កិច្ចការផ្សព្វផ្សាយនូវសារព្រះរាជាណាចក្រអាចជួយសង្គ្រោះជីវិតមនុស្សបាន!
១ កិច្ចការនេះជាកិច្ចការដ៏សំខាន់បំផុតដែលកំពុងតែកើតមានឡើងក្នុងលោកីយ៍នាបច្ចុប្បន្នកាលនេះ។ ព្រះយេហូវ៉ា ព្រះយេស៊ូគ្រីស្ទ និងទេវតារាប់សែនរូបបានផ្ដោតអារម្មណ៍ទៅលើកិច្ចការនេះ។ តើកិច្ចការនេះជាអ្វីទៅ? ហេតុអ្វីបានជាកិច្ចការនេះចាំបាច់ដូច្នេះ? នេះជាកិច្ចការផ្សាយនូវសារព្រះរាជាណាចក្រ ហើយក៏អាចជួយសង្គ្រោះជីវិតមនុស្សបាន!—រ៉ូម ១:១៦; ១០:១៣, ១៤
២ មនុស្សខ្លះប្រហែលជាគិតថា យើងអាចជួយបានច្រើនជាង បើយើងខំធ្វើឲ្យពិភពលោកយើងនេះបានប្រសើរឡើង។ មនុស្សជាច្រើនជក់ស្លុងនឹងការព្យាយាមបង្កើតឲ្យមានសន្ដិភាព ការព្យាបាលជម្ងឺឲ្យជា និងការលើកស្ទួយសេដ្ឋកិច្ចឲ្យបានប្រសើរឡើង។ ប៉ុន្តែ តើអ្វីទៅអាចផ្ដល់ប្រយោជន៍ច្រើនបំផុតដល់មនុស្ស?
៣ កិច្ចការដ៏សំខាន់បំផុត: មានតែសារអំពីព្រះរាជាណាចក្រប៉ុណ្ណោះ ដែលអាចពន្យល់អំពីគោលបំណងនៃជីវិត អំពីដើមហេតុដែលបណ្ដាលឲ្យមនុស្សរងទុក្ខ និងអំពីសេចក្ដីសង្ឃឹមតែមួយគត់ដែលយើងអាចទុកចិត្តបានស្តីពីពេលអនាគត។ ដំណឹងល្អនេះបើកផ្លូវឲ្យមនុស្សក្លាយជាមិត្តសំឡាញ់របស់ព្រះយេហូវ៉ា ហើយតាមវិធីនេះអាចទទួល«សេចក្ដីសុខសាន្តរបស់ព្រះ ដែលហួសលើសពីអស់ទាំងគំនិត»។ (ភី. ៤:៧) មានតែសារអំពីព្រះរាជាណាចក្រនេះទេ ដែលឲ្យការណែនាំដើម្បីជួយមនុស្សឲ្យស៊ូទ្រាំនឹងបញ្ហាក្នុងជីវិតនៅពេលឥឡូវនេះ ហើយពន្យល់អំពីរបៀបទទួលការការពារឲ្យរួចរស់ជីវិតនាអនាគតកាល ពេលលោកីយ៍ដ៏ខូចអាក្រក់នេះនឹងត្រូវបំផ្លាញចោល។ (១យ៉ូន. ២:១៧) អាស្រ័យហេតុនេះ បានជាមានប្រយោជន៍ឲ្យយើងខិតខំអស់ពីសមត្ថភាពក្នុងកិច្ចការផ្សាយនូវសារព្រះរាជាណាចក្រ មែនទេ?
៤ ឧបមាថា មនុស្សក្នុងភូមិតូចមួយកំពុងតែសំរាន្តមិនដឹងខ្លួនទេថាទំនប់អាងធំមួយហៀបនឹងបាក់លិចភូមិ។ តើជំនួយបែបណាប្រសើរជាងគេ? បាចទឹកចេញពីអាងនោះឬ? សំអាតនិងតុបតែងភូមិដែលជិតវិនាសនោះឬ? មិនមែនទេ! គឺត្រូវដាស់អ្នកភូមិ ព្រមទាំងព្រមានពួកគេអំពីមហន្តរាយដែលជិតមកដល់ ហើយជួយគេរត់ឲ្យបានរួចជីវិតផងដែរ! មនុស្សសព្វថ្ងៃនេះកំពុងតែដេកលក់ខាងវិញ្ញាណក៏ស្ថិតក្នុងស្ថានភាពដែលអាចមានគ្រោះថ្នាក់ដ៏ធ្ងន់ធ្ងរផងដែរ។ (លូ. ២១:៣៤-៣៦) ដោយសាររបបលោកីយ៍នេះនឹងកន្លងផុតទៅឆាប់ៗខាងមុខនេះ ចូរឲ្យយើងខំផ្សព្វផ្សាយយ៉ាងបន្ទាន់ដល់អស់អ្នកណាដែលយើងអាចជួបបាន!—២ធី. ៤:២; ២ពេ. ៣:១១, ១២
៥ ចូរព្យាយាមជានិច្ចចុះ!: សូមឲ្យយើងរិះរកវិធីផ្សេងៗដើម្បីជួបមនុស្សកាន់តែច្រើននាក់ទៀតដែលមានចិត្តស្មោះស ឲ្យគេទទួលស្ដាប់ដំណឹងល្អ មិនថានៅផ្ទះគេ តាមផ្លូវថ្នល់ តាមរយៈទូរស័ព្ទ និងផ្សព្វផ្សាយក្រៅផ្លូវការជាដើម។ កិច្ចការដែលព្រះយេហូវ៉ាបានប្រគល់ឲ្យយើង គឺជាកិច្ចការដ៏សំខាន់បំផុតដែលយើងអាចធ្វើទៅបាន។ បើយើងធ្វើការនេះយ៉ាងខ្នះខ្នែង យើង‹នឹងសង្គ្រោះខ្លួនយើងបាន ព្រមទាំងពួកអ្នកដែលស្ដាប់យើងផង›។—១ធី. ៤:១៦