កិច្ចបម្រើផ្សាយរបស់យើង ជាកិច្ចការដែលបង្ហាញនូវចិត្តអាណិតអាសូរ
១ ព្រះយេស៊ូបានសង្កេតឃើញថា ហ្វូងមនុស្សដែលស្ដាប់សាររបស់ទ្រង់នោះ«គេល្វើយ ហើយខ្ចាត់ខ្ចាយ ដូចហ្វូងចៀម ដែលឥតអ្នកគង្វាល»។ (ម៉ាថ. ៩:៣៦) ដោយព្រះទ័យស្លូតបូតនិងក្ដីស្រឡាញ់ ទ្រង់បានបង្រៀនពួកគេអំពីខ្នាតតម្រារបស់ព្រះយេហូវ៉ា បានជួយសម្រាលទុក្ខ និងយកព្រះទ័យទុកដាក់បំពេញសេចក្ដីត្រូវការខាងវិញ្ញាណរបស់ពួកគេ។ កាលដែលយើងសញ្ជឹងគិតអំពីការប្រព្រឹត្ដិរបស់ព្រះយេស៊ូ នោះជួយយើងរៀនឲ្យចេះគិតនិងមានអារម្មណ៍ដូចទ្រង់ ហើយយើងនឹងបង្ហាញឲ្យឃើញយ៉ាងច្បាស់នូវគុណសម្បត្ដិនេះពោលគឺ ចិត្តអាណិតអាសូរក្នុងកិច្ចបម្រើផ្សាយរបស់យើង។
២ សូមចំណាយពេលគិតអំពីប្រតិកម្មរបស់ព្រះយេស៊ូពេលមនុស្សដែលត្រូវការជំនួយជាខ្លាំងមកទូលអង្វរទ្រង់។ (លូ. ៥:១២, ១៣; ៨:៤៣-៤៨) ទ្រង់ចេះយោគយល់ដល់អស់អ្នកដែលមានសេចក្ដីត្រូវការដោយឡែកពីគេ។ (ម៉ាក. ៧:៣១-៣៥) ទ្រង់បានជ្រាបពីអារម្មណ៍របស់អ្នកឯទៀតហើយទ្រង់យកព្រះទ័យទុកដាក់នឹងពួកគេ។ សម្បកក្រៅរបស់មនុស្សមិនមែនជាអ្វីដែលសំខាន់ចំពោះទ្រង់ទេ។ (លូ. ៧:៣៦-៤០) ប្រាកដហើយ ព្រះយេស៊ូបង្ហាញយ៉ាងល្អឥតខ្ចោះនូវព្រះហឫទ័យប្រោសប្រណីប្រកបដោយមេត្ដាករុណាដ៏លើសលប់របស់ព្រះនៃយើង។
៣ «ទ្រង់មានព្រះហឫទ័យក្ដួលអាណិត»: ព្រះយេស៊ូមិនបានចាត់ទុកកិច្ចបម្រើរបស់ទ្រង់ជាកាតព្វកិច្ចដែលទ្រង់ត្រូវបំពេញប៉ុណ្ណោះទេ។ តែទ្រង់«មានព្រះហឫទ័យក្ដួលអាណិត»ដល់មនុស្ស។ (ម៉ាក. ៦:៣៤) ស្រដៀងគ្នាដែរសព្វថ្ងៃនេះ យើងមិនត្រឹមតែកំពុងប្រកាសសារមួយប៉ុណ្ណោះទេ តែយើងកំពុងខំប្រឹងសង្គ្រោះជីវិតអ្នកឯទៀត។ ចូរស្វែងរកយល់អំពីមូលហេតុដែលមនុស្សមានប្រតិកម្មតាមរបៀបណាមួយ។ ហេតុអ្វីបានជាពួកគេខ្វល់ខ្វាយនិងមានអារម្មណ៍មិនមូល? តើគ្រូគង្វាលក្នុងសាសនាមិនពិតមិនបានបំពេញសេចក្ដីត្រូវការខាងវិញ្ញាណរបស់គេហើយបោកបញ្ឆោតពួកគេឬទេ? ការយកចិត្តទុកដាក់ដ៏ស្មោះចំពោះអ្នកឯទៀតប្រហែលជាអាចជំរុញចិត្តពួកគេឲ្យស្ដាប់ដំណឹងល្អ។—២កូ. ៦:៤, ៦
៤ ការចេះអាណិតអាសូរទាក់ទាញទឹកចិត្តមនុស្ស។ ជាឧទាហរណ៍ ស្ត្រីម្នាក់កើតទុក្ខសោកសង្រេងដោយសារកូនស្រីគាត់អាយុបីខែបានស្លាប់។ ពេលដែលបងស្រីជាស្មរបន្ទាល់ពីរនាក់បានមកជួបគាត់ ស្ត្រីនោះក៏អញ្ជើញពួកគាត់ឲ្យចូលផ្ទះក្នុងគោលបំណងបង្ហាញថាការអះអាងរបស់ពួកគាត់អំពីមូលហេតុដែលព្រះអនុញ្ញាតឲ្យមានទុក្ខវេទនានោះ ជាការមិនពិត។ ក៏ប៉ុន្តែក្រោយមក ស្ត្រីនោះបាននិយាយថា៖ «ពួកគាត់បានស្ដាប់ខ្ញុំដោយក្ដីអាណិតជាខ្លាំង ហើយពេលដែលគាត់បានចាកចេញទៅ ខ្ញុំបានធូរស្រាលក្នុងចិត្តច្រើនជាងមុន ដូច្នេះហើយខ្ញុំយល់ព្រមឲ្យពួកគាត់មកលេងម្ដងទៀត»។ តើអ្នកព្យាយាមបង្ហាញក្ដីអាណិតចំពោះមនុស្សគ្រប់រូបដែលអ្នកជួបក្នុងកិច្ចបម្រើផ្សាយឬទេ?
៥ បើយើងបណ្ដុះឲ្យមានចិត្តអាណិតអាសូរ នោះនឹងជំរុញឲ្យយើងខំសម្រាលទុក្ខអ្នកឯទៀត។ បើយើងធ្វើដូច្នេះ នោះយើងសរសើរតម្កើងព្រះយេហូវ៉ាដែលជា «ព្រះវរបិតាដ៏មានសេចក្ដីមេត្ដាករុណា»។—២កូ. ១:៣