ព្រះបន្ទូលរបស់ព្រះជាសេចក្ដីពិត
១ អ្នកតែងទំនុកដំកើងបានសរសេរថា៖«បូករួមអស់ទាំងព្រះបន្ទូលនៃទ្រង់ទៅឃើញថា ពិតត្រង់ទាំងអស់»។ (ទំនុក. ១១៩:១៦០) តាមរយៈព្រះបន្ទូលរបស់ព្រះយេហូវ៉ា ទ្រង់ផ្ដល់ចម្លើយចំពោះសំនួរសំខាន់បំផុតអំពីជីវិត។ ទ្រង់ផ្ដល់ការសម្រាលទុក្ខដល់អស់អ្នកណាដែលមានទុក្ខកង្វល់។ ហើយទ្រង់ក៏បង្ហាញរបៀបដែលយើងអាចចូលទៅជិតទ្រង់ដែរ។ ស្ត្រីកតញ្ញូមួយរូបបានពោលថា៖«នៅពេលដែលរៀនសេចក្ដីពិតក្នុងព្រះគម្ពីរ គឺដូចជាចេញពីបន្ទប់មួយដែលងងឹតមានបរិយាកាសដ៏អាប់អួ និងចូលក្នុងបន្ទប់មួយដែលមានពន្លឺភ្លឺស្រឡះជាទីពេញចិត្ត»។ តើអ្នកខំប្រឹងប្រាប់អ្នកឯទៀតនូវសេចក្ដីពិតពីព្រះបន្ទូលរបស់ព្រះរាល់ដងពេលដែលមានឱកាសហុចឲ្យឬទេ?
២ ព្រះគម្ពីរមានឥទ្ធិពលជំរុញឲ្យកែប្រែ និងទាក់ទាញមនុស្សគ្រប់មជ្ឈដ្ឋាន: សេចក្ដីពិតពីព្រះគម្ពីរមានអានុភាពទៅលើចិត្ត និងមានឥទ្ធិពលជំរុញឲ្យកែប្រែជីវិត។ (ហេ. ៤:១២) យុវនារីម្នាក់ឈ្មោះរ៉ូសា ធ្លាប់រកស៊ីផ្លូវភេទ ប្រមឹកស្រា និងប្រើថ្នាំញៀន។ គាត់ប្រាប់ថា៖«នៅថ្ងៃមួយ ពេលដែលខ្ញុំអស់សង្ឃឹមបំផុត មានស្វាមីភរិយាមួយគូដែលជាស្មរបន្ទាល់ព្រះយេហូវ៉ាបាននិយាយជាមួយខ្ញុំអំពីរបៀបព្រះគម្ពីរអាចជួយដោះស្រាយបញ្ហារបស់យើង។ ខ្ញុំក៏ចាប់ផ្ដើមសិក្សាព្រះបន្ទូលរបស់ព្រះ ហើយឃើញថានេះជាអ្វីគួរឲ្យចាប់អារម្មណ៍ណាស់!។ អស់រយៈពេលតែមួយខែ ខ្ញុំមានកម្លាំងចិត្តគ្រប់គ្រាន់ដើម្បីចាប់ផ្ដើមសាងជីវិតថ្មីមួយដែលប្រកបដោយភាពស្អាតស្អំ។ នៅពេលនោះ ដោយសារខ្ញុំមានគោលបំណងក្នុងជីវិតហើយ ខ្ញុំមិនចាំបាច់ពឹងស្រាឬថ្នាំទៀតទេ។ ហើយដោយព្រោះខ្ញុំចង់ទៅជាមិត្តសំឡាញ់របស់ព្រះយេហូវ៉ា នោះខ្ញុំប្ដេជ្ញាចិត្តរស់ឲ្យសមស្របតាមខ្នាតតម្រារបស់ទ្រង់។ បើខ្ញុំមិនបានទទួលប្រាជ្ញាពីព្រះគម្ពីរទេ ខ្ញុំប្រាកដជា សម្លាប់ខ្លួនរួចទៅហើយ»។—ទំនុក. ១១៩:៩២
៣ ព្រះគម្ពីរខុសប្លែកពីសៀវភៅភាគច្រើន ដ្បិតព្រះគម្ពីរទាក់ទាញចិត្តរបស់មនុស្ស‹គ្រប់ទាំងសាសន៍ ពូជមនុស្ស និងគ្រួសារ›។ (វិវរ. ៧:៩) ព្រះហឫទ័យរបស់ព្រះគឺចង់ឲ្យ«មនុស្សទាំងអស់បានសង្គ្រោះ ហើយឲ្យបានស្គាល់សេចក្ដីពិត»។ (១ធី. ២:៤) ដូច្នេះ យើងមិនគួរមើលប្រវត្ដិរបស់អ្នកណាម្នាក់ហើយសន្មតជាមុនថា គាត់នឹងមិនស្ដាប់តាមដំណឹងល្អទេ។ ផ្ទុយទៅវិញ ចូរប្រាប់សារព្រះរាជាណាចក្រដល់មនុស្សគ្រប់ទាំងអស់ ដោយបង្ហាញសារក្នុងព្រះគម្ពីរផ្ទាល់នៅពេលដែលអាចធ្វើទៅបាន។
៤ បញ្ជាក់បទគម្ពីរ: ក្នុងកិច្ចបំរើ យើងមានឱកាសជាច្រើនដើម្បីប្រើព្រះគម្ពីរ។ នៅពេលដែលបង្ហាញទស្សនាវដ្ដី ចូរព្យាយាមបើកមើលបទគម្ពីរដែលត្រូវបានជូនជាយោបល់ក្នុងពាក្យផ្សព្វផ្សាយ។ នៅពេលប្រើឧបករណ៍ផ្សាយសំរាប់ខែណាមួយ បងប្អូនខ្លះមានប្រសិទ្ធភាពដោយជ្រើសរើសបទគម្ពីរមួយយ៉ាងយកចិត្តទុកដាក់និងអានបទគម្ពីរនោះក្នុងពាក្យផ្ដើម។ នៅពេលធ្វើការត្រឡប់ទៅជួបម្ដងៗ ចូរបង្ហាញបទគម្ពីរមួយឬក៏ពីរបីខដើម្បីជួយម្ចាស់ផ្ទះទទួលចំណេះត្រឹមត្រូវថែមទៀតជាបណ្ដើរៗ។ នៅពេលដឹកនាំការសិក្សា ចូរបង្រៀនសិស្សដោយផ្ដោតអារម្មណ៍ទៅលើបទគម្ពីរសំខាន់ៗ។ ក្រៅពីចូលរួមកិច្ចផ្សព្វផ្សាយផ្លូវការ ចូរទុកព្រះគម្ពីរនៅជាប់ខ្លួនដើម្បីប្រើពេលមានឱកាសធ្វើបន្ទាល់ក្រៅផ្លូវការ។—២ធី. ២:១៥
៥ សូមឲ្យយើងជួយអ្នកឯទៀតទទួលប្រយោជន៍ពីឥទ្ធិពលដែលជំរុញចិត្តនៃព្រះបន្ទូលដ៏ពិតរបស់ព្រះ ដោយប្រើព្រះគម្ពីរក្នុងកិច្ចបំរើរាល់ដងពេលដែលយើងមានឱកាសហុចឲ្យ។—១ថែ. ២:១៣
[Study Questions]
១. តើព្រះគម្ពីរមានពត៌មានដ៏សំខាន់អ្វី?
២. តើព្រះគម្ពីរជួយធ្វើឲ្យមានជីវិតល្អជាងយ៉ាងដូចម្ដេច?
៣. ហេតុអ្វីយើងគួរប្រាប់សារក្នុងព្រះគម្ពីរដល់មនុស្សគ្រប់គ្នា?
៤. នៅពេលធ្វើបន្ទាល់ តើយើងអាចប្រើព្រះគម្ពីរយ៉ាងដូចម្ដេច?
៥. ហេតុអ្វីបានជាយើងគួរព្យាយាមប្រើព្រះគម្ពីរក្នុងកិច្ចបំរើរបស់យើង?