ប្រអប់សំណួរ
◼ តើយើងគួរនឹកចាំពីអ្វីពេលយើងប្រើទូរស័ព្ទដៃនិងហ្វូនលីង?
ឧបករណ៍ទាំងនេះអាចផ្ដល់លទ្ធភាពឲ្យយើងប្រាស្រ័យទាក់ទងជាមួយអ្នកឯទៀតស្ទើរតែគ្រប់កន្លែងទាំងអស់មិនថាយើងស្ថិតនៅទីណាក៏ដោយ។ ទោះបីជា នេះអាចមានប្រយោជន៍ក៏ពិតមែន តែយើងត្រូវប្រុងប្រយ័ត្នមិនឲ្យការប្រើទូរស័ព្ទដៃនិងហ្វូនលីងរំខានក្នុងកិច្ចបម្រើផ្សាយឬនៅកិច្ចប្រជុំគ្រិស្តសាសនិកឡើយ។ តើការនេះអាចកើតឡើងយ៉ាងដូចម្ដេច?
តើម្ចាស់ផ្ទះនឹងគិតយ៉ាងណា? ពេលដែលយើងកំពុងតែធ្វើបន្ទាល់ស្រាប់តែទូរស័ព្ទដៃឬហ្វូនលីងរោទ៍ឡើង។ តើម្ចាស់ផ្ទះមានអារម្មណ៍បែបណាពេលយើងផ្អាកដើម្បីឆ្លើយទូរស័ព្ទដៃរបស់យើង? យើងប្រាកដជាមិនចង់ឲ្យអ្វីមួយបង្អាក់អ្នកឯទៀតពីការស្ដាប់សារព្រះរាជាណាចក្រឡើយ។ (២កូ. ៦:៣) ដូច្នេះ បើសិនជាយើងកាន់ទូរស័ព្ទដៃឬហ្វូនលីង គួរតែបន្ថយសំឡេងឲ្យឮតិចៗឬក៏ដាក់ឲ្យញ័រប៉ុណ្ណោះ ដើម្បីកុំឲ្យរំខានខ្លួនយើងផ្ទាល់និងអ្នកឯទៀតពេលផ្សព្វផ្សាយ។
ចុះយ៉ាងណាវិញពេលដែលដៃគូរបស់យើងកំពុងតែធ្វើបន្ទាល់? បើយើងបានកំណត់ពេលសម្រាប់ធ្វើកិច្ចបម្រើផ្សាយ យើងគួរផ្ចង់ស្មារតីទៅលើសកម្មភាពនោះ មែនទេ? ចូរបង្ហាញការគោរពដល់កិច្ចការដ៏ពិសិដ្ឋរបស់យើង ដោយទុករឿងផ្ទាល់ខ្លួនដូចជារបររកស៊ី ឬការដើរលេងកម្សាន្តជាដើមនៅពេលផ្សេងវិញ។ (រ៉ូម ១២:៧) ប៉ុន្តែនេះមិនមានន័យថា យើងមិនអាចប្រើទូរស័ព្ទដើម្បីធ្វើបន្ទាល់បន្ថែម ឬក៏ណាត់ជួបគ្នាដើម្បីផ្សព្វផ្សាយឡើយ។
យើងត្រូវតែប្រុងប្រយ័ត្នយ៉ាងម៉ឺងម៉ាត់ពីការប្រើទូរស័ព្ទដៃពេលបើកបរ។ យោងតាមការស្រាវជ្រាវមួយចំនួនបានបង្ហាញឲ្យឃើញថា បើប្រើទូរស័ព្ទកាន់តែច្រើននោះក៏បង្កើនហេតុបង្កគ្រោះថ្នាក់កាន់តែច្រើនជាងដែរ។ យើងគួរតែធ្វើតាមច្បាប់ដោយហ្មត់ចត់ពីការប្រើទូរស័ព្ទដៃពេលបើកបរ។
ដោយហេតុថា យើងមកកិច្ចប្រជុំ សន្និបាត និងមហាសន្និបាតដើម្បីថ្វាយបង្គំព្រះយេហូវ៉ាព្រមទាំងទទួលការបង្ហាត់បង្រៀនពីទ្រង់។ ដូច្នេះ គួរគប្បីឲ្យយើងបង្ហាញចិត្តកតញ្ញូចំពោះភាពពិសិដ្ឋនៃឱកាសទាំងអស់នោះ ដោយបន្ថយសំឡេងទូរស័ព្ទដៃឬហ្វូនលីងឲ្យឮតិចៗឬក៏ដាក់ឲ្យញ័រប៉ុណ្ណោះ ដើម្បីកុំឲ្យរំខានខ្លួនយើងផ្ទាល់ព្រមទាំងអ្នកឯទៀតដែរ។ បើសិនជាមានរឿងបន្ទាន់តម្រូវឲ្យយើងយកចិត្តទុកដាក់ភ្លាមៗ យើងគួរចាត់ចែងរឿងនោះនៅខាងក្រៅសាលប្រជុំ។ ពុំនោះទេ គួរគប្បីឲ្យយើងរៀបចំកិច្ចការផ្ទាល់ខ្លួនដែលមិនទាក់ទងនឹងការថ្វាយបង្គំពេលផ្សេងទៀត ជាជាងយកពេលដែលបានកំណត់ទុកសម្រាប់ការថ្វាយបង្គំ។—១កូ. ១០:២៤
សូមឲ្យរបៀបដែលយើងប្រើទូរស័ព្ទដៃឬក៏ឧបករណ៍អេឡិចត្រូនិក បង្ហាញថាយើងចេះគិតពីអ្នកដទៃ និងបង្ហាញចិត្តកតញ្ញូដ៏ជ្រាលជ្រៅ ចំពោះការរៀបចំដើម្បីជួយយើងឲ្យរក្សាទំនាក់ទំនងជាមួយនឹងព្រះ។