ទស្សនាវដ្ដីរបស់យើងគឺមានប្រយោជន៍ក្នុងការរកសិស្សគម្ពីរថ្មី
១. ជាយូរមកហើយ ហេតុអ្វីអង្គការរបស់ព្រះយេហូវ៉ាលើកទឹកចិត្តអ្នកផ្សាយឲ្យបន្តជូនទស្សនាវដ្ដីដល់អ្នកដែលចូលចិត្តអាន?
១ មនុស្សជាច្រើនមិនចង់រៀនគម្ពីរជាមួយយើងទេ តែចូលចិត្តអានទស្សនាវដ្ដីរបស់យើង។ ជាយូរមកហើយ អង្គការរបស់ព្រះយេហូវ៉ាលើកទឹកចិត្តអ្នកផ្សាយឲ្យបន្តជូនទស្សនាវដ្ដីលេខថ្មីបំផុតដល់មនុស្សបែបនោះ។ ពេលមនុស្សបែបនោះអានទស្សនាវដ្ដីរបស់យើងយ៉ាងទៀងទាត់ ពួកគេច្រើនតែបណ្ដុះឲ្យមានការស្រេកឃ្លានចង់បានបណ្ដាំរបស់ព្រះ។ (១ពេ. ២:២) ទីបំផុត អ្វីមួយដែលពួកគេអានអាចទាក់ទាញចិត្តពួកគេឲ្យយល់ព្រមសិក្សាគម្ពីរ។
២. តើតាមរបៀបណាយើងអាចបណ្ដុះចំណាប់អារម្មណ៍របស់អ្នកដែលអានទស្សនាវដ្ដីរបស់យើងជាទៀងទាត់?
២ ចូរ«ស្រោច»គ្រាប់ពូជនៃសេចក្ដីពិត: ជាជាងជូនទស្សនាវដ្ដីដល់ម្ចាស់ផ្ទះ រួចចេញភ្លាម សូមព្យាយាមនិយាយជាមួយគាត់ ហើយខំស្គាល់គ្នាថែមទៀត។ ធ្វើដូចនេះនឹងជួយអ្នកឲ្យស្គាល់កាលៈទេសៈ ចំណាប់អារម្មណ៍ និងជំនឿរបស់គាត់ ដែលអាចឲ្យអ្នកនិយាយដោយមានការយល់ដឹង។ (សុភ. ១៦:២៣) សូមរៀបចំសម្រាប់ការត្រឡប់ទៅជួបនីមួយៗ។ បើអាចធ្វើបាន សូមលើកចំណុចមួយយ៉ាងខ្លី និងបទគម្ពីរមួយពីទស្សនាវដ្ដី ដែលប្រៀបដូចជាការស្រោចគ្រាប់ពូជនៃសេចក្ដីពិតណាមួយឲ្យដុះក្នុងចិត្តរបស់គាត់។ (១កូ. ៣:៦) សូមកត់ទុកថ្ងៃខែនៃការត្រឡប់ជួបនីមួយៗ សៀវភៅដែលបានទុកឲ្យម្ចាស់ផ្ទះ និងប្រធានបទព្រមទាំងបទគម្ពីរដែលបានពិភាក្សា។
៣. ចំពោះអ្នកដែលទទួលទស្សនាវដ្ដីរបស់យើងជាទៀងទាត់ តើយើងគួរត្រឡប់ទៅជួបគាត់ញឹកញាប់យ៉ាងណា?
៣ រាល់លើកដែលយើងមានទស្សនាវដ្ដីចេញថ្មី អ្នកគួរត្រឡប់ទៅជួបម្ចាស់ផ្ទះ។ ក៏ប៉ុន្តែ អាស្រ័យទៅលើចំណាប់អារម្មណ៍របស់បុគ្គលម្នាក់ៗ អ្នកអាចសម្រេចចិត្តទៅជួបគាត់ញឹកញាប់ឬយ៉ាងណា។ ជាឧទាហរណ៍ មួយឬពីរសប្ដាហ៍ក្រោយពីបានជូនទស្សនាវដ្ដីហើយ យើងអាចត្រឡប់ទៅជួបគាត់ ហើយនិយាយថា៖ «ខ្ញុំមកជួបមួយភ្លែតដើម្បីបង្ហាញចំណុចមួយពីទស្សនាវដ្ដី»។ ការធ្វើដូចនេះនឹងនាំឲ្យគាត់ចង់អានអត្ថបទណាមួយក្នុងទស្សនាវដ្ដីនោះ។ បើគាត់បានអានហើយ យើងអាចសួរគាត់ថា តើអ្នកគិតយ៉ាងណាអំពីអត្ថបទនោះ? រួចមកពិគ្រោះយ៉ាងខ្លីអំពីអត្ថបទនោះ។ បើបុគ្គលណាម្នាក់ចូលចិត្តអានសៀវភៅរបស់យើង អ្នកអាចត្រឡប់ទៅជួប ហើយបង្ហាញគាត់នូវខិត្តប័ណ្ណ សៀវភៅស្តើង ឬសៀវភៅដែលយើងកំពុងស្នើផ្ដល់ក្នុងខែនោះ។
៤. ម្ដងម្កាល តើយើងអាចធ្វើអ្វីដើម្បីដឹងថាម្ចាស់ផ្ទះដែលទទួលទស្សនាវដ្ដីជាទៀងទាត់ ប្រហែលព្រមរៀនគម្ពីរជាមួយយើង?
៤ កុំចាំរហូតដល់ម្ចាស់ផ្ទះសុំអ្នកឲ្យបង្រៀនគម្ពីរគាត់។ សូមសួរគាត់ជាមុន។ ទោះជានៅពេលមុន គាត់បដិសេធមិនព្រមសិក្សាគម្ពីរក្ដី ម្ដងម្កាលអ្នកអាចបង្ហាញអត្ថបទក្នុងទស្សនាវដ្ដីប៉មយាម ដែលមានចំណងជើង«សំណួរនិងចម្លើយពីគម្ពីរ» ហើយមើលថាគាត់ព្រមពិភាក្សាអំពីអត្ថបទនោះជាមួយអ្នកឬទេ។ ប្រហែលអ្នកអាចចាប់ផ្ដើមបង្រៀនគម្ពីរនៅមាត់ទ្វារផ្ទះ។ ទោះជាយ៉ាងណាក្ដី បើអ្នកមិនអាចចាប់ផ្ដើមបង្រៀនគម្ពីរទេ អ្នកអាចបន្តជូនទស្សនាវដ្ដីដើម្បីបណ្ដុះចំណាប់របស់គាត់តទៅទៀត។