ចូរបន្តផ្សព្វផ្សាយ!
១ ព្រះទ្រង់សព្វព្រះហឫទ័យ «ឲ្យមនុស្សទាំងអស់បានសង្គ្រោះ ហើយឲ្យបានស្គាល់សេចក្ដីពិត»។ (ធីម៉ូថេទី១ ២:៤) ហេតុនេះហើយបានជាទ្រង់បានប្រគល់កិច្ចការឲ្យយើងផ្សព្វផ្សាយដំណឹងល្អ។ (ម៉ាថាយ ២៤:១៤) ប្រសិនបើយើងទទួលយល់នូវហេតុដែលយើងគួរតែបន្តផ្សព្វផ្សាយនោះ ការធ្លាក់ទឹកចិត្ត ឬក៏បញ្ហាណាដែលយើងជួបប្រទះដែលអាចបង្វែរស្មារតីយើង ក៏នឹងមិនធ្វើឲ្យយើងរារែកដែរ។
២ ហេតុអ្វីបានជាត្រូវតែតស៊ូ? គឺមានរបស់ជាច្រើនក្នុងលោកីយ៍នេះដែលអាចបង្វែរស្មារតីមនុស្ស ហើយក៏បណ្ដាលឲ្យគេភ្លេចអ្វីដែលយើងប្រាប់គេ ឬក៏ចាត់ទុកនោះជាអ្វីដ៏មិនសូវសំខាន់ទេ។ ដូច្នេះហើយ យើងត្រូវបន្តរំឭកគេពីសាររបស់ព្រះខាងឯសេចក្ដីសង្គ្រោះ។ (ម៉ាថាយ ២៤:៣៨, ៣៩) បន្ថែមទៅទៀតនោះ កាលៈទេសៈក្នុងជីវិតមនុស្ស ក៏ប្រែប្រួលជានិច្ច។ សូម្បីតែស្ថានការណ៍ពិភពលោកក៏អាចផ្លាស់ប្ដូរទាំងស្រុង ក្នុងកំឡុងពេលតែមួយយប់ប៉ុណ្ណោះ។ (កូរិនថូសទី១ ៧:៣១) ថ្ងៃស្អែក សប្ដាហ៍ក្រោយ ឬខែក្រោយ មនុស្សដែលយើងផ្សព្វផ្សាយដល់នោះ ប្រហែលជានឹងប្រឈមមុខនឹងបញ្ហាឬសេចក្ដីខ្វល់ខ្វាយផ្សេងៗ ដែលបង្កឲ្យគេយកចិត្តទុកដាក់មែនទែននឹងដំណឹងល្អដែលយើងជូនចំពោះគេ។ តើអ្នកដឹងគុណឬទេ ដែលស្មរបន្ទាល់បានតស៊ូដើម្បីជូនសេចក្ដីពិតចំពោះអ្នកនោះ?
៣ ដើម្បីធ្វើតម្រាប់តាមសេចក្ដីមេត្ដាករុណារបស់ព្រះ: ដោយព្រះហឫទ័យអត់ធ្មត់នោះ ព្រះយេហូវ៉ាបានអនុញ្ញាតឲ្យមានមួយរយៈពេលកន្លងផុតទៅ មុននឹងកាត់ក្ដីលើមនុស្សអាក្រក់។ តាមរយៈពួកយើង ទ្រង់បន្តអំពាវនាវសូមឲ្យអស់អ្នកណាដែលមានចិត្តល្អ បែរមករកទ្រង់ដើម្បីទទួលសេចក្ដីសង្គ្រោះបាន។ (ពេត្រុសទី២ ៣:៩) យើងនឹងទទួលទោសចំពោះឈាមគេ បើយើងមិនប្រកាសនូវសារខាងសេចក្ដីមេត្ដាករុណារបស់ព្រះ ព្រមទាំងព្រមានមនុស្សពីការកាត់ក្ដីដោយព្រះនាពេលខាងមុខ មកលើអស់អ្នកដែលមិនព្រមបែរចេញពីផ្លូវអាក្រក់របស់គេ។ (អេសេគាល ៣៣:១-១១) ទោះជាគេមិនតែងតែទទួលព្រមស្ដាប់នូវសារដែលយើងផ្សព្វផ្សាយក៏ដោយ យើងមិនត្រូវបន្ថយទេ ក្នុងការខំប្រឹងគ្រប់បែបគ្រប់យ៉ាងខាងការជួយពួកអ្នកដែលមានចិត្តស្មោះ ឲ្យអបអរនឹងសេចក្ដីមេត្ដាករុណាដ៏លើសលប់របស់ព្រះ។—កិច្ចការ ២០:២៦, ២៧; រ៉ូម ១២:១១
៤ ដើម្បីបង្ហាញនូវសេចក្ដីស្រឡាញ់របស់យើង: គឺជាព្រះយេហូវ៉ា តាមរយៈព្រះយេស៊ូគ្រីស្ទ ដែលបានបង្គាប់ឲ្យផ្សាយដំណឹងល្អពេញពាសលើផែនដី។ (ម៉ាថាយ ២៨:១៩, ២០) សូម្បីតែពេលដែលមនុស្សបដិសេធមិនព្រមស្ដាប់ក៏ដោយ យើងមានឱកាសបង្ហាញនូវសេចក្ដីស្រឡាញ់ និងចិត្តភក្ដីរបស់យើងចំពោះព្រះ ដោយតស៊ូធ្វើការដ៏ត្រឹមត្រូវ។—យ៉ូហានទី១ ៥:៣
៥ សូមឲ្យយើងប្ដេជ្ញាចិត្តបន្តផ្សព្វផ្សាយ! ចូរឲ្យយើងធ្វើដូច្នេះដោយចិត្តខ្នះខ្នែង ពេលដែលនេះនៅតែជា«ថ្ងៃសង្គ្រោះ»របស់ព្រះយេហូវ៉ា។—កូរិនថូសទី២ ៦:២