«ព្រះទ្រង់អាចនឹងធ្វើកើតទាំងអស់»
១ កិច្ចការដ៏ចំបងរបស់ក្រុមជំនុំគ្រីស្ទាន គឺជាកិច្ចការផ្សព្វផ្សាយទូទាំងពិភពលោកនេះនូវសារអំពីព្រះរាជាណាចក្រ។ (ម៉ាថាយ ២៤:១៤) នេះជាកិច្ចការដ៏ធំមហិមាមែន។ ចំពោះអ្នកសង្កេតមើលជាច្រើននាក់ កិច្ចការនេះតម្រូវធនធានច្រើនជាងលទ្ធភាពរបស់យើង។ ចំពោះអ្នកឯទៀត ការសម្រេចកិច្ចការនេះមើលទៅដូចជាធ្វើមិនបានឡើយ ដោយព្រោះគេសើចចំអកដាក់យើង ទាំងប្រឆាំង និងបៀតបៀនដែរ។ (ម៉ាថាយ ២៤:៩; ធីម៉ូថេទី២ ៣:១២) អ្នកសង្ស័យខ្លះជឿជាក់ថា កិច្ចការនេះជាកិច្ចការដែលសម្រេចមិនបានទាល់តែសោះ។ ក៏ប៉ុន្តែ ព្រះយេស៊ូបានមានបន្ទូលថា៖ «ព្រះទ្រង់អាចនឹងធ្វើកើតទាំងអស់»។—ម៉ាថាយ ១៩:២៦
២ គំរូដ៏ល្អដែលគួរនឹងធ្វើតម្រាប់តាម: ព្រះយេស៊ូបានចាប់ផ្ដើមកិច្ចបំរើផ្សាយរបស់ទ្រង់ ជាមនុស្សម្នាក់ដែលទាស់នឹងរបបលោកីយ៍ទាំងមូលនេះ។ ក្នុងការខំប្រឹងបង្អាក់ទ្រង់កុំឲ្យបានជោគជ័យនោះ អ្នកដែលប្រឆាំងទ្រង់បានធ្វើបាបទ្រង់គ្រប់បែបគ្រប់យ៉ាង និងនៅទីបំផុតបានធ្វើគុតទ្រង់ដោយរបៀបមួយដែលធ្វើឲ្យឈឺចាប់ជាខ្លាំង។ យ៉ាងណាក៏ដោយ នៅទីបំផុតនោះព្រះយេស៊ូបានមានបន្ទូលដោយមានទំនុកចិត្តថា៖ «ខ្ញុំបានឈ្នះលោកីយហើយ»។ (យ៉ូហាន ១៦:៣៣) នេះជាការសម្រេចមួយដ៏អស្ចារ្យមែនហ្ន៎!
៣ សិស្សរបស់ព្រះយេស៊ូក៏បានបង្ហាញចិត្តគំនិតខ្នះខ្នែងនិងក្លាហានដូចគ្នាដែរ ក្នុងកិច្ចបំរើគ្រីស្ទាននោះ។ សិស្សច្រើននាក់នោះបានត្រូវគេវាយនឹងរំពាត់ វាយដោយដំបង បានត្រូវចាប់ដាក់គុក ទាំងបានត្រូវគេសម្លាប់ផងដែរ។ ក៏ប៉ុន្តែ គេបាន«អរសប្បាយ ពីព្រោះ[គេ, ព.ថ.]បានរាប់ជាអ្នកគួរនឹងទ្រាំសេចក្ដីដំនៀល ដោយព្រោះព្រះនាមទ្រង់»។ (កិច្ចការ ៥:៤១) ថ្វីបើទំនងជាគ្មានលទ្ធភាពទទួលជោគជ័យក៏ដោយ ពួកគេបានសម្រេចអ្វីដែលមើលទៅដូចជាមិនអាចធ្វើបានទាល់តែសោះ គឺជាការផ្សព្វផ្សាយដំណឹងល្អ«រហូតដល់ចុងផែនដីបំផុត»។—កិច្ចការ ១:៨; កូល៉ុស ១:២៣
៤ របៀបទទួលជ័យជំនះនាបច្ចុប្បន្នយើងនេះ: យើងបានយល់ព្រមធ្វើកិច្ចការផ្សព្វផ្សាយអំពីព្រះរាជាណាចក្រដោយចិត្តខ្នះខ្នែង ថ្វីបើទំនងជាគ្មានលទ្ធភាពទទួលជោគជ័យទេ។ ថ្វីបើមានបំរាម ការធ្វើទុក្ខបៀតបៀន ការចាប់ដាក់គុក និងរបៀបឃោរឃៅឯទៀតដើម្បីខំបញ្ឈប់យើងក៏ដោយ យើងនៅតែមានជ័យជំនះ។ ហេតុដូចម្ដេចបានជាអាចទៅជាអ៊ីចឹងបាន? «ព្រះយេហូវ៉ានៃពួកពលបរិវារ ទ្រង់មានបន្ទូលថា៖ ‹មិនមែនដោយឥទ្ធិឫទ្ធិ ឬដោយអំណាចទេ គឺដោយសារវិញ្ញាណរបស់អញវិញ›»។ (សាការី ៤:៦) ដោយមានព្រះយេហូវ៉ាគាំទ្រយើង គ្មានអ្វីទាល់តែសោះដែលអាចបញ្ឈប់យើងបានឡើយ!—រ៉ូម ៨:៣១
៥ នៅពេលដែលយើងផ្សព្វផ្សាយ គឺគ្មានហេតុឲ្យយើងទៅជាកំសាក ខ្លាច ឬគិតថាខ្វះសមត្ថភាពនោះឡើយ។ (កូរិនថូសទី២ ២:១៦, ១៧) យើងមានមូលហេតុដ៏ល្អលើសលប់ដើម្បីបន្តទៅមុខក្នុងការផ្សព្វផ្សាយដំណឹងល្អអំពីព្រះរាជាណាចក្រ។ ដោយមានជំនួយពីព្រះយេហូវ៉ា យើងនឹងធ្វើអ្វីដែល«មនុស្សធ្វើមិនកើត»វិញ!—លូកា ១៨:២៧