វិធីចាប់ផ្ដើមការសិក្សាព្រះគម្ពីរជាមួយអ្នកដែលបានទទួលទស្សនាវដ្ដី
១ នៅកិច្ចបម្រើផ្សាយរៀងរាល់ថ្ងៃសៅរ៍ យើងស្នើផ្ដល់ទស្សនាវដ្ដីប៉មយាម។ យ៉ាងណាក៏ដោយ នេះជាជំហានទីមួយដើម្បីបំពេញគោលដៅរបស់យើង ក្នុងការបង្រៀនសេចក្ដីពិតដល់អស់អ្នកដែលមានចិត្តស្មោះ។ នៅខាងក្រោមនេះមានយោបល់ខ្លះៗពីរបៀបដែលអាចជូនសៀវភៅព្រះគម្ពីរបង្រៀន ពេលធ្វើការត្រឡប់ទៅជួប ហើយរបៀបចាប់ផ្ដើមការសិក្សាព្រះគម្ពីរ។ យោបល់នេះអាចកែសម្រួលទៅតាមតំបន់ និងពាក្យរបស់អ្នកផ្ទាល់។ បើវិធីឯទៀតមានប្រសិទ្ធភាពសម្រាប់អ្នក សូមប្រើវិធីនោះ។
២ ចូរប្រើសេចក្ដីផ្ដើមពីសៀវភៅព្រះគម្ពីរបង្រៀន : ពេលអ្នកត្រឡប់ទៅជួប អ្នកអាចនិយាយថា «ទស្សនាវដ្ដីដែលខ្ញុំបានជូនឲ្យនោះ លើកបញ្ជាក់អំពីព្រះគម្ពីរ។ សូមកត់សម្គាល់មូលហេតុដែលការអានព្រះគម្ពីរគឺសំខាន់ម្ល៉េះ»។ សូមអាន អេសាយ ៤៨:១៧, ១៨; យ៉ូហាន ១៧:៣ ឬបទគម្ពីរឯទៀតដែលទាក់ទងនឹងចំណុចនោះ។ បន្ទាប់ពីបង្ហាញនិងជូនម្ចាស់ផ្ទះសៀវភៅព្រះគម្ពីរបង្រៀនមួយក្បាល អ្នកអាចបន្តការពិភាក្សាដូចតទៅ :
◼ «ព្រះគម្ពីរផ្ដល់ឲ្យយើងមានសេចក្ដីសង្ឃឹមពិតចំពោះអនាគត»។ សូមបង្ហាញម្ចាស់ផ្ទះទំព័រ៤-៥ ហើយសួរគាត់ថា៖ «ក្នុងចំណោមសេចក្ដីសន្យាទាំងនេះ តើលោកអ្នកចង់ឃើញសេចក្ដីសន្យាមួយណាបានសម្រេច?»។ រួចបង្ហាញម្ចាស់ផ្ទះជំពូកដែលពន្យល់អំពីសេចក្ដីសន្យាដែលគាត់បានជ្រើសរើស ហើយប្រសិនបើគាត់អនុញ្ញាត សូមពិភាក្សាយ៉ាងខ្លី មួយឬពីរវគ្គពីជំពូកនោះ។
◼ ឬក៏អ្នកអាចនិយាយថា «ព្រះគម្ពីរឆ្លើយសំណួរដ៏សំខាន់បំផុតនៃជីវិត»។ បង្ហាញម្ចាស់ផ្ទះទំព័រ៦ ហើយសួរបើសិនជាគាត់ធ្លាប់ឆ្ងល់អំពីសំណួរណាមួយនៅខាងក្រោមទំព័រនោះ។ រួចបើកទៅជំពូកដែលឆ្លើយនឹងសំណួរនោះ ហើយពិភាក្សាជាមួយគាត់មួយឬពីរវគ្គ។
◼ ឬក៏អ្នកអាចចង្អុលប្រាប់ចំណងជើងខ្លះៗពីទំព័រមាតិកា ហើយសួរគាត់ប្រធានមួយណាដែលគាត់ចាប់អារម្មណ៍។ រួចមកបើកទៅជំពូកនោះ ហើយបង្ហាញរបៀបសិក្សាព្រះគម្ពីរយ៉ាងខ្លី។
៣ ចូរទុកសំណួរមួយពេលជួបម្ចាស់ផ្ទះលើកដំបូង : វិធីមួយទៀតពេលជួបម្ចាស់ផ្ទះជាលើកដំបូង គឺឲ្យយើងរៀបចំមូលដ្ឋានដើម្បីត្រឡប់ទៅជួបគាត់។ ពេលគាត់ទទួលទស្សនាវដ្ដី សូមលើកសំណួរមួយនិងសន្យាត្រឡប់មកវិញដើម្បីឆ្លើយសំណួរនោះ។ ចូរព្យាយាមណាត់ពេលឲ្យបានច្បាស់លាស់ដើម្បីត្រឡប់ទៅជួប ហើយធ្វើតាមពាក្យសន្យា។ (ម៉ាថ. ៥:៣៧) ពេលអ្នកត្រឡប់ទៅវិញ សូមរំលឹកម្ចាស់ផ្ទះអំពីសំណួរនោះ និងអានហើយពិភាក្សាពីចម្លើយយ៉ាងខ្លីក្នុងសៀវភៅព្រះគម្ពីរបង្រៀន។ ជូនឲ្យគាត់សៀវភៅនេះមួយក្បាលដើម្បីគាត់អាចផ្ទៀងអានតាម។ ចំពោះវិធីនេះមានគំរូខ្លះដូចតទៅ :
◼ ប្រសិនបើអ្នកបានចែកទស្សនាវដ្ដីដែលទាក់ទងពីស្ថានភាពពិភពលោកដែលកាន់តែអាក្រក់ទៅៗ អ្នកអាចនិយាយថា «លើកក្រោយយើងអាចពិភាក្សាចម្លើយពីព្រះគម្ពីរចំពោះសំណួរមួយនេះ តើព្រះនឹងផ្លាស់ប្រែអ្វីខ្លះនៅលើផែនដី?»។ អ្នកអាចប្រើទំព័រ៤-៥ពេលត្រឡប់ទៅវិញ។ ឬក៏អ្នកអាចលើកសំណួរថា «តើរឿងខ្លោចផ្សាដែលបានកើតឡើងជាបំណងចិត្តរបស់ព្រះទេ?»។ ពេលអ្នកត្រឡប់ទៅវិញ សូមបង្ហាញម្ចាស់ផ្ទះវគ្គ៧៨នៅជំពូកទី១។
◼ ប្រសិនបើអ្នកបានចែកទស្សនាវដ្ដីដែលទាក់ទងពីក្រុមគ្រួសារ មុននឹងលាម្ចាស់ផ្ទះ អ្នកអាចលើកសំណួរនេះថា «តើសមាជិកគ្រួសារម្នាក់ៗអាចធ្វើអ្វីដើម្បីឲ្យជីវភាពគ្រួសារកាន់តែមានសុភមង្គល?»។ ពេលត្រឡប់ទៅវិញ អ្នកអាចពិភាក្សាវគ្គ៤នៅជំពូកទី១៤។
◼ ប្រសិនបើអ្នកបានចែកទស្សនាវដ្ដីដែលទាក់ទងពីការទុកចិត្តលើព្រះគម្ពីរ អ្នកអាចទុកសំណួរមួយនេះដើម្បីពិភាក្សាលើកក្រោយគឺ «តើព្រះគម្ពីរមានភាពត្រឹមត្រូវខាងរឿងវិទ្យាសាស្ត្រទេ?»។ ពេលត្រឡប់ទៅវិញ សូមពិភាក្សាវគ្គ៨នៅជំពូកទី២។
៤ នៅពេលបញ្ចប់ការពិភាក្សានីមួយៗ ចូរលើកសំណួរមួយទៀតដើម្បីឆ្លើយពេលមកវិញ។ កាលណាមានការសិក្សាទៀងទាត់ ចូរសិក្សាសៀវភៅពីទំព័រទី១រហូតដល់ទំព័រចុងក្រោយ។ ចុះយ៉ាងណាប្រសិនបើម្ចាស់ផ្ទះមិនព្រមទទួលសៀវភៅព្រះគម្ពីរបង្រៀន? អ្នកនៅតែអាចបន្តជូនទស្សនាវដ្ដីនិងពិភាក្សាអំពីព្រះគម្ពីរជាមួយគាត់។ នៅពេលដែលអ្នកបណ្ដុះចំណាប់អារម្មណ៍របស់គាត់ មិនយូរមិនឆាប់គាត់ប្រហែលព្រមសិក្សាព្រះគម្ពីរ។
៥ ទស្សនាវដ្ដីប៉មយាមអាចលើកទឹកចិត្តឲ្យបុគ្គលម្នាក់មានចិត្តចង់រៀនអំពីអ្វីដែលព្រះគម្ពីរពិតជាបង្រៀន។ ដូច្នេះ ចូរព្យាយាមចាប់ផ្ដើមការសិក្សាព្រះគម្ពីរជាមួយអស់អ្នកដែលទទួលទស្សនាវដ្ដី។ ដោយធ្វើដូចនេះ យើងនឹងស្ដាប់តាមបង្គាប់របស់ព្រះយេស៊ូ ដែលណែនាំឲ្យយើងទៅ«បញ្ចុះបញ្ចូលឲ្យមានសិស្ស . . . ហើយបង្រៀន»គេ។— ម៉ាថ. ២៨:១៩, ២០
[សំណួរសម្រាប់អត្ថបទសិក្សា]
១. តើយើងមានគោលដៅអ្វីពេលស្នើផ្ដល់ទស្សនាវដ្ដីប៉មយាម?
២. តើយើងអាចប្រើសេចក្ដីផ្ដើមពីសៀវភៅព្រះគម្ពីរបង្រៀនដើម្បីចាប់ផ្ដើមការសិក្សាព្រះគម្ពីរយ៉ាងដូចម្ដេច?
៣. តើតាមរបៀបណាយើងអាចចាប់ផ្ដើមការសិក្សាព្រះគម្ពីរបន្ទាប់ពីពេលចែកទស្សនាវដ្ដីដែលទាក់ទងពី (ក) ស្ថានភាពពិភពលោកដែលកាន់តែអាក្រក់ទៅៗ? (ខ) ក្រុមគ្រួសារ? (គ) ការទុកចិត្តលើព្រះគម្ពីរ?
៤. តើយើងគួរធ្វើយ៉ាងណាប្រសិនបើម្ចាស់ផ្ទះមិនព្រមទទួលសៀវភៅព្រះគម្ពីរបង្រៀន?
៥. ហេតុអ្វីយើងគួរព្យាយាមធ្វើច្រើនជាងមិនគ្រាន់តែចែកទស្សនាវដ្ដីប៉ុណ្ណោះ?