ចូរបន្ត«បង្កើតផលជាច្រើន»
១ ដោយប្រើពាក្យជានិមិត្តរូប ព្រះយេស៊ូបានតំណាងខ្លួនជាដើមទំពាំងបាយជូរដ៏ពិត ព្រះវរបិតារបស់ទ្រង់ជាអ្នកដាំ និងអ្នកកាន់តាមដែលបានត្រូវតែងតាំងដោយសកម្មពលរបស់ព្រះ ជាខ្នែងនៃដើមទំពាំងបាយជូរដែលបង្កើតផលជាច្រើន។ ក្នុងការពិពណ៌នាកិច្ចការរបស់អ្នកដាំជានិមិត្តរូបនោះ ព្រះយេស៊ូបានបញ្ជាក់នូវសារៈសំខាន់ពីការនៅជាប់យ៉ាងមាំមួននឹងដើមទំពាំងបាយជូរ។ (យ៉ូន. ១៥:១-៤) នៅរឿងប្រៀបប្រដូចនេះមានមេរៀនមួយ ពោលគឺអស់អ្នកដែលមានចំណងមេត្រីភាពជិតស្និទ្ធជាមួយនឹងព្រះយេហូវ៉ា ត្រូវធ្វើដូចជាខ្នែងដែលបង្កើតផលនៃ«ដើមទំពាំងបាយជូរដ៏ពិត» គឺព្រះយេស៊ូគ្រិស្ត។ យើងត្រូវបន្តបង្កើតផលផ្លែជាច្រើន ពោលគឺ«ផលផ្លែនៃព្រះវិញ្ញាណ» និងផលផ្លែនៃព្រះរាជាណាចក្រ។—កា. ៥:២២, ២៣; ម៉ាថ. ២៤:១៤; ២៨:១៩, ២០
២ ផលផ្លែនៃព្រះវិញ្ញាណ: ការបង្កើនឲ្យមានចំណងមេត្រីភាពរបស់យើងជាមួយនឹងព្រះយេហូវ៉ា អាចឃើញជាក់ស្តែងតាមរបៀបដែលយើងសម្ដែងផលផ្លែនៃព្រះវិញ្ញាណល្អប៉ុណ្ណា។ តើអ្នកខំប្រឹងបណ្ដុះផលផ្លែនៃព្រះវិញ្ញាណដោយសិក្សានិងរំពឹងគិតពីព្រះបន្ទូលរបស់ព្រះយ៉ាងទៀងទាត់ទេ? (ភី. ១:៩-១១) ចូរកុំស្ទាក់ស្ទើរក្នុងការអធិស្ឋានសុំវិញ្ញាណបរិសុទ្ធ ព្រោះនេះអាចជួយអ្នកបង្កើតគុណសម្បត្ដិដែលនឹងសរសើរព្រះយេហូវ៉ា ហើយនឹងជួយអ្នកបន្តឲ្យមានការលូតលាស់នូវចំណងមេត្រីភាពជាមួយនឹងទ្រង់ដែរ។—លូ. ១១:១៣; យ៉ូន. ១៣:៣៥
៣ ការបណ្ដុះផលផ្លែនៃព្រះវិញ្ញាណនឹងជួយយើងជាអ្នកបម្រើ ឲ្យមានចិត្តខ្នះខ្នែងថែមទៀត។ ជាឧទាហរណ៍ សេចក្ដីស្រឡាញ់និងជំនឿ ជំរុញចិត្តយើងឲ្យលៃពេលក្នុងកាលវិភាគដ៏រវល់របស់យើង ដើម្បីចូលរួមយ៉ាងទៀតទាត់ក្នុងកិច្ចបម្រើផ្សាយ។ គុណសម្បត្ដិដូចជាមេត្រីភាព អត់ធ្មត់ សប្បុរស ស្លូតបូត និងដឹងខ្នាត ជួយយើងឲ្យមានប្រតិកម្មត្រឹមត្រូវនឹងអ្នកប្រឆាំង។ អំណរអាចនាំឲ្យយើងមានការស្កប់ចិត្តក្នុងកិច្ចបម្រើផ្សាយ សូម្បីតែមនុស្សមិនសូវចាប់អារម្មណ៍ក៏ដោយ។
៤ ផលផ្លែនៃព្រះរាជាណាចក្រ: យើងក៏ចង់បង្កើតផលផ្លែនៃព្រះរាជាណាចក្រដែរ។ នេះរួមបញ្ចូលការ«ថ្វាយពាក្យសរសើរ . . . ទុកជាគ្រឿងបូជាដល់ព្រះជានិច្ច គឺជាផលនៃបបូរមាត់ ដែលថ្លែងប្រាប់ពីព្រះនាមទ្រង់[ព្រះយេហូវ៉ា]»។ (ហេ. ១៣:១៥) យើងធ្វើដូចនេះដោយផ្សព្វផ្សាយដំណឹងល្អយ៉ាងខ្នះខ្នែងនិងខ្ជាប់ខ្ជួន។ តើអ្នកខំប្រឹងបង្កើតផលនៃព្រះរាជាណាចក្រច្រើនទៀត ដោយធ្វើឲ្យកិច្ចបម្រើផ្សាយរបស់ខ្លួនកាន់តែប្រសើរឡើងទេ?
៥ ព្រះយេស៊ូបានបង្ហាញឲ្យដឹងថា អ្នកកាន់តាមស្មោះភក្ដីរបស់ទ្រង់ នឹងបង្កើតផលដែលមានចំនួនខុសៗពីគ្នា។ (ម៉ាថ. ១៣:២៣) ហេតុនេះហើយបានជាយើងមិនគួរប្រៀបធៀបខ្លួននឹងអ្នកឯទៀត តែថ្វាយព្រះយេហូវ៉ាឲ្យអស់ពីសមត្ថភាពរបស់យើងវិញ។ (កា. ៦:៤) ការពិនិត្យមើលខ្លួនដោយឥតលាក់លៀមនឹងជួយយើងឲ្យបន្តសរសើរព្រះយេហូវ៉ាដោយ«បង្កើតផលជាច្រើន»។—យ៉ូន. ១៥:៨