បន្ទាល់មួយដោយឥតប្រើពាក្យសំដី
១ ដោយឥតបន្លឺពាក្យមួយម៉ាត់សោះ ការបង្កើតរបស់ព្រះយេហូវ៉ាសម្ដែងឲ្យឃើញយ៉ាងច្បាស់នូវគុណសម្បត្ដិដ៏មើលមិនឃើញរបស់ទ្រង់។ (ទំនុក. ១៩:១-៣; រ៉ូម ១:២០) ស្រដៀងគ្នាដែរ ចរិយាល្អរបស់យើង គុណសម្បត្ដិគ្រីស្ទាន និងអាការក្រៅដ៏សមរម្យ អាចធ្វើបន្ទាល់ដោយឥតប្រើពាក្យសំដី។ (១ពេ. ២:១២; ៣:១-៤) យើងម្នាក់ៗត្រូវប្រាថ្នា«ដើម្បីឲ្យបានតាក់តែងសេចក្ដីបង្រៀនរបស់ព្រះ ដ៏ជាព្រះអង្គសង្គ្រោះនៃយើងរាល់គ្នា ក្នុងគ្រប់ការទាំងអស់»តាមរយៈអាកប្បកិរិយារបស់យើង។—ទីត. ២:១០
២ តើតាមរបៀបណាដែលមនុស្សឥតគ្រប់ល័ក្ខណ៍អាចបន្ថែមសោភ័នភាពដល់ការបង្រៀននៃព្រះគម្ពីរ? នេះអាចធ្វើទៅបានតាមរយៈការណែនាំពីព្រះបន្ទូលនៃព្រះនិងអំណាចនៃព្រះវិញ្ញាណបរិសុទ្ធតែប៉ុណ្ណោះ។ (ទំនុក. ១១៩:១០៥; ១៤៣:១០) ព្រះបន្ទូលនៃព្រះ«នោះរស់នៅហើយពូកែផង ក៏មុតជាងដាវណាមានមុខ២»។ (ហេ. ៤:១២) ព្រះបន្ទូលនោះធ្លុះចូលជ្រៅក្នុងចិត្តយើងហើយជួយយើងឲ្យបំពាក់បុគ្គលិកលក្ខណៈថ្មី។ (កូល. ៣:៩, ១០) វិញ្ញាណបរិសុទ្ធបង្កើតក្នុងយើងនូវគុណសម្បត្ដិគួរចង់បាន ដូចជាចិត្តសប្បុរស ចិត្តសន្ដោសមេត្ដា ចិត្តស្លូតបូត ហើយការចេះទប់ចិត្តខ្លួនឯង។ (កា. ៥:២២, ២៣, ខ.ស.) តើយើងម្នាក់ៗកំពុងតែអនុញ្ញាតឲ្យព្រះបន្ទូលនិងវិញ្ញាណរបស់ព្រះមានឥទ្ធិពលក្នុងជីវិតរបស់យើងឬទេ?—អេភ. ៤:៣០; ១ថែ. ២:១៣
៣ អ្នកឯទៀតកត់សម្គាល់ឃើញ: កាលណាយើងរស់នៅឲ្យសមស្របទៅតាមខ្នាតតម្រារបស់ព្រះយេហូវ៉ាហើយខិតខំបង្ហាញគុណសម្បត្ដិរបស់ទ្រង់នោះ អ្នកឯទៀតកត់សម្គាល់យើង។ ជាឧទាហរណ៍ សូមគិតអំពីបុរសម្នាក់ដែលត្រូវបានអ្នករួមការងារសើចចំអកឲ្យពីព្រោះគាត់ជាមនុស្សទាប។ បងស្រីម្នាក់ដែលបានធ្វើការនៅការិយាល័យដូចគ្នានោះ បានប្រព្រឹត្តនឹងគាត់ដោយសេចក្ដីថ្លៃថ្នូរនិងការគោរព។ នេះបានជំរុញបុរសនោះឲ្យសួរបងស្រីថាហេតុអ្វីបានជាគាត់ខុសពីអ្នកឯទៀតដូច្នោះ។ បងស្រីបានពន្យល់ថាចរិយាដែលសម្ដែងការគោរពរបស់គាត់គឺជាលទ្ធផលពីការអនុវត្តតាមគោលការណ៍ព្រះគម្ពីរនៅក្នុងជីវិតរបស់គាត់។ គាត់ក៏បានប្រាប់បុរសនោះអំពីសេចក្ដីសង្ឃឹមដ៏អស្ចារ្យនៃព្រះរាជាណាចក្រ។ បុរសនោះក៏បានចាប់ផ្ដើមសិក្សាព្រះគម្ពីរហើយនៅទីបំផុតបានរីកចំរើនរហូតដល់ធ្វើបុណ្យជ្រមុជទឹក។ ពេលដែលគាត់បានត្រឡប់ទៅប្រទេសគាត់វិញ ញាតិសន្ដានគាត់បានមានការចាប់អារម្មណ៍ចំពោះចរិយាល្អរបស់គាត់ ហើយពួកគេជាច្រើននាក់ក៏បានទទួលយកសេចក្ដីពិតដែរ។
៤ នៅកន្លែងធ្វើការ នៅឯសាលារៀនឬពេលប្រស្រ័យទាក់ទងនឹងញាតិសន្ដាននិងអ្នកជិតខាង យើងអាចបណ្ដាលឲ្យអ្នកឯទៀតលើកដំកើងសិរីរុងរឿងរបស់ព្រះដោយចរិយាល្អរបស់យើងគួបផ្សំនឹងការធ្វើបន្ទាល់។—ម៉ាថ. ៥:១៦