ចូរខ្នះខ្នែងប្រព្រឹត្តអំពើល្អ!
១ កាលដែលយើងឈានចូលទៅដល់ពេលបុណ្យរំឭកប្រចាំឆ្នាំ២០០៣ យើងមានមូលហេតុជាបរិបូណ៍ដែលបណ្ដាលឲ្យយើង«ខ្នះខ្នែងប្រព្រឹត្តអំពើល្អ»។ (១ពេ. ៣:១៣, ព្រះគម្ពីរភាសាខ្មែរសម្រាយ) មូលហេតុសំខាន់បំផុតគឺយញ្ញបូជាលោះរបស់ព្រះយេស៊ូគ្រីស្ទ។ (ម៉ាថ. ២០:២៨; យ៉ូន. ៣:១៦) សាវ័កពេត្រុសបានសរសេរអំពីយញ្ញបូជានេះថា៖ «ទ្រង់បានលោះអ្នករាល់គ្នា ឲ្យរួចពីកិរិយាឥតប្រយោជន៍ . . . មិនមែនដោយរបស់ពុករលួយ ដូចជាប្រាក់ឬមាសនោះទេ គឺបានលោះដោយសារព្រះលោហិតដ៏វិសេសរបស់ព្រះគ្រីស្ទវិញ ទុកដូចជាឈាមនៃកូនចៀមឥតខ្ចោះ ឥតស្លាកស្នាម»។ (១ពេ. ១:១៨, ១៩) បើយើងមានកតញ្ញូដោយសារបានទទួលនូវសេចក្ដីស្រឡាញ់ដ៏ប្រសើរលើសលប់នេះ កតញ្ញូនោះនឹងជំរុញចិត្តយើងឲ្យប្រព្រឹត្តអំពើល្អយ៉ាងសកម្ម ដោយទទួលស្គាល់ថា ព្រះយេស៊ូ«បានបូជាព្រះជន្មរបស់ព្រះអង្គផ្ទាល់ សំរាប់យើង ដើម្បីលោះយើងអោយរួចផុតពីអំពើទុច្ចរិតគ្រប់យ៉ាង និង ជំរះប្រជារាស្ត្រមួយទុកសំរាប់ព្រះអង្គផ្ទាល់ ជាប្រជារាស្ត្រដែលខ្នះខ្នែងប្រព្រឹត្តអំពើល្អ»។—ទីត. ២:១៤, ព្រះគម្ពីរភាសាខ្មែរសម្រាយ; ២កូ. ៥:១៤, ១៥
២ ពេលយើងធ្វើអ្វីដែលផ្គាប់ព្រះហឫទ័យព្រះ យើងក៏មានទំនាក់ទំនងល្អជាមួយនឹងទ្រង់ ហើយទ្រង់ថែរក្សាការពារយើងដោយសេចក្ដីស្រឡាញ់។ ពេត្រុសបានមានប្រសាសន៍តទៅទៀតថា៖«អ្នកណាដែលចូលចិត្តចង់ស្រឡាញ់ជីវិត ហើយចង់ឃើញគ្រាដ៏ល្អ . . . ត្រូវឲ្យអ្នកនោះបែរចេញពីការអាក្រក់ ប្រយោជន៍ឲ្យបានធ្វើការល្អវិញ ត្រូវស្វែងរក ហើយដេញតាមសេចក្ដីមេត្រីភាព ពីព្រោះព្រះនេត្រនៃព្រះអម្ចាស់ តែងទតមកលើមនុស្សសុចរិត ឯព្រះកាណ៌ទ្រង់ក៏ផ្ទៀងស្ដាប់ពាក្យទូលអង្វររបស់គេ»។ (១ពេ. ៣:១០-១២) នៅសម័យនេះដែលពោរពេញទៅដោយគ្រោះថ្នាក់ យើងពិតជាមានពរមែន ព្រោះយើងដឹងថាព្រះយេហូវ៉ាកំពុងតែទតឃ្លាំមើលហើយការពារយើង និងប្រុងប្រៀបចាត់វិធានការដើម្បី«រក្សា[យើង] ទុកដូចជាប្រស្រីព្រះនេត្ររបស់ទ្រង់»។—ចោទិ. ៣២:១០; ២របា. ១៦:៩
៣ ទោះជាគ្រីស្ទានសម័យដើមដែលពេត្រុសផ្ញើសំបុត្រជូននោះកំពុងប្រឈមមុខការល្បងលក៏ដោយ ពួកគេនៅតែមានចិត្តខ្នះខ្នែងប្រៀបដូចជាភ្លើងឆេះត្រគោលដែលពន្លត់ពុំបាន ហើយពួកគេប្រកាសដំណឹងល្អឲ្យឮសុសសាយពាសពេញ។ (១ពេ. ១:៦; ៤:១២) រាស្ត្ររបស់ព្រះសព្វថ្ងៃនេះក៏ដូចគ្នាដែរ។ ទោះជាយើងរស់នៅ«គ្រាលំបាកណាស់»ក៏ដោយ តែការដឹងគុណចំពោះព្រះយេហូវ៉ាដោយសារភាពល្អរបស់ទ្រង់ជំរុញទឹកចិត្តយើងឲ្យខ្នះខ្នែងធ្វើតាមព្រះហឫទ័យទ្រង់។ (២ធី. ៣:១; ទំនុក. ១៤៥:៧) សូមយើងពិចារណាការល្អខ្លះៗដែលយើងនឹងចូលរួមធ្វើយ៉ាងសកម្មក្នុងពេលនេះរហូតទៅដល់ថ្ងៃបុណ្យរំឭក។
៤ ចូរអញ្ជើញអ្នកដទៃមកបុណ្យរំឭក : វិធីមួយដែលយើងអាចដឹងគុណសំរាប់តម្លៃលោះដែលជាអំណោយយ៉ាងប្រសើរឯកនោះ គឺដោយមានវត្តមាននៅពិធីដែលប្រព្រឹត្តឡើងជារៀងរាល់ឆ្នាំដែលរំឭកពីការសោយទិវង្គតរបស់ព្រះយេស៊ូ ដែលនឹងធ្វើឡើងនៅថ្ងៃពុធ ទី១៦ ខែមេសា ឆ្នាំនេះក្រោយថ្ងៃលិច។ (លូ. ២២:១៩, ២០) សរុបទៅ ឆ្នាំមុនយើងបានមាន១៥.៥៩៧.៧៤៦នាក់ចូលរួម យោងទៅតាមសេចក្ដីរាយការណ៍នៃ៩៤.៦០០ក្រុមជំនុំទូទាំងពិភពលោក! ចំនួននេះគឺច្រើនជាងឆ្នាំមុនជាង២២០.០០០នាក់។
៥ តើមនុស្សប៉ុន្មាននាក់នឹងចូលរួមនៅឆ្នាំនេះ? នេះច្រើនតែអាស្រ័យទៅលើការព្យាយាមរបស់យើងក្នុងការលើកទឹកចិត្តអ្នកដទៃឲ្យចូលរួមជាមួយយើង។ ចូរចាប់ផ្ដើមដោយកត់សរសេរបញ្ជីមួយមានឈ្មោះមនុស្សណាដែលអ្នកចង់អញ្ជើញ។ មុនបង្អស់ គួរសរសេរឈ្មោះសមាជិកគ្រួសារនៅក្នុងផ្ទះជាមួយអ្នក។ បើប្ដីឬប្រពន្ធអ្នកមិនមែនជាអ្នកជឿ នោះចូរប្រាប់គាត់ពីទឹកចិត្តរបស់អ្នកថា អ្នកចង់ឲ្យគាត់ចូលរួមជាមួយដែរ។ ប្ដីម្នាក់ដែលមិនជាអ្នកជឿបានប្រាប់ថា គាត់បានចូលរួមពិធីបុណ្យរំឭកឆ្នាំមុន ដោយសារយល់ឃើញថា ប្រពន្ធគាត់ពិតជានឹងរីករាយណាស់បើគាត់ចូលរួមជាមួយនាង។ បន្ទាប់មក អ្នកអាចកត់ឈ្មោះបងប្អូនញាតិសន្ដាន អ្នកជិតខាង អ្នកធ្វើការជាមួយ ឬសិស្សរួមថ្នាក់។ កុំភ្លេចអញ្ជើញសិស្សព្រះគម្ពីររបស់អ្នក។
៦ ក្រោយកត់ឈ្មោះអស់ហើយ ចូរឆ្លៀតពេលទៅអញ្ជើញពួកគេដោយផ្ទាល់។ ចូរប្រើលិខិតអញ្ជើញសំរាប់បុណ្យរំឭក។ ដើម្បីជួយមនុស្សឲ្យចាំម៉ោងនិងទីកន្លែងនៃបុណ្យរំឭក ចូរសរសេរម៉ោងនិងទីកន្លែងយ៉ាងច្បាស់លើលិខិតអញ្ជើញនៅរឹមខាងក្រោម។ ពេលថ្ងៃទី១៦ ខែមេសាកាន់តែជិតមកដល់ ចូររំឭកមនុស្សដែលមានឈ្មោះក្នុងបញ្ជីរបស់អ្នក ដោយជួបផ្ទាល់ឬតាមទូរស័ព្ទ។ ចូរយើងជួយមនុស្សច្រើនបំផុតឲ្យមានវត្តមាននៅឱកាសដ៏ពិសិដ្ឋបំផុតនេះ។
៧ ជួយអ្នកដែលចូលរួមពិធីបុណ្យរំឭក : យប់នៃពិធីបុណ្យរំឭកតែងតែជាពេលដែលបណ្ដាលឲ្យរំភើបចិត្តណាស់។ យើងមានឱកាសស្វាគមន៍មនុស្សដែលតាមធម្មតាមិនចូលរួមកិច្ចប្រជុំរបស់យើងទេ។ ពេលដែលសមស្របតាមកាលៈទេសៈរបស់អ្នក ចូររៀបចំមកមុនម៉ោងនិងនៅបន្តក្រោយចប់ពិធី។ ចូរផ្ដើមសំណេះសំណាលជាមួយអ្នកថ្មីដែលមក។ ចូរបង្ហាញភាពកក់ក្ដៅនិងភាពរាក់ទាក់។—រ៉ូម ១២:១៣
៨ ដោយមានការសិក្សាព្រះគម្ពីរតាមផ្ទះ តើមនុស្សខ្លះដែលចូលរួមពិធីបុណ្យរំឭកអាចត្រូវជួយឲ្យរីកចំរើនខាងវិញ្ញាណតទៅទៀតបានឬទេ? ចូរខំកត់ឈ្មោះនិងអាស័យដ្ឋានរបស់អ្នកចូលរួមដែលមិនទាន់មានអ្នកណាទៅជួប ដើម្បីអ្នកអាចជួយគាត់បាន។ មនុស្សខ្លះក្នុងចំណោមអ្នកទាំងនេះប្រហែលជាអាចរីកចំរើនរហូតដល់មានលក្ខណៈគ្រប់គ្រាន់ដើម្បីក្លាយទៅជាអ្នកផ្សព្វផ្សាយមុនពិធីបុណ្យរំឭកឆ្នាំក្រោយ បើពួកគេទទួលជំនួយប្រកបទៅដោយសេចក្ដីស្រឡាញ់។ ពេលអ្នកទៅជួបមនុស្សដែលបានចូលរួមបុណ្យរំឭក ចូរអញ្ជើញពួកគេមកស្ដាប់សុន្ទរកថាពិសេសនៅថ្ងៃទី២៧ ខែមេសាដែរ។
៩ តើអ្នកអាចត្រួសត្រាយជំនួយក្នុងពេលមុនបុណ្យរំឭកបានទេ?: រាល់ឆ្នាំ ដោយសារយើងមានចំណង់ខ្លាំងចំពោះការបំរើព្រះយេហូវ៉ា ចំណង់នេះជំរុញឲ្យយើងខំប្រឹងអស់ពីសមត្ថភាពក្នុងកិច្ចបំរើនៅកំឡុងខែដែលមានសកម្មភាពពិសេសនេះ។ បើក្រុមជំនុំទាំងមូលព្យាយាមរួមកម្លាំងខ្នះខ្នែងផ្សព្វផ្សាយដំណឹងល្អក្នុងកំឡុងខែឈានចូលទៅដល់ពេលបុណ្យរំឭកនោះ ការព្យាយាមនេះអាចបង្កើតលទ្ធផលល្អប្រសើរ។។
១០ ក្រុមជំនុំមួយដែលមានអ្នកផ្សាយ១០៧នាក់និងមានអ្នកត្រួសត្រាយពេញពេល៩នាក់បានរាយការណ៍ថា ខែមេសាឆ្នាំមុនជាខែ«អស្ចារ្យគួរឲ្យកត់សម្គាល់ណាស់»សំរាប់ក្រុមជំនុំពួកគេ ដោយមានអ្នកត្រួសត្រាយជំនួយ៥៣នាក់ រួមទាំងអ្នកចាស់ទុំនិងអ្នកងារជំនួយទាំងឡាយ។ តើអ្នកចាស់ទុំបានបំផុសឲ្យបងប្អូនមានការរំភើបចិត្តចង់ត្រួសត្រាយជំនួយនៅខែនោះយ៉ាងដូចម្ដេច? ពួកគាត់បានចាប់ផ្ដើមមុនខែនោះ ដោយលើកទឹកចិត្តបងប្អូនច្រើនបំផុតឲ្យចុះឈ្មោះ។ កិច្ចប្រជុំផ្សព្វផ្សាយត្រូវរៀបចំនៅម៉ោងផ្សេងៗឲ្យសមស្របទៅតាមតម្រូវការរបស់បងប្អូនទាំងឡាយក្នុងក្រុមជំនុំ។ មានការយកចិត្តទុកដាក់ជាពិសេសទៅលើការផ្សាយតាមទូរស័ព្ទ ពិសេសសំរាប់បងប្អូនដែលគ្មានសុខភាពមាំទាំ។
១១ បងស្រីម្នាក់អាយុ៨៦ឆ្នាំ ដែលដើរមិនបានដោយសារបញ្ហាសុខភាព គាត់បានចុះឈ្មោះត្រួសត្រាយជំនួយ។ គាត់ចាប់ផ្ដើមពេលព្រឹក ដោយអង្គុយនៅតុក្នុងផ្ទះបាយ ហើយផ្សាយតាមទូរស័ព្ទប្រហែលជាពីរម៉ោង រួចសំរាកពីរបីម៉ោង ហើយមកវិញធ្វើទៀត។ មនុស្សម្នាក់ដែលគាត់និយាយជាមួយបានបាត់បង់ប្ដីនិងកូនប្រុសជំទង់ពីរនាក់ក្នុងកំឡុងពីរឆ្នាំកន្លងទៅនេះ ហើយគាត់មិនអាចយល់ថាតើហេតុអ្វីបានជាព្រះអនុញ្ញាតឲ្យរឿងអាក្រក់ដូច្នេះកើតឡើង។ បងស្រីបានធ្វើបន្ទាល់យ៉ាងក្បោះក្បាយនិងការសិក្សាព្រះគម្ពីរក៏បានចាប់ផ្ដើមឡើង។ ការផ្សាយតាមទូរស័ព្ទនៅពេលល្ងាចឬនៅពេលផ្សេងទៀតមានប្រសិទ្ធភាពណាស់សំរាប់ជួបមនុស្សដែលរស់នៅក្នុងអាគារឬតំបន់ដែលយើងចូលមិនបាន។ ការផ្សាយតាមទូរស័ព្ទក៏ជួយអ្នកផ្សាយជួបមនុស្សដែលមិននៅផ្ទះពេលថ្ងៃដែរ។
១២ អ្នកចាស់ទុំនៃក្រុមជំនុំនោះបានបញ្ចប់សេចក្ដីរាយការណ៍ដោយសរសេរថា៖«យើងបានរីករាយណាស់ ហើយមានកតញ្ញូចំពោះព្រះយេហូវ៉ាដោយសារឯកសិទ្ធិនិងពរដែលទ្រង់ផ្ដល់មកយើងម្នាក់ៗ»។ បើរៀបចំឲ្យបានត្រឹមត្រូវ ក្រុមជំនុំរបស់អ្នកក៏អាចមានពរដូចនេះដែរ។
១៣ ចូរព្យាយាមឲ្យមានអ្នកផ្សាយ១០០ភាគរយចូលរួមក្នុងកិច្ចផ្សព្វផ្សាយ : សេចក្ដីស្រឡាញ់ដែលយើងមានចំពោះព្រះនិងអ្នកជិតខាងជំរុញទឹកចិត្តយើងឲ្យឆ្លៀតយកពេលរៀងរាល់ខែដើម្បីប្រាប់អ្នកដទៃអំពីដំណឹងល្អ។ (ម៉ាថ. ២២:៣៧-៣៩) ពួកអ្នកត្រួតពិនិត្យការសិក្សាសៀវភៅតាមក្រុមជំនុំនិងអ្នកជំនួយរបស់ពួកគាត់គួរខំជួយអ្នកក្នុងក្រុមខ្លួនឲ្យចូលរួមក្នុងកិច្ចផ្សាយជារៀងរាល់ខែ។ វិធីដ៏ល្អមួយដែលពួកគាត់អាចធ្វើដូច្នេះ គឺដោយរៀបចំទុកជាមុនដើម្បីផ្សព្វផ្សាយជាមួយបងប្អូនម្នាក់ៗក្នុងក្រុមគាត់។ ជាជាងចាំទាល់តែដាច់ខែទើបរៀបចំ នោះអ្នកត្រួតពិនិត្យចាប់ផ្ដើមមុនខែនោះវិញ។ នេះនឹងផ្ដល់ឱកាសច្រើនជាងដើម្បីផ្ដល់ជំនួយប្រកបទៅដោយសេចក្ដីស្រឡាញ់។
១៤ ក្នុងក្រុមសិក្សាសៀវភៅរបស់អ្នក តើមានអ្នកផ្សាយណាដែលគ្មានសុខភាពមាំទាំនិងមានការពិបាកចូលរួមកិច្ចផ្សព្វផ្សាយទេ? បើពួកគេរស់នៅក្នុងមន្ទីរថែទាំសុខភាពឬក៏មិនអាចចេញពីផ្ទះបាន យើងយល់ថាពួកគេមិនសូវមានឱកាសដើម្បីធ្វើបន្ទាល់នោះទេ។ ប៉ុន្តែ បើពួកគេឆ្លៀតយកឱកាសឲ្យពន្លឺខ្លួនភ្លឺនោះ ទោះជាមានឱកាសតិចតួចក៏ដោយ នោះអ្នកផ្សាយទាំងនេះប្រហែលជាអាចបណ្ដាលឲ្យអ្នកឯទៀតមានចំណាប់អារម្មណ៍ពិតប្រាកដទៅលើសេចក្ដីពិត ដោយបានឃើញការល្អដែលអ្នកផ្សាយធ្វើ។ (ម៉ាថ. ៥:១៦) អ្នកត្រួតពិនិត្យក្រុមសិក្សាសៀវភៅគួរយកចិត្តទុកដាក់ឲ្យបានប្រាកដថា អ្នកផ្សាយទាំងនេះដឹងច្បាស់ថា ពួកគេអាចរាយការណ៍ពីម៉ោងផ្សព្វផ្សាយសូម្បីតែ១៥នាទីក៏ដោយ។ ដោយសារអ្នកផ្សាយដ៏ស្មោះត្រង់ទាំងនេះអាចរាយការណ៍ពេលដែលចំណាយក្នុងកិច្ចផ្សាយ នោះលើកទឹកចិត្តពួកគេ ហើយក៏នាំឲ្យពួកគេមានចិត្តសប្បាយរីករាយដែរ។ នេះក៏ជួយធានាថា សេចក្ដីរាយការណ៍អំពីកិច្ចផ្សាយរបស់រាស្ត្រព្រះទូទាំងពិភពលោកគឺត្រឹមត្រូវ។
១៥ យុវជនដែលរវល់ធ្វើការល្អ! : យើងពិតជាសប្បាយចិត្តណាស់ឃើញយុវជនគ្រីស្ទានប្រើកម្លាំងនិងថាមពលខ្លួនក្នុងកិច្ចបំរើព្រះយេហូវ៉ា! (សុ. ២០:២៩) បើអ្នកនៅក្មេង តើអ្នកអាចបង្ហាញចិត្តខ្នះខ្នែងសំរាប់ព្រះយេហូវ៉ាក្នុងកំឡុងខែដែលមានសកម្មភាពពិសេសទាំងនេះបានឬទេ?
១៦ បើអ្នកមិនទាន់ជាអ្នកផ្សាយដែលមិនទាន់ទទួលបុណ្យជ្រមុជទឹកក្នុងក្រុមជំនុំ តើអ្នកអាចព្យាយាមបំពេញលក្ខណៈដើម្បីទទួលឯកសិទ្ធិនេះបានទេ? សូមសួរខ្លួនឯងនូវសំនួរដូចតទៅនេះថា៖ ‹តើខ្ញុំមានចំណេះបឋមអំពីសេចក្ដីពិតពីព្រះគម្ពីរទេ? តើខ្ញុំចង់ចូលរួមក្នុងកិច្ចបំរើព្រះរាជាណាចក្រទេ? តើចរិយារបស់ខ្ញុំជាគំរូល្អឬទេ? តើខ្ញុំផ្ទាល់អាចថ្លែងប្រាប់ពីជំនឿរបស់ខ្លួន ដោយនិយាយជាមួយអ្នកឯទៀតអំពីដំណឹងល្អបានទេ? តើចិត្តខ្ញុំជំរុញឲ្យធ្វើដូច្នេះទេ›? បើអ្នកអាចឆ្លើយថា‹មែន›ចំពោះសំនួរទាំងនេះ នោះសូមនិយាយជាមួយមាតាបិតារបស់អ្នកថាអ្នកចង់ធ្វើជាអ្នកផ្សាយ។ មាតាបិតារបស់អ្នកអាចនិយាយជាមួយអ្នកចាស់ទុំម្នាក់ដែលរួមក្នុងគណៈកម្មាធិការខាងកិច្ចបំរើ។
១៧ បើអ្នកជាអ្នកផ្សាយដំណឹងល្អរួចហើយ តើអ្នកអាចឆ្លៀតយកប្រយោជន៍ពីវិស្សមកាលនៅសាលាដើម្បីចូលរួមក្នុងកិច្ចផ្សាយឲ្យបានច្រើនជាងបានទេ? ដោយមានកាលវិភាគល្អនិងជំនួយពីមាតាបិតានិងអ្នកឯទៀតនោះ យុវជនជាច្រើនដែលបានទទួលបុណ្យជ្រមុជទឹកហើយបានមានសមត្ថភាពចុះឈ្មោះត្រួសត្រាយជំនួយ។ បើអ្នកគ្មានលទ្ធភាពទេ នោះចូរតាំងចិត្តបង្កើនកិច្ចផ្សាយរបស់អ្នកឲ្យបានច្រើនជាង។ ចូររៀបចំគោលដៅសំរាប់ខ្លួន។ ព្រមជាមួយនឹងគោលដៅថាអ្នកនឹងផ្សាយប៉ុន្មានម៉ោងនោះ ចូររៀបចំគោលដៅមួយទៀត គឺធ្វើឲ្យវិធីផ្សព្វផ្សាយរបស់អ្នកបានប្រសើរឡើងថែមទៀត។ ប្រហែលជាអ្នកអាចព្យាយាមអានបទគម្ពីរជូនម្ចាស់ផ្ទះនិមួយៗ ឬបង្កើនប្រសិទ្ធភាពរបស់អ្នកក្នុងការត្រឡប់ទៅជួបគេ ឬក៏ចាប់ផ្ដើមការសិក្សា ឬមួយក៏ពង្រីកកិច្ចផ្សាយរបស់អ្នកដោយផ្សាយតាមទូរស័ព្ទឬចូលរួមផ្នែកមួយផ្សេងទៀតនៃកិច្ចផ្សាយ។ ចុះយ៉ាងណាគោលដៅអញ្ជើញអ្នកជិតខាង មិត្តរួមថ្នាក់ឬញាតិមិត្តមកចូលរួមពិធីបុណ្យរំឭកជាមួយអ្នកឆ្នាំនេះ? ការចូលរួមយ៉ាងពេញលេញក្នុងសកម្មភាពបែបនេះនឹងធ្វើឲ្យអ្នកសប្បាយចិត្តនិងពិតជានឹងលើកទឹកចិត្តអ្នកឯទៀតក្នុងក្រុមជំនុំ។—១ថែ. ៥:១១
១៨ ចូរជួយអ្នកថ្មីរីកចំរើន : នៅប្រទេសកម្ពុជា រាល់ខែក្នុងកំឡុងឆ្នាំកិច្ចបំរើកន្លងទៅនេះ មានអ្នកសិក្សាមធ្យម៣៤៣,៧នាក់។ ក្រោយមក សិស្សព្រះគម្ពីរជាច្រើនក្នុងចំណោមអ្នកទាំងនេះបានរីកចំរើនទៅដល់ការថ្វាយខ្លួននិងបុណ្យជ្រមុជទឹក។ ប៉ុន្តែ មុនដែលពួកគេអាចសម្រេចគោលដៅនេះ យើងត្រូវតែជួយពួកគេបំពេញតម្រូវការដើម្បីទៅជាអ្នកផ្សាយដំណឹងល្អ។ នេះជាជំហានដ៏សំខាន់មួយក្នុងការបង្រៀនអ្នកថ្មីឲ្យធ្វើជាអ្នកកាន់តាមព្រះយេស៊ូគ្រីស្ទ។ (ម៉ាថ. ៩:៩; លូ. ៦:៤០) តើអ្នកមានសិស្សព្រះគម្ពីរម្នាក់ដែលមានលក្ខណៈគ្រប់គ្រាន់ក្នុងការធ្វើតាមជំហាននេះដែលឬទេ?
១៩ បើអ្នកមិនច្បាស់ថាសិស្សរបស់អ្នកកំពុងតែរីកចំរើនឬយ៉ាងណា នោះចូរសូមជំនួយពីអ្នកត្រួតពិនិត្យក្រុមសិក្សាសៀវភៅរបស់អ្នកឬអ្នកត្រួតពិនិត្យកិច្ចបំរើ។ ប្រហែលជាអ្នកអាចអញ្ជើញគាត់ចូលរួមការសិក្សានោះជាមួយអ្នក។ បងប្រុសទាំងនេះមានបទពិសោធន៍ច្រើន ដែលអាចជួយយើងឲ្យដឹងអំពីការរីកចំរើនរបស់សិស្សយើង។ ពួកគាត់ប្រហែលជាមានយោបល់ដែលនឹងជួយសិស្សនោះបន្តរីកចំរើនខាងវិញ្ញាណ។
២០ ពេលសិស្សរបស់អ្នកប្រាប់ពីចំណង់ក្នុងការចង់ធ្វើជាអ្នកផ្សាយមិនទាន់ជ្រមុជទឹក ហើយអ្នកគិតថាគាត់មានលក្ខណៈគ្រប់គ្រាន់ នោះសូមនិយាយជាមួយប្រធានត្រួតពិនិត្យ។ គាត់នឹងរៀបចំឲ្យមានអ្នកចាស់ទុំពីរនាក់ជួបជាមួយអ្នកនិងសិស្សរបស់អ្នក ដើម្បីពិចារណាថាតើគាត់មានលក្ខណៈគ្រប់គ្រាន់ឬយ៉ាងណា ដោយផ្អែកលើពត៌មានក្នុងសន្លឹកបន្ថែមក្នុងកិច្ចបំរើព្រះរាជាណាចក្រយើង នៅទំព័រទី៦ ខែកក្កដា ឆ្នាំ២០០២។ (សូមមើលទស្សនាវដ្ដីប៉មយាម ថ្ងៃទី១៥ ខែវិច្ឆិកា ឆ្នាំ១៩៨៨ ទំព័រ១៧ ជាភាសាអង់គ្លេស)។ បើសិស្សនោះបានទទួលការយល់ព្រមឲ្យទៅផ្សព្វផ្សាយនោះ អ្នកគួរចាប់ផ្ដើមបង្ហាត់គាត់ភ្លាមៗ។ នៅពេលគាត់ជូនសេចក្ដីរាយការណ៍កិច្ចផ្សាយលើកដំបូង នោះក្រុមជំនុំនឹងត្រូវជំរាបថា គាត់ជាអ្នកផ្សាយមិនទាន់ជ្រមុជទឹក។ យើងសង្ឃឹមថានឹងមានអ្នកផ្សាយថ្មីរាប់ពាន់នាក់ទាំងចាស់ទាំងក្មេង ដែលអាចឈានទៅដល់ជំហានដ៏សំខាន់នេះក្នុងកំឡុងពីរខែដែលមានសកម្មភាពពិសេសនេះ។
២១ ការរៀបចំជាមុនជួយយើងសម្រេចការល្អឲ្យបានច្រើនបំផុត: ការរៀបចំជាមុននឹងជួយយើងទទួលបានជោគជ័យក្នុងសកម្មភាពរបស់យើងក្នុងកំឡុងពេលឈានទៅដល់ថ្ងៃបុណ្យរំឭក។ (សុ. ២១:៥) មានរឿងជាច្រើនដែលអ្នកចាស់ទុំត្រូវយកចិត្តទុកដាក់។
២២ ដើម្បីជួយក្រុមជំនុំសម្រេចការឲ្យបានច្រើនបំផុតក្នុងកិច្ចផ្សាយ អ្នកចាស់ទុំគួររៀបចំឲ្យមានការប្រជុំផ្សព្វផ្សាយរាល់ថ្ងៃ។ ប្រធានត្រួតពិនិត្យគួរនាំមុខចាត់ចែងការរៀបចំនេះ។ តើអាចបន្ថែមការប្រជុំសំរាប់ពេលព្រលឹម ល្ងាច ឬក្បាលព្រលប់បានឬទេ? ត្រូវជំរាបក្រុមជំនុំអំពីការរៀបចំទាំងនោះ។ ប្រហែលជាមានប្រយោជន៍បើបិទកម្មវិធីលើក្ដារពត៌មាន។
២៣ អ្នកចាស់ទុំគួរធ្វើការចាត់ចែងសំរាប់បុណ្យរំឭក តាំងពីយូរមុនថ្ងៃទី១៦ខែមេសា។ នេះរួមបញ្ចូលការចាត់ចែងសម្របសម្រួលជាមួយក្រុមជំនុំឯទៀតដែលប្រហែលជាជួបជុំគ្នានៅទីនោះសំរាប់ការប្រើសាលព្រះរាជាណាចក្រ ព្រមទាំងការសំអាតសាល ការជ្រើសរើសឆ្មាំនិងអ្នកជូនវត្ថុតំណាង ហើយការទិញវត្ថុតំណាង។ ក្រុមជំនុំគួរទទួលដំណឹងអំពីម៉ោងនិងទីកន្លែងនៃបុណ្យរំឭក ហើយបើកម្មវិធីប្រជុំសំរាប់សប្ដាហ៍នោះកែប្រែ។ ការព្យាយាមយកចិត្តទុកដាក់ទៅលើអ្វីៗទាំងនេះនឹងធ្វើឲ្យពិធីនេះមានដំណើរការ«តាមបែបគួរសម ហើយដោយលំដាប់លំដោយផង»។—១កូ. ១៤:៤០
២៤ បណ្ដាមេគ្រួសារប្រហែលជាអាចឆ្លៀតពេលក្នុងកំឡុងការសិក្សាជាក្រុមគ្រួសារដើម្បីពិគ្រោះរបៀបក្រុមគ្រួសារអាចចូលរួមកិច្ចផ្សាយឲ្យបានច្រើនជាងក្នុងពេលឈានទៅដល់ថ្ងៃបុណ្យរំឭក។ តើក្រុមគ្រួសារទាំងមូលរបស់អ្នកអាចត្រួសត្រាយជំនួយបានទេ? ឬក៏តើក្រុមគ្រួសារអាចគាំទ្រសមាជិកម្នាក់ឬពីរនាក់ឲ្យគេអាចត្រួសត្រាយជំនួយបានឬទេ? បើមិនបានទេ ចូររៀបចំគោលដៅជាក់លាក់ជាក្រុមគ្រួសារដើម្បីចំណាយពេលច្រើនជាងក្នុងកិច្ចផ្សព្វផ្សាយ។ តើមានអ្នកនៅក្មេងក្នុងក្រុមគ្រួសាររបស់អ្នកដែលអាចបំពេញលក្ខណៈធ្វើជាអ្នកផ្សាយមិនទាន់ជ្រមុជទឹកបានបើអ្នកជួយឬលើកទឹកចិត្តគាត់បន្ដិចបន្តួច ឬទេ? តើក្រុមគ្រួសាររបស់អ្នកអាចអញ្ជើញមនុស្សបានប៉ុន្មាននាក់មកបុណ្យរំឭកឆ្នាំនេះ? ការរៀបចំឲ្យបានល្អនឹងនាំមកនូវពរជាច្រើននិងអំណរចំពោះក្រុមគ្រួសាររបស់អ្នក។
២៥ ចូរឆ្លៀតយកប្រយោជន៍ឲ្យបានពេញលេញពីពេលវេលាដែលនៅសល់ : ពេលសាវ័កពេត្រុសផ្ញើសំបុត្រជូនគ្រីស្ទាននៅសតវត្សទីមួយ គាត់រំឭកពួកគេអំពីភាពបន្ទាន់នៅសម័យនោះដោយព្រោះទីបញ្ចប់នៃរបបយូដាជិតមកដល់ហើយ។ (១ពេ. ៤:៧) សព្វថ្ងៃនេះ ភស្តុតាងបញ្ជាក់ឲ្យឃើញថាទីបញ្ចប់នៃរបបលោកីយ៍ទាំងមូលនេះក៏ជិតមកដល់ដែរ។ ពីមួយថ្ងៃទៅមួយថ្ងៃ វិថីជីវិតរបស់យើងគួរបញ្ជាក់ថាយើងជាអ្នកមានជំនឿថានោះជាពិត។ ក្នុងនាមជាអ្នកបំរើព្រះយេហូវ៉ាដែលខ្នះខ្នែង យើងគួរផ្ចង់ចិត្តទៅលើការប្រកាសប្រាប់ដំណឹងល្អនេះដែលត្រូវធ្វើជាបន្ទាន់។—ទីត. ២:១៣, ១៤
២៦ គ្រាឥឡូវនេះជាពេលដែលត្រូវមានចិត្តខ្នះខ្នែងនិងមានសកម្មភាព! ចូររំពឹងគិតអំពីអ្វីដែលព្រះយេហូវ៉ាបានប្រព្រឹត្តដើម្បីអ្នក ក្រុមគ្រួសារអ្នក និងក្រុមជំនុំ។ ទោះជាយើងគ្មានសមត្ថភាពតបស្នងសងគុណព្រះយេហូវ៉ាឲ្យសមនឹងអ្វីៗដែលទ្រង់ធ្វើសំរាប់ឲ្យយើងទទួលប្រយោជន៍ក៏ដោយ តែយើងអាចថ្វាយបង្គំព្រះយេហូវ៉ាអស់ពីព្រលឹងបាន។ (ទំនុក. ១១៦:១២-១៤) ការព្យាយាមរបស់យើងនឹងទទួលពរពីព្រះយេហូវ៉ា។ (សុ. ១០:២២) ចូរយើងទាំងអស់គ្នា«ខ្នះខ្នែងប្រព្រឹត្តអំពើល្អ»ក្នុងកំឡុងពេលមានសកម្មភាពពិសេសនេះ «ដើម្បីឲ្យព្រះបានថ្កើងឡើងក្នុងគ្រប់ការទាំងអស់ដោយសារព្រះយេស៊ូវគ្រីស្ទ»។—១ពេ. ៣:១៣, ព្រះគម្ពីរភាសាខ្មែរសម្រាយ; ១ពេ. ៤:១១
[Box on page 3]
ចំនួនអ្នកចូលរួម បុណ្យរំឭក ទូទាំងពិភពលោក
១៩៩៩ ១៤.០៨៨.៧៥១
២០០០ ១៤.៨៧២.០៨៦
២០០១ ១៥.៣៧៤.៩៨៦
២០០២ ១៥.៥៩៧.៧៤៦
[Box on page 4]
តើអ្នកនឹងអញ្ជើញ អ្នកណាខ្លះ មកបុណ្យរំឭក?
□ សមាជិកក្រុមគ្រួសារនិងញាតិមិត្ត
□ អ្នកជិតខាងនិងមនុស្សដែលអ្នកស្គាល់
□ អ្នកដែលធ្វើការជាមួយឬសិស្សរួមថ្នាក់
□ ការត្រឡប់ទៅជួបនិងសិស្សព្រះគម្ពីរ
[Box on page 5]
ចូរជួយអ្នកដែលមកបុណ្យរំឭក
□ អញ្ជើញយ៉ាងកក់ក្ដៅ
□ ទៅជួបពួកគេដើម្បីបណ្ដុះបណ្ដាលចំណាប់អារម្មណ៍
□ សុំបង្រៀនពួកគេនូវព្រះគម្ពីរ
□ អញ្ជើញពួកគេឲ្យមកស្ដាប់សុន្ទរកថាពិសេស
[Box on page 6]
តើអ្នកមានគោលដៅអ្វីខ្លះសំរាប់ពេលដែលឈានទៅដល់បុណ្យរំឭក?
□ ចង់មានមនុស្សម្នាក់មកបុណ្យរំឭកតាមការអញ្ជើញរបស់អ្នក
□ បំពេញលក្ខណៈទៅជាអ្នកផ្សាយដំណឹងល្អ
□ ចំណាយម៉ោងមួយចំនួនជាក់លាក់ក្នុងកិច្ចផ្សាយ
□ ធ្វើឲ្យផ្នែកណាមួយក្នុងកិច្ចផ្សព្វផ្សាយរបស់យើងប្រសើរឡើងថែមទៀត
□ បំរើជាអ្នកត្រួសត្រាយជំនួយ