។ (កូរិនថូសទី១ ១១:២០-២៦) អ្នកអាចអានជំពូកទី១៣ដល់១៧នៃដំណឹងល្អរបស់យ៉ូហាន ពេលដែលមានការសិក្សាជាក្រុមគ្រួសាររបស់អ្នក ហើយឲ្យសមាជិកគ្រួសារនិមួយៗប្រាប់ថាយញ្ញបូជារបស់ព្រះយេស៊ូមានន័យអ្វីចំពោះគេផ្ទាល់។ កុំភ្លេចអានអំនានព្រះគម្ពីរប្រចាំថ្ងៃដែរក្នុងកំឡុងមួយអាទិត្យនៃពិធីបុណ្យរំឭកនេះ!
៥ សេចក្ដីស្រឡាញ់របស់យើងចំពោះព្រះគ្រីស្ទគឺខ្លាំងដ៏ម្ល៉េះ ហើយនិងស្ថិតស្ថេរជាបន្តក្រោយពីថ្ងៃទី១៩ ខែមេសានោះទៅទៀត។ យើងតាំងចិត្តបង្ហាញសេចក្ដីស្រឡាញ់របស់យើងចំពោះទ្រង់ជារៀងរហូត! ពិធីបុណ្យរំឭកនៅឆ្នាំនេះនឹងជួយយើងពង្រឹងការប្ដេជ្ញាចិត្តនោះ។