ចូរព្យាយាមផ្សព្វផ្សាយតទៅទៀត!
១ យើងរស់នៅគ្រាលំបាកណាស់។ ចលាចលនិងសង្គ្រាមស៊ីវិល មហន្តរាយធម្មជាតិ ហើយរឿងគួរឲ្យរន្ធត់ឯទៀតកើតឡើងជាញឹកញយ។ ឥឡូវនេះជាងមុនៗទៅទៀត មនុស្សជាតិត្រូវការនូវដំណឹងល្អ។ ក៏ប៉ុន្តែ ទូទាំងផែនដីមនុស្សបង្ហាញភាពព្រងើយកន្តើយចំពោះរឿងខាងវិញ្ញាណ។ នៅតំបន់ខ្លះ យើងប្រហែលជាពិបាកជួបមនុស្សនៅផ្ទះ ហើយការរកមនុស្សដែលសុខចិត្តស្ដាប់ឬចង់រៀនព្រះគម្ពីរគឺពិបាកជាងនោះទៅទៀត។ យ៉ាងណាក៏ដោយ គឺជាការចាំបាច់ដែលយើងព្យាយាមផ្សាយដំណឹងល្អតទៅទៀតអំពីព្រះរាជាណាចក្ររបស់ព្រះដែលបានស្ថាបនាឡើងហើយ។—ម៉ាថ. ២៤:១៤
២ សេចក្ដីស្រឡាញ់ចំពោះមនុស្ស: ការផ្សព្វផ្សាយរបស់យើងបញ្ជាក់ថាព្រះយេហូវ៉ាស្រឡាញ់មនុស្ស។ ទ្រង់«មិនចង់ឲ្យអ្នកណាមួយវិនាសឡើយ គឺចង់ឲ្យមនុស្សទាំងអស់បានប្រែចិត្តវិញ»។ (២ពេ. ៣:៩; អេសេ. ៣៣:១១) ហេតុនេះហើយ ទ្រង់បានបង្គាប់ដូចព្រះយេស៊ូបានមានបន្ទូលថា«ដំណឹងល្អ នឹងត្រូវផ្សាយដល់គ្រប់សាសន៍ជាមុនសិន»។ (ម៉ាក. ១៣:១០ កំណែជាអក្សរទ្រេត) ព្រះសុំមនុស្សឲ្យស្វែងរកទ្រង់ ដើម្បីរួចរស់ជីវិតពីការជំនុំជំរះលោកីយ៍របស់សាតាំងនៅថ្ងៃមុខ។ (យ៉ូល. ២:២៨, ២៩, ៣២; សេផា. ២:២, ៣) យើងពិតជាមានកតញ្ញូធម៌ដែលព្រះយេហូវ៉ាបានផ្ដល់ឱកាសនេះឲ្យយើង មែនទេ?—១ធី. ១:១២, ១៣
៣ សេចក្ដីរាយការណ៍ពីកិច្ចបំរើទូទាំងពិភពលោកបានឲ្យដឹងថា ក្នុងឆ្នាំកិច្ចបំរើ២០០៤ ជាមធ្យមមាន៦.០៨៥.៣៨៧ការសិក្សាដែលត្រូវដឹកនាំជារៀងរាល់ខែ ហើយជាមធ្យមមានសិស្សថ្មីប្រមាណ៥.០០០នាក់ទទួលបុណ្យជ្រមុជទឹកជារៀងរាល់សប្ដាហ៍! អ្នកខ្លះក្នុងចំណោមសិស្សថ្មីនោះបានត្រូវរកឃើញដោយសារព្រះយេហូវ៉ាប្រទានពរលើការព្យាយាមរបស់អ្នកផ្សាយដែលបានខំនិយាយតទៅទៀតជាមួយមនុស្សទាំងអស់ក្នុងតំបន់ផ្សាយរបស់ពួកគេ។ នេះធ្វើឲ្យក្រុមជំនុំមានអំណរក្រៃលែង ហើយក៏ជាឯកសិទ្ធិអស្ចារ្យមែន ដែលអាចធ្វើការជាមួយនឹងព្រះក្នុងកិច្ចការនេះដែលសង្គ្រោះជីវិត!—១កូ. ៣:៥, ៦, ៩
៤ ការសរសើរព្រះនាមព្រះ: យើងព្យាយាមផ្សព្វផ្សាយតទៅទៀតដើម្បីសរសើរព្រះយេហូវ៉ាជាចំហ និងដើម្បីលើកព្រះនាមទ្រង់ឲ្យបានបរិសុទ្ធនៅមុខមនុស្សជាតិទាំងឡាយ។ (ហេ. ១៣:១៥) សាតាំងបាននាំ«លោកីយទាំងមូល»ឲ្យវង្វេង ដោយនាំឲ្យគេជឿថាព្រះគ្មានសមត្ថភាពដោះស្រាយបញ្ហារបស់មនុស្សជាតិទេ ហើយទ្រង់ក៏មិនអើពើនឹងការឈឺចាប់របស់មនុស្ស ឬរហូតដល់នាំឲ្យគេជឿថាគ្មានព្រះតែម្ដង។ (វិវរ. ១២:៩) តាមរយៈការផ្សព្វផ្សាយ យើងគាំទ្រសេចក្ដីពិតអំពីព្រះវរបិតាដ៏ឧត្តុង្គឧត្តមរបស់យើងនៅស្ថានសួគ៌។ សូមឲ្យយើងបន្តសរសើរព្រះនាមទ្រង់ឥឡូវនេះ និងជារៀងរហូតតទៅ។—ទំនុក. ១៤៥:១, ២