ពេលបង្រៀនចូរខំបញ្ជាក់ហេតុផលឲ្យគេជឿ
១ អ្នកបម្រើដែលមានប្រសិទ្ធភាព យល់ដូចសាវ័កប៉ូល ថាការ«បង្រៀននិងពន្យល់បណ្ដាំនៃសេចក្ដីពិតយ៉ាងត្រឹមត្រូវ» មិនគ្រាន់តែជាការដកស្រង់បទគម្ពីរប៉ុណ្ណោះទេ។ (២ធី. ២:១៥) តើមានវិធីណាខ្លះដែលយើងអាច«បញ្ជាក់ហេតុផលដើម្បីឲ្យពួកគេជឿ» ពេលប្រើបណ្ដាំរបស់ព្រះក្នុងការបង្រៀន?—សកម្ម. ២៨:២៣
២ ចូរបង្ហាញអ្វីដែលបណ្ដាំរបស់ព្រះចែង: ទី១ ចូរលើកបញ្ជាក់បទគម្ពីរតាមរបៀបដែលនាំឲ្យគេគោរពថាអ្វីដែលចែងក្នុងគម្ពីរគឺមកពីប្រាជ្ញារបស់ព្រះ។ ទំនុកចិត្តរបស់យើងទៅលើបណ្ដាំរបស់ព្រះ អាចជំរុញចិត្តម្ចាស់ផ្ទះឲ្យស្ដាប់ដោយយកចិត្តទុកដាក់ពេលយើងអានខគម្ពីរ។ (ហេ. ៤:១២) យើងប្រហែលជាគ្រាន់តែនិយាយថា «ខ្ញុំឃើញថាជាការល្អបើពិចារណាអំពីទស្សនៈរបស់ព្រះ។ ដូច្នេះ សូមមើលអ្វីដែលបណ្ដាំរបស់លោកចែងអំពីរឿងនេះ»។ បើអាចធ្វើបាន ចូរបង្ហាញអ្នកស្ដាប់ពីអ្វីដែលបណ្ដាំរបស់ព្រះចែង ដោយអានពីគម្ពីរតែម្ដង។
៣ ទី២ ចូរពន្យល់ខគម្ពីរដែលទើបអាន។ មនុស្សជាច្រើនពិបាកយល់អត្ថន័យនៃខគម្ពីរ ពេលដែលស្ដាប់ជាលើកដំបូង។ យើងត្រូវការពន្យល់នូវរបៀបដែលបទគម្ពីរទាក់ទងនឹងរឿងដែលយើងកំពុងពិគ្រោះ។ (លូក. ២៤:២៦, ២៧) ចូរលើកបញ្ជាក់ពាក្យសំខាន់ៗ។ ប្រសិនបើអ្នកសួរអ្នកស្ដាប់សំណួរមួយ អ្នកអាចដឹងថាគាត់យល់ច្បាស់អំពីចំណុចក្នុងខគម្ពីរនោះឬមិនយល់។—សុភ. ២០:៥; សកម្ម. ៨:៣០
៤ វែកញែកខគម្ពីរ: ទី៣ ចូរខំព្យាយាមធ្វើឲ្យព័ត៌មានជ្រួតជ្រាបចូលទៅក្នុងចិត្តគំនិតរបស់អ្នកស្ដាប់។ សូមជួយម្ចាស់ផ្ទះឲ្យយល់ពីរបៀបដែលខគម្ពីរនោះទាក់ទងនឹងគាត់ផ្ទាល់។ ការវែកញែកខគម្ពីរតាមរបៀបដែលនាំឲ្យជឿ អាចជួយគាត់ឲ្យផ្លាស់ប្ដូររបៀបគិតគូររបស់គាត់។ (សកម្ម. ១៧:២-៤; ១៩:៨) ជាឧទាហរណ៍ ក្រោយពីអានទំនុកតម្កើង ៨៣:១៨ យើងអាចវែកញែកថា ការរៀនដឹងអំពីឈ្មោះរបស់មនុស្សម្នាក់គឺសំខាន់ចាំបាច់ដើម្បីបង្កើតឲ្យមានចំណងមិត្តភាពជាមួយនឹងបុគ្គលនោះ។ រួចមក យើងប្រហែលជាអាចសួរថា«តើអ្នកគិតថាការស្គាល់ឈ្មោះរបស់ព្រះអាចធ្វើឲ្យសេចក្ដីអធិដ្ឋានរបស់អ្នកមានន័យខ្លឹមសារច្រើនជាងទេ?»។ ពេលយើងបញ្ជាក់អំពីទំនាក់ទំនងរវាងខគម្ពីរនិងជីវិតរបស់ម្ចាស់ផ្ទះតាមរបៀបនេះ យើងបង្ហាញថាខគម្ពីរមានប្រយោជន៍សម្រាប់គាត់។ ការបង្រៀនបណ្ដាំរបស់ព្រះដោយខំបញ្ជាក់ហេតុផលឲ្យគេជឿតាមរបៀបនេះ ជួយមនុស្សដែលមានចិត្តស្មោះត្រង់ឲ្យមកគោរពប្រណិប័តន៍ព្រះយេហូវ៉ាជាព្រះពិតនិងដែលមានជីវិតរស់នៅ។—យេ. ១០:១០
[សំណួរសម្រាប់អត្ថបទសិក្សា]
១. ក្នុងកិច្ចបម្រើផ្សាយ តើការប្រើបណ្ដាំរបស់ព្រះដោយមានប្រសិទ្ធភាពច្រើនតែរួមបញ្ចូលអ្វី?
២. តើយើងអាចជួយមនុស្សឲ្យគោរពបណ្ដាំរបស់ព្រះជាងយ៉ាងដូចម្ដេច?
៣. ក្រោយពីអានខគម្ពីរ តើយើងអាចធ្វើយ៉ាងណាដើម្បីជួយអ្នកស្ដាប់ឲ្យយល់ន័យនោះ?
៤. តើអ្វីជាជំហានចុងក្រោយក្នុងការខំបញ្ជាក់ហេតុផលឲ្យគេជឿពេលបង្រៀន?