ការទទួលប្រយោជន៍យ៉ាងពេញលេញពីមហាសន្និបាតតាមតំបន់ «អ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ»
១ កម្មវិធីដែលពង្រឹងកម្លាំង: ក្នុងពេលថ្មីៗនេះនៅឯមហាសន្និបាតតាមតំបន់ យើងបានអរសប្បាយនឹងកម្មវិធីដែលបានជំរុញទឹកចិត្តណាស់! ហើយយើងបានជួបជុំគ្នាដោយមានគោលដៅតែមួយ គឺការធ្វើជាអ្នកមានសមត្ថភាពប្រសើរជាងមុនក្នុងការប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ។ តើអ្នកចាំរបៀបដែលអ្នកថ្លែងសុន្ទរកថាទីមួយបានពន្យល់អត្ថន័យពាក្យ«ប្រកាស»ទេ? តើអ្នកនៅចាំអំពីសុន្ទរកថាប្រធាន«កុំឲ្យភ័យខ្លាចឡើយ ដោយដឹងថាព្រះយេហូវ៉ាគង់នៅជាមួយនឹងយើង» នេះបានលើកទឹកចិត្តយើងឲ្យស្រាវជ្រាវអ្វីខ្លះ? តើអ្នកបានស្រាវជ្រាវអំពីជីវប្រវត្ដិរបស់បងប្អូនណាខ្លះហើយ?
២ សុន្ទរកថាចែកជាផ្នែកៗដែលមានប្រធានថា«ជំនឿរបស់យើងត្រូវសាកល្បងដោយទុក្ខលំបាកផ្សេងៗ» ហើយក្នុងសុន្ទរកថាទាំងនេះបានផ្ដល់មូលហេតុបីយ៉ាងដែលព្រះយេហូវ៉ាអនុញ្ញាតឲ្យមានការបៀតបៀន។ តើអ្នកអាចពន្យល់នូវមូលហេតុទាំងនេះបានទេ? យោងទៅតាមព្រះគម្ពីរ តើមានមូលហេតុអ្វីដែលយើងជាគ្រីស្ទានរក្សាភាពអព្យាក្រឹត? តើយើងបានទទួលការលើកទឹកចិត្តអ្វី ដើម្បីប្រុងប្រៀបជាស្រេចចំពោះបញ្ហាដែលយើងនឹងប្រឈមមុខដោយព្រោះយើងរក្សាភាពអព្យាក្រឹតនោះ? តើតាមរបៀបណាដែលយើងអាចស៊ូទ្រាំនឹងការលំបាកដោយនៅស្មោះត្រង់ចំពោះព្រះយេហូវ៉ា ដែលនាំឲ្យទ្រង់ទទួលការសរសើរនោះ?
៣ ជាពិសេស តើឆាកណាខ្លះក្នុងឈុតសម្ដែង«តាំងជំហរមាំមួនក្នុងគ្រាលំបាក» បានពង្រឹងកម្លាំងរបស់អ្នក? តើយើងអាចធ្វើយ៉ាងដូចម្ដេចដើម្បីបង្ហាញថាយើងដូចយេរេមា?
៤ តើសុន្ទរកថាសាធារណៈប្រធានថា: «‹គំរូនៃលោកីយនេះកំពុងតែផ្លាស់ទៅ›» បានពន្យល់នូវការប្រែប្រួលដ៏សំខាន់ណាខ្លះ ដែលនឹងកើតមានឡើងមុនថ្ងៃដ៏គួរឲ្យស្ញែងខ្លាចរបស់ព្រះ? នៅពេលដែលអ្នកបានស្ដាប់សុន្ទរកថាចុងក្រោយដែលមានប្រធានថា«ក្នុងនាមជាអ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ ចូរធ្វើការដ៏ល្អជាបរិបូរចុះ!» តើពត៌មាននោះទាក់ទងនឹងកិច្ចបំរើផ្ទាល់របស់អ្នកយ៉ាងណា?
៥ ចំណុចសំខាន់ដែលត្រូវយកមកអនុវត្ត: ដូចសុន្ទរកថា«ចូរឲ្យចេះដឹងគុណ!»បានពន្យល់នោះ តើយើងអាចសម្ដែងនូវកតញ្ញូធម៌យ៉ាងជ្រាលជ្រៅចំពោះព្រះយេហូវ៉ាតាមរបៀបណា? ក្នុងសុន្ទរកថាជាមូលដ្ឋានដែលមានប្រធានថា«អ្នកប្រកាសសារព្រះរាជាណាចក្ររបស់ព្រះ បានញ៉ាំងឲ្យផ្សាយយ៉ាងខ្នះខ្នែង» តើយើងបានត្រូវលើកទឹកចិត្តឲ្យធ្វើតំរាប់តាមការខ្នះខ្នែងរបស់អ្នកណា? តើយើងបានត្រូវអញ្ជើញឲ្យធ្វើការពិនិត្យមើលខ្លួនដោយដូចម្ដេច?
៦ សុន្ទរកថាចែកជាផ្នែកៗដែលមានប្រធានថា«ទំនាយរបស់លោកមីកាជួយផ្ដល់កម្លាំងចិត្តឲ្យយើងដើរតាមព្រះនាមនៃព្រះយេហូវ៉ា» តើបានលើកបញ្ជាក់តម្រូវការបីយ៉ាងអ្វី ដែលយើងត្រូវធ្វើតាមដើម្បីទទួលព្រះគុណពីព្រះយេហូវ៉ា? តើយើងអាចបំពេញតម្រូវការទាំងនេះបានឬទេ? (មីកា ៦:៨) យោងទៅតាមសុន្ទរកថាដែលមានប្រធាន«ចូររក្សាភាពបរិសុទ្ធដោយការពារចិត្តរបស់ខ្លួន» តើតាមវិធីណាដែលយើងអាចរក្សាខ្លួនឲ្យស្អាតស្អំខាងសីលធម៌? តើសុន្ទរកថាប្រធានថា «ចូរប្រុងប្រយ័ត្ននឹងការភូតភរបោកបញ្ឆោត» បានព្រមានកុំឲ្យយើងត្រូវចាញ់បញ្ឆោតក្នុងរឿងអ្វីខ្លះ ហើយកុំឲ្យយើងបោកបញ្ឆោតអ្នកឯទៀតក្នុងរឿងអ្វីដែរ?
៧ តើសុន្ទរកថាចែកជាផ្នែកៗដែលមានប្រធាន«អ្នកផ្សាយសារព្រះរាជាណាចក្ររបស់ព្រះដែលដំកើងកិច្ចបំរើរបស់ខ្លួន»មានចំណុចណាខ្លះ ដែលអ្នកបានអនុវត្តក្នុងកិច្ចបំរើរបស់ខ្លួនរួចហើយទទួលបានប្រយោជន៍នោះ? ក្នុងសុន្ទរកថាដែលមានប្រធាន«ការសន្ទនាអំពីអ្វីៗខាងវិញ្ញាណតែងតែជួយលើកទឹកចិត្ត» បទគម្ពីរនៅភីលីព ៤:៨ បានត្រូវយកមកវិភាគ។ តើខគម្ពីរនោះជួយយើងឲ្យមានការសន្ទនាដែលទាក់ទងនឹងរឿងខាងវិញ្ញាណដោយដូចម្ដេច? ហើយតើយើងគួរធ្វើដូច្នេះនៅពេលណា?
៨ សុន្ទរកថាប្រធាន «ចូរទុកចិត្តទៅលើព្រះយេហូវ៉ាទាំងស្រុង ពេលជួបប្រទះទុក្ខលំបាក» បានពិគ្រោះនូវវិធីដែលយើងអាចស៊ូទ្រាំពេលដែលយើងជួបប្រទះព្រឹត្ដិការណ៍ដ៏ខ្លោចផ្សា បញ្ហាខាងសុខភាព បញ្ហាក្នុងគ្រួសារ និងការពិបាកយកឈ្នះភាពទន់ខ្សោយរបស់ខ្លួន។ តើតាមវិធីណាដែលបង្ហាញថាយើងទុកចិត្តលើព្រះយេហូវ៉ាពេលយើងជួបប្រទះកាលៈទេសៈដូចនេះ?
៩ រតនៈសម្បត្ដិថ្មិខាងវិញ្ញាណ: យើងមានចិត្តអរសប្បាយដោយបានទទួលសៀវភៅថ្មីចូរថ្វាយបង្គំព្រះពិតតែមួយ។ តើសេចក្ដីជូនដំណឹងដែលពន្យល់នូវគោលបំណងនៃសៀវភៅនោះធ្វើឲ្យអ្នកមានអារម្មណ៍យ៉ាងណា? ក្នុងកិច្ចការផ្សព្វផ្សាយរបស់យើង តើហេតុអ្វីបានជាសៀវភៅនេះគឺជំនួយដ៏ល្អហើយជាសៀវភៅទីពីរដែលយើងអាចសិក្សាជាមួយសិស្សរបស់យើង?
១០ បន្ទាប់មក យើងបានទទួលសៀវភៅដ៏ស្អាតមួយទៀតគឺគន្លឹះនៃសុភមង្គលគ្រួសារ។ តើសៀវភៅនេះមានលក្ខណៈពិសេសយ៉ាងណាខ្លះ? តើរូបភាពណាដែលអ្នកចូលចិត្តជាងគេ? តើការអានសៀវភៅនេះជំរុញឲ្យអ្នកចង់បង្កើតឲ្យមានភាពស្និទ្ធស្នាលជាងជាមួយគ្រួសាររបស់អ្នកទេ? តើអ្នកណាទៀតដែលប្រហែលជាទទួលប្រយោជន៍ពីសៀវភៅនេះ?
១១ មហាសន្និបាតតាមតំបន់ប្រធាន«អ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ» បានផ្ដល់ឲ្យយើងនូវការលើកទឹកចិត្តខាងវិញ្ញាណដែលយើងត្រូវការក្នុងគ្រាដ៏ពិបាកនេះ។ ដូច្នេះ ដើម្បីទទួលប្រយោជន៍ច្រើនបំផុតពីសំវិធានការខាងវិញ្ញាណនេះ ចូរឲ្យយើងខំអស់ពីសមត្ថភាពដើម្បីនឹកចាំអ្វីៗដែលបានត្រូវថ្លែងប្រាប់ និងបង្ហាញការដឹងគុណចំពោះពត៌មានដែលយើងបានទទួលនោះ ហើយអនុវត្តតាមអ្វីដែលយើងបានរៀន។ (២ពេ. ៣:១៤) បើយើងធ្វើដូច្នេះ នោះយើងនឹងពង្រឹងនូវចិត្តស្មោះត្រង់របស់យើង ដោយធ្វើជាអ្នកយកតំរាប់តាមព្រះអម្ចាស់ព្រះយេស៊ូគ្រីស្ទជាអ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ ដើម្បីលើកសិរីល្អចំពោះព្រះយេហូវ៉ា។—ភី. ១:៩-១១