«ព្រះបន្ទូលនៃព្រះនោះ . . . ពូកែ»
១ សាវ័កប៉ុលបានសរសេរថា៖ «ព្រះបន្ទូលនៃព្រះនោះរស់នៅ ហើយពូកែផង»។ (ហេព្រើរ ៤:១២) តើសេចក្ដីនេះមានន័យយ៉ាងណា? គឺព្រះបន្ទូលឬសាររបស់ព្រះ ដែលមានក្នុងព្រះគម្ពីរ អាចមានឥទ្ធិពលយ៉ាងខ្លាំងទៅលើមនុស្ស។ ប្រាជ្ញាដែលមានក្នុងព្រះគម្ពីរ គឺពូកែនឹងផ្លាស់ប្រែជីវិតរបស់មនុស្សម្នាក់ឲ្យបានប្រសើរជាង។ ការរំលែកទុក្ខនិងសេចក្ដីសង្ឃឹមដែលមានក្នុងព្រះគម្ពីរ នោះអាចទាញចិត្តមនុស្សមកឯព្រះយេហូវ៉ាដ៏ជាព្រះអង្គដែលប្រទានជីវិត។ សារក្នុងព្រះគម្ពីរអាចជួយអ្នកស្មោះត្រង់ចាប់ផ្ដើមដើរតាមផ្លូវទៅឯជីវិតជារៀងរហូត។ ក៏ប៉ុន្តែ ដើម្បីឃើញលទ្ធផលបែបនេះ យើងត្រូវតែប្រើព្រះគម្ពីរនៅពេលដែលយើងធ្វើបន្ទាល់ចំពោះអ្នកដទៃ។
២ ចូរអានបទគម្ពីរមួយនៅគ្រប់ឱកាស: តាមមើលទៅ អ្នកផ្សាយភាគច្រើន កម្រប្រើព្រះគម្ពីរនៅពេលផ្សព្វផ្សាយណាស់។ តើអ្នកធ្វើដូច្នេះដែរឬទេ? ដោយព្រោះមើលទៅដូចជាមនុស្សជាច្រើន មិនសូវមានពេលនិយាយយូរប៉ុន្មានជាមួយនឹងយើងទេ អ្នកប្រហែលជាបានបង្កើតទំលាប់គ្រាន់តែស្នើផ្ដល់ប្រកាសនវត្ថុ ឬគ្រាន់តែសង្ខេបន័យខគម្ពីរណាមួយប៉ុណ្ណោះ។ យើងសូមលើកទឹកចិត្តអ្នកផ្សាយទាំងឡាយ ឲ្យខំឆ្លៀតអានយ៉ាងហោចណាស់នូវខតែមួយពីព្រះគម្ពីរ ពេលផ្សាយដំណឹងល្អនោះ។ ការធ្វើដូច្នេះអនុញ្ញាតឲ្យអ្នកនោះឃើញថា សាររបស់យើងពិតជាមកពីព្រះបន្ទូលរបស់ព្រះមែន។
៣ ថ្វីបើមនុស្សមួយចំនួនតិចទេ មានទំលាប់អានព្រះគម្ពីរ នោះមនុស្សភាគច្រើនក៏នៅមានចិត្តគោរពចំពោះព្រះគម្ពីរដែរ។ សូម្បីតែមនុស្សណាដែលរវល់ក៏ដោយ គេនឹងឆ្លៀតមួយឬពីរនាទីដើម្បីស្ដាប់សារណាមួយ ដែលត្រូវអានចេញពីព្រះគម្ពីរមកតែម្ដង។ បើអានបទគម្ពីរសមគួរណាមួយ ដោយចិត្តកក់ក្ដៅ ព្រមទាំងពន្យល់ខ្លឹមសារផង នោះព្រះបន្ទូលរបស់ព្រះយេហូវ៉ាដែលពូកែនឹងមានឥទ្ធិពលល្អលើអ្នកស្ដាប់នោះហើយ។ ប៉ុន្តែ តើអ្នកអាចភ្ជាប់ពាក្យផ្ដើមរបស់អ្នក ទៅនឹងការអានខមួយពីព្រះគម្ពីរយ៉ាងណាបាន?
៤ សូមសាកធ្វើនេះ នៅពេលស្នើផ្ដល់ទស្សនាវដ្ដី: អ្នកធ្វើដំណើរត្រួតពិនិត្យម្នាក់ប្រើបទគម្ពីរនានាតាមរបៀបដែលមានប្រសិទ្ធិភាព ក្នុងការស្នើផ្ដល់ទស្សនាវដ្ដី។ គាត់កាន់ព្រះគម្ពីរតូចមួយក្បាល ដាក់ក្នុងហោប៉ៅរបស់គាត់។ ក្រោយពីបង្ហាញទស្សនាវដ្ដី និងការបញ្ជាក់យ៉ាងខ្លីនូវអត្ថបទណាមួយ គាត់ក៏បើកព្រះគម្ពីរដោយមិនស្ទាក់ស្ទើរ និងអានខមួយដែលទាក់ទងនឹងអត្ថបទនោះ។ យើងអាចធ្វើដូច្នេះយ៉ាងស្រួល ដោយសួរថា៖ «តើលោកគិតយ៉ាងណាអំពីសេចក្ដីសន្យាមួយនេះ ដែលជាទីលើកទឹកចិត្តនោះ?» និងចាប់ផ្ដើមអានខគម្ពីរមួយដែលត្រូវបានជ្រើសរើសជាមុន។
៥ សូមអ្នកមានគោលដៅចង់អានព្រះគម្ពីរមួយខឬពីរខ ជូនចំពោះអស់អ្នកដែលព្រមស្ដាប់ចុះ។ ដោយព្រោះព្រះគម្ពីរពូកែជំរុញចិត្តគេ នោះអាចបើកផ្លូវឲ្យព្រះទាញនាំមនុស្សកាន់តែច្រើននាក់ទៀតមកឯទ្រង់។—យ៉ូហាន ៦:៤៤