សាលាបង្ហាត់ខាងកិច្ចបំរើប្រៀបដូចជាទ្វារយ៉ាងធំបើកឲ្យបំពេញកិច្ចបំរើ
១ ព្រះយេហូវ៉ាបានមានបន្ទូលប្រាប់តាមរយៈព្យាការីយេរេមាថា៖ «អញនឹងតាំងអ្នកគង្វាលលើ[រាស្ត្រអញ]ដែលនឹងឃ្វាលគេ គ្រានោះគេនឹងមិនភ័យ ឬស្រយុតចិត្តទៀតឡើយ ក៏មិនដែលបាត់បង់ណាមួយដែរ»។ (យេ. ២៣:៤) កិច្ចការគង្វាលនេះកំពុងតែសម្រេចក្នុងចំណោមមនុស្សដែលមាននៅគ្រប់ទាំងសាសន៍។ អ្នកចាស់ទុំជាច្រើនពាន់នាក់ក្នុងក្រុមជំនុំកំពុងតែបំពេញកិច្ចការជាអ្នកគង្វាល។ បន្ថែមទៅទៀត យុវបុរសជាច្រើនដែលប្រៀបដូចជាទឹកសន្សើមបានថ្វាយខ្លួនស្ម័គ្រពីចិត្តក្នុងកិច្ចបំរើរបស់ព្រះយេហូវ៉ា។ (ទំនុក. ១១០:៣) បងប្អូនដែលមានចិត្តរាបទាបទាំងនេះពិតជានាំឲ្យក្រុមជំនុំជាច្រើនរបស់ព្រះទទួលពរមែន! កាលដែលកិច្ចការប្រមូលខាងវិញ្ញាណបន្តឈានទៅមុខ នោះក៏នៅតែត្រូវការបុរសដែលមានសមត្ថភាពឲ្យបង្ហាញនូវចិត្តស្មោះស្ម័គ្រដើម្បីបំរើបងប្អូនខាងវិញ្ញាណ។
២ សាលាបង្ហាត់ខាងកិច្ចបំរើគឺជាសំវិធានការដ៏ល្អដើម្បីអប់រំអ្នកចាស់ទុំនិងអ្នកងារជំនួយដែលនៅលីវឲ្យទទួលភារកិច្ចច្រើនទៀត។ តាំងពីសាលានេះបានចាប់ផ្ដើមនៅឆ្នាំ១៩៨៧ នោះមានចំនួន៩៩៩ថ្នាក់ដែលមានសិស្ស២២.០០០នាក់មកពី១៤០ប្រទេសដែលបានទទួលការបង្ហាត់បង្រៀននោះ។ ចំពោះបងប្អូនទាំងនេះពិតជាបានឃើញថា សាលានេះប្រៀបដូចជា‹ទ្វារយ៉ាងធំដែលបើកចំហ›ឲ្យពួកគេបំពេញកិច្ចបំរើមែន។—១កូ. ១៦:៩
៣ គោលបំណងនៃសាលានេះ: គោលបំណងនៃសាលាបង្ហាត់ខាងកិច្ចបំរើគឺដើម្បីអប់រំនិងផ្ដល់សមត្ថភាពដល់បងប្អូនដែលមានលក្ខណៈគ្រប់គ្រាន់ឲ្យទទួលនូវភារកិច្ចផ្សេងៗនៅកន្លែងណាដែលមានសេចក្ដីត្រូវការក្នុងអង្គការរបស់ព្រះ។ សាលានេះបង្កើនសមត្ថភាពរបស់ពួកគេចំពោះការនាំមុខក្នុងកិច្ចការផ្សព្វផ្សាយដំណឹងល្អ ការចូលរួមបំពេញកិច្ចការជាអ្នកគង្វាល ព្រមទាំងបង្កើនសមត្ថភាពបង្រៀនក្នុងក្រុមជំនុំ។ ក្រោយពីចប់ការសិក្សានៅសាលានេះ សិស្សខ្លះត្រូវបានបញ្ជូនឲ្យបំរើជាអ្នកត្រួសត្រាយពិសេស ឬអ្នកធ្វើដំណើរត្រួតពិនិត្យក្នុងប្រទេសឬក៏ទៅបំរើនៅក្រៅប្រទេស។ សិស្សឯទៀតទទួលភារកិច្ចបំរើក្នុងក្រុមជំនុំរបស់ខ្លួន ឬទៅបំរើនៅកន្លែងដែលត្រូវការជំនួយច្រើនជាងនៅក្នុងតំបន់ដែលការិយាល័យសាខាមើលខុសត្រូវ។
៤ ក្នុងកំឡុងប្រាំបីសប្ដាហ៍ ពួកសិស្សសិក្សាព្រះគម្ពីរយ៉ាងលំអិត។ ពួកគេពិនិត្យមើលដោយយកចិត្តទុកដាក់នឹងការបង្រៀនជាច្រើនក្នុងព្រះគម្ពីរនិងគោលការណ៍ណែនាំចំពោះការដោះស្រាយបញ្ហាផ្សេងៗក្នុងជីវភាពរស់នៅជាជនគ្រីស្ទាន។ ពួកសិស្សក៏សិក្សានូវអ្វីដែលបទគម្ពីរបង្រៀនអំពីរឿងរដ្ឋបាល ការវិនិច្ឆ័យនិងរបៀបរៀបចំក្នុងអង្គការរបស់ព្រះ។ សិស្សទទួលការអប់រំយ៉ាងដិតដល់ឲ្យចេះថ្លែងសុន្ទរកថាជាសាធារណៈ និងទទួលនូវជំនួយដើម្បីឲ្យរីកចំរើនខាងវិញ្ញាណ។
៥ តម្រូវការផ្សេងៗ: ហេតុនេះហើយ តម្រូវការចំពោះការចូលរួមក្នុងសាលានេះគឺមានលក្ខខណ្ឌជាច្រើនមែន។ អ្នកដាក់ពាក្យសុំត្រូវបំរើជាអ្នកចាស់ទុំឬអ្នកងារជំនួយបានពីរឆ្នាំ ហើយនៅលីវនិងមានអាយុរវាង២៣និង៥០ឆ្នាំ។ អ្នកដាក់ពាក្យសុំត្រូវចេះអាន សរសេរនិងនិយាយបានស្ទាត់នូវភាសាដែលត្រូវប្រើក្នុងថ្នាក់ ហើយគាត់ត្រូវមានសុខភាពល្អ មិនត្រូវការនូវការមើលថែរក្សាឬអាហារដ៏ពិសេស។ ជំរើសទីមួយគឺសំរាប់អស់អ្នកដែលបំរើជាអ្នកត្រួសត្រាយពេញពេល។
៦ អស់អ្នកដែលស្ម័គ្រចិត្តត្រូវតែសុខចិត្តនិងអាចបំរើនៅកន្លែងណាដែលត្រូវការជំនួយ។ នេះតម្រូវឲ្យពួកគេមានចិត្តគំនិតដូចព្យាការីអេសាយដែលបានស្ម័គ្រចិត្តធ្វើកិច្ចការដ៏ពិសេស ដោយពោលថា៖ «ទូលបង្គំនៅឯណេះហើយ សូមចាត់ទូលបង្គំចុះ!»។ (អេសា. ៦:៨) គាត់ក៏បានបង្ហាញនូវចិត្តរាបទាបក្នុងជីវិតរបស់គាត់ដែរ។ អស់អ្នកដែលដាក់ពាក្យសុំចំពោះសាលាបង្ហាត់ខាងកិច្ចបំរើ គប្បីជំរុញដោយសេចក្ដីស្រឡាញ់ចំពោះបងប្អូននិងមានចិត្តចង់បំរើបងប្អូន មិនមែនចង់បានមុខមាត់ឬឋានៈដ៏ពិសេសនោះទេ។ ក្រោយពីបានទទួលនូវការអប់រំដ៏ពិសេសនេះ សិស្សដែលសិក្សាចប់តម្រូវឲ្យអនុវត្តតាមអ្វីដែលពួកគាត់បានរៀនដើម្បីឲ្យអ្នកដទៃទទួលប្រយោជន៍។—លូកា ១២:៤៨
៧ ផលប្រយោជន៍: ក្នុងកំឡុងការសិក្សាយ៉ាងលំអិតអស់រយៈពេលប្រាំបីសប្ដាហ៍ សិស្សដែលចប់សិក្សាបានទទួល«ការអប់រំអំពីជំនឿនិងសេចក្ដីបង្រៀនដ៏ត្រឹមត្រូវ»។ (១ធី. ៤:៦, ខ.ស.) នេះនឹងធ្វើឲ្យពួកគេមានសមត្ថភាពជួយនិងលើកទឹកចិត្តអ្នកដទៃក្នុងក្រុមជំនុំនិងមណ្ឌលរបស់ពួកគេ។ នៅកន្លែងជាច្រើនដែលបានបញ្ជូនសិស្សពីសាលាបង្ហាត់ខាងកិច្ចបំរើ នោះកិច្ចបំរើផ្សាយត្រូវបានរីកចំរើន និងបងប្អូនបានទទួលការលើកទឹកចិត្តឲ្យចូលបំរើជាអ្នកត្រួសត្រាយជាពិសេសក្នុងចំណោមយុវជន។ ហើយក៏យកចិត្តទុកដាក់ច្រើនជាងចំពោះអ្នកថ្មីម្នាក់ៗដែលសេពគប់ជាមួយរាស្ត្ររបស់ព្រះ។
៨ តើអ្នកជាអ្នកចាស់ទុំឬអ្នកងារជំនួយដែលនៅលីវមានអាយុរវាង២៣និង៥០ឆ្នាំទេ? យើងសូមលើកទឹកចិត្តអ្នកឲ្យដាក់ពាក្យសុំចូលសាលាបង្ហាត់ខាងកិច្ចបំរើ។ តើអ្នកនៅក្មេងហើយគិតអំពីគោលដៅចំពោះអនាគតក្នុងកិច្ចបំរើរបស់ព្រះយេហូវ៉ាទេ? សូមរក្សាជីវភាពរស់នៅបានសាមញ្ញ ហើយកុំឲ្យអ្វីបង្វែរអារម្មណ៍អ្នកចេញពីការចូលក្នុង‹ទ្វារយ៉ាងធំសំរាប់បំពេញកិច្ចបំរើ›នេះ។ ការធ្វើបែបនេះនឹងនាំឲ្យអ្នកមានអំណរជាច្រើននិងស្កប់ស្កល់ចិត្តទៀតផង។ ពិតហើយ សាលាបង្ហាត់ខាងកិច្ចបំរើបានសឲ្យឃើញជាពរដល់សិស្សដែលបានចូលរួមក្នុងសាលា និងក៏ជាពរដល់ក្រុមជំនុំជាច្រើននៃរាស្ត្ររបស់ព្រះទូទាំងពិភពលោក។
[ប្រអប់នៅទំព័រ៣]
ប្រយោជន៍ដែលសិស្សទទួលបានពីការអប់រំ
«ការអប់រំនេះពិតជាបានធ្វើឲ្យកិច្ចបំរើខ្ញុំបានប្រសើរឡើង និងបង្កើនសមត្ថភាពខ្ញុំឲ្យធ្វើកិច្ចការជាអ្នកគង្វាលដោយប្រាជ្ញានិងប្រើបទគម្ពីរ»។
«សាលានេះបានធ្វើឲ្យខ្ញុំមានទំនុកចិត្តច្រើនជាងក្នុងការបំពេញភារកិច្ចផ្សេងៗក្នុងក្រុមជំនុំ»។
«ការអប់រំនេះបានផ្លាស់ប្ដូរសឹងតែគ្រប់ទិដ្ឋភាពនៃជីវិតរបស់ខ្ញុំ ដែលរួមបញ្ចូលអារម្មណ៍របស់ខ្ញុំចំពោះការគ្រប់គ្រងរបស់ព្រះនិងអង្គការរបស់ទ្រង់»។
«ការអប់រំដែលខ្ញុំបានទទួលបានជួយខ្ញុំឲ្យដឹងពីសេចក្ដីត្រូវការឲ្យបំរើនៅកន្លែងដែលត្រូវការជាង»។